Esdra 3 - ꞌRe Ihâimana Uꞌâsi Mono Zadawa Wasuꞌu

'Re idanhoprub za'ra mono zé, apâ da te dasiwi i'manharĩzé wasu'u

¹ Tawamhã Izaraéu nhihudu norĩ, 7 a'amo oto isébrézéb ãma, 'ri nho'õmo mono wa 're hâimana za'ra mono wamhã, ma tô uburé Zeruzalẽ ãma a'uwẽ norĩ hã si'rã'õtõ.

² Tawamhã sasedoti Zozué, Zozadaquihi 'ra, isiré ihâimana za'ra norĩ hã, isiré ihâiba amo sasedoti norĩ hã, Zorobabé, Salati'éhé 'ra zama, duré isisãnawã norĩ hã ma tô Izaraéu nhihudu norĩ te, 'Re ihâimana u'âsi mono ma danhoprubzé zata nomrizéb da hã siwi 'manha, Mozési, 'Re ihâimana u'âsi mono nhib'a'uwẽ nhimiroti na rob'ui'éré zarina.

³ Tawamhã tô õ hã ti'ai 're, a'uwẽ norĩ 're isi'ubumroi mono ma, pahi za'ra nherẽ, ma tô apâ iwana 're isa mono ne hã siwi 'manha, 'Re ihâimana u'âsi mono ma, danhoprub zata nhomrizé hã. Tahawa, ma tô taha nhisiwi ãma siwi sãna'rata tinhoprubzéb hã mararé nhidâpâsi, duré hâiwahâ nhidâpâsi.

⁴ Taha nhipai u ma tô Romhâ 'manharĩ 'ri na dasima romhu'uzém nhisi na 'manharĩ za'ra ni, Mozésihi nhimiroti na rob'ui'éré zarina, te te iwa sima 're iromhu'u za'ra mono zéb da hã. Taha ré, ma tô bâtâ sidâpâsi tinhoprubzéb da, tinhimizama zada hã te te 're sõmri za'ra, tô taha bâtâ mono na sipu'u pese na ipisutu pese mono zarina.

⁵ Tawamhã bâtâ sidâpâsi danhoprubzéb da, danhimizama wahuré, da te 're izata za'ra mono norĩ zama, ma tô te te 're 'wasari, duré a'amo itém na dato isa'ẽtẽ na te te ãma sima 're irowẽ za'ra mono zéb da zama. Duré dato isa'ẽtẽ hâiba amo norĩ iwazéb zahi na te te ãma sima 're irowẽ za'ra mono zéb da zama, ma tô te te 're 'wasari. Tawamhã sima iwẽ na tite na ãma 're sõprub za'ra mono da, te te 're i'wasari mono na hã ma tô duré ãma tãma 're sõprub za'ra.

⁶ Tawamhã a'uwẽ norĩ, ma tô oto Uburé Danhib'apito ma tinhoprubzém na hã ãma sãna'rata za'ra, 7 a'amo te bâdâ isãna'rata hawi, Uburé Danhib'apito te, 'ri 'manharĩ na apâ te te ãma siwi sãna'rata õ ré.

'Ri 'manharĩ na apâ da te dasiwi ãma isãna'ratazé wasu'u

⁷ Tawamhã a'uwẽ norĩ, ẽtẽ po'o hâ su'u nomri na romhuri'wa norĩ ma hã, duré wedepo'o na romhuri'wa norĩ ma hã ma tô rob'uiprazé hã tãma sõmri za'ra. Ma tô duré Sidõ ãma ma, Tiru ãma ma a'uwẽ norĩ ma, dasa norĩ hã, marĩ wa'u norĩ te te 're i'âhuri mono da hã, duré azeitona wa'u to hã tãma sõmri za'ra. Ta norĩ na ma tô wede nhinhihã na ãma saprĩ za'ra, âporé na hã Libanu na darom nhisi hawi, Zope u hã. Ãne ma tô Persia nhib'apito Ciru te te irowairébézéb zarina siwi 'manha.

