Apocalipsi 7 - ꞌRe Ihâimana Uꞌâsi Mono Zadawa Wasuꞌu

Izaraéu nhihudu uihâi ui'éré za'ratazé wasu'u, 144 miu na

¹ Tawamhã wa tô duré 'madâ, maparane si'uiwa na hâiwa ãma 'Re ihâimana u'âsi mono ma, romhuri'wa norĩ hã. Bâtâ pusizém niwĩ misi te za, ti'ai ãma hã. Bâtâ zasizém niwĩ te duré misi za. Duré hâiwa si'uiwa na te duré si'uiwada zahuré. 'Re ihâimana u'âsi mono te te tãma ipisutu za'ra zéb zarina, te ta norĩ hã rowa'u hã si'u tété za'ra, bâtâ pusizém niwĩ, duré bâtâ zasizém niwĩ, duré hâiwa si'uiwa na, te te 're rowapõrĩ tõ za'ra mono da. Te te duré 're âzasisi za'ra tõ mono da, te rowa'u hã siwi tété, duré wede hã te te 're rési tõ za'ra mono da.

^2-3 Taha parimhã, wa tô duré 'madâ, hâiwa ãma romhuri'wa aimawi hã. Bâtâ pusizém hawi ma tô we sihâi'ré. Ta hã te rob'ui'éré siro hã tinhib'rata we 're ti'â, 'Re ihâimana u'âsi mono nhib'a'uwẽ ãma te te 're i'aza'ra mono da hã. Tawamhã maparane si'uiwa na hâiwa ãma romhuri'wa norĩ hã te 'mahârâ za'ra, mreme 'rãihâ na, ãne: — Tô'ã. Ti'ai ma, rob'manharĩ za'ra wa'aba tõ a'â, â poré ma zama, duré wede ma zama. Wanhib'apito 'Re ihâimana u'âsi mono nhib'a'uwẽ hã a'â wa te a'uihâ ui'éré mono, pibui pese da, 'Re ihâimana u'âsi mono nhimihâzém na dazu te te robzépata za'ra tõ da. — Ãne te 'mahârâ za'ra hâiwa ãma romhuri'wa hã, tinhib'rata rob'ui'éré siro te te 're i'râ'âri hã. Tawamhã ma tô oto a'uihâ ui'éré, bâtâ pusizém hawi iwatobro hã tisiré norĩ me. Maparane si'uiwa na hâiwa ãma romhuri'wa norĩ ma, ma tô 'Re ihâimana u'âsi mono hã tãma 'ru za'ra aré, isimi'manharĩ waihu'u pese zém na ti'ai ma, te te rob'manharĩ za'ra da aré, duré â poré ma, te te rob'manharĩ za'ra da. Tane nherẽ, hâiwa ãma romhuri'wa aimawi hã ma tô ãma pa'uwati za'ra, ti'ai ma, te te a'â rob'manharĩ tõ za'ra da.

⁴ Tawamhã wa tô duré wapa, ni'wai mreme hã. Te ĩma wasu'u, 'Re ihâimana u'âsi mono nhib'a'uwẽ za'ratazé hã. Ãne te ĩma wasu'u: — 'Re ihâimana u'âsi mono nhib'a'uwẽ za'ratazé hã ãne, i'uihâ ui'éré ré norĩ hã 144 miu na ihâiba za'ra hã. — Ãne ma tô ni'wa hã ĩma waihu'u. Ã hã Izaraéu nhihudu norĩ za'ratazé, te wasu'u. Isihudu sidâpâsi, te awasu'u.

⁵ Zudaha nhihudu uihâ ui'éré za'ratazé hã 12 miu na. Duré tô Rubẽhẽ nhihudu uihâ ui'éré za'ratazé hã 12 miu na. Duré Gadihi nhihudu uihâ ui'éré za'ratazé hã tô 12 miu na.

⁶ Duré tô Aséhé nhihudu uihâ ui'éré za'ratazé hã 12 miu na. Duré Naptalihi nhihudu uihâ ui'éré za'ratazé hã tô 12 miu na. Duré tô Manaséhé nhihudu uihâ ui'éré za'ratazé hã 12 miu na.

⁷ Duré Simiãhã nhihudu uihâ ui'éré za'ratazé hã tô 12 miu na. Duré tô Levihi nhihudu uihâ ui'éré za'ratazé hã 12 miu na. Duré Isacaha nhihudu uihâ ui'éré za'ratazé hã tô 12 miu na.

⁸ Duré tô Zébulõhõ nhihudu uihâ ui'éré za'ratazé hã 12 miu na. Duré Zuzéhé nhihudu uihâ ui'éré za'ratazé hã tô 12 miu na. Duré tô Bẽzamihĩ nhihudu uihâ ui'éré za'ratazé hã 12 miu na. Simisutu hã, i'uihâ ui'éré za'rata za'ra zé hã 144 miu na ma watobro, Izaraéu nhihudu norĩ za'ratazé, isihudu sidâpâsi hã.

