Zezusihi zadawa wasuꞌuꞌwa norĩ nhimiromhuri na robꞌuiꞌéré 15 - ꞌRe Ihâimana Uꞌâsi Mono Zadawa Wasuꞌu

Zeruzalẽ ãma idasi'rã'õtõzé wasu'u

¹ Tawamhã aibâ norĩ hã ma tô aihutu Ãtioquia u, Zudéa hawi. Taha wamhã, te isazei'wa norĩ ma, roti za'ra, ãne: — Zudeu'õ norĩ hã, Mozési wahi'rata norĩ ma, te te ipisutu zarina, 're sisihâiwata nhihâri za'ra mono õ nherẽ, 'Re ihâimana u'âsi mono te te 're sõ'reptu za'ra mono õ di za.

² Tawamhã Paulu norĩ hã Banabéhé me, te te ãma dazaze zahuré õ di, isimirowasu'u za'ra na hã. Tahawa, te simreme wa'rãmi nasi sa'ẽtẽ ãma sima nharĩ za'ra. Ãne wa, isazei'wa norĩ hã ma tô ni'wam norĩ hã pisutu za'ra, Paulu norĩ siré si'aba'ré da, Zeruzalẽ u, tame da'madâ'â'wa norĩ me duré Zezusihi zadawa wasu'u'wa norĩ me, te te sima ãma romnhoré za'ra da.

³ Tawamhã isazei'wa norĩ hã siré 're isi'rã'õtõ mono norĩ hã ma tô ãma ana, isi'aba'rézém na hã. Ma tô si'mazatõrĩ za'ra, ime 'masi'aba'réi hutu da. Tawamhã Paulu norĩ hã Zeruzalẽ u si'aba'réi ré, Penisiza na danhipti'a nho'õmo nhisi wa'wai baba, te ai'aba'ré, duré Samaria na danhipti'a nho'õmo nhisi wa'wai baba. Taha wa'wai baba, si'aba'réi ré, ma tô isazei'wa norĩ ma, te te rowasu'u za'ra, zudeu'õ norĩ hã 'Re ihâimana u'âsi mono u, 're isipizari za'ra mono na hã. Tawamhã aihĩni ma tô dama ãma rowẽ zani za'ra, tame isazei'wa norĩ ma.

⁴ Tawamhã Zeruzalẽ u ma tô oto aihutu. Sihutu wamhã, isazei'wa norĩ hã, duré Zezusihi zadawa wasu'u'wa norĩ hã, duré da'madâ'â'wa norĩ hã ma tô siwi waibui wẽ, Paulu norĩ hã. Tawamhã Paulu norĩ hã ma tô dama rowasu'u za'ra aihĩni, 'Re ihâimana u'âsi mono nhimipawaptobzéb zarina uburé isadawa para te te dama 're i'ab'manharĩ zahuré mono zém na hã.

⁵ Tawamhã ni'wam norĩ hã ma hâiwi aimasa, farizeu norĩ hã te te dama rowasu'u za'ra da. Tawamhã te dama nharĩ za'ra, ãne: — Isazei'wa norĩ ma, wa te roti za'ra wa'aba, zudeu'õ norĩ hã, dame 're sisihâiwata nhihâri za'ra mono da, uburé 'Re ihâimana u'âsi mono nhimiroti 'rata na Mozésihi nhimi'ui'éré zarina 're nomro mono da.

⁶ Tawamhã Zezusihi zadawa wasu'u'wa norĩ hã ma tô si'rã'õtõ, da'madâ'â'wa norĩ me, te te sima ãma romnhoré za'ra da, niha na hã.

⁷ Tawamhã te te sima ãma romnhoré hâ za'ra pari, ma tô Pedru hã hâiwi za. Ãne te taha wamhã tãma nharĩ za'ra: — Wasisãnawã norĩ, ĩwapari za'ra wa'aba. Duréi 'Re ihâimana u'âsi mono hã ma tô sima ĩpisutu, ĩhâiba pisutu zudeu'õ norĩ ma, Zezusihi wasu'uwẽ na te tãma 're rowasu'u za'ra mono da, te te 're wapari za'ra mono wa, te te 're saze za'ra mono da. Ãne na ma tô ĩ'ãma iwaihu'u za'ra wa'wa.

⁸ 'Re ihâimana u'âsi mono ma, dapẽ'ẽ 'remhã danhimirosa'rada hã tãma waihu'u pese di. Zudeu'õ norĩ hã te te 're saze za'ra mono wamhã, 'Re ihâimana u'âsi mono te te 're iwẽsãmri za'ra mono zéb zarina, ma tô Tipẽ'ẽzani hã ta norĩ ma zama te te 're anhomri, isãna'rata hawi te te wama 're i'anhomri mono ne.

