Zezusihi zadawa wasuꞌuꞌwa norĩ nhimiromhuri na robꞌuiꞌéré 26 - ꞌRe Ihâimana Uꞌâsi Mono Zadawa Wasuꞌu

Paulu hã apito Agripaha nho're, dama isiwasu'uzé wasu'u

¹ Tawamhã apito Agripa ma tô Pauluhu ma tinha, ãne: — Ãhã na, asi'uihâ na te za wama asiwasu'u, aihâimanazém na. Ãne wa, Paulu hã ma tô tinhib'rada hã dama wẽ, apito Agripaha ma siwasu'u da. Taha pari, te ãne tãma siwasu'u oto danho'a:

² — Apito Agripa, ĩto ti ãhã na hã, asõ'a za oto aima ĩsiwasu'u wa. Zudeu norĩ hã ĩwasédé hã te te ĩ'ãma ihiri za'ra zém na wa za ĩsiwasu'u na wa'rã.

³ Zudeu norĩ hã 're inomro mono zé hã aima waihu'u pese di. Isisada'rãmi za'ra zé hã, aima waihu'u pese di duré. Tahawa, wa aiwi rowaptẽ, asimi'ẽ na ĩwapari da.

⁴ — Ĩprédu wi, 're ĩhâimana mono zém na tãma ĩwaihu'u pese za'ra di, zudeu norĩ ma hã. Duré ĩrob ãma 're ĩhâimana mono ré, ma tô siwi ĩwaihu'u, 're ĩhâimana mono zém na hã. Duré Zeruzalẽ ãmab zama hã ma tô duré siwi ĩwaihu'u, tame 're ĩhâimana mono ré.

⁵ Farizeu norĩ siré, wa tô 're ĩhâimana. Wasiré zudeu norĩ hã Mozésihi nhimi'ui'éré zarina sipai ãna 're ihâimana za'ra mono zém nhipai u 're iwahâimana za'ra mono zé hã, wasiré farizeu norĩ hã. Ãne isãna'rata hawimhã, 're ĩhâimana mono zé hã. Zudeu norĩ hã sena na te te aima ĩwasu'u ze za'ra 'wa'âhã, ãne na hã te aré aima ĩwasu'u wẽ za'ra.

⁶ Dadâ'â nherẽ, apâ te te 're ida'ahâiwa'utu mono zéb zô, wa 're ĩnhimipari u'âsi, 'Re ihâimana u'âsi mono, wahi'rata norĩ ma, te te iropisutu zô. Taha zarina, ma tô zudeu norĩ hã ã bâtâ na ĩwasédé hã ĩ'ãma hiri za'ra.

^7-8 Wahi'rata norĩ, 12 na ihâiba norĩ nhihudu mono bâ, wa wanhimi'ẽ na ãma 're wawata za'ra, 'Re ihâimana u'âsi mono ãma hã. Rowa'a na wa ãma 're wawata za'ra, duré bara na zama. 'Re ihâimana u'âsi mono te te wama iropisutu zô, wa wanhimipari sina ãma 're wawata u'âsi za'ra. Õhõ zô 're ĩnhimipari mono wa, te zudeu norĩ hã ĩwasédé hã ĩ'ãma sa'ra za'ra. Ĩwapari'wa norĩ, e marĩ wa, te 'Re ihâimana u'âsi mono ãma 're irosa'rata upa za'ra wa'aba mo, te te 're ida'ahâiwa'utu mono zéb da hã, tãma iwaihu'u õ newa.

⁹ — Wa tô aré ĩsina rosa'rata, Zezusihi zazei'wa norĩ ãma te 're rowasutu u'âsi mono da, Nazaré ãma aré 're isãmra mono zazei'wa norĩ ãma.

¹⁰ Tawamhã Zeruzalẽ ãma ma, wa tô ãne hã te tãma 're 'manharĩ za'ra. Sasedoti ipire norĩ zadawa para, wa tô te 're 'maza, dazazéb 're, 'Re ihâimana u'âsi mono nhib'a'uwẽ norĩ hã. Duré da te dasiwi 're simroi mono da, da te dasima 're hâiba za'ré za'ra mono wamhã, wa tô duré ãma te 're dazaze za'ra.

¹¹ Tahawa, wa tô te ãma 're arowasété, rowahutuzé mono bâ, Zezusi hã te te siwi 're wẽ'õ za'ra mono da, isazei'wa norĩ hã. Ta norĩ zada ĩzahi uptabi wa, wa tô 'ri nho'õmo mono bâ te ãma 're rowasété za'ra, duré darob amoi ãma zama.

