Zezusihi zadawa wasuꞌuꞌwa norĩ nhimiromhuri na robꞌuiꞌéré 20 - ꞌRe Ihâimana Uꞌâsi Mono Zadawa Wasuꞌu

¹ Tawamhã damreme na ro'wa'rudu hã ma tô sahâri za'ra ni. Rowẽ di oto. Rob u'âsi nomro wamhã, Paulu hã ma tô Zezusihi zazei'wa norĩ zô tihârâ za'ra. Tahawa, ma tô tãma roti za'ra, siptete sina 're hâimana za'ra mono da. Tawamhã ma tô oto tãma siwasu'u za'ra, za oto imorĩ na hã. Taha pari, te oto mo, Masédonia u.

Paulu hã Zeruzalẽ u apâ imorĩzé wasu'u, Masédonia wa'wai baba

² Tawamhã Masédonia na danhipti'a nho'õmo nhisi wa'wai baba, ma tô ro'razâ, Paulu hã. Daza'rui mono bâ 're morĩ ré, ma tô isazei'wa norĩ hã pawaptob za'ra isimiroti na, siptete sina 're hâimana za'ra mono da. Taha parip si, ma tô mo, Deresiza na danhipti'a nho'õmo nhisi u.

³ Tame sãmra ré, ma tô a'amo si'ubdatõ ãma ai'utõ. Tawamhã ma tô sima rosa'rata, Siria u morĩ da. Tane nherẽ, rowa'u'u na uba'renem na sébré õ ré, ma tô wapa, zudeu norĩ te te sima ihâiba za'ré za'ra zé wasu'u hã. Tahawa, ma tô sima ãma saprĩ, ti'ai babap si apâ hã morĩ da oto, Masédonia wa'wai baba.

⁴ Morĩ wamhã, aibâ norĩ hã ma tô isiré ai'aba'ré. Ta norĩ nhisi za'ra hã, ãne: Sopatru hã Pirõhõ 'ra hã, Beréa ãma 're isãmra mono, duré Aristacu norĩ, Seduduhu me, Tesalonita ãma 're isimasisi zahuré mono hã, duré Gaiu, Débi ãma 're isãmra mono hã, duré Tiquicu hã Trufimuhu me, Azia ãma 're isimasisi zahuré mono hã, duré Timotiu hã.

⁵ Ta norĩ hã ma tô wawana ai'aba'ré, Trowadi na 'ri nho'õmo nhisi u. Tame ma tô wazô mapari za'ra.

⁶ Tawamhã i'u'ẽtẽ duptoi'õ na dasa da te huri parip si, Filipu hawi wa tô wanem ni, Trowadi u rowa'u'u na uba'renem na. Bâdâ 5 na ma tô wa'ãma ai'utõ, tamomo wasi'aba'réi ré. Tame, wa tô wasi'ãma aihutu ni apâ, aibâ norĩ wawana isi'aba'ré norĩ me. Romhuri misi, ma tô wa'ãma ai'utõrĩ za'ra, tame wasi'ubumroi ré.

Paulu hã Trowadi ãma te te iromhurizé wasu'u

⁷ Tawamhã sabadu mara na wa tô wasi'rã'õtõ ni, tame isazei'wa norĩ 're isi'ubumroi mono norĩ me, i'u'ẽtẽ wapu hã wa te huri da. Tawamhã Paulu hã sisa'u ma tô wama roti za'ra, awẽ za oto morĩ na dâ'âsina. Simiroti za'ẽtẽ na te mara wa'wam nherẽ, zahadu wama roti za'ra.

⁸ Tamemhã rob'uiwẽzé hã ahâ di, hâimo iwasi'ubumrozéb ãma hã, si'ubdatõ 'ri 're wa'wa si'uzusi ãma hã.