⁹ Ta norĩ hã Zezusi te te sina 're i'umnhasi za'ra mono zéb zarina si, ma tô iwasédé hã te te tãma 're apari, wa norĩ hã wa te wasina 're umnhasi za'ra mono wa, wawasédé hã te te wama 're i'apari mono ne. Aimawi hã te te tãma 're apisutu mono õ di, zudeu'õ wa.

^10-11 E marĩ da, ma tô bété asima iwẽ za'ra wa'wa, 'Re ihâimana u'âsi mono hã pibu za'ra wa'aba da, niha te te aima irob'manharĩ za'ra wa'aba õ zéb zô. 'Re ihâimana u'âsi mono nhimiroti 'rata na Mozési te te ãma irob'ui'éré hã wa te tãma ãma 're uwaimrami waihu'u za'ra mono õ di, taha zarina 're iwasisõ'reptu za'ra mono da hã. Wahi'rata norĩ zama te te duré tãma ãma 're uwaimrami waihu'u za'ra mono õ di. Tahawa, e marĩ da, wa za bété wasiré isazei'wa norĩ ma, wa te 're roti za'ra, Mozésihi nhimi'ui'éré zarina 're nomro mono da, zudeu'õ nherẽ. Ni'wa hã marĩ ipire uptabi hã te te danhoihi waptob ãna, te te dama isibu 'rãihâ ne, ma tô a norĩ wa'wa hã ipire uptabi hã tãma ipisutu za'ra wa'wa, zudeu'õ isazei'wa norĩ ma hã. Tane nherẽ, tinhoprubzém na si ma tô Wanhib'apito Zezusi hã te te 're wa'anho'reptu. Õhõ na si te duré ta norĩ zama te te 're anho'reptu, zudeu'õ norĩ hã.

¹² Tame isi'ubumro norĩ hã te ari'iwi asimro, Banabé norĩ mreme hã te te wapari za'ra da, Pauluhu me. Uburé zudeu'õ norĩ ma, 'Re ihâimana u'âsi mono zadawa para, marĩ dama i'manharĩ waihu'u'õ hã te te 're i'ab'manharĩ zahuré mono zém na te dama siwasu'u zahuré.

¹³ Ta norĩ hã te te dama rowasu'u zahuré parimhã, te duré Tiagu hã dama rowasu'u, ãne: — Wasisãnawã norĩ, ĩwapari za'ra wa'aba.

¹⁴ Sima Pedru, ma tô wama rowasu'u pari za'ra, 'Re ihâimana u'âsi mono, tinhoprum na zudeu'õ norĩ ãma isime na'rata zém na. Tinhib'a'uwẽ da, ma tô ni'wam norĩ si te te 're awaibu, zudeu'õ norĩ hã.

¹⁵ Ãne na ma tô 'Re ihâimana u'âsi mono zadawa 'mahârâ 'rata 'wa hã ãma rob'ui'éré, tô isarina. Ãne duréihã rob'ui'éré hã, uburé Danhib'apito mreme na hã:

¹⁶ “Zahadu wa za apâ ĩsina siri, Dawi na aihi'rata nhisi nhimirotizéb zarina ni'wa hã isihudu uwaibaba hã siroti'wa da. 'Ri siprum nherẽ, ti'ai u'ẽne hã te za ubumro ni, da te dasiwi ãma 'ri téb da apâ. Tane duré, Dawi hã duréihã pire na te te 're ida'ab'madâ'â mono zé hã si'utõrĩ nherẽ, wa za isihudu hã pisutu, apâ Dawihi nhimiroti zarina te te 're 'mairoti mono da.

¹⁷ Tawamhã zudeu'õ norĩ zama te za ĩzô 're sõpré, ĩnhib'a'uwẽ da, te ĩsima ipisutu za'ra norĩ hã te te 're ĩzaze za'ra mono da.

¹⁸ Wa hã uburé Danhib'apito, wa tô ãne hã isãna'rata hawimhã dama waihu'u pa.”

¹⁹ Te duré tãma nharĩ za'ra, ãne: — Ãhã na ĩnhimirosa'rada hã wa za aima waihu'u za'ra wa'wa. Zudeu'õ norĩ hã, 'Re ihâimana u'âsi mono u 're isipizari za'ra mono norĩ wi, wa te tiwi 're ro'wa'rutu za'ra mono õ di za.

