Daniéu 8 - ꞌRe Ihâimana Uꞌâsi Mono Zadawa Wasuꞌu

Daniéu, pone'ẽrebâ zéré mapure si'aibâ, duré pone'ẽrebâ zéré uzé si'aibâ me, te te i'madâ'â zahuré zé wasu'u

¹ Dama i'rã nho'õmo na si'ubdatõ na Béusaza ãma iwahub ãma, wa hã Daniéu wa tô duré aimawi hã ĩnhotõ 'rowim ne marĩ hã ab'madâ.

² Te irosawẽrẽ 'remhã, Ulai na pa nhisi zaihâ 'rata, wa za, Susã na 'ri nho'õmo nhisi 'wawi wa'ra 'rãihâ 're, Elã na daza'rui wa'õtõ nhisi 're ihâimana mono ãma.

³ Ĩ'rãiwahutu wa, te oto rob'madâ'â wamhã, wa tô pone'ẽrebâ zéré mapure si'aibâ hã 'madâ, maparane i'õmo pa hã. Misi daza'u i'õmo watobro hã, i'õmo pa uptabi.

⁴ Pone'ẽrebâ zéré mapure si'aibâ, te ti'õmo ré nasi ti'rã wabzu, bâtâ zasizém niwĩ, duré hâiwa nhimire niwĩ, duré hâiwa nhimi'e niwĩ. Tahawa, nimahã abaze hã sada 'maihâimana waihu'u õ di. Duré tiwi 'masimani waihu'u õ di. Ta hã te te sima iwẽzéb zarina te marĩ hã ab'manha. Tahawa, te isiptetezé hã tãma te te sina hâimo.

⁵ Ãne na te ãma rosa'rata ré, te pone'ẽrebâ zéré uzé si'aibâ bâtâ zasizém hawimhã wei mo. Sa'ẽtẽ we wara wamhã, tipara na ti'a hã te te upi õ di. Taha u hã misi isa'ẽtẽ uptabi, isimirob'madâ'âzé wa'wa i'uihâ nho'õmo isa hã.

⁶ Ta hã ma tô we wara, pone'ẽrebâ zéré mapure si'aibâ nho'õmoi baba, pa 'rata isa, te i'madâ'â u. Tawamhã ma tô siptete uptabi na hã rési.

⁷ Wa tô duré 'madâ, pone'ẽrebâ zéré uzé si'aibâ sahi sina, pone'ẽrebâ zéré mapure si'aibâ te te rési wa, maparane i'u te te tiwi iwẽ'ẽ zahuré hã. Tahawa, pone'ẽrebâ zéré mapure si'aibâ nhiptetezé hã tãma hâimana õ di, si'wawi isimapazéb da hã. Tahawa, pone'ẽrebâ zéré uzé hã ma tô pone'ẽrebâ zéré mapure ti'ai u time aiwétési. Ma tô tipara na wati'i. Tawamhã ni'wa hã pone'ẽrebâ zéré mapure te te sõ'reptui waihu'u õ di, pone'ẽrebâ zéré uzé zahi wi hã.

⁸ Tahawa pone'ẽrebâ zéré uzé nhiptetezé hã te we te te sina hâimo u'âsi. Tane nherẽ, isiptetezé bâ oto iwa tãma hâimana wamhã, ma tô i'u hã tiwi wẽ'ẽ ni. Taha zabzém nho'wa're're, ma tô maparane si'uiwa na i'õmo pa hã tãma tipoto za'ra. Misi ma tô hâiwa nhimi'e nho'õmoi baba ãma si'réi mono, duré misi hâiwa nhimire nho'õmoi baba, duré misi bâtâ pusizém nho'õmoi baba. Duré misi bâtâ zasizém nho'õmoi baba ma tô duré ti'õmo pa.

⁹ Tawamhã taha misi i'õmo pa na ma tô i'upsuru hã 'maipodo. Ta hã õmo si'réi mono wamhã, ma tô siptete na hã õmo si'réi mono, hâiwa nhimire nho'õmoi baba, duré bâtâ pusizém nho'õmoi baba, duré Ti'a Iwẽ uptabi nho'õmoi baba.

