Daniéu 7 - ꞌRe Ihâimana Uꞌâsi Mono Zadawa Wasuꞌu

Daniéu sõtõ 'rowim ne, ropoto siwamnarĩ pipa maparane si'uiwa na te te i'madâ'â za'ra zé wasu'u

¹ Béusazaha ãma imorĩ'rata na ãma iwahub ãma Babilonia 're, te te 're ida'a'madâ'â mono na ma tô Daniéu hã nimahã mara na tinhimiwaptâ wa nomro. Sõtõ wamhã, ma tô te te saho. Tame ma tô marĩ sõtõ 'rowi 'madâ'â za'ra. Topo'o wamhã, ma tô duré te te isahoi mono na marĩ te te i'madâ'â za'ra norĩ na hã ãma rob'ui'éré.

² Ãne ma tô ãma rob'ui'éré: Bara na te sahoi mono wamhã, wa tô 'madâ, maparane si'uiwa na rowa'u'u za'ẽne sitẽme siré iwairébé, âporé te te siwi i'âzasisi za'ẽtẽ za'ra mono hã.

³ Taha ré ropoto siwamnarĩ isa'ẽtẽ uptabi norĩ hã ma tô wairé, sipu'u pese na âporé hawi.

⁴ Imorĩ'rada hã hu'u zérépa hâiba ne, si'õmo wawẽ zaripi ré hã. Ta hã te 'madâ'â ré, ma tô isaribi hã tiwi sani ni. Tahawa, ma tô hâiwi sab da, dasiwi sãrĩ ni, a'uwẽ hâiwi 're isimasa mono ne. Ma tô duré a'uwẽ nhimirosa'rata ne hã oto tãma sõmri ni.

⁵ Tawamhã ropoto siwamnarĩ isãna'reb ãma hã wa tô duré 'madâ, ursu hâiba ne hã. Ta hã ma tô duré para na hâiwi za wahu na, tizadawa 're, ti'wa na marĩ waihi te te tété sina. Taha ré, te ni'wa tãma tinha ãne: “Aiwahutu, asima iwẽ na romnhi hã 'mairẽne da.”

⁶ Taha pari si'ubdatõ ãma ropoto siwamnarĩ wa tô duré 'madâ, hu'u hâiba ne hã. Iba na isaribi hã maparane si'uiwa na, tô si norĩ zaripi ne. Duré maparane si'uiwa na i'rã hã. Taha ma, pire na i'rãnho'õmo na te te 're ida'a'madâ'â mono zéb da hã ma tô tãma pisutu ni.

⁷ Tawamhã bara na ĩnhotõ 'rowim ne, wa tô 'madâ, maparane si'uiwa na ãma ropoto siwamnarĩ ipipa uptabi hã, duré isiptete uptabi hã. Isi'uwazi tete 'manharĩ na i'wa za'ẽne hã. Taha na ma tô tinhisõpãrĩ te te 're anhiwazu, te te 're a'masi mono da. Duré tinhisõpãrĩ nhi te te 're i'atarẽme mono hã ma tô tipara na te te 're anhizu pese. Ta hã aimawi uptabi, iwana ropoto siwamnarĩ iwairébé nei õ di. 10 na i'u hã.

⁸ Tawamhã i'õmo norĩ te 'madâ'â ré, wa tô duré 'madâ, i'õmo hâiba amo i'up surure hã, i'õmo za'ẽtẽ norĩ wa'wa iwatobro hã. Tahawa, i'õmo za'ẽne si'ubdatõ hã ma tô õmo zani za'ra ni, i'õmo surure ma, ropese da. Taha ma, te oto a'uwẽ tõmo ne hã tãma tihâimana zahuré. Duré isadawa hã 'râwi 're isi'madâ'â zei mono zéb zarina te te ãma 're inharĩ mono da hã te tãma tihâiba.

Daniéu hã, 'Re ihâimana u'âsi mono te te i'madâ'âzé wasu'u

⁹ Wa hã zahadu te isahoi mono 're, rob'madâ'â na te ãma uzusi mono ré, ma tô danhib'apito simasisizé hã dasiwi sãrĩ ni. Tawamhã nimahã dasimasisizém na te oto we Duréi 're Ihâimana mono hã ãma nhamra. I'uza hã ihâirã uptabi. Duré iséré hã, irã uptabi, pone'ẽrebâ zéré ne hã. Isimasisizé hã duré isimasisizé para hã tô unhama ro'o zoto ne i'manharĩ hã.

