Esdra 1 - ꞌRe Ihâimana Uꞌâsi Mono Zadawa Wasuꞌu

Ciruhu nhimirotizé wasu'u

¹ Tawamhã Persia te apito, Ciru dama isi'i'rãnho'õmozém na misi imorĩ'rata na ãma iwahub ãma, ma tô Uburé Danhib'apito, isadawa 'mahârâ'wa Zeremiaha nhimirowasu'u zarina timreme hã ãma uwaimra oto. Tawamhã Uburé Danhib'apito ma tô apito Ciru hã 'rãi pi'ra. Tahawa, ma tô dama ti'ru, daro mono bâ tinhimi'madâ'âzéb 'remhã isimiroti na, da te ãma dasima ropéi mono da, rob'ui'éré na duré da'ahâ nho'a da te dasima 're isõré za'ra mono zéb da hã, ãne isimiroti na:

² “Wa hã Ciru, Persia nhib'apito, wa aima nharĩ za'ra wa'wa ãne: Uburé Danhib'apito, 'Re ihâimana u'âsi mono hâiwa ãma 're isãmra mono hã ma tô ti'ai ãma uburé te 're ida'ab'madâ'â mono da hã danhib'ihâ'a na 're ĩhâimana mono zé hã ĩma tisõ. Ma tô duré ĩpisutu, Zeruzalẽ ãma iwa 're idawata za'ra mono zé 'ri hã te tãma sãrĩ da, Zuda na romnhisi ãma.

³ 'Re ihâimana u'âsi mono, asiré 're hâimana za'ra wa'aba mono da si ĩma iwẽ hã, tinhib'a'uwẽ siré. Tahawa, ma'ãpé Zeruzalẽ u ai'aba'réi wa'aba, Uburé Danhib'apito, Izaraéu nhihudu norĩ te 'Re ihâimana u'âsi mono nhorõwa asiwi 'ri wahutu aba da, iwa ãma 're idawata za'ra mono zéb da hã, Zeruzalẽ 're, 're isãmra mono ãma.

⁴ Tawamhã iwaptoma 're isi'ubumroi mono, te za Izaraéu nhihudu norĩ pawaptob za'ra, apâ tirob u si'aba'ré da. Tawamhã ẽtẽ waipo prã prata, ẽtẽ waipo pré oru, mra hã, duré danhimizama te za ta norĩ hã tãma sõmri za'ra. Duré danhoprubzéb da zama te za tãma sõmri za'ra, Zeruzalẽ ãma 'Re ihâimana u'âsi mono nhorõwa 're, te te tãma isõmri za'ra da hã.”

Izaraéu nhihudu norĩ, Zeruzalẽ u apâ isi'aba'rézé wasu'u

⁵ Tawamhã Zudaha nhihudu norĩ te, duré Bẽzamihĩ nhihudu norĩ te, dawa'õtõ nhib'ihâ'a norĩ hã, sasedoti norĩ hã, levita norĩ hã, duré uburé a'uwẽ ma 'Re ihâimana u'âsi mono ipẽ'ẽ to, te te tãma isõmri za'ra norĩ hã ma tô oto sima rob'ubumro za'ra, Zeruzalẽ u si'aba'ré da, tame Uburé Danhib'apito nhorõwa 'ri, apâ te te siwi 'ri da.

⁶ Tawamhã a'uwẽ iwaptoma 're ihâimana za'ra mono norĩ, te te uburé ipawaptob za'ra norĩ hã ma tô nasi tãma sõmri za'ra, prata na piza hã, oru na hã, dasa hã, danhimizama hã, duré marĩ iwa'âbâ za'ẽtẽ norĩ hã. Duré 're idanhoprub za'ra mono zéb zama ma tô tãma sõmri za'ra, Zeruzalẽ ãma 'Re ihâimana u'âsi mono nhorõwa za te te siwi i'ri norĩ ma.

⁷ Tawamhã Nabucodonozo marĩ nhemezé piza'a norĩ, hâsizém norĩ me, Zeruzalẽ ãma Uburé Danhib'apito nhorõwa hawi te te isani za'ra, tite ihâiba'õ norĩ ãma 're idawata za'ra mono zéb u te te i'ãwisi za'ra hã ma tô duré apito Ciru hã apâ sõmri za'ra.

⁸ Rob'uiprazé 'madâ'â'wa Mitredatehe ma, ma tô marĩ mono hã tãma sõmri za'ra. Taha pari ma ta hã iwamri za'ratazé mono na ãma romnhihâtâ. Tahawa, ma tô Sesbaza, Zuda ãma dama i'rãnho'õmo ma hã uburé tãma sõmri za'ra.

^9-10 Ãhãta ãne marĩ za'rata na ãma irob'ui'éré za'ra hã: piza'a nho'a 'reptõ oru na hã 30 na, piza'a nho'a 'reptõ prata na i'manharĩ hã miu na, piza'a nho'a 'reptõ ihâiba amo norĩ hã 29 na, piza'a nho'a 'reptõ ẽtẽ waipo pré oru na i'manharĩ hã 30 na, piza'a nho'a 'reptõ iwa'âbâ surure i'manharĩ hã 410 na, duré marĩ ihâiba amo norĩ hã miu na.

¹¹ Tawamhã oru na duré prata na marĩ mono hã ma tô uburé simisutu hã watobro, 5.400 na. Ta hã Sesbaza, Zeruzalẽ u ma tô uburé apâ tidu, Izaraéu nhihudu norĩ Babilonia hawi apâ isi'aba'ré norĩ siré.