¹⁰ Ta hã õmo 'rãihâ pese wamhã, ma tô hâiwa ãma dasi'wapéi 'manharĩ'wa 're ihâimana za'ra mono zéb u sina rotété. Tahawa, ma tô nima norĩ dasi'wapéi 'manharĩ'wa hã we sina sãmra ti'ai u. Taha pari ma tô wati'i za'ra.

¹¹ Hâiwa ãma dasi'wapéi 'manharĩ'wa norĩ wada'uri'wa zada ma tô duré tihâiba. Tahawa, bâtâ sidâpâsi õ norĩ wada'uri'wai ma, marĩ zata na 're idanhoprub za'ra mono zé hã ma tô tiwi pari pese za'ra. Ma tô duré isõrõwa 'ri 'rãihâ hã tiwi pru pese.

¹² Duré bâtâ sidâpâsi 're idanhoprub za'ra mono zéb upana, ma tô iwasété na si 're danhoprub za'ra oto. Õ hã ma tô duré sena na danhimizaze 're ihâimana mono hã uprosi. Duré uburé marĩ te te 're i'a'manharĩ mono zém na ma tô te te sima ãma 're a'uwaimrami.

¹³ Taha pari wa tô duré wapa, hâiwa ãma romhuri'wa norĩ te te sima irobzanhamri zahuré zé hã. Nima hã ma tô tihâiba amo sadanha ãne: — E niha danhotõ 'rowim ne marĩ 'madâ'âzém na we iromhâimana mono na hã te za we ãma ropsi'utõrĩ. Duré marĩ zata na bâtâ sidâpâsi 're idanhoprub za'ra mono zéb upana, iwasété na si oto 're idanhoprub za'ra mono na hã, e niha te za duré we ãma ropsi'utõrĩ. Duré isõrõwa 'ri 'rãihâ siprum haré 're isa mono na hã e niha te za duré we ãma ropsi'utõrĩ. E niha te za hâiwa ãma dasi'wapéi 'manharĩ'wa norĩ ãma, da te ãma 're i'ai'uté za'ra mono na hã we duré ãma ropsi'utõrĩ u'âsi.

¹⁴ Tawamhã ihâiba amo ma tô ãne ãma sada'â: — Ãne te za we tiromhâiba za, 2.300 bâtâ na hâiwahâ sidâpâsi, duré mararé sidâpâsi, marĩ zata na 're idanhoprub za'ra mono õ zém na. Ãhã parip si te za isõrõwa 'ri 'rãihâ hã apâ iwẽ na tihâiba za.

Hâiwa ãma romhuri'wa Gabriéu, rosawẽrẽ na marĩ 'madâ'âzém na te te ãma isaprĩzé wasu'u

¹⁵ Wa hã Daniéu, ĩnhotõ 'rowim ne na marĩ te i'a'madâ'â mono zé te waihu'u da, rosa'rata na ĩsi'wapéi ré, ma tô ĩnho'remhã aibâ ne hã sihâi'ré.

¹⁶ A'uwẽ mreme na panho'u Ulai na isisi hawi we ni'wa te te i'mahârâ, wa tô wapa, ãne: — Gabriéu, ma'ãpé ã hã aibâ ma, marĩ te te i'ab'madâ'â mono zém na hã ãma tãma saprĩ na.

¹⁷ Tawamhã Gabriéu 'râwi te te ĩtẽme sina rotété wamhã oto, wa tô ĩpahi pese. Tahawa, wa tô ĩhi'rãtitõ tãma aime. Wa tô duré ti'ai u ĩ'ubu na ropto. Tahawa, te ãne ĩma tinha: — A hã, aibâ i'atâ'â pesere, marĩ i'madâ'âzé iwaihu'u da hã tô i'ru zahi. E marĩ wa. Rob'rãsutuzé, ta hã te te sina wasu'u wa.

¹⁸ Zahadu te te ĩma nharĩ ré, ĩnhimiza'rese'õ si'utõrĩ wa, wa tô ti'ai u ĩdumana na waptãrã. Tane nherẽ, ma tô ĩwahutu, hâiwi apâ ĩpara na te te ĩnharĩ da.

