Zezusihi zadawa wasuꞌuꞌwa norĩ nhimiromhuri na robꞌuiꞌéré 24 - ꞌRe Ihâimana Uꞌâsi Mono Zadawa Wasuꞌu

Zudeu norĩ hã Pauluhu ãma iwasédé te te siwi ãma ihirizé wasu'u

¹ Tawamhã bâdâ hã 5 na ma tô ãma ne, Erodihi nhorõwa ãma hâimana ré, Paulu hã. Tawamhã Anania hã, sasedoti 'Re ihâimana u'âsi mono ma da'ãma romhuri'wa, tisiré norĩ nhipai u ipire uptabi hã ma tô Sézaréa u wi. Ni'wam norĩ hã, da'madâ'â'wa norĩ hã ma tô siré te te simro. Danhimirob'manharĩzém na dawasu'u'wa zama te siré saprõni za'ra, Téturu na isisi hã. Ta norĩ hã apito Peresihi ma, ma tô iwasédé hã siwi ãma tihi, Pauluhu ãma.

^2-3 Tawamhã apito Peresi hã ma tô Pauluhu zô hâ, danho're sab da. Taha pari, Téturu hã ma tô oto Pauluhu ãma iwasédé hã ãma tihi. Apito ma, te rowasu'u, ãne: — Roti'wa, a hã aiwẽ uptabi di. A hã wama 're roti wẽ u'âsi mono wa, wa rowẽ na si 're wahâimana za'ra ãhã na hã. Wa'madâ'â'wa norĩ ma, ma tô 're iroti wẽ u'âsi mo, daro mono bâ te te 're wa'madâ'â wẽ za'ra mono da, marĩ iwasédé hã te te wama 're pese za'ra mono da. Tawamhã waro mono bâ, asimipawaptobzém na wama 're asõpru mono wa, wa wa te 're aiwẽsãmri u'âsi za'ra.

⁴ Tane nherẽ, ĩwapari wa'a õ'umnhasite, ĩmreme suru na wa za aima rowasu'u. Asõpru wa, da'upana te aima rowasu'u wamhã, ãté aima wẽ di za, ĩwapari da hã.

⁵ Õ hã aibâ hã wa tô waihu'u za'ra ni, timreme na daré ro'wa'rutu'wa na hã. Duré daro mono bâ zudeu norĩ hã te te iropéi mono tẽme 're morĩ wamhã, ma tô te te da'ãma 're aro'wa'rutu. Duré nazarenu na dasina dasipo'ozém nhisi niwĩ, 're inomro mono ma hã pire di, õ hã.

⁶ 'Re ihâimana u'âsi mono nhorõwa 'ri hã te aré wawi wasété, 'ri hã. Tazahã wa tô wasiwi âri ni.

⁷ Tane nherẽ, apito Risia hã ma tô watẽme wi. Ta hã sa'ẽtẽ siptete si na ma tô wawi âri za'ra, Paulu hã.

⁸ Ta hã ma tô iwasété na tãma inharĩ'wa norĩ ma 'ru za'ra, asõ'a simasab da, te te aima wasu'u za'ra da. Tahawa, ã hã aibâ hã sadawa pibui wamhã, tô sena na te za iwaihu, iwasédé hã wa te wasiwi ãma isa'razém na hã.

⁹ Tawamhã zudeu norĩ, tame isimasam norĩ hã te duré sadawa waptob za'ra, iwasu'u hã tô sena na.

Paulu hã, Peresihi uiwada isiwasu'uzé

¹⁰ Tawamhã apito hã ma tô Pauluhu ma tinhib'rada sarõtõ, timreme hã te te oto wazere da. Tahawa, Paulu hã timreme hã ma oto waze, ãne: — Ma tô ai'ãma tiwahub ahâ, ãme da'ãma rowairébé'wa na 're aihâimana mono ré hã. Ãne hã ĩma waihu'u pese di. Tahawa, asõ'a ĩsi'uihâ na aima ĩsiwasu'u da hã, ĩma wẽ di.