⁸ Tawamhã apâ isi'aba'rézém na maparane wahub 're maparane a'amoi ãma, ma tô Izaraéu nhihudu norĩ, 'Re ihâimana u'âsi mono nhorõwa 'ri 'manharĩ tém na hã ãma siwi sãna'rata, Zeruzalẽ ãma za 're isa mono na. Zorobabé Salati'éhé 'ra hã, Zozué Zozadaquihi 'ra hã, isisãnawã norĩ isiré za'ra hã, sasedoti norĩ hã, levita norĩ hã, duré uburé a'uwẽ norĩ Zeruzalẽ u apâ te te sina isiri za'ra norĩ hã, ma tô siptete na romhuri hã siwi ti'â. Tawamhã levita norĩ 20 na ãma iwahub za'ra nhipai u ma tô uburé dama romhuri'wa da hã pisutu za'ra ni.

⁹ Tawamhã Zozué norĩ, ti'ra norĩ me, duré tisisãnawã norĩ me ma tô dawa'õno hã siwi 'manha, Cadmi'éhé siré, duré i'ra norĩ Hodaviaha nhihudu norĩ siré. Ã norĩ dawa'õno hã ma tô 'ri na romhuri'wa na hã dama 're hâimana za'ra. Tahawa, ma tô levita norĩ hã Henadadehe te a'uwẽ wa'õno te te 're pawaptob za'ra.

¹⁰ Tawamhã 'ri'wa norĩ, 'ri nhana'rata 'manharĩ na te te oto ãma siwi sãna'rata wamhã, ma tô sasedoti norĩ hã uza hâi wẽ uptabi ré, duré tinhib'rata danhimnhihârâzé te te 're 'wasari sina hâiwi aimasa. Taha ré, ma tô duré Asafihi sipoto zarina levita norĩ hã pratu baihâ 'manharĩ ne ropta'azéb ré hã simasa, Uburé Danhib'apito ãma, wata za'ra da, Dawi Izaraéu nhihudu norĩ nhib'apito te te i'ruzéb zarina.

¹¹ Tawamhã nima norĩ, Uburé Danhib'apito ãma iwata za'ra na ma tô tinho're za'ra. Tahawa, isiré ihâiba amo hã ma tô nasi 'râwi ãma sada'âbâ za'ra, tinho're na tô õhõ danho're na. Ãne te nasi ãma sisada'âbâ za'ra: “Uburé Danhib'apito hã wẽ uptabi di. Duré isimizawizé Izaraéu nhihudu norĩ ãma hã te õne u'â 're hâimana u'âsi!” Tawamhã uburé a'uwẽ norĩ hã te mreme 'rãihâ sina Uburé Danhib'apito ãma hã tinho're na, nasi ãma tiwata za'ra, 'ri 'manharĩ na apâ te te oto ãma siwi sãna'rata wẽ te.

¹² Tawamhã ahâ uptabi na sasedoti si'ihi norĩ hã, levita si'ihi norĩ hã, duré a'uwẽ wa'õtõ nhib'ihâ'a si'ihi norĩ hã ma tô duréihã imorĩ'rata na aré 'ri 're isa mono hã te te 're 'madâ'â za'ra. Ãhã wa, ta norĩ hã ma tô wawa 'rãihâ na ti'ru'ru, 'ri tém nhana'ratazé apâ da te dasiwi sa'ra ré, te te 'madâ'â za'ra wa. Tane nherẽ, isiré norĩ isimasa hã ma tô rowẽ te, sa'ẽtẽ nasi hã, hârâ 'rãihâ na.

¹³ Ãne wa, nima hã robruru'uzé ni'wa hã te te wapari waihu'u õ di, sina sito wa, dazadarizé, da'ru'ru me. Sa'ẽtẽ uptabi da te dasima iromhu'u za'ra zé robruru hã da te dasima 'manharĩ za'ra wa, ma tô romhâ hawim nherẽ wapari za'ra ni, robruru hã.