Éfézu 2 - ꞌRe Ihâimana Uꞌâsi Mono Zadawa Wasuꞌu

Dapẽ'ẽ 're dadâ'â u'âsi 're idanomro mono zém hawi, danho'reptuzé wasu'u

¹ Duréihã a norĩ wa'wa hã aipẽ'ẽ 're, 're atâ'â za'ra wa'aba mono na, te aré tô 're anomro aba mo, 'Re ihâimana u'âsi mono nhimiroti na 're anomro aba mono õ wa, duré aiwasédé hã 're 'manharĩ za'ra wa'aba mono wab zama.

² Isazei'õ'wai hâimanazém na ma tô aré 're aihâimana za'ra wa'aba mo, wa'uburé norĩ nhib'apito nhimiroti na zama. Hâiwa nho're ãma te ta norĩ hã 're hâimana za'ra. Isimiroti hã tãma pire za'ra di, ipo're'õ norĩ ma hã. Tahawa, te ta norĩ hã isimiroti na si 're nomro, 'Re ihâimana u'âsi mono wapari'õ'wa norĩ hã.

³ Tane wa norĩ hã, wa aré tô wanhimirosa'rata wasété zarina 're wanomro. Wa te wasima 're iwẽ za'ra mono zéb zarina, wa tô aré wa te wasima ãma 're uwaimrami za'ra. Ãne 're wahâimana wasété za'ra mono wa, te aré tô duré dazu wahâ za'ra, 'Re ihâimana u'âsi mono hã.

^4-5 Tane nherẽ, wawasété na 're wanomro mono wa, 're iwadâ'â za'ra mono ne, 're wahâimana za'ra mono nherẽ, ma tô Cristu te te ihâiwa'utuzém ne wapẽ'ẽ 're te te 're wa'ahâiwa'utu, rowẽ na si oto ãma 're wanomro mono da. Ãne ma tô wama ãma uwaimrami wẽ za'ra 'Re ihâimana u'âsi mono hã, ipẽ'ẽzézé hã sa'ẽtẽ na tãma 're hâimana mono wa, duré tãma wazawi uptabi za'ra wa. Tahawa, te te 're iwa'anho'reptui mono zé wa'rãmi, marĩ zô 're simipari mono ãna, ma tô, tô te te 're wa'anho'reptu.

⁶ Ta hã Cristu ab're hawi te te ihâiwa'utu ne, ma tô wapẽ'ẽ 're te te 're wa'ahâiwa'utu, hâiwa ãma 're wasi'ubumroi u'âsi mono da, Cristu Zezusihi 'rata.

⁷ E marĩ da. Da te waihu'u za'ra da, wa'uirĩ na 're idahâimana za'ra mono norĩ hã, isimizawizé sa'ẽtẽ na tãma 're ihâimana mono na hã. Ãne te za da te 're waihu'u za'ra, Cristu Zezusi te te 're ida'azawi pese mono zém na.

⁸ 'Re ihâimana u'âsi mono te te 're asawi pese za'ra wa'aba mono zéb zarina, ma tô asõ'reptu za'ra wa'wa, Wa'anho'reptui'wa hã asina 're i'umnhasi za'ra wa'aba mono zéb zarina. Asi'uihâ na 're asisõ'reptui waihu'u za'ra wa'aba mono õ di. Sõpru wa, ma tô Wamama hã aima ãma uwaimrami za'ra wa'wa, asõ'reptu za'ra wa'aba zém na hã.

⁹ Marĩ hã ahâ na 're 'manharĩ wẽ za'ra wa'aba mono nherẽ, taha zarina te te 're asõ'reptu za'ra wa'aba mono õ di za 'Re ihâimana u'âsi mono hã, 'râwi asi'ãma wa'aba 're ai'maiwata aba mono tõ da, asi'uihâ na asi'manho'reptui wa'aba mono dai õ wa.

¹⁰ Cristu Zezusihi ãma 're wanomro mono wa, ma tô 'Re ihâimana u'âsi mono hã wama sõmri za'ra wahâimanazé ité hã, wa te ãma dama 're rob'manharĩ wẽ za'ra mono da, duré iwẽ na wa te 're dapawaptob za'ra mono da ãma, te te wa'ãma iroti siromo zéb zarina.

Zudeu norĩ, zudeu'õ norĩ me aihĩni Cristuhu ãma oto 're inomro mono zé wasu'u

^11-12 A norĩ wa'wa hã ma tô zudeu'õ na 're aipoto za'ra wa'aba mo. Tahawa, ma tô asihâiwata nhihâri aba õ na te te 're asisi za'ra wa'wa, zudeu norĩ hã. Ta norĩ si ma tô tinhihâiwata nhihâri ré na 're sisisi za'ra, tihâiba na te te sima 're i'manharĩ za'ra mono zéb zarina. Ma'ãpé rosa'rata za'ra wa'aba, 're aihâimana 'rata za'ra wa'aba mono zém na. Cristu hã Danho'reptui'wa na waihu'u za'ra wa'aba õ wa, ãma 're anomro aba mono õ di aré. A norĩ wa'wa hã zudeu'õ wa, Izaraéu nhihudu norĩ siré duré 're anomro aba mono õ di. Tahawa, 'Re ihâimana u'âsi mono hã tinhib'a'uwẽ norĩ ma si, iwẽ na te te iropisutuzém na 're waihu'u za'ra wa'aba mono ãna, ma tô aré 're aihâimana za'ra wa'aba mo. Ãne wa, rowẽ uptabi zô 're asimipari za'ra wa'aba mono ãna, ma tô 're anomro aba mo. Duré 'Re ihâimana u'âsi mono hâimanazém na sena na waihu'u za'ra wa'aba ãna, ma tô aré duré 're anomro aba mo.