¹¹ Ĩmreme hã sena na te za iwaihu. Nimosi, wa tô wi, Zeruzalẽ u hã. Bâdâ 12 na ma tô ĩ'ãma ne, tame ĩnhamra ré hã. 'Re ihâimana u'âsi mono ãma ĩwata da hã, wa tô wi. Tawamhã 'Re ihâimana u'âsi mono nhorõwa ãma, 'ri 'wawi wa'ra 're, ĩnhamra ré, ĩsiré zudeu norĩ hã ma tô siwi ĩsã.

¹² Tane nherẽ, ĩmreme na te idamreme 'razâri na hã te te ĩwapari za'ra õ di. Zudeu norĩ te, rowahutuzé mono bâ ĩmreme na te dazada'rãmi õ di. Duré 'ri babab zama te da'azada'rãmi mono õ di.

¹³ Tahawa, ĩwasété na, tô sena na te te siwi ĩ'ãma sa'ra waihu'u õ di. Mare di.

^14-15 Ãne wa za aima ĩsiwasu'u. 'Re idanomro mono zép téb zarina, wa tô te 're romhuri, 'Re ihâimana u'âsi mono ma. 'Re idanomro mono zép té wasu'u hã te zudeu norĩ hã te te siwi 're wẽ'õ za'ra, senai õ newa. Tane nherẽ, 'Re ihâimana u'âsi mono nhimiroti hã, wahi'rata norĩ nhib'apito nhimiroti hã wa tô uburé saze, Mozési te te ãma irob'ui'éré hã. Isadawa 'mahârâ'wa norĩ nhimi'ui'éré hã wa tô duré saze. Ĩwasédé hã te te siwi ĩ'ãma isa'ra norĩ hã 'Re ihâimana u'âsi mono ãma te te isasõmri za'ra ne, wa duré wa hã ãma sasõ. Dadâ'â nherẽ, aihĩni apâ te te 're ida'ahâiwa'utu mono zém na wa tô ãma sasõ, iwẽ hã duré iwasédé hã apâ te te 're ida'ahâiwa'utu mono zém na hã.

¹⁶ Tahawa, iwẽ hã te 'manharĩ tõ da hã, ĩwa'a õ di, ĩpẽ'ẽ wapu na 're ĩsi'madâ'â u'âsi mono da si, 'Re ihâimana u'âsi mono nho'a, duré danho'a zama.

¹⁷ Te duré tãma siwasu'u, ãne: — Zeruzalẽ nhiti 're ĩmorĩ ré, ma tô ĩ'ãma tiwahub ahâ. Tawamhã tamomo wa oto apâ mo, danhibzari hã te âri da, ĩsiré norĩ ma, te sõmri da. Duré danhimizama hã da te isimro hã 'Re ihâimana u'âsi mono ma, te sõmri da, ãma ĩwata da, wa tô apâ mo.

^18-19 Ãne te 'manharĩ da, wa tô ĩsipese, wasiré zudeu norĩ 're ihâimana za'ra mono zéb zarina, 'Re ihâimana u'âsi mono hã te te ĩwẽsãmri da. Tawamhã zudeu norĩ hã Azia na danhipti'a nho'õmo nhisi hawi isihudu hã ma tô ĩ'madâ'â za'ra, 'Re ihâimana u'âsi mono nhorõwa ãma, 'ri 'wawi wa'ra 're. Tame te te ĩ'madâ'â za'ra wamhã, ĩ'rata dasi'rã'õtõ õ di. Da te ĩmreme 'razâri õ di. Rowẽ si. Ta norĩ hã te te ĩ'madâ'â za'ra norĩ hã marĩ iwasédé hã te te ĩ'ãma waihu'u za'ra wamhã, we si'aba'réi 'wa'âhã, aré wẽ di, asõ'a ĩwasédé hã te te ĩ'ãma sa'ra da.

