Daniéu 1 - ꞌRe Ihâimana Uꞌâsi Mono Zadawa Wasuꞌu

Babilonia ãma Daniéu ihâimanazé wasu'u

¹ Zuda na danhipti'a nho'õmo nhisi 're, Zeoaquĩ dama i'rãnho'õmo na 're ihâimana mono na si'ubdatõ ãma iwahubzéb ãma, ma tô Babilonia te, apito Nabucodonozo, Zeruzalẽ hã rési. Tawamhã ite dasi'wapéi 'manharĩ'wa norĩ, ma tô 'ri nho'u hã siwi uirĩ.

² 'Re ihâimana u'âsi mono, ma tô Nabucodonozoho ma sa'ré, 'ri nho'õmo na te te ai'uté da hã. Duré marĩ norĩ iwa'âbâ za'ẽne 'Re ihâimana u'âsi mono nhorõwa 'ri 'rãihâ 're, 're ihâimana za'ra mono norĩ zama te te waibu da hã, ma tô tãma sa'ré za'ra. Tahawa, Nabucodonozo, tô õ hã marĩ norĩ iwa'âbâ za'ẽne ma tô tinhipti'ai u Babilonia u hã tidu. Te te duri wamhã, ma tô dama ti'ru, tite ihâiba'õ ãma 're idawata za'ra mono zé 'ri 'rãihâ 're, da te dasiwi sa'ra da, marĩ iwa'âbâ za'ẽne, da te 're i'rã'õtõ mono zéb ãma.

³ Taha pari te apito Nabucodonozo, isimiromhurizé 'ri 'rãihâ 'madâ'â'wa norĩ nhib'ihâ'a zô hã hâ, Apenasihi zô. Sô hârâ wamhã, ma tô tãma ti'ru, ni'wam norĩ Izaraéu nhihudu, iprédupté apito hawi a'uwẽ hã, duré apito zapari romhuri'wa norĩ a'uwẽ hã te te niha 'maipisutu za'ra da,

⁴ uburé 'madâ'â ze na hâiba wẽ na 're ihâimana za'ra mono, ihâiba siwamnarĩ'õ hã, i'rãiwaihu'u pe hã, isimirowaihu'u pese norĩ hã, za apito nhimiromhurizé 'ri 'rãihâ 're, romhuri waihu'u pese 'wa norĩ da hã, duré za Babilonia norĩ mreme te te iwaihu'u za'ra da hã, duré ta norĩ mreme na rob'ui'éré na te te 're iromnhoré za'ra mono da hã.

⁵ Tawamhã Babilonia ãma apito, ma tô duré ti'ru, tô õ norĩ Izaraéu nhihudu ipréduptém norĩ ma, awẽ sidâpâsi apito ãma 're isai mono zé hã te te tãma 're a za'ra mono da, duré awẽ sidâpâsi uwa 'rãi wa'u isé na tisa te te ãma 're isimihâri mono zé hã te te tãma 're sa'wari za'ra mono da. Tawamhã si'ubdatõ wahu parimhã, te za ipréduptém norĩ hã ãma sãna'rata za'ra, apito nhimiromhurizé 'ri 'rãihâ 're, tinhimiromhuri za'ra na hã.

⁶ Tawamhã Izaraéu nhihudu norĩ iprédupté da te ipisutu za'ra norĩ 'remhã ma tô dame tihâimana za'ra, Daniéu, Anania, Mizaéu, duré Azaria, uburé Zudaha hawip si a'uwẽ hã.

⁷ Tawamhã Apenasi ma tô isisi amo na hã sisi za'ra ãne, Béutésaza, Sadraqui, Mezaqui, duré Abide-Negu.

⁸ Tawamhã Daniéu, apito sazém na za 're isai mono na, duré uwa 'rãi wa'u isé na tisa te te 're isimihâri mono zém na, ãma 're sihâiba wamnarĩ mono tõ da, ma tô 'râwi sima waihu'u. Tahawa ma tô Apenasihi wi rowaptẽ, te te tãma rowairébé da, apito sa te te upi tõ da, duré ite rob'rãi wa'u zama te te upi tõ da.

⁹ Tawamhã 'Re ihâimana u'âsi mono, ma tô Apenasi hã simirosa'rata pi'ra, Daniéu ma, iwẽ na si te te tãma 're 'manharĩ mono da, duré ãma 're siwãrĩ u'âsi mono da.