¹⁹ Ãne ma tô ĩma tinha: — 'Re ihâimana u'âsi mono siti'rui wa, marĩ za iwatobrozém na, wa za aima rowasu'u. E marĩ wa. Ã hã marĩ i'ab'madâ'â mono zé hã za rob'rãsutuzéb ãma we iromhâimana mono zé, te wasu'u.

²⁰ Pone'ẽrebâ zéré mapure si'aibâ maparane i'u i'madâ hã, Média ãma apito, Persia ãma apito me, te wasu'u zahuré.

²¹ Pone'ẽrebâ zéré uzé si'aibâ, Grécia ãma apito, te wasu'u. Duré i'õmo za'ẽne imorĩ'rata na ã hã ti'ai wa'õtõ nho'õmo ãma za isi'apito hã te wasu'u.

²² Duré i'u da te iwẽ'ẽ nho'wa're're, maparane si'uiwa na i'u ipoto za'ra hã, maparane si'uiwa na ti'ai ãma dama i'rã nho'õmo nhimi'madâ'â za'ra zé, te wasu'u, ti'ai wa'õtõ nho'u za sima isipo'o za'ra hã. Tane nherẽ, ã hã dama i'rã nho'õmo norĩ hã imorĩ'rata na isiptede tãma 're ihâimana mono ne, tãma 're hâimana za'ra mono õ di za, ta norĩ ma.

²³ Ã norĩ, i'rã nho'õmo na dama 're ihâimana za'ra mono zéb 'rãsutuzéb da u oto ro'rutu wamhã, duré isimi'manharĩ wasété za'ra zé hã oto we te te ãma sa'ẽtẽ pese za'ra wamhã, te za apito iwasété uptabi i'ubu nhiti'ru hã sihâi'ré, ihâimana nhipe hã.

²⁴ Tawamhã te za duré isiptetezé hã we te te tãma sina hâimo u'âsi. Tane nherẽ, tinhiptete na we sihawi siptete mono õ di za. Taha na te za te te dawi 're arowamnarĩ, tipipa uptabi na. Te za duré a'uwẽ isiptete norĩ hã uprosi, 'Re ihâimana u'âsi mono tinhib'a'uwẽ da, te te ipisutu norĩ zama. Marĩ te te sima iwẽzéb zarina, te za tô we te te sima ãma 're a'uwaimrami.

²⁵ Ti'rã nhipese zarina te za tô sima te te 're irowa'õtõ mono zé hã ãma sima te te 're a'uwaimrami. Te za duré 're isi'madâ'â zei mono na, we te te sina 're hâimo u'âsi. Te za duré te te 're ida'ahâiba za'réi mono zarina, da'ahâ na te te 're da'a'mapãrĩ. Uburé apito norĩ nhipai u Isiptede 'Re ihâimana u'âsi mono zada, te za duré tihâiba, ti'ai ãma apito iwasédé hã. Tane nherẽ, ti'ai ãma apito iwasédé hã te za wamnarĩ ni, a'uwẽ nhiptete nai õ na hã.

²⁶ Tawamhã Gabriéu hã timreme, ma oto 'rãsutu: — Ma tô iwapari pa, rosawẽrẽ na hâiwahâ sidâpâsi duré mararé sidâpâsi marĩ zata na 're idanhoprub za'ra mono zém na, sena na ãma isaprĩzé hã. Tane nherẽ, marĩ i'a'madâ'â mono zém na ãma isaprĩzé hã ni'wai ma, wasu'u õ di za. E marĩ wa. Ã norĩ na za a'â we iromhâimana mono zé hã watobro su'u õ na dâ'âsina.

²⁷ Wa hã Daniéu, bâtâ siwaptom na wa tô ĩhâiba zei õ na duré ĩhâzé na we ĩhâimana. Taha pari oto apâ we ĩwẽ na ĩhâimana mono wamhã, wa tô apâ dama ĩ'rã nho'õmo nhimiromhuri na hã te romhuri. Tane nherẽ, marĩ te i'ab'madâ'â mono zém na si ĩhâtâ'â u'âsi di, te isadaihu'u da hã ĩma pire wa.