¹³ Tane nherẽ, dasisiti 're idahâimana za'ra mono ne, 'Re ihâimana u'âsi mono nhiti, romhâ na 're aihâimana za'ra wa'aba mono õ di oto, asimirosa'rata aba na. Cristu hã wazada idâ'âzéb zarina, ma tô Wamama hã sitẽme ai'ãwisi za'ra wa'wa, Cristu Zezusihi ãma oto 're anomro aba mono da, 'râwi i'rata 're aihâimana za'ra wa'aba mono da oto, asimirosa'rata aba na hã.

¹⁴ Cristu hã ma tô wawi uprosi za'ra, 're iwasi'ruiwapari za'ra mono zé hã. Tahawa, aihĩni wa oto isib'a'uwẽ 're wahâimana za'ra, zudeu norĩ hã, zudeu'õ norĩ me. 'Re wasisawi pese za'ra mono sina, wa oto tô duré 're wanomro.

¹⁵ 'Re ihâimana u'âsi mono nhimiroti 'rata na rob'ui'éré hã sa'ẽtẽ na ma tô zudeu norĩ ma si 're hâimana za'ra, marĩ hã te te tãma ãma 're i'uwaimrami za'ra mono zéb da hã, taha zarina iwasédé hã te te tãma 're i'apari mono zéb da hã duré. Cristu hã wazada idâ'âzéb zarina, tâibâ oto 'Re ihâimana u'âsi mono nhimiroti 'rada hã, marĩ na dawasédé hã te te dama 're i'apari mono zéb da hã. Misi dahâiba ne, aiwapsi wa oto 're wahâimana za'ra, zudeu norĩ, zudeu'õ norĩ me, wahâimanazép tém na si, iwẽ na si ãma 're wanomro mono da, duré wasisawi pese sina oto 're wahâimana za'ra mono da wasiré.

¹⁶ Cristu hã wedepo'o nhonhi'rãmi na wazada idâ'âzém na ma tô wawi uprosi za'ra, 're iwasi'ruiwapari za'ra mono zé hã, aihĩni tizazei'wa norĩ hã te te 're wa'anhimroi mono da si oto, 'Re ihâimana u'âsi mono u.

¹⁷ Cristu hã ti'ai u wei morĩ wa, ma tô rowasu'uwẽ na te te 're da'apo're pu'u, rowẽ na 're idahâimana za'ra mono zém na hã, 'Re ihâimana u'âsi mono oto te te 're ida'awẽsãmri mono zéb zarina. E marĩ da. Zudeu'õ norĩ hã rowẽ na ãma 're aihâimana za'ra wa'aba mono da, 'Re ihâimana u'âsi mono nhimiroti ré, 're anomro aba mono õ norĩ hã, duré zudeu norĩ, rowẽ na ãma 're wahâimana za'ra mono da, 'Re ihâimana u'âsi mono nhimiroti ré, 're iwanomro mono norĩ hã.

¹⁸ Cristu hã wazada dâ'â wa, duré wama 're hâimana za'ra mono wa, te za oto Ipẽ'ẽzani hã simisutu te te 're wa'apawapto, Wamama u 're iwasihutu mono zéb da hã wanhimirosa'rata na. Tawamhã tãma 're wamreme zusi mono wamhã, te za te te 're wa'awapari u'âsi, zudeu norĩ hã, zudeu'õ norĩ me.

¹⁹ Tahawa, zudeu'õ nherẽ, dasiré'õ ne 're aihâimana za'ra wa'aba mono õ di oto. 'Re ihâimana u'âsi mono nhib'a'uwẽ te oto dame 're aihâimana za'ra wa'aba mo. Te duré i'ra na dame 're aihâimana za'ra wa'aba mo oto.

²⁰ Ẽtẽ 'manharĩ na wa za 'ri na ai'ãma simiré'é za'ra wa'wa. Ẽtẽ na'rata nhisiwi, da te dasiwi 're i'ri za'ra mono ne, ma tô Cristuhu wasu'uwẽ na te te 're aipawaptom na'rata za'ra wa'wa, isadawa wasu'u'wa norĩ hã. Duré Wamama pẽ'ẽzani, marĩ hã te te tãma iwaihu'u za'ra zéb zarina, duréihã 'Re ihâimana u'âsi mono te te dama 're isadawa wasu'u za'ra mono norĩ zama ma tô te te 're aipawaptob za'ra wa'wa. 'Ri uparizéb da, 'ri na'rata wẽ'ẽzéb ãma, ẽtẽ tõmo hâpâ wawẽ na, wa za Zezu Cristuhu ãma simiré'é, wapawapto uptabi 'wa wama 're hâimana za'ra mono wa, ta hã.

²¹ Ẽne hã misi 'ri na simisutu 're isimi'wara mono ne, te za te te 're wa'apawapto Cristu hã, wa'ãma 're isõrõwa za'ra mono da hã, aiwapsi ãma 're wahâimana za'ra mono da.

²² Tane a norĩ wa'wa hã, ẽtẽ ahâ na 'ri misi da, da te dasiwi i'ri ne, te za te te aima 're nharĩ u'âsi za'ra wa'wa, simisutu Wanhib'apito ãma 're aihâimana za'ra wa'aba mono da, isõrõwa misi tãma 're aihâimana za'ra wa'aba mono da oto, 'Re ihâimana u'âsi mono ma, Ipẽ'ẽzani hã aipẽ'ẽ za'ra wa'aba 're, 're ihâimana mono zéb zarina.