Daniéu 6 - ꞌRe Ihâimana Uꞌâsi Mono Zadawa Wasuꞌu

Daniéu, hu'u zérépa norĩ wa'wa ab're 're, isabzé wasu'u

¹ Tawamhã apito Dariu ma tô ti'ai wa'õtõ nho'u tinhimi'madâ'âzéb 'remhã, 120 na daza'rui wa'õtõ mono na ãma sipo'o da hã rowairébé. Taha zarina ma tô duré aibâ norĩ hã 120 na daza'rui wa'õtõ mono bâ dama i'rãnho'õmo na 're hâimana za'ra mono da hã pisutu za'ra.

² Tawamhã ro morĩ wẽ da, niha marĩ hâimana tõ da, ma tô apito si'ubdatõ dama ipire norĩ, 120 na dama i'rãnho'õmo norĩ te te 're 'madâ'â za'ra mono da hã pisutu za'ra. Tawamhã Daniéu zama ma tô dazu pisutu, dama ipire na hâimana da.

³ Tawamhã Daniéu ma tô tisiré norĩ dama i'rãnho'õmo na 're ihâimana za'ra mono nhipai u tinhimiromhuri wẽ na hã sihâi'ré. Taha ma, tãma romhuri waihu'u pese uptabi wa, ma tô apito hã ãma rosa'rata, te te sẽrẽ da, uburé danhipai u danhib'ihâ'a na oto 're hâimana mono da.

⁴ Tahawa, isiré dama ipire norĩ, duré dama i'rãnho'õmo norĩ, ma tô Daniéu hã te te siwi 're pibu, niha isimi'madâ'âzéb 'remhã marĩ hã te te ãma siwi sãmri wasété wa, iwasédé te te ãma siwi hiri da. Tane nherẽ, marĩ hã te te ãma siwi sãmri õ di, sena na duré i'uwaibaba na si 're hâimana mono wa. Tahawa, ni'wa hã te te marĩ i'manharĩ wasété na duré te te ãma i'upa na te te ãma wasété waihu'u õ di.

⁵ Tahawa, te ãne sima wasu'u za'ra: — Niwamhã Daniéu, marĩ na siwasété ré hã, wa te wasiwi sõpẽtẽ waihu'u õ di, wa te ãma wasiwi iwasu'u wamnarĩzéb da hã. Ãne wa, ãté 'Re ihâimana u'âsi mono ãma isimizaze tãma ihâimana na te te ãma upai wapsi, wa za wasiwi sãmri ni, niha na iwasétézé hã.

⁶ Tawamhã uburé dama ipire norĩ ma tô apito u ai'aba'ré. Si'aba'réi wamhã, te ãne tãma nharĩ za'ra: — Apito Dariu, 're aihâimana u'âsi mono da si, iwẽ hã!

⁷ Uburé wa norĩ, dama i'rãnho'õmo norĩ hã, 'ri nho'õmo 're, dama ipire norĩ hã, daza'rui wa'õtõ mono bâ dama i'rãnho'õmo norĩ hã, duré uburé aimawi dama ipire norĩ hã wasi'rã'õtõ wamhã, wa tô ãma wasisaze za'ra ni, asimiroti itede i'manharĩ da hã, wa te aiwi waptẽrẽ za'ra da, ãma idanhimipari prédu, i'ru zahi hã. Tahawa, te za a hã dama iwaihu, 30 bâtâ 'remhã aiwi si, da te 're rowaptẽrẽ za'ra mono da. Tawamhã taha ré ni'wam norĩ, marĩ siwa'ru ihâiba'õ norĩ wi, duré siwa'ru dawi te te 're rowaptẽrẽ za'ra mono wamhã, te za hu'u zérépa ma, ab're 'remhã dasiwi sãmra ni.

⁸ Tahawa apito, ma'ãpé asimiroti nhiptede hã 'manharĩ, ãma i'asisihâtâ da hã. Tawamhã Média norĩ nhimiroti zarina Persa norĩ me, asimiroti nhiptete 'manharĩzé niwamhã da te ipari da hã, mare di za.

⁹ Tawamhã apito ma tô ãma saze za'ra. Taha zarina ma tô duré tinhisi hã ãma tisã, isimiroti na rob'ui'éré hã da te ãma ropéi mono da, uburé dama.