¹² — Taha da, nimahã bâtâ na wa tô duré mo Damascu u, isazei'wa norĩ zô, ãne hã te tãma 'manharĩ za'ra da. 'Re ihâimana u'âsi mono ma, da'ãma romhuri'wa ipire norĩ hã ma tô ĩzatõrĩ za'ra. Rob'ui'éré ma tô ĩma sõmri za'ra, isazei'wa norĩ ãma te 're rowasété za'ra mono da, isadawa parab za'ra.

¹³ Apito, tane nherẽ, ma tô aimawi ĩma tiromhâiba. Damascu u ĩmorĩ ré, abzuma wa'wa ma tô rowa'a za'ẽtẽ uptabi hã ĩma ai'ubuzi, hâiwa hawi. Bâtâ nhimirowa'a nhipai u, rowa'a za'ẽtẽ uptabi na. Ĩsiré isi'aba'ré norĩ uwaibaba zama ma tô ai'ubuzi.

¹⁴ Tawamhã aihĩni wa tô warere'e ni, ti'ai wa. Wa hã ni'wai mreme hã wa tô wapa. Ãne te ãhã wamhã ĩma tinha, hebreu norĩ mreme na: “Saulu, Saulu, e marĩ wa, te ĩwi 're irowasutu u'âsi mo. Aipẽ'ẽ 'remhã ma tô 're asi'u'a u'âsi mo, powawẽ hã wedehu 'rã'wa na da te zusi wa, te te sina ime hã, isi'u'a ne.”

¹⁵ — Taha wamhã, wa tô asa 'mahâ, ãne: “Apito, e 'wa hã a hã.” — Tawamhã Wanhib'apito, ma asa ĩzada'â ãne: “Wa hã Zezusi, te ĩwi 're irowasutu u'âsi mo.

¹⁶ Ma'ãpé aiwahutu, hâiwi asab da. Wa we aima ĩsihâi'ré, te ĩsima aipisutu da, ĩma romhuri'wa da. Ã bâtâ na ĩ'madâ'âzém na te za dama 're ĩwasu'u u'âsi mo. Duré zahadu wapsi te aima iwaihu'uzém na zama, te za dama 're ĩzadawa wasu'u u'âsi mo.

¹⁷ Wa hã wa za te 're ai'madâ'â, asiré zudeu norĩ, isahi norĩ wi, te 're asõ'reptui mono da, duré zudeu'õ norĩ wi, te 're asõ'reptui mono da zama. Zudeu'õ norĩ tẽme, wa za oto asatõ.

¹⁸ Datob'a ne 're danomro mono wa, da te 're idato pese za'ra mono ne, te za 'Re ihâimana u'âsi mono nhimiroti na 're ipo're pu'u za'ra mo, zudeu'õ norĩ hã. Robra na 're inomro mono hã te za 're i'awaibui mo, rowa'a na oto 're nomro mono da, ta norĩ hã. Satanasihi nhiptetezém hawi te za 're i'apizari mo, 'Re ihâimana u'âsi mono niwĩ 're nomro mono da oto, te te sina 're ĩ'umnhasi za'ra mono zéb zarina, 'Re ihâimana u'âsi mono hã iwasédé hã te te tãma 're apari mono da, duré ãma 're sib'a'uwẽ za'ra mono da oto dame.” Tawamhã Paulu te duré siwasu'u, ãne:

Paulu hã tinhimiromhuri na isiwasu'uzé

¹⁹ — Apito Agripa, tahawa, ĩnhotõ 'rowim ne, hâiwa hawi te i'madâ hã te rẽme õ di.

²⁰ Damascu ãma uimrehẽne wa tô Zezusihi zadawa wasu'u na hã dama ãma sãna'rata. Taha parip si, Zeruzalẽ ãma wa tô duré dama ãma rowasu'u. Taha parip si, wa tô duré Zudéa ãma dama sadawa wasu'u, zudeu norĩ ma, zudeu'õ norĩ ma zama. Ta norĩ hã tiwasédé hã te te 're rẽme za'ra mono da, duré 'Re ihâimana u'âsi mono niwĩ 're nomro wẽ mono da, wa tô te tãma ãma 're rowasu'u za'ra, tô sena tiwasété wi 're isipizari za'ra mono na, da te 're waihu'u za'ra mono da.

²¹ Taha 'ru te, ni'wam norĩ hã zudeu norĩ hã ma tô siwi ĩ'â, 'Re ihâimana u'âsi mono nhorõwa ãma, 'ri 'wawi wa'ra 're, ĩnhamra ré. Ãhã wamhã, ma aré siwi ĩwĩ.