Da'ahâ uptabi na 'Re ihâimana u'âsi mono nho're idahâimana za'ra zé wasu'u

^9-10 Taha parimhã, wa hã Zuwã, wa tô duré 'madâ. Te 'madâ'â wamhã, wa tô da'ab'madâ, da'ahâ uptabi na, da te idaza'rata waihu'u õ hã. Dapoto mono bâ te aimasam ni, damreme sipo'o mono bâ 're idahâimana za'ra mono hã. Danhib'apito simasisizém nho're te aimasam ni, duré Pone'ẽrebâ nho'reb zama. Da'uza hâpa hâirã ré te isõ're aimasam ni. Tawamhã wa'asu ne hã, da te tété za'ra sina, te damreme 'rãihâ na ãma tawata za'ra ni, ãne: — Wanhib'apito 'Re ihâimana u'âsi mono, danhib'apito simasisizém na isãmra hã ta hã, Wa'anho'reptui'wa. Duré Pone'ẽrebâ hã tô isiré Wa'anho'reptui'wa. Ã norĩ hã ma tô wawasété wi te te 're wa'anho'reptu zahuré, 're iwasi'utõrĩ za'ra mono zé wib zama.

¹¹ Tawamhã hâiwa ãma romhuri'wa norĩ hã te zahadu danhib'apito simasisizé mana wawi aimasa. 24 na dama ipire za'ra norĩ hã isisõré mana wawib zama te zahadu aimasa, maparane si'uiwa na ropoto na ihâiba norĩ mana wawib zama. Ta norĩ hã hâiwa ãma romhuri'wa norĩ hã ma tô duré danhib'apito simasisizém nho're hi'rãtitõ ana, 'Re ihâimana u'âsi mono ãma wata za'ra da.

¹² Ãne te ãma tiwata za'ra: — Tô sena, wa ai'ãma si 're wawata u'âsi za'ra. Tô sena, aiwaihu'u pese uptabi di. Duré aiwẽ uptabi di. Duré asõprub uptabi di. Tô sena danhipai u uptabi dama aipire na te 're aihâimana mo. Tô sena, wa ãne ai'ãma wawata za'ra ni.

¹³ Tawamhã ãma wata za'ra pari, ma tô 24 na dama ipire norĩ siré hã misi ĩ'mazadanha, ãne: — E 'wam norĩ, õ norĩ hã, da'uza hâpa hâirã ré hã. E ma hawi we idasi'aba'ré.

¹⁴ Tawamhã asa wa tãma tinha, ãne: — Me. Wa hã te waihu'u õ di. Aima waihu'u pese di, a hã. Tawamhã ma tô oto ĩma waihu'u, ãne: — Ã norĩ hã ropsi'utõrĩzéb ãma, ti'ai ãma da te 're irobzépata za'ẽtẽ za'ra mono zéb 'rãsutu u, hâiba ré 're ihâimana za'ra mono. Da te dasima 're irob'manharĩ wasété za'ra mono zém na 're idasi'utõrĩ mono zém hawib õ di. Te te 're robzépata za'ẽtẽ za'ra mono nherẽ, hâiba ré we iwairébé, ã norĩ hã. 'Re ihâimana u'âsi mono ma, ma tô sihâiba 'ru za'ra, Pone'ẽrebâ wapru na dazada idâ'âzém na iwasété wi te te 're a'upsõi pese mono da, da'uza hã hâirã da, da te 're i'upsõi pese za'ra mono ne.

¹⁵ Tahawa, te ã norĩ hã 'Re ihâimana u'âsi mono simasisizém nho're aimasa, uza hâpa hâirã ré. Romhuri sahâri waihu'u ãna te te tãma 're romhuri u'âsi za'ra, isõrõwa ãma hã. Duré danhib'apito simasisizém na isãmra hã te za duré 'râwi ãma 're sisaprĩ u'âsi za'ra, i'uza hâpa hâirã ré norĩ ãma hã, i'rata za oto 're sãmra u'âsi za'ra mono wa.

¹⁶ Tawamhã ã norĩ hã mra te te 're sépata zahu za'ra mono õ di za oto. Duré te te 're 'rubu zahu za'ra mono õ di za oto. Bâdâ hã te te 're hâiba zata waihu'u za'ra mono õ di za oto. Duré aimawi rowa'ro ipire hã te te 're hâiba zata waihu'u za'ra mono õ di za oto.

¹⁷ E marĩ wa, te te 're robzépata waihu'u za'ra mono õ di za oto. Pone'ẽrebâ hã danhib'apito simasisizéb ãma isa hã te te 're 'madâ'â pese za'ra mono wa, te te 're robzépata waihu'u za'ra mono õ di za. A'ubuni wi, danhimizama da te 're i'madâ'â pese za'ra mono ne, te za te te 're 'madâ'â pese za'ra. Te za duré ub're u te te 're simroi u'âsi, â u'âsi u, da te 're âhuri mono wa, 're idanomro u'âsi mono zéb u. 'Re da'ru'ru mono wa, da'upĩ hã da te dasima 're i'u'õ za'ra mono ne, te za duré te te 're apawapto, pẽ'ẽzé ãna oto 're nomro u'âsi mono da.