Apocalipsi 4 - ꞌRe Ihâimana Uꞌâsi Mono Zadawa Wasuꞌu

Hâiwa ãma, 'Re ihâimana u'âsi mono ãma 're idawata za'ra mono zé wasu'u

¹ Taha za'u si, wa tô duré marĩ hã te ab'madâ'â, ĩnhotõ 'rowim ne. Hâiwa u wa tô rob'madâ. Te rob'madâ'â wamhã, wa tô 'madâ, hâiwa 'ridawa hã. Õne haré 'ridawa u'âsi na ihâiba hã. Tawamhã ni'wai mreme, mreme 'rãihâ na isimnhihârâzém hârâ ne te iwapari 'rata ne hã wa tô duré wapa. Ãne te ĩ'mahâ: — We ãwa aimorĩ hâimo, te aima awasu'u mono da, za 're iromhâimana mono zéb da hã ab'madâ'â mono da.

² Tawamhã 'Re ihâimana u'âsi mono pẽ'ẽzani hã ma tô duré ĩ'uihâ pi'ra, awa'awi. Te te ĩ'uihâ pi'rai wa, wa tô duré aimawi ĩhâiba, ĩhâiba waihu'u õ na. Tawamhã ma tô ĩzaprõ, hâiwa u. Hâiwa u, te te ĩzaprõni wamhã, danhib'apito simasisizé hã wa tô 'madâ. Ni'wa hã te ãma nhamra.

³ Tawamhã ãma isãmra hã te nasi hâibahai'ubuzi, ẽtẽ'ubuzi zarob'a uptabi ne hã. Duré ẽtẽ'ubuzi itobro'o préro'o ne hã te nasi ai'ubuzi. Tawamhã isimasisizé mana wawi, te tãiwaipo ne hã nasi ai'ubuzi, ẽtẽ'ubuzi ro'o uzé ne hã.

⁴ Tawamhã danhib'apito simasisizé mana wawi te dasimasisizé hã aimasa, 24 na danhib'apito norĩ te ne hã. Taha na te asimro, dama ipire norĩ 24 na ihâiba za'ra norĩ hã, 'Re ihâimana u'âsi mono nhimiroti na si 're isõpré pese mono norĩ hã. Uza hâpa hâirã ré te asimro. Ẽtẽ waipo pré oru 'manharĩ na da'rãzaza ré zama te asimro.

^5-6 Duré danhib'apito simasisizém hawi te tã si'ubuzi ne hã nasi ai'ubuzi, iwapsa'a zama, duré irãrã'ã zama. 'Rãsitõ hã te duré isõ're tiro'o za'ra, 7 na ihâiba hã, iro'o hâ hã. Ta norĩ hã 'Re ihâimana u'âsi mono pẽ'ẽzani nhimiromhurizéb zarina hã 7 na. Â poré hã te duré isõ're nomro. Â hã isarob'a uptabi, simhi isarob'a uptabi ne hã. Maparane si'uiwa na ropoto na ihâiba norĩ hã te duré 'râwi imana wawi si'uiwada za'ra. Ã norĩ hã ihâiba nho're niwĩ itob ahâ. Duré ibabarã niwĩmhã tob ahâ di duré. Ã norĩ hã tob ahâ wa, ihâiba upsibi ré norĩ hã wa tô 'madâ'â za'ra.

^7-8 Imorĩ'rada hã, hu'u zérépa 'rã ne i'rã hã. Duré isãna'remhã powawẽ iba'õmo 'rã ne i'rã hã. Duré si'ubdatõ ãma hã da'rã ne i'rã hã. Duré maparane si'uiwa na ãma hã si'õmo 'rã ne i'rã hã, hâiwi 're sisa'rei mono wa, i'rã ne hã. Ã norĩ hã 6 na ipaihi za'ra hã, ihâiba mono bâ. Duré ã norĩ hã ihâiba upsibi ré norĩ, tob ahâ wa, ihâiba na hã. Tawamhã bâtâ bâre duré mara bâre te tinho're za'ra, tinho're te te 're sahâri za'ra mono ãna, ãne: “Uburé Danhib'apito uptabi 'Re ihâimana u'âsi mono hã, 're iwasété mono õ. Siwaprosi 're iwasété waihu'u mono õ uptabi. Wẽ uptabi di. E ni'wa hã isipai u waihu'u pese na 're hâimana mono bâ. Õhõ si, siwaprosi iwaihu'u pese uptabi hã. Duréihã marĩ õ uptabi ré, ma tô 're hâimana u'âsi. Te za duré 're hâimana u'âsi, ãhã na zama, si'utõrĩ waihu'u ãna.”

⁹ Ãne te ã norĩ hã maparane si'uiwa na ropoto na ihâiba norĩ hã nasi ãma tiwata za'ra, danhib'apito simasisizém na isãmra ãma, 'Re ihâimana u'âsi mono ãma. Waihu'u pese uptabi wa, te nasi ãma tiwata za'ra, duré sõpru uptabi wa.

¹⁰ Nasi ãma wata za'ra siré, te nasi 24 na dama ipire za'ra norĩ hã danhib'apito simasisizém na isãmra nho're hi'rãtitõ ana, siré ãma wata za'ra da. Te duré nasi hi'rãtitõ si'ubumro sina, ti'rãzaza sani za'ra isõ're, tãma pire za'ra wa, ãma wata za'ra da.

¹¹ Ãne te nasi ãma tiwata za'ra: “Wanhib'apito, 'Re ihâimana u'âsi mono, a hã aiwẽ uptabi di. Aiwaihu'u pese di. Aiwaihu'u pese na ma tô i'aropoto mo. Asima iwẽ zarina ma tô uburé pese i'aropoto mo. Asima iwẽ zarina te oto uburé marĩ hã 're hâimana za'ra, asimipoto mono bâ. Tahawa, uburé i'aropoto mono zéb zarina tô ibâre, wa ai'ãma si 're wawata u'âsi za'ra.”