²⁰ Ta norĩ hã we si'aba'réi õ wamhã, ãté asõ'a isimasam norĩ si te za aima ĩwasu'u za'ra. Dama roti'wa norĩ nho're ĩzab ré, marĩ iwasédé hã te te ĩ'ãma iwaihu'u za'ra zém na, te za ĩwasu'u za'ra, ãme ĩzab ré.

²¹ Wa hã wa za aima ĩsiwasu'u, te i'mahârâzém na, dama ipire norĩ nho're ĩzab ré, ãne: “Ã bâtâ na wa asõ'a ĩzab za'ra wa'wa, ĩpibui pese za'ra wa'aba da. Dadâ'â nherẽ, apâ dahâiwa'utuzé, te sazei wa, 'Re ihâimana u'âsi mono nhimiroti na 're ĩmorĩzéb zô te za ĩpibu za'ra wa'wa.” Ãne si wa tô ĩsi'mahâ, dama ipire norĩ nho'a ĩzab ré. Ãté ãne ĩmreme wamhã, te ĩ'ãma rosa'rata za'ra, ĩwasété na.

²² Tawamhã apito Peresi te tãma tinha, ãne asa hã: — Zahadu, apito Risia wei wisi wapsi, wa za niha hã aima rowairébé. Apito Peresi hã ma tô waihu'u pese, 're idanomro mono zép té hã. Tane nherẽ, te te ãma wapari 'rãsutu õ di.

²³ Tawamhã apito Peresi hã ma tô da'wapéi'wa norĩ wada'uri'wai ma waihu'u, ãne: — 'Madâ'â pese za'ra wa'aba za, ã hã aibâ hã aiwi simani za'ra wa'aba tõ da. Tazahã, marĩ hã te te 'manharĩ da, te te sima wẽ wamhã, suru na te za tãma irowairébé 'wa. Duré, isiré norĩ hã ihâimanazéb da, te te pawaptob za'ra da, we itẽme sisisi wamhã, wẽ'õ za'ra wa'aba õ di za, tiwi.

Paulu hã Apito Peresihi nho're isabzé wasu'u, Durusiraha nho're me

²⁴ Bâdâ hã siwaptom na ãma ne pari, ma tô apito Peresi hã Pauluhu zô hâ, timro me, Durusiraha me. Durusira hã, zudeu. Tawamhã Cristu Zezusi hã da te dasina 're i'umnhasi za'ra mono zém na ma tô Paulu hã tãma rowasu'u zahuré. Apito Peresi hã ma tô isimirowasu'u hã wapari pese.

²⁵ Iwẽ na si 're idanomro mono zém na ma tô tãma rowasu'u, marĩ hã iwasédé hã da te dasiwi iwẽ'õzém na zama. 'Re danomro wasété mono wa, rob'rãsutu u 'Re ihâimana u'âsi mono, za niha te te dama irob'manharĩ pipa zém na ma tô duré tãma rowasu'u. Ãne hã te te tãma awasu'u wa, ma tô apito Peresi hã tipahi. Tahawa, te tãma tinha, ãne Pauluhu ma: — Ãhã na te za aimo a'â. Niwa te ĩsima wẽ wapsi, wa za duré ãma asô hâ apâ, te aiwapari da.

²⁶ Tawamhã Pauluhu ãma te rosa'rata, rob'uiprazém na tãma siwa'âbâ da newa, dazazém hawi watobro da. Tahawa, te nasi sô hâ, te te sima rowasu'u zahuré da.

Paulu hã Festuhu ma, isiwasu'uzé wasu'u

²⁷ Tawamhã maparane ma tô ãma tiwahu, Sezariza ãma sãmra ré, dazazéb 're, Paulu hã. Tawamhã Posiu Festu hã te za oto si'apito, Peresihi nhowa're're. Tahawa, apito Peresi hã sisa'u ma tô tizadawa ãma tirẽ, dazazéb 're, hâimana u'âsi da Paulu hã, isa'u. Zudeu norĩ ma, rowẽzéb da, ma tô ãne hã tizadawa hã ãma tirẽ.