¹⁰ Taha nho'remhã ma tô duré unhama na â hã tipraba. Tamemhã te duré da'ahâ uptabi na tahâimana za'ra ni, marĩ, da te tãma i'manharĩ za'ra da hã. Nemo te da'ahâ uptabi na duré daza'rata waihu'u ãna isõ're aimasam ni. Tawamhã da'ãma rowairébézé oto sãna'rata wamhã, ma tô ibaihâ hã sõzi za'ra ni.

¹¹ Duré wa zahadu 'madâ. E marĩ wa. I'õmo surure zahadu te te sina nharĩ wa, 're isi'madâ'â zei mono na hã. Te 'madâ'â ré, ma tô maparane si'uiwa na ãma ropoto siwamnarĩ hã dasiwi wĩrĩ ni. Ma tô duré ihâiba hã da te dasiwi wa'õtõ pese. Taha pari ma tô duré unhama ro'o u dasiwi sãmra ni.

¹² Duré ropoto siwamnarĩ hâiba amo norĩ wi hã ma tô isiptede tiwi sani za'ra ni. Tane nherẽ, ta norĩ hã da te dasiwi simroi õ di. Ma tô tãma pisutu za'ra ni, bâdâ suru na a'â ãma 're ihâimana za'ra mono zéb da hã.

¹³ Tawamhã tô taha mara na ĩnhotõ 'rowim na, wa tô duré ni'wa hã 'madâ, a'uwẽ hâiba ne hâiwa nhirõtõ na we imorĩ hã. Ta hã ma tô Duréi 're Ihâimana mono u we sina rotété. Tahawa, ma tô ta hã dasiwi saprõni ni, Duréi 're Ihâimana mono nho're u.

¹⁴ Ma tô isimiroti pire na 're ihâimana mono zé, duré apito wa, da te ãma 're iwazé mono zé duré te te 're ida'a'madâ'â mono zé hã tãma pisutu ni. Tawamhã dapoto mono bâ, duré daro mono bâ 're idahâimana za'ra mono hã, duré damreme mono bâ 're idamreme zusi mono hã ma tô uburé ãma 're dawata za'ra. Ĩsiptetezé hã isi'utõrĩ waihu'u'õ. Duré te te 're ida'a'madâ'â mono zé isi'utõrĩ waihu'u'õ na.

Daniéu, marĩ te te i'madâ'âzém na te te ãma isaprĩzé wasu'u

¹⁵ Wa hã Daniéu ĩnhotõ 'rowim ne, marĩ te i'ab'madâ'â mono zé hã te te ĩpẽ'ẽwara pese wa, wa tô hâtârâ.

¹⁶ Tahawa, isimasisizém nho're da'ahâ uptabi na tame idasimasam norĩ u, wa tô 'râwi ĩsina rotété, marĩ te i'ab'madâ'â mono na te te ĩma ãma i'mazaprĩzé hã te tiwi 'maiwaptẽrẽ da. Tahawa, ma tô õ hã ãma ĩma saprĩ ãne:

¹⁷ — Maparane si'uiwa na ropoto siwamnarĩ isa'ẽtẽ uptabi norĩ hã maparane si'uiwa na za apito norĩ siptete na te te 're ida'a'madâ'â za'ra mono zé, te wasu'u.

¹⁸ Tane nherẽ, da'madâ'âzé hã te za uburé danhipai u Isiptede 'Re ihâimana u'âsi mono tinhib'a'uwẽ da, te te ipisutu norĩ ma sõmri za'ra ni, õne u'â tãma 're ihâimana za'ra mono da.

¹⁹ Wa tô duré ĩsima wẽ, maparane si'uiwa na ãma ropoto siwamnarĩ na isaprĩzé te waihu'u da, si'ubdatõ ropoto siwamnarĩ norĩ hâiba nei õ hã. Ta hã aimawi ipipa uptabi, duré isi'uwazi tete na i'wa hã, duré ẽtẽ topsata na isipo hã, duré tinhisõpãrĩ te te ãma 're inhiwazu mono, duré isisõpãrĩ nhi 're isi'atarẽme mono tipara na te te 're i'anhizu pese mono hã.