¹⁰ Tawamhã apito tinhimirotizém na isisi hâtâzém na te te waihu'u wamhã, ma tô tinhorõwa u apâ hã mo. Hâimo ãma 'ri 're wa'õno ihâimana ãma te nhamra, zanela 'ri zadazâri norĩ Zeruzalẽ nho'õmoi baba ihâimana za'ra ãma. Tawamhã Daniéu ma tô 'ri zadazâri hã sima 'ridawa za'ra. Taha pari ma tô hi'rãtitõ nhamra. Ma tô duré tite 'Re ihâimana u'âsi mono ma hã mre, awẽ sidâpâsi si'ubdatõ na ãma isahu na tãma 're imreme u'âsi mono ne.

¹¹ Tawamhã Daniéu nhitob'ru norĩ, simisutu isõrõwa u si'aba'réi wamhã, ma tô siwi 'madâ, 'Re ihâimana u'âsi mono te te pawaptob da, timreme na te te tiwi rowaptẽrẽ ré.

¹² Tawamhã apito tinhimiroti te te iwaihu'uzém na te te tãma nharĩ za'ra da hã, ma tô oto ai'aba'ré. Tahawa, te tãma nharĩ za'ra ãne: — Apito, asimiroti nhiptede iwaihu'uzém na i'asisihâtâzém na hã ma tô dawi isawi, 30 bâtâ 'remhã ni'wa hã, siwa'ru ihâiba'õ norĩ wi duré siwa'ru dawi, da te 're rowaptẽrẽ za'ra mono tõ da, duré aiwi si da te 're rowaptẽrẽ za'ra mono da. Tawamhã asimiroti 'manharĩzém na ma tô duré ipisu, ni'wa asimiroti te te wapari õ wamhã, za hu'u zérépa ma, da te dasiwi ime na hã, ab're 're. Ãne na hã, e senai õ di bété, i'asisihâtâzé hã. Tawamhã apito asa ma te ãma sada'âbâ za'ra ãne: — Ĩhe sena tô roti hã. Tahawa, te za tô da te 're wapari pese za'ra. Duré Média norĩ nhimiroti 'manharĩzéb zarina Persa norĩ me da te ipari da hã mare di tô.

¹³ Tahawa, ta norĩ hã te duré tãma nharĩ za'ra ãne, apito ma hã: — Tane nherẽ, Daniéu, Zuda ti'ai hawi wa te da'ãma ai'uté wa, dasiré da te we dasiwi isaprõni hã, ta hã asimiroti nhiptede i'manharĩzém na hã te te aiwazéb õ di. Tãma hã tarére. Õne haré te 'Re ihâimana u'âsi mono ma, awẽ sidâpâsi 're mreme, misi bâtâ 'remhã si'ubdatõ na ãma isahu na.

¹⁴ Tawamhã ãne hã apito te te wapari wamhã, ma tô tiwi tirobzei'õ pese. Tiwi robzei'õ pese wa, ma tô aré sima rosa'rata, Daniéu te te sõ'reptu da. Tô taha bâtâ na, bâdâ isébrézéb u, ma tô niha hã nasi sima pibu, te te sõ'reptu da hã.

¹⁵ Tane nherẽ, Daniéu nhitob'ru norĩ, apâ duré apito u si'aba'réi wamhã, ma tô ãne tãma nharĩ za'ra: — Apito, Média norĩ nhimiroti 'manharĩzéb zarina Persa norĩ nhimiroti me, apito nhimiroti 'manharĩzém na romnhihâdâ da te dasiwi i'mapari waihu'u õ na hã aima waihu'u pese di.

¹⁶ Tahawa apito, ma tô Daniéu hã dama ti'ru, da te dasiwi saprõni da, hu'u zérépa ma, ab're 're, da te dasiwi me da. Tahawa, te apito, Daniéu ma tinha ãne: — Ate 'Re ihâimana u'âsi mono, ãma 're i'aihâimana mono hã, duré õne u'â tãma 're i'asisõmri mono hã te te asõ'reptu zô, wa za wa hã rob'madâ.

¹⁷ Tawamhã ẽtẽ tõmo wawẽ na ma tô ab're zadawa hã iré siwi sito. Taha pari, ma tô apito hã tinhiptõmohi tétézém na, duré dama ipire norĩ nhiptõmohi wasisi za'ra zém na zama ãma tob'rata to, Daniéu ma, iromhâimanazém na hã ni'wa te te ãma saprĩ tõ da.