²² Tane nherẽ, 'Re ihâimana u'âsi mono hã ma tô te te 're ĩpawaptob u'âsi. Tahawa, ã bâtâ na ĩhâiba ré, wa zahadu 're ĩhâimana. Tahawa, zahadu wa nasi dama sadawa wasu'u, dama iwapu norĩ ma, duré dama ipire norĩ ma zama. Uburé Mozésihi nhimirowasu'u zarina, duré 'Re ihâimana u'âsi mono zadawa 'mahârâ 'rata 'wa norĩ nhimirowasu'u zarina, wa tô te dama 're sadawa wasu'u. Ĩnhimizadawa wasu'uzém na ãma ĩsipai õ di. Romhâ ré ma tô ta norĩ hã te te dama 're wasu'u za'ra, ãne:

²³ “Danho'reptui'wa da, 'Re ihâimana u'âsi mono te te ipisudu hã te za robzépata za'ẽtẽ. Te za dasiwi wĩrĩ ni. Dadâ'â nherẽ, apâ te te 're idahâiwa'utu mono zéb da na te za sãna'rata. Tawamhã te za dama waihu'u, rowa'a na 're idanomro wẽ mono zé hã. Apâ ihâiwa'utuzéb za'u si, te za ãne hã zudeu norĩ ma waihu'u za'ra, zudeu'õ norĩ ma zama.” Ãne ma tô romhâ ré dama sadawa wasu'u za'ra. Taha na wa tô duré wa hã dama rowasu'u.

²⁴ Ãne siwasu'u ré, ma tô apito Festu hã sadawa 'razâ. Mreme 'rãihâ na te tãma tinha, ãne: — Paulu, ma tô aiwamna, ai'rãzadâ'â wa. Asimirosa'rata ahâ wa, ma tô ai'rãsiwamna.

²⁵ Tawamhã Paulu ma te asa ãma tãma wa'rã, ãne: — Ĩnhib'apito, mare di. Ĩsiwamnarĩ õ di. Sena na wa tinha ĩmreme na hã. Tahawa ĩmreme hã tô õhõ u'â ĩmreme wẽ di.

²⁶ Tawamhã apito Agripaha ma, te duré tinha, ãne: — Apito Agripa, Zezusi hã ti'ai ãma 're morĩ ré hã uburé marĩ hã tãma 're iromhâimana mono zém na hã aima waihu'u pese di, idâ'âzém na hã duré ihâiwa'utuzém na zama. Da'ahâ na ma tô ãma 're danhopré. Tahawa, apito Agripa, a zama ma tô iwaihu, uburé Zezusihi wasu'u hã te aima iwasu'u hã. Tahawa, sena na, wa aima ĩsiwasu'u ĩpahi ãna, waihu'u da.

²⁷ Apito Agripa, e 'Re ihâimana u'âsi mono zadawa 'mahârâ 'rata 'wa norĩ nhimirowasu'u hã sena na ma tô isaze. Ãté ma tô isaze tô. Ãne na wa tô ĩsina aiwaihu'u.

²⁸ Tawamhã apito Agripa, ma tô mreme to na Pauluhu ma tinha, ãne: — E tane na duréi ĩma rowasu'u bâ, wa za bété ãma asaze, Cristu hã te saze da.

²⁹ Tawamhã Paulu te asa duré tãma tinha, ãne: — Ĩmreme 'rutu na niha wamhã, ĩmreme pa na te aima rowasu'u wamhã, tô marĩ õ di. Ãhã si ipire hã, ĩsine 're isazei pese mono da hã. Taha da, wa 'Re ihâimana u'âsi mono ma ai'ãma 're ĩmreme u'âsi, uburé ã bâtâ na ĩwapari'wa norĩ ãma zama, te ĩsima wẽ õ nherẽ, Cristu hã saze za'ra wa'aba 'ru te, ĩsine da te aipawasisi za'ra wa'aba da hã.

³⁰ Tawamhã apito Agripa hã duré apito Festu hã duré Berenisi hã, duré uburé isiré isi'ubumro norĩ zama ma tô tiwahutu za'ra aihĩni.

³¹ Tahawa te oto tiwi ai'aba'ré uburé. Tiwi si'aba'ré za'u si, ma tô sima ãma nharĩ za'ra, ãne: — Õ hã aibâ hã marĩ iwasédé hã te te 'manharĩ õ di, da te dasiwi iwĩrĩzéb da hã, niha wamhã, dazazéb 're, da te dasiwi isẽrẽ da hã.

³² Tawamhã Agripa te tãma tinha, ãne Festuhu ma: — Õ hã, aibâ hã Roma ãma apito Sézaha nho're sab da, te te rowaptẽrẽ õ 'wa'âhã, wa aré tãma rowairébé za'ra ni, apâ 're morĩ da. Tane nherẽ, waihu'u õ di oto.