Esdra 5 - ꞌRe Ihâimana Uꞌâsi Mono Zadawa Wasuꞌu

¹ Tawamhã 'Re ihâimana u'âsi mono zadawa 'mahârâ'wa Ageu norĩ, Idoho 'ra Zacariaha me hã Zuda ãma duré Zeruzalẽ ãma zudeu norĩ 're ihâimana za'ra mono norĩ ma, Izaraéu nhihudu norĩ te, 'Re ihâimana u'âsi mono timreme te te tãma iwaihu'u zahuré zém na ma tô dama ãma rowasu'u zahuré.

² Tawamhã Salati'éhé 'ra Zorobabé, Zozadaquihi 'ra Zozuéhé me 'Re ihâimana u'âsi mono zadawa wasu'u hã ma tô wapari zahuré. Tahawa, Zeruzalẽ ãma 'Re ihâimana u'âsi mono nhorõwa 'ri na ma tô apâ ãma dasiwi sãna'rata ni. Tahawa, ma tô isadawa 'mahârâ'wa norĩ hã duré ãma dapawaptob zahuré.

³ Tawamhã taha ré, Tatena'i, Eufrati bâtâ zasizém niwĩ daza'rui wa'õtõ ãma dama i'rãnho'u hã, Seta-Bozena'i hã, duré isiré norĩ hã ma tô Zeruzalẽ u ai'aba'ré. Si'aba'réi wamhã, ma tô ãne sadanharĩ za'ra: — E 'wa ma tô 'ri hã apâ asiwi wahutu aba da hã ãma aima rowairébé za'ra wa'wa, duré 'ri uparizé mono hã apâ asiwi sõré aba mono da hã.

⁴ E niha aibâ norĩ nhisi hã 'ri na romhuri'wa hã.

⁵ Tane nherẽ, tite za'ra 'Re ihâimana u'âsi mono tõmobre, ma tô zudeu ma, i'rãnho'õmo norĩ hã tihâimana za'ra. Tahawa Persia ãma dama ipire norĩ hã ma tô marĩ te te a'â 'manharĩ za'ra tõ da, ãma sima rowairébé za'ra, apito Dariuhu ma, za taha na te te ãma iromnhihâtâ za'ra zé wa'rãmi, te te ãma sada'âbâ za'ra õ ré hã.

⁶ Tawamhã Tatena'ihi norĩ nhimiromnhihâdâ hã, Seta-Bozena'ihi me duré isiré 're ihâimana za'ra mono norĩ me, ma tô apito ma ãne na hã siwi time:

⁷ “Apito Dariu, rowẽ na si i'rãnho'õmo na hã dama 're aihâimana mono!

⁸ Ãne wa za ãma aima wasu'u za'ra ni, apito. Zuda ãma daza'rui wa'õtõ u wasi'aba'réi wamhã, wa tô dama isa'ẽne 'Re ihâimana u'âsi mono nhorõwa wasiwi 'madâ'â ni, ẽne itõmo za'ẽtẽ nhisu'u pese na da te dasiwi i'ri hã, duré wedepo ipo'o hâ za'õno hã da te dasiwi tãma isõré mono hã, 'ri na'rata 'manharĩzé ma. Romhuri hã te wẽ uptabi na dasiwi 'manharĩ ni ãma. Te duré sa'ẽtẽ romhuri hã mo.

⁹ “Tahawa, wa tô dama i'rãnho'õmo norĩ ãma sadanharĩ za'ra ni, apâ da te dasiwi i'ri wahutuzéb da hã, duré apâ 'ri na'rata 'manharĩzé da te dasiwi iwahutu da hã ni'wa te te dama ãma rowairébé zô.

¹⁰ Tawamhã danhib'ihâ'a norĩ nhisi za'ra zô, wa tô duré sadanharĩ za'ra ni, isisi za'ra hã wa te aima ui'éré za'ra wa, awaihu'u da.

¹¹ Tahawa, ma tô asa ãma wazada'âbâ za'ra ãne: ‘Wa norĩ hã, 'Re ihâimana u'âsi mono hâiwa 'manharĩ'wa ti'ai 'manharĩ'wa nhib'a'uwẽ, wa 're wahâimana za'ra. Wa norĩ hã wa oto 'Re ihâimana u'âsi mono nhorõwa 'ri hã wasiwi wahutu ni, duréi Izaraéu nhihudu norĩ nhib'apito isa'ẽne te te aré i'ri nharĩ hã.

¹² Tane nherẽ, wahi'rata norĩ hã ma tô 'Re ihâimana u'âsi mono hâiwa ãma 're isãmra mono ma hã si'rui wazere za'ra. Taha zarina, ma tô Babilonia nhib'apito Nabucodonozoho ma, te te ãma ai'uté za'ra da hã tãma hâiba za'ré za'ra, Caldéia hawi a'uwẽ ma. Tahawa 'Re ihâimana u'âsi mono nhorõwa 'ri hã ma tô dasiwi prum ni. Ma tô duré a'uwẽ wahi'rata norĩ hã Babilonia u da te dasiwi simro.

¹³ Tane nherẽ, Babilonia nhib'apito Ciruhu ãma imorĩ'rata na isi'i'rãnho'õmozém na ãma iwahub ãma, ma tô 'Re ihâimana u'âsi mono nhorõwa 'ri apâ da te dasiwi wahutu da hã tinhimiromnhihâtâ na hã dama ti'ru.

¹⁴ Tawamhã piza'a oru 'manharĩ na hã, duré ẽtẽ waipo prã prata 'manharĩ na zama hã, apito Nabucodonozo Zeruzalẽ ãma 'Re ihâimana u'âsi mono nhorõwa 'ri hawi te te isani za'ra hã, te te Babilonia ãma tite ihâiba'õ norĩ ãma 're idawata za'ra mono zé 'ri wa, te te isa'ra norĩ hã ma tô apito Ciru hã apâ sõmri za'ra, aibâ Sesbaza na isisi ma, Zuda ãma dama i'rãnho'õmo na 're hâimana mono da, te te ipisutu ma hã.

¹⁵ Tawamhã apito, Sesbazaha ma hã ma tô tãma ti'ru, apâ Zeruzalẽ ãma 'Re ihâimana u'âsi mono nhorõwa 'ri 're isa mono u hã te te ãma siri za'ra da. Tahawa, 'Re ihâimana u'âsi mono nhorõwa 'ri imorĩ'rata na isabzéb ãma tô apâ da te dasiwi i'ri da hã, ma tô duré dama ti'ru.

¹⁶ Tawamhã Sesbaza morĩ wamhã, ma tô 'Re ihâimana u'âsi mono nhorõwa 'ri na'ratazé mono hã te te ab'manharĩ. Ta hawim haré te zahadu ãhã na hã 'ri na da te ãma 're rob'ma'wamarĩ. Tane nherẽ, zahadu si'utõrĩ õ di.’

¹⁷ “Tahawa, apito, ãne hã aima wẽ wamhã, ma'ãpé dama 'mai'ru na, Babilonia ãma dahi'rata norĩ wasu'uzéb ré ibaihâi mono hã da te sabu za'ra da, apito Ciru hã sena na te te i'ruzéb zô, Zeruzalẽ ãma 'Re ihâimana u'âsi mono nhorõwa 'ri apâ da te dasiwi i'rizéb da hã. Taha parip si, te za we wama asiwasu'u za'ra, niha na ãma asima irowairébézém na hã.”