Apocalipsi 13 - ꞌRe Ihâimana Uꞌâsi Mono Zadawa Wasuꞌu

Ropoto siwamnarĩ pipa zahuré wasu'u, â 'rowimhã, duré ti'ai 'rowimhã

¹ Tawamhã wa hã wa tô duré 'madâ, â 'rowi ropoto siwamnarĩ hã â hawi watobro ré. Ihâiba misi nherẽ, 7 na i'rã hã. Duré 10 na powawẽ õmo ne, i'õmo mono hã. I'õmo na hã danhib'apito 'rãzaza si'ubuzi ne ré, te õmo 'rãzaza ré aimasa, 10 na. Duré i'rãi mono na rob'ui'éré za'ra ré hã aiwa 'Re ihâimana u'âsi mono newa, 'Re ihâimana u'âsi mono wamri na isiwaptẽrẽ ui'éré wasédé hã.

² Duré ihâiba hã, hu'u hâiba ne. Ipara hã robzahi para ne hã ursu para ne. Duré isadai'ré hã, aiwa hu'u zérépa zadai'ré ne, isadai'ré hã. Tawamhã ho'orã hâiba ne ropoto siwamnarĩ hã, Satanasi hã ma tô tinhiptetezé hã tãma tisõ, isadawa para siré te te da'ãma 're romhuri wasété zahuré mono da, isimiromhuri waihu'u pese zém na.

³ Tawamhã misi i'rãi ãma i'u'a ré hã da te wĩrĩ da, da te i'u'a ne hã. Tane nherẽ, i'wa're hã ma tô tãma dârâ. Tahawa, daro mono bâ uburé 're idahâimana za'ra mono hã ma ãma tatob'uzu za'ra ni. Ma duré ãma sasõmri za'ra ni, isimiwada'uri na hã.

⁴ Ma tô duré ho'orã hâiba ne ropoto siwamnarĩ ãma tawata za'ra ni aihĩni, â hawi ropoto siwamnarĩ ma, tinhimi'manharĩ waihu'u pese zé hã te te tãma sõmri wa. Tane ma tô duré â hawi ropoto siwamnarĩ ãma tawata za'ra ni. Ãne te ãma tawata za'ra ni: — E 'wa hã isine hâimana waihu'u pese bâ. E 'wa hã duré isiptete wabzu'wa pâ.

⁵ Tawamhã â hawi ropoto siwamnarĩ hã, te 'Re ihâimana u'âsi mono hã wa'ẽi wasété, 'râwi waihu'u pese na sina wata na dâ'âsina. 'Re ihâimana u'âsi mono te te sadawa uwati õ di. Ma tô duré tãma waprosi, dama pire na te te da'awada'uri wasété mono da a'â, 42 na a'amo isisõré mono u.

⁶ Taha ré, ma tô 'Re ihâimana u'âsi mono hã wa'ẽi wasété tô, isisi na zama. 'Re isãmra mono zém na ma tô duré timreme wasété, duré hâiwa ãma 're ihâimana za'ra mono norĩ ãma zama.

⁷ Tawamhã 'Re ihâimana u'âsi mono hã ma tô duré tãma waprosi, â hawi ropoto siwamnarĩ ma, isib'a'uwẽ te te 'wapé za'ra da, te te ãma ai'uté za'ra da, isib'a'uwẽ norĩ ãma. Ma tô duré tãma waprosi, simiwada'uri wasété nhiptete sina te te 're da'awada'uri mono da, dapoto mono bâ, duré damreme sipo'o mono bâ 're idahâimana za'ra mono hã.

⁸ Tawamhã ti'ai ãma daro mono bâ 're idahâimana za'ra mono norĩ hã te za ãma 're dawata za'ra, da'ahâ uptabi na. Tane nherẽ, ni'wam norĩ hã ãma 're wata za'ra mono õ di za, ibaihâ na 're idahâimana u'âsi za'ra mono norĩ nhisi, 're isimi'wara mono zém na isisi 're isimi'wara mono norĩ hã. Duréihã 'Re ihâimana u'âsi mono hã te te ropoto mono õ ré, danhisi na te te ãma irob'ui'éré za'ra hã ã ibaihâ hã, Pone'ẽrebâ, da te dasiwi iwĩrĩ te hã.

⁹ Ma'ãpé, aipo're 'repu'u ré za'ra wa'aba hã, ãhã wapari pese za'ra wa'aba.