¹⁰ Tane nherẽ, Apenasi hã tinhib'apito ma, pahi wa, te Daniéu ma tinha ãne: — Ĩnhib'ihâ'a si niha na 're i'asaihuri aba mono zéb da hã, duré 're isimihâri za'ra wa'aba mono zéb da hã ma tô aima pisutu za'ra wa'wa. Ãne nherẽ, aihâiba nhiptete prã na asiré ipréduptém norĩ zahâpâ te te aihâiba waihu'u za'ra wa'aba wamhã, ãté te za dama ĩ'ru, da te dasiwi ĩwĩrĩ da hã, ãne u'âbâmhã.

¹¹ Tawamhã Daniéu ma tô mo, Apenasi, i'madâ'â za'ra 'wa da, te te ipisutu u, te te tãma nharĩ da. Ãne te tãma tinha, Daniéu hã:

¹² — Wa ĩsima wẽ, te aiwi waptẽrẽ da, niha na pé we wa'ãma rob'madâ'â za'ra da. Ma'ãpé 10 bâtâ 'remhã rob're na si dasa norĩ hã wama a za'ra na, wa te ihuri da hã nasi. Â si te za duré wama isõmri za'ra, wa te nasi i'âhuri da hã.

¹³ Tawamhã 10 na bâtâ 'rãsutu ãma hã, wasiré norĩ iprédupté, apito sa te te 're ihuri mono norĩ hâiba te za wa'ãma i'madâ'â za'ra za, aiwab zô. Tawamhã asima iwẽ zéb zarina te za marĩ hã wa'ãma i'manharĩ za'ra.

¹⁴ Tawamhã Daniéu norĩ 'madâ'â'wa, tame te te ãma sazei wa, ma tô 10 bâtâ 'remhã niha zô pibu za'ra, te te tiwi iwaptẽrẽzéb zarina.

¹⁵ Tawamhã 10 bâdâ te te oto sa'rei wamhã, Izaraéu nhihudu maparane si'uiwa na iprédupté ihâimana za'ra norĩ hã hâiba wẽ za'ra di, duré siptete za'ra di, isiré iprédupté hâiba amo norĩ, apito sa na 're isaihuri mono norĩ hâiba nhipai u.

¹⁶ Tahawa, ta hawim haré te oto ta norĩ 'madâ'â'wa hã rob're na dasa norĩ si te te tãma 're a za'ra, apito sazé upana, rob'rãi wa'u me.

¹⁷ Tawamhã 'Re ihâimana u'âsi mono, ma tô rob'ui'éré zadaihu'uzé hã tãma sõmri za'ra, maparane si'uiwa na iprédupté ihâiba za'ra ma hã. Babilonia norĩ nhimirowaihu'uzéb zama ma tô duré tãma sõmri za'ra. Tane nherẽ, Daniéu ma si, ma duré aimawi tãma tisõ, da te 're irosawẽrẽ za'ra mono zém na duré danhotõ 'rowim ne, marĩ, da te 're i'madâ'â za'ra mono zé hã te te ãma dama 're azaprĩ mono da.

¹⁸ Tawamhã apito Nabucodonozo, si'ubdatõ wahu te te ipisutu ãma, ma tô Apenasi hã apito hâimanazéb u uburé ipréduptém norĩ hã te te oto simro.

¹⁹ Tame apito ma tô oto tãma robzanhamri za'ra. Tahawa, ma tô awaihu'u, uburé ipréduptém norĩ 'remhã ni'wa ihâimana õ na hã, Daniéu norĩ ne hã, Anania, Mizaéu, duré Azaria. Tahawa, ma tô ta norĩ si apito nhimiromhurizé 'ri 'rãihâ 're te te oto 're romhuri za'ra.

²⁰ Tawamhã apito, uburé marĩ mono na te te ta norĩ 're sadanharĩ za'ra mono wamhã, uburé Babilonia ãma i'rãiwaihu'u pese norĩ nhipai u, duré marĩ 'manharĩ nhipese 'wa norĩ nhipai u, te te irowaihu'u pese za'ra na hã ma tô oto upsibi me za'ra.

²¹ Tawamhã Daniéu hã te oto dama i'rãnho'õmo nhimiromhurizé 'ri 'rãihâ 'remhã 're hâimana, Ciru za dama i'rãnho'õmo na tinhimiromhuri te te i'ârizé wahub u, Babilonia ãma hã.