⁹ Tawamhã 'ritéi'wa hã, Euticu na isisi hã ma tô zanela 'ri zadazâri ãma nhamra, Paulu hã te te wama roti za'ra ré. Wama simiroti za'ẽtẽ za'ra wa, tãma aptâ'â di, 'ritéi'wai ma. Tahawa tãma aptâ'â uptabi wa, ma tô nhono. Sõtõ pese ré, ma tô waptãrã ti'ai u, hâimo zanela 'ri zadazâri hawi. Tawamhã dâ'â siromo, ma tô siwi ti'â.

¹⁰ Tahawa, Paulu hã ma tô itẽme si'ra. Te te itẽme si'rai wamhã, ma tô sô aiwẽ'ẽ. Tawamhã ma tô iré pahato, te te sa'ra da. Tawamhã ãne ma tô dama tinha: — Aipẽ'ẽwara za'ra wa'aba tõ. Hâiba ré, te nomro.

¹¹ Taha pari, ma tô apâ sai'u. I'u'ẽtẽ wapu hã ma tô te te wẽ'ẽ oto. Taha pari, ma tô te te tãma sõmri, isiré isi'ubumro norĩ ma. Tawamhã te ime tisa za'ra. Taha pari, te duré tãma roti za'ra. Te te tãma roti za'ra ré, ma tô tiwi tirowa'a. Rowa'a wamhã, ma tô oto tiwi timorĩ za'ra.

¹² Tawamhã 'ritéi'wa hã hâiba ré ma tô siwi saprõ, isõrõwa u. Ta hã ma tô tãma rowẽ wazere za'ra, isazei'wa norĩ ma hã.

Paulu hã Trowadi hawi Miletu u imorĩzé wasu'u

¹³ Tawamhã wa norĩ hã wa tô asisi ni, rowa'u'u na uba'renem na. Taha na wa tô ai'aba'ré ni, Asôsi na 'ri nho'õmo nhisi u, Pauluhu zô tame wanhimipari za'ra da. Paulu hã ma tô sima pisutu aré, ti'ai baba ãma morĩ da. Tahawa, tamomo te za wa'ãma tiwisi za'ra.

¹⁴ Tawamhã Asôsi u wisi wi, ma tô watẽme tizébré za'ra, rowa'u'u na uba'renem na.

¹⁵ Tawamhã taha na wa oto ai'aba'ré ni, Mitireni na 'ri nho'õmo nhisi u. Taha wamhã, awẽm na si ma tô duré uba'rene hã waré tiwara za'ra, Ti'osi na rob'ré za'iti nhisi wa'wai baba. Tawamhã awẽ amo na ma tô wi, Samo na rob'ré za'iti nhisi u hã. Tawamhã awẽm na si wa tô oto aihutu ni, Miletu na 'ri nho'õmo nhisi u hã, uba're nhimizahârizéb u.

¹⁶ Paulu hã ma tô aré sima rosa'rata, Éfézu u hã sipa tõ da, Zeruzalẽ u wisi su'u da. Tahawa, Azia na danhipti'a nho'õmo nhisi ãma sãmra zei õ di oto. Pẽtécosti na bâtâ wana, Zeruzalẽ u iwisi su'u da si, ma tô sima wẽ pese, Paulu hã.

Paulu hã Éfézu ãma da'madâ'â'wa norĩ ma, te te irotizé wasu'u

¹⁷ Tawamhã Paulu hã Miletu ãma sãmra ré, ma tô da'mazatõ, Éfézu u, isazei'wai 'madâ'â'wa norĩ zô itẽme si'aba'ré da.

¹⁸ Itẽme sihutu wamhã oto, ma tô ãne tãma rowasu'u za'ra, Paulu hã: — A norĩ wa'wa hã ma tô ĩnhimiromhuri na iwaihu'u za'ra wa'wa, asiré 're ĩhâimana za'ra wa'aba mono ré hã. Azia u ãma ĩwisi na'rata zém hawim haré, duré aihawi wa'aba za ĩmorĩzéb u hã ma tô ãne na hã ĩ'ãma iwaihu'u za'ra wa'wa.