¹⁰ Ni'wa hã isazei'wai wamhã, dazazéb 're da te 're séme mono da, 'Re ihâimana u'âsi mono te te dawi 're sawi za'ra mono õ wamhã, te za tô da te 're sé. Duré sib'ézé 'wapa na da te 're simroi mono da, 'Re ihâimana u'âsi mono te te dawi 're sawi za'ra mono õ wamhã, te za tô da te 're simro. Ãne da nherẽ, te za sipizari ãna ãma 're nomro, 'Re ihâimana u'âsi mono ãma.

¹¹ Tawamhã wa tô duré 'madâ ropoto pipa hã, ti'ai hawi iwatobro hã. Maparane i'u hã, pone'ẽrebâ 'rare õmo ne hã. Tane nherẽ, imreme hã ho'orã hâiba ne ropoto siwamnarĩ mreme ne, imreme hã.

¹² Tawamhã â hawi ropoto siwamnarĩ nho'a te te 're romhuri, ti'ai hawi iwatobro hã. Isadawa para te te 're da'awada'uri pese, ti'ai ãma daro mono bâ 're idahâimana za'ra mono norĩ hã â hawi ropoto siwamnarĩ ãma 're dawata za'ra mono da, i'rãi ãma i'u'azé tãma isitob ãma.

¹³ Tawamhã ti'ai hawi ropoto pipa hã ma tô te te 're aromhõsi, marĩ iwaihu'u'õ na, dama isa'rese'õ na. Hâiwa hawi unhama ro iwaptã'ã na ma tô datõmo nho'a romhõsi.

¹⁴ Ãne 'Re ihâimana u'âsi mono hã ma tô tãma waprosi, â hawi ropoto siwamnarĩ nho'a te te 're romhõsi mono da. Ãne ma tô tinhimiromhõsi na dama 're sadawa nhipese, 'Re ihâimana u'âsi mono zadawa para newa, ti'ai ãma daro mono bâ 're idahâimana za'ra mono norĩ ma hã. Ma tô duré dama ti'ru, romhâiba, da te dasiwi 'manharĩ da, â hawi ropoto siwamnarĩ hâiba na, sib'ézé 'wapa na da te dasiwi wĩrĩ nherẽ, apâ ihâiwa'utu hâiba na.

¹⁵ Tawamhã romhâiba hã da te dasiwi 'manharĩ parimhã, ma tô 'Re ihâimana u'âsi mono hã ti'ai hawi ropoto pipa ma waprosi, romhâiba ma, ipẽ'ẽzani te te tãma sõmri da, mreme ré oto 're morĩ da, duré romhâiba ãma 're idawata za'ra mono õ norĩ hã te te 're anhimroi mono da, ti'ai hawi ropoto pipa hã.

¹⁶ Tawamhã ti'ai hawi ropoto pipa hã ma tô te te da'awada'uri, da te dasima waprosi za'ra da, ni'wam norĩ hã isib'rata nhimire niwĩ da te sib'rata ui'éré za'ra mono da, duré ni'wam norĩ hã i'uihâi mono na da te uihâ ui'éré za'ra mono da. Tawamhã ma tô da te a'ui'éré tô, daro mono bâ 're idahâimana za'ra mono hã, dama iwapu mono bâ duré dama ipire mono bâ, duré danhibro pese mono bâ, duré danhibrob'õ mono bâ, duré dapawa'âbâ ãna dawada'uri zarina si da te dama 're iromhuri za'ra mono bâ, duré dawada'uri ãna dasi'uihâ na 're idahâimana za'ra mono bâ. Da'upsãtã mono bâ ma tô da te da'ui'éré za'ra.

¹⁷ Tawamhã danhib'rata ui'éré õ nherẽ, da'uihâ ui'éré õ nherẽ, da te 're rob'uipra waihu'u za'ra mono õ di. Duré da te 're rowede waihu'u za'ra mono õ di. Â hawi ropoto siwamnarĩ nhisi na da'uihâ ui'éré hã, duré danhib'rata ui'éré hã, isisi za'ratazé hã.

¹⁸ A norĩ wa'wa hã ai'mai'rãiwaihu'u pese aba wamhã, ma'ãpé isisi za'ratazéb ui'éré hã asiwi 'maiwaihu'u aba, iwasu'uzé hã. 666 na isisi za'ratazé hã danhisi za'ratazém na isisi hã te wasu'u.