Apocalipsi 20 - ꞌRe Ihâimana Uꞌâsi Mono Zadawa Wasuꞌu

miu na Satanasihi ãma pawasisi ré iwahubzé wasu'u

¹ Tawamhã wa tô duré 'madâ, hâiwa ãma 'Re ihâimana u'âsi mono ma romhuri'wa hã. Hâiwa hawi te wei mo, ab're 'rehâ zô 'ridawazéb ré, duré isi'uwazi nhorõ rutu ipire ré zama.

² Tawamhã te te si'rai wi, ma tô ho'orã hâiba ne ropoto siwamnarĩ hã õne haré sa'ẽtẽ uptabi ti'â, siptete uptabi na. Ho'orã hâiba ne ropoto siwamnarĩ hã ta hã Satanasi, wanhitob'ru, duréihã wahi na isihâiba. Ta hã hâiwa ãma romhuri'wa hã te te sa'ẽtẽ âri wamhã, ma tô pawasisi, miu na wahub u pawasisi ré, 're hâimana mono da.

³ Taha da, ma tô oto time, ab're 'rehâ u. Taha wamhã, ma tô duré oto iré sito. Ma tô duré iré upto, miu na wahub u daro mono bâ sadawa nhipese na te te 're da'a'rãmi tõ mono da. miu na wahub 'rãsutu parip si, te za 'Re ihâimana u'âsi mono zadawa para tãma wasihu ni, suru na a'â 're morĩ da, te te sima iwẽzéb zarina.

⁴ Tawamhã wa tô duré 'madâ danhib'apito simasisizém ne na 're idasi'ubumroi mono zé hã. Ãma isi'ubumroi mono ma, ma tô 'Re ihâimana u'âsi mono hã tãma pisutu za'ra, dahâimanazém na te te 're ida'awaihu'u mono zéb zarina, dama pire na te te dama 're arowairébé mono da, isadawa para. Tawamhã wa tô duré 'madâ'â za'ra, 'Re ihâimana u'âsi mono zadawa wasu'u te te 're sazei pese za'ra mono 'ru te, da te 're i'rãnhihâri za'ra mono norĩ pẽ'ẽzani hã, tô sena na Zezusihi zazei'wa na dama 're siwasu'u za'ra mono 'ru te. Ta norĩ hã â hawi ropoto siwamnarĩ ãma 're iwata za'ra mono õ. Duré ihâiba 'manharĩ na romhâiba ãma 're iwata za'ra mono õ. Duré â hawi ropoto siwamnarĩ nhisi na i'uihâ ui'éré za'ra õ, duré isib'rata ui'éré za'ra õ. Ta norĩ hã ma tô oto hâiba ré apâ 're hâimana za'ra. Ma tô tihâiwa'utu za'ra. Tawamhã Cristuhu siré te oto dama pire na te te dama 're roti za'ra, Satanasi hã pawasisi ré, miu na ãma iwahub u.

⁵ Ã hã, 're idahâiwa'utu 'rata za'ra mono zé. Tawamhã miu na wahub 'rãsutu parip si, ma tô daro mono bâ uburé pese 're idadâ'â za'ra mono hã tahâiwa'utu za'ra ni, dahâiwa'utu 'rata na 're idahâiwa'utu za'ra mono õ norĩ hã. Ãne wa tô te te ab'madâ'â.

⁶ Tawamhã 're idahâiwa'utu 'rata za'ra mono norĩ ma hã, tãma 're rowẽ uptabi za'ra mono di za. Ta norĩ hã 're idadâ'â zahu za'ra mono ne, unhama ro'o u'âsi u, da te 're idanhamra za'ra mono norĩ zu 're sisisi mono õ di za. miu na wahub u te za 'Re ihâimana u'âsi mono ma sasedoti na 're hâimana za'ra, duré Cristuhu ma zama. Te za duré isiré dama pire na te te dama 're roti za'ra, miu na wahub u.

Satanasi, unhama ro'o u'âsi u, da te imezé wasu'u

⁷ Tawamhã miu na wahu 'rãsutu wapsi, te za Satanasihi ma wasihu ni, 're isa mono zém hawi oto watobro da.