^19-21 Ĩsina 're ĩwata mono ãna, wa tô Wanhib'apito ma si te 're romhuri u'âsi. Zudeu norĩ hã nasi ĩzada siwada'uri za'ra wa, ĩma ropire uptabi di. Tahawa, ĩwawa sina, wa tô te tãma 're romhuri, Wanhib'apito ma. Tane nherẽ, iwasu'uwẽ hã te aiwi wasu'u zazâri za'ra wa'aba õ di. Ãne na ma tô ĩ'ãma iwaihu'u za'ra wa'wa. Danho'a wa tô te aima ãma 're rowasu'u za'ra wa'wa, 'ri baba zama. Zudeu norĩ ma, duré zudeu'õ norĩ ma zama, wa tô te tãma 're roti pese za'ra, tiwasété wi 're sipizari za'ra mono da, 'Re ihâimana u'âsi mono niwĩ 're nomro mono da, Wanhib'apito Zezusi hã te te 're saze za'ra mono da.

²² Ãhã na Zeruzalẽ u wa za mo, 'Re ihâimana u'âsi mono pẽ'ẽzani te te ĩma iwaihu'uzéb zarina. Tame za marĩ hã ĩzô iwatobro hã te waihu'u õ nherẽ, wa za mo. Tane nherẽ, wa za tô mo.

²³ 'Ri nho'õmo mono bâ 're ĩmorĩ ré, ma tô 'Re ihâimana u'âsi mono pẽ'ẽzani hã te te ĩma 're awaihu'u, ãne: Tame, te za dazazéb 're ĩnherẽ ni. Ropire hã wa za tô te 're sépata.

²⁴ Tane nherẽ, ĩhâiba ré 're ĩmorĩ siroptu da hã, ĩhâiba te ĩsima sawi õ di, tarére wa, ĩma hã. Wanhib'apito Zezusi hã ma tô ĩnhimiromhuri hã ĩma tisõ, 'Re ihâimana u'âsi mono nhimizawi pese zé wasu'u na te dama 're sadawa wasu'u mono da. Ĩnhimiromhuri hã te tãma ãma uwaimrami da, wa tô ĩsima wẽ pese, taha si.

^25-27 — Airo mono bâ, te 're aiwaimrami za'ra wa'aba mono ré hã, wa tô te aima 're rowasu'u za'ra wa'wa, 'Re ihâimana u'âsi mono, da'ãma 're isib'a'uwẽ mono zé wasu'u na hã. Niwamhã 'Re ihâimana u'âsi mono nhimiroti hã te aiwi wasu'u zazâri za'ra wa'aba õ di. Mare di. Ãhã na, wa hã Paulu, wa ĩsina waihu'u, za niwa ĩzabu na isahu za'ra wa'aba õ zé hã. E tawamhã ĩnhimiromhuri na te ai'ãma upa za'ra wa'aba bâ, te za asõ'reptuzé hã asiwi i'manhimini wa'wa. Mare di. Asi'uihâ na te za asisimini za'ra wa'wa 'râwi. Ãne na hã tô sena wa tô waihu'u.

²⁸ Tahawa, te za 're asi'madâ'â pese za'ra wa'aba mo, 're anomro wẽ wa'aba mono da. Duré isazei'wa norĩ hã te za 're i'madâ'â pese za'ra wa'aba mo, siré 're isi'rã'õtõ mono norĩ hã. 'Re ihâimana u'âsi mono pẽ'ẽzani hã ma tô sima aipisutu za'ra wa'wa, isazei'wa norĩ hã tãma 're 'madâ'â za'ra wa'aba mono da. Ti'ra wapru na ma tô isazei'wa norĩ hã wa'â, tite da. Tahawa, pone'ẽrebâ 'madâ'â'wa norĩ ne, te za 're ida'madâ'â pese za'ra wa'aba mo, 'Re ihâimana u'âsi mono nhib'a'uwẽ norĩ hã.

