Zezusihi zadawa wasuꞌuꞌwa norĩ nhimiromhuri na robꞌuiꞌéré 25 - ꞌRe Ihâimana Uꞌâsi Mono Zadawa Wasuꞌu

¹ Tawamhã Festu hã tame si'apito wamhã, bâdâ si'ubdatõ ãma ne pari, te oto mo Zeruzalẽ u, Sézaréa hawi.

² Zeruzalẽ u wisi wamhã, sasedoti ipire norĩ hã duré zudeu norĩ ma, roti'wa norĩ zama ma tô tãma wasu'u za'ra Paulu hã, wasété ré ne.

³ Ma tô tiwi waptẽrẽ za'ra, Paulu hã te te tãma satõrĩ za'ra da, Zeruzalẽ u. Ta norĩ hã bâdâdi wãi wa, te te siwi wĩrĩ da, aré ãma siwada'uri za'ra na dâ'âsina, ma tô tiwi waptẽrẽ za'ra, Zeruzalẽ u te te satõrĩ da.

⁴ Tawamhã apito Festu hã ma tô asa tãma nharĩ za'ra, ãne: — Paulu hã Sézaréa ãma te nhamra dazazéb 're, da'wapéi'wa norĩ hã te te siwi 'madâ'â pese za'ra da tame. Tamomomhã wa za apâ morĩ su.

⁵ Tahawa, dama imreme pire norĩ hã asiwa'wa hawi, asiwi satõrĩ za'ra wa'aba za, ĩme si'aba'ré da. Iwasédé hã te te ãma hiri ze za'ra wamhã, tamep si te za tãma nharĩ za'ra, ĩnho'a.

⁶ Tawamhã bâdâ hã 8 na ãté niwamhã 10 na ma tô ãma ne, Zeruzalẽ ãma sãmra ré hã, apito Festu hã. Taha pari, ma tô mo apâ, Sézaréa u. Wisi wamhã, awẽ te oto nhamra, dapa'uwati'wa simasisizém na. Tawamhã Pauluhu zô ma tô da'mazatõ, te te itẽme siwi saprõni da.

⁷ Tawamhã Paulu hã oto itẽme wisi wamhã, zudeu norĩ hã Zeruzalẽ hawi isi'aba'ré norĩ hã ma tô siwi uirĩ. Tahawa, apito ma, ma tô wasu'u wasété uptabi za'ra, Paulu hã. Tane nherẽ, tô sena na iwasédé hã te te siwi ãma sa'ra waihu'u õ di, zudeu norĩ hã.

⁸ Tawamhã Paulu hã ma tô apito ma siwasu'u, ãne: — Zudeu norĩ te, roti wa'rãmi, ĩwasédé hã te 'manharĩ õ di. Mare di. 'Re ihâimana u'âsi mono nhorõwa 'ri ãma duré ĩwasédé hã te 'manharĩ õ di. Duré Roma ãma apito Sézaha ma, marĩ hã te 'manharĩ õ di, danhipai u danhib'apito ma hã.

⁹ Tawamhã apito Festu hã ãne te sadanha, zudeu norĩ ma, imreme te te tãma ãma uwaimrami za'ra da, tãma irowẽ za'ra zéb da: — E Zeruzalẽ u aimorĩ da hã, aima wẽ di, tame da te dasiwi asadanharĩ za'ra da, ĩnho'a.

¹⁰ Tahawa ma tô Paulu asa tãma tinha, ãne: — Mare di. Ĩmorĩ da hã, te ĩsima rowẽ õ di. Roma ãma apito Sézaha zadawa para, te ãme 're ida'apa'uwati mo. Tahawa, ãmep si te za siwi ĩzadanha, ĩhâimanazém na. Marĩ iwasédé hã te 'manharĩ õ di, zudeu norĩ ma hã. Ãne na hã aima ĩwaihu'u pese di, a hã.

¹¹ Marĩ iwasédé hã te 'manharĩ 'wa'âhã, da te dasiwi ĩwĩrĩ da hã, aré ĩsisawi õ di. Tane nherẽ, ĩwasédé hã te te siwi ĩ'ãma isa'ra hã tô senai õ wamhã, ni'wa hã te te tãma ĩza'réi waihu'u za'ra õ di. Tahawa, Roma u si te za ĩzatõ, apito Sézaha nho're ĩzab da, taha ma si ĩsiwasu'u da, tame.

¹² Tawamhã Pauluhu mreme hã te te wapari wamhã, apito Festu hã isimiroti na ãma isime za'ra norĩ me, ma tô sima ãma roti za'ra. Taha parip si, ma tô asa Pauluhu ma tinha, ãne: — Ma tô ĩma asi'ru, Roma ãma apito Sézaha u te asatõrĩ da. Tane tô. Te za tô itẽme aimo.

Paulu hã Apito Agripaha nho're isabzé wasu'u, Berenisihi nho're me

¹³ Tawamhã suru na ãma ronomro pari, apito Agripa norĩ hã ma tô tihidiba me aimasisi zahuré, Sézaréa u. Berenisi na ihidiba nhisi hã. Apito Festu hã te te sabu zahuré da, ma tô itẽme aimasisi.