⁸ Tawamhã watobro wamhã, daro mono bâ te za oto te te 're da'a'rãmi, sadawa nhipese na. Ti'ai ãma hã darom nhisi zahuré hã maparane za oto. Gogui na duré Magogui na darom nhisi zahuré hã. Tame te za Satanasi hã da'rã'õtõ, dasi'wapé da. Da'ahâ uptabi na te za da'a'rã'õtõ. Â poré zaihâ na supara 're isimi'wara mono ne, da'ahâ uptabi di za.

⁹ Tawamhã daro mono bâ te za oto dasiwi romnhitom ni. Da te dasiwi romnhito wamhã, te za 'ri nho'u hã dasiwi ubu ni, 'Re ihâimana u'âsi mono te te 're isawi mono hã, isib'a'uwẽ norĩ, iwa 're ihâimana za'ra mono zé hã. Ta norĩ hã da te dasiwi uprosi da, te za dasiwi ubu ni. Tane nherẽ, 'Re ihâimana u'âsi mono hã te za hâiwa hawi uzâ hã sãmra. Te te sãmra wamhã, te za ãma da'uprosi, unhama ro'o na.

¹⁰ Tawamhã Wa'uburé hã sadawa nhipese na te te 're ida'a'rãmi mono hã te za me ni, unhama ro'o u'âsi u, ẽtẽ ro'o nhizédé uzé pire u. Â hawi ropoto siwamnarĩ norĩ, da te iwabzurizéb u te za me ni. Tawamhã tame te za oto te te 're robzépata za'ẽtẽ u'âsi za'ra, õne u'âsi.

Da te 're idaza'ré za'ra mono zé 'rãsutu wasu'u

¹¹ Tawamhã wa tô duré 'madâ, danhib'apito simasisizé irã hã, isa'ẽtẽ uptabi hã. Ãma isãmra hã wa tô duré 'madâ. Tawamhã uburé pese hã, ma tô ti'a hã ai'utõ, duré hâiwa zama. Taha wamhã, marĩ õ uptabi di oto. Tahawa, da te 're 'madâ'â zahuré mono õ di oto, ti'a norĩ hã hâiwa me. Tâibâ ma tô ai'utõrĩ pese zahuré.

^12-13 Tawamhã wa tô duré 'madâ'â za'ra, 're idadâ'â za'ra mono hã, dama ipire norĩ hã, duré dama iwapu norĩ hã. Da'upsãtã mono bâ, te aihĩni pese danhib'apito simasisizém nho're aimasam ni. Â poré mono bâ, â na 're idasi'utõrĩ mono norĩ zama te aimasam ni, adâ 're ihâimana za'ra mono zém hawib zama. Tawamhã ibaihâ ahâ na ma tô sõzi za'ra ni, ti'ab ré uburé marĩ, da te 're i'manharĩ za'ra mono zém na rob'ui'éré ré hã, marĩ iwẽ na, duré marĩ iwasété na zama. Ma tô duré sõzi ibaihâ hã, 'Re ihâimana u'âsi mono 'rata za rowẽ na 're idahâimana u'âsi za'ra mono norĩ nhisi ré hã. Tawamhã ibaihâ na da te 're i'manharĩ wẽ za'ra mono zéb ui'éré zarina, ma tô da'ãma rowairébé za'ra ni. Da te 're i'manharĩ wasété za'ra mono zéb ui'éré zarina zama, ma tô aihĩni pese da'ãma rowairébé za'ra ni.

^14-15 Tawamhã ni'wam norĩ hã ibaihâ na 're ihâimana u'âsi za'ra mono norĩ nhisi, 're isimi'wara mono zém na isisi isimi'wara õ norĩ hã ma tô sãmra ni, unhama ro'o u'âsi u. (Ã hã unhama ro'o u'â hã maparane ãma 're idadâ'â zahu za'ra mono zé, te wasu'u.) 'Re idadâ'â za'ra mono zé hã tâibâ oto. Duré adâ hã aré 're ihâimana za'ra mono zé hã, tâibâ duré oto. Ma tô ab're 're sãmra ni, uburé adâ'â norĩ hã, unhama ro'o u'âsi u. Tahawa, tâibâ oto, adâ 're ihâimana za'ra mono zé hã.