²⁰ Wa tô duré tiwi waptẽ, ropoto siwamnarĩ 'rã na i'u 10 na ihâimana za'ra na zama te te ĩma ãma isaprĩzé hã, duré i'õmo hâiba amo iwatobro na isaprĩzé hã. Ta hã si'ubdatõ i'u te te i'marõpãrĩ za'ra hã, i'õmo hâiba amo norĩ nhipai u isiptete uptabi, ito duré tãma ihâiba hã, duré 're isi'madâ'â zei mono na tizadawa na te te 're inharĩ mono.

²¹ Tawamhã zahadu te 'madâ'â ré, ma tô i'u hã 'Re ihâimana u'âsi mono nhib'a'uwẽ a'wapé. Tawamhã ropoto siwamnarĩ upsuru, zahadu we te te tô da'ãma ai'uté,

²² duréi 're Ihâimana mono hã we datẽme iwisizéb u. Ta hã ma tô uburé danhipai u Isiptede 'Re ihâimana u'âsi mono nhib'a'uwẽ norĩ ma, iwẽ na hã rowairébé. E marĩ wa. Bâdâ hã tô oto iwa waptã'ã wa, isib'a'uwẽ norĩ, siptete na za 're isi'i'rãnho'õmo za'ra mono zém na te te ãma isãna'rata za'ra zéb da hã.

²³ Tawamhã ãne te te ĩma ãma isaprĩzé hã ma tô ĩma wasu'u: — Maparane si'uiwa na ãma ropoto siwamnarĩ hã, maparane si'uiwa na ãma ti'ai ãma da'madâ'âzé hã te wasu'u. Ti'ai ãma isimi'madâ'âzé hã ihâiba amo norĩ nhimi'madâ'â za'ra zém nei õ di. Ta hã te za uburé ti'ai mono bâ 're idahâimana za'ra mono hã a'uprosi. Te za duré te te da'anhiwazui pese. Te za duré tipara na te te da'anhinhizu pese.

²⁴ 10 na i'õmo norĩ hã, te 10 na apito norĩ hã wasu'u, za i'rã nho'õmo na 're hâimana za'ra mono wa, te te 're ida'madâ'â za'ra mono zé hã. Tawamhã ta norĩ parimhã te za apito ihâiba amo hã duré sihâi'ré, imorĩ'rata na apito norĩ nei õ na, za 're ihâimana mono hã. Ta hã te za si'ubdatõ apito norĩ ãma ai'uté za'ra.

²⁵ Ta hã te za uburé danhipai u Isiptede 'Re ihâimana u'âsi mono zada hã 're hâimana. Te za duré isib'a'uwẽ norĩ ma hã te te 're arob'manharĩ wasété. Duré te za 'Re ihâimana u'âsi mono nhimiroti na duré isib'a'uwẽ nhibâtâ norĩ na te te ãma tiwi saprĩ za'ra da hã, te te 're pibui u'âsi za'ra, Te za duré si'ubdatõ wahu aiwa ãma isipo'o na 'Re ihâimana u'âsi mono nhib'a'uwẽ norĩ isib'ratamhã a'â tihâimana za'ra.

²⁶ Tane nherẽ, ãne na romhâimana parip si, te za da'ãma rowairébé'wa norĩ, niha hã tãma pisutu za'ra. Taha zarina te za tinhimi'madâ'âzé hã siwi simini. Te za duré isiptetezé hã õne u'â tiwi 're si'utõrĩ.

²⁷ Tawamhã ti'ai ãma da'madâ'âzé hã duré danhimiroti nhiptetezé hã te za uburé danhipai u Isiptede 'Re ihâimana u'âsi mono nhib'a'uwẽ ma hã tãma sõmri za'ra ni. Ta norĩ hã te za ti'ai mono bâ uburé pese õne u'â te te 're da'madâ'â za'ra. Tahawa, uburé pese dapoto mono bâ te za tãma 're dahâimana za'ra. Te za duré isimiroti hã uburé da te 're wapari pese za'ra.

²⁸ Ãme ma oto ti'rãsutu, ĩnhotõ 'rowim ne, te marĩ i'a'madâ'â mono zé hã. Tane nherẽ, wa hã Daniéu wa tô duré tãma ĩpẽ'ẽwara pese, te ãma irosa'ratazéb zarina. Tahawa, wa tô duré ĩ'ubu'a pese. Tane nherẽ, wa 'râwi ĩsima si tété.