^14-15 Tawamhã tame simasisi ré, bâdâ hã umro na ãma ne pari, ma tô apito Festu hã apito Agripaha ma wasu'u, Paulu hã. Te tãma tinha, ãne: — Ãme aibâ hã te za, dazazéb 're, apito Peresi hã sisa'u te te dama i'ru hã, dazazéb 're, hâimana u'âsi da, isa'u. Tawamhã Zeruzalẽ u ĩmorĩ wamhã, sasedoti ipire norĩ hã duré zudeu norĩ ma roti'wa norĩ me, ma tô ĩma wasu'u za'ra, Paulu hã wasété ré ne. Te dama hâiba 'ru da, ma tô iwasédé hã siwi ãma tihi.

¹⁶ Tane nherẽ, wa tô asa tãma nharĩ za'ra, ãne: “Mare di. Wa norĩ hã, romanu norĩ hã ãne wa te 're 'manharĩ za'ra mono õ di. Dasi'wawi 're dasimapa za'ra mono õ ré, wa te 're dahâiba za'réi waihu'u za'ra mono õ di. Te te dama 're inharĩ za'ra mono norĩ nho'a 're dasimasa mono wapsi, te za a'â 're dasiwasu'u za'ra, sena zô.” Ãne wa tô asa tãma nharĩ za'ra, sasedoti norĩ ma.

¹⁷ Tawamhã ta norĩ hã ma tô we ĩsiré ai'aba'ré. Tawamhã awẽm na hã awa'awi wa tô sô nhamra, dapa'uwatizéb ãma. Wa tô dama ti'ru, da te we ĩtẽme saprõni da, aibâ hã.

¹⁸ Tawamhã tãma inharĩ'wa norĩ hã ma tô sada aimasa. Tane nherẽ, marĩ na te te wasu'u wasété za'ra õ di. Iwasété uptabi newa, wa tô aré ãma rosa'rata. Tane nherẽ, ãnei õ di oto, ĩnhimirosa'rada hã.

¹⁹ Zudeu norĩ nhimizazezém na sisada'âbâ za'ra wa, marĩ hã iwasété na te te ãma hiri za'ra neza. Aibâ hã Zezusi na isisi hã dâ'â nherẽ, apâ ihâiwa'utu na te te dama 're wasu'u u'âsi mono wa, ma tô iwasété na tãma nharĩ za'ra.

²⁰ Tahawa, wa hã isimi'manharĩzéb zô te pibui waihu'u õ di, ãmemhã. Tahawa, wa tô sadawa pibu aré, Zeruzalẽ u morĩ da, te te sima rowẽ zô, tame da te dasiwi sadanharĩ da.

²¹ Tane nherẽ, ma tô ĩwi rowaptẽ, Roma ãma apito Sézaha u si te satõrĩ da, duré da'wapéi'wa norĩ nhib'rata sãmra da a'â, tamomo te satõrĩ õ ré. Tahawa, wa tô dama ti'ru, da te dasiwi ãma ropti da, ãme sãmra da a'â Paulu hã, apito Sézaha u te satõrĩ õ ré.

²² Tawamhã mreme parip si, Agripa te tãma tinha, Festuhu ma, ãne: — Aibâ mreme hã te wapari hâ, wa ĩsima wẽ. Tawamhã Festu te asa tãma tinha, ãne: — Tane tô, awẽpsi te za iwapa.

²³ Tawamhã awẽm na si apito Agripa norĩ hã Berenisihi me, ma tô tizasi zahuré, apito te, dasi'rã'õtõzéb u. Uza wẽ ré, duré sima sipese na, ma tizasi zahuré, dama pire wẽ te, ãma datob'uzu za'ra da. Da'wapéi'wa norĩ nhib'apito norĩ me ma tô asisi, 'ri nho'õmo ãma dama ipire norĩ me zama. Tawamhã apito Festu hã ma tô Paulu hã dama ti'ru, te te itẽme siwi saprõni da.

²⁴ Te te itẽme siwi saprõni wamhã, Festu hã ma tô dama tinha, ãne: — Apito Agripa, duré ãme 're asimroi wa'aba mono norĩ, ĩwapari za'ra wa'aba. Ãhãta te za, aibâ hã. Zeruzalẽ ãma ĩnhamra ré zudeu norĩ hã aihĩni ma tô siwi ãma ĩwasutu. Ãmeb zama te siwi ãma ĩwasutu, dâ'â da. Ã hã hâiba ré 're morĩ u'âsi wamhã, te za, u, te te da'ãma 're rowasété.

²⁵ Tane nherẽ, marĩ na wa hã te upsibi mei waihu'u õ di, da te dasiwi iwĩrĩzéb da hã. Tawamhã õ hã si'uihâ na ma tô ĩwi rowaptẽ, Roma ãma apito Sézaha u te satõrĩ da. Tahawa, wa tô ãma saze tô, te itẽme satõrĩ da.

²⁶ E niha, wa za tawamhã bété iwasété na tãma rob'ui'éré, Roma ãma wanhib'apito ma. Marĩ na sena na iwasédé hã da te ãma isa'razém na hã te waihu'u õ di, wa hã. Baba di. Tahawa, wa tô sô hâ, asõ're sab za'ra wa'aba da, apito Agripaha nho'reb zama. Marĩ zô te za asiwi i'madâ'â 'wa pé, marĩ na pé te ãma rob'ui'éré da, wanhib'apito ma.

²⁷ Iwasédé hã da te ãma isa'razém na te tãma rob'ui'éré waihu'u õ di. E niha da, wa za bété taré itẽme satõ, aibâ hã da'wapéi'wa norĩ me morĩ da, Sézaha nho're sab da, si'uihâ na tãma siwasu'u da. Marĩ iwasédé hã da te ãma isa'razé hã hâimana õ nherẽ, te itẽme satõrĩ waihu'u õ di.