¹⁸ Tawamhã apito tinhimiromhurizé 'ri 'rãihâ u hã ma tô apâ mo. Morĩ wamhã, sai õ di. Duré tãma dasima romhu'uzé hã te te waptẽrẽ õ di, te te 're i'manharĩ u'âsi mono ne hã. Duré tô taha mara na hã sõtõ waihu'u õ di.

¹⁹ Tawamhã mararé uptabi ma tô udu. Utu wamhã, ma tô sa'ẽtẽ mo, hu'u zérépa ab're 're, isimasabzéb u.

²⁰ Tawamhã ab're u te te sina rotété wamhã, ma tô te te ãma robzépata wa, mreme zei ãna 'mahâ ãne: — Daniéu, 'Re ihâimana u'âsi mono idâ'â'õ nhib'a'uwẽ! E 'Re ihâimana u'âsi mono, a hã ãma 're i'aihâimana mono hã, duré õne u'â tãma 're i'asisõmri mono hã, ma tô hu'u zérépa norĩ wi te te i'asõ'reptu da hã ãma aima uwaimra.

²¹ Tawamhã Daniéu, ma te asa sada'â ãne: — Apito, 're aihâimana u'âsi mono da si, iwẽ hã!

²² Ĩte 'Re ihâimana u'âsi mono, tite hâiwa ãma romhuri'wa we te te isatõrĩ hã ma tô te te siwi ĩ'u'a tõ da, sadawa nhiptob za'ra, hu'u zérépa norĩ hã. 'Re ihâimana u'âsi mono ma, wa hã marĩ iwasédé te tiwi i'manharĩ õ na hã tãma ĩwaihu'u pese wa, ma tô ãne hã ĩma 'manha. Duré niwamhã aiwi zama marĩ te aiwi 'manharĩ wasété õ di.

²³ Tawamhã apito, to za'ẽtẽ uptabi wa, ma tô Daniéu ab're hawi da te dasiwi wazere da, dama ti'ru. Tawamhã da te oto dasiwi wazere wamhã, ma tô 'madâ'â za'ra ni, hu'u zérépa marĩ ihâiba na te te ãma i'manharĩ za'ra õ na hã, 'Re ihâimana u'âsi mono si te te sina 're umnhasi mono wa.

²⁴ Tawamhã apito nhimiwada'uri zarina ma tô Daniéu wasu'u wasété'wa norĩ hã dasiwi sãmra ni, hu'u zérépa isimasabzé ab're u, uburé isiré za'ra zama imro norĩ hã, duré i'ra norĩ hã. Tawamhã zahadu hâimo hawi itẽme za'ra sisa'rei mono ré, ab're nhitõ u hã ma tô zahadu ré hu'u zérépa norĩ sô tizarõtõ za'ra. Tahawa, ma tô uburé te te hipru pese za'ra.

²⁵ Tawamhã apito Dariu ma tô uburé daro mono bâ, duré dapoto mono bâ duré damreme mono bâ 're idamreme zusi mono ma, rob'ui'éré, ãne: “Rowẽ na 're aihâimana za'ra wa'aba mono!

²⁶ Uburé a'uwẽ norĩ, ĩnhimi'madâ'âzéb 're daza'rui mono bâ 're i'aihâimana za'ra wa'aba mono ma, wa aima waihu'u za'ra wa'wa, ãne. Ma'ãpé Daniéu, 'Re ihâimana u'âsi mono ãma 're iwata mono hã asiwi 're wazé aba mono. E marĩ wa, õ hã 'Re ihâimana u'âsi mono idâ'â'õ, õne u'â 're ihâimana mono. Niwamhã duré dama i'rãnho'õmo na isimi'madâ'âzé hã isipru waihu'u õ. Duré niwamhã isiptetezé hã tiwi isi'utõrĩ waihu'u õ.

²⁷ Taha si, siminho'reptu waihu'u pese di. Hâiwa ãma, duré ti'ai ãma te dama isa'rese'õ na te te 're romhõsi. Taha si ma tô Daniéu hã sõ'reptu, hu'u zérépa nhiptetezé wi hã.”

²⁸ Tawamhã Daniéu, Dariu i'rãnho'õmo na te te 're da'a'madâ'â mono ré, duré Persia norĩ siré Ciru te te 're da'a'madâ'â mono siwaprã, ma tô danhipai u dama ipire na 're ihâimana mono zém na hã ãma uzusi.