²⁹ Aihawi ĩmorĩ za'ra wa'aba wamhã, ni'wam norĩ hã te za we asô ai'aba'réi wa'wa. Abaze zahi, pone'ẽrebâ da, 're isahi za'ra mono ne, te za asada tizahi za'ra wa'wa. Tinhimirowahutu wasété na te za asada tihâimana za'ra wa'wa. Ai'ãma pẽ'ẽzé za'ra wa'aba õ di za. Ãne wa tô ai'ãma waihu'u siromo za'ra wa'wa.

³⁰ Duré ni'wam norĩ hã asiré wa'aba nherẽ, te za aima sadawa hapese za'ra wa'wa, isiniwĩ 're anomro aba mono da, isazei'wa norĩ hã uburé isiniwĩ 're nomro mono da.

³¹ Tahawa, te za asimiza'rese sina 're aihâimana za'ra wa'aba mo, ta norĩ wi. Te aima 're roti za'ra wa'aba mono ré hã, ma tô si'ubdatõ ĩ'ãma tiwahu. Rowa'a na wa tô aihâiba mono bâ te aima 're roti za'ra wa'wa, bara na zama, ĩwawa sina. Roti hã niwa te aiwi sazâri za'ra wa'aba õ di. Tahawa, ma'ãpé ĩnhimiromhurizém na 're aipo're pu'u u'âsi za'ra wa'aba mono za.

³² — Ãhã na hã 'Re ihâimana u'âsi mono ma, wa za oto airẽme za'ra wa'wa, taha si te te 're ai'madâ'â za'ra wa'aba mono da oto. Isimizawi pese zé wasu'u na te za 're asõpré u'âsi aba mo. Ta hã te za te te 're aipawaptob u'âsi za'ra wa'wa, isaze za'ra wa'aba zém na aiprédup sina 're aihâimana za'ra wa'aba mono da. Uburé marĩ iwẽ hã tinhib'a'uwẽ norĩ ma, te te 're i'anhomri mono hã te za duré aima sõmri za'ra wa'wa, ate za'ra wa'aba da oto.

³³ Wa hã danhibrob zô, te 're rob'ruiwapari mono õ di, rob'uiprazéb zô duré da'uzazéb zô.

³⁴ Duré ĩhâimanazéb da, wa tô ĩnhib'rata na te 're romhuri, ĩsiré norĩ hâimanazéb da zama. Ãne na ma tô a norĩ wa'wa hã asiwi ĩwaihu'u za'ra wa'wa.

³⁵ Ĩnhimiromhuri pese na wa tô aima ãma asanho za'ra wa'wa, sib'uware na 're ihâimana za'ra mono norĩ hã wanhimiromhuri na wa te ãma 're pawaptob za'ra mono da. Wanhib'apito Zezusihi mreme na te za 're aipo're pu'u u'âsi za'ra wa'aba mo. Ãne ma tô wama waihu'u za'ra: “Dama marĩ nhomri'wai ma, rowẽ uptabi di, dawi marĩ âri'wai ma, irowẽ nhipai u.”

³⁶ Tawamhã Paulu hã mreme parimhã, ma tô da'madâ'â'wa norĩ me hi'rãtitõ asimro, 'Re ihâimana u'âsi mono ma, mreme zusi da.

³⁷ Mreme zusi pari, wawa sina ma tô Paulu hã nasi tinho'utu awaibu, te te sawi za'ra da, ãma pẽ'ẽzé za'ra wa. Ma tô duré nasi tob'rata hârâ za'ra.

³⁸ Za niwamhã te te ihâiba pibui za'ra õ na tãma siwasu'u za'ra wa, ãma pẽ'ẽzé uptabi za'ra di. Tawamhã ma tô ime ai'aba'ré, rowa'u'u na uba'reneb u hã.