²⁰ Ãne si wa za 'manharĩ za'ra ni. Wa za tãma rob'ui'éré za'ra ni, marĩ iwasété uptabi si, wa te tiwi sawi za'ra da, romhâiba 'manharĩ ãma 're idawata za'ra mono zéb da, abaze da te 're simroi mono wamhã, taha nhi hã te te 're huri tõ mono da, duré siwa'ru tihâimanazé iwasédé hã te te 're 'manharĩ za'ra mono tõ da, pi'õ na aibâ na zama, duré danhimizama hã da te 're isõ'reti za'ra mono nhi hã waprui ré te te 're huri tõ mono da, duré danhimizama wapru hã te te duré 're âhuri tõ mono da. Ãne si wa za dawi sawi za'ra ni.

²¹ Rowahutuzé mono bâ, sabadu sidâpâsi Mozésihi nhimi'ui'éré hã da te 're sõré za'ra mono ré hã, ma ãma tiwahub ahâ. Te duré da te dasima ãma 're rowahutu u'âsi za'ra, 'ri nho'õmo mono bâ. Tahawa, Mozésihi nhimi'ui'éré hã dama waihu'u pese za'ra wa, te za ã norĩ hã roti hã te te wama 're 'madâ'â za'ra, zudeu'õ norĩ hã, rowẽ na wasiré 're wahâimana za'ra mono da.

Zudeu'õ na, Zezusihi zazei'wa norĩ ma, da te irob'ui'éré za'ra zé wasu'u

²² Tawamhã Zezusihi zadawa wasu'u'wa norĩ hã, da'madâ'â'wa norĩ me, ma tô aihĩni ãma sisaze za'ra, isiré isazei'wa norĩ me, Ãtioquia u tisiré norĩ hã te te siwi 'mazatõrĩ zahuré da, Paulu norĩ siré 'maneb zahuré da, Banabéhé me. Tawamhã Zuda hã ma tô siwi pisutu, Basaba na isisi amo hã, isiré neb zahuré da, Silaha me. Ta norĩ hã simiroti prédub zahuré di, isazei'wa norĩ ma hã.

²³ Tawamhã isiré neb zahuré wamhã, rob'ui'éré, ma tô siré âri zahuré. Ãne rob'ui'éré hã: “Wasiré isazei'wa norĩ, zudeu'õ na 're aipoto za'ra wa'aba mono hã, wa ãma asawi za'ra wa'aba ni, Ãtioquia ãma 're aihâimana za'ra wa'aba mono norĩ hã, duré Siria na danhipti'a nho'õmo nhisi ãma 're aihâimana za'ra wa'aba mono norĩ hã, duré Sirisia na danhipti'a nho'õmo nhisi ãma 're aihâimana za'ra wa'aba mono norĩ hã. Wa norĩ hã Zezusihi zadawa wasu'u'wa norĩ hã duré ãme da'madâ'â'wa norĩ zama wa tô wasisãnawã na wa te 're asisi za'ra wa'wa, wasiré Zezusihi zazei'wai wa.

²⁴ Wa norĩ hã wa tô romreme hã wapari za'ra ni. Aibâ norĩ hã, aré wasiré 're isi'ubumroi mono hã ma tô, u, ãma ai'aba'ré, atẽme za'ra wa'aba, wazadawa para õ nherẽ. Si'uihâ na ma te u, tinhimirowasu'u na aiwi ro'wa'rutu za'ra wa'wa. Ma duré asimirosa'rada hã aiwi 'wa'rutu za'ra wa'wa.

²⁵ Tahawa, aihĩni wa tô ãma wasisaze za'ra ni, aibâ norĩ hã maparane wasi'upana wa te wasiwi ãma satõrĩ zahuré da, atẽme za'ra wa'aba. Aibâ norĩ hã Banabé norĩ siré te za ãma tineb zahuré. Banabé norĩ hã Pauluhu me, wama isawi pese zahuré.

²⁶ Ta norĩ hã Wanhib'apito Zezu Cristu te te dama 're wasu'u wẽ zahuré mono da, 're neb zahuré ré, ma tô da te dasima 're 'ru zahuré, da te dasiwi pãrĩ da. Tane nherẽ, ma tô Zezusi hã te te dama 're sadawa wasu'u u'âsi zahuré.

²⁷ Ãhã na, wa Paulu norĩ me wasiwi ãma satõrĩ zahuré ni Zuda norĩ hã, Silaha me. Wanhimi'ui'éré zarina te za 'râwi aima wazadawa wasu'u za'ra wa'wa.

²⁸ 'Re ihâimana u'âsi mono pẽ'ẽzani hã ma tô wanhimirosa'rata waihu'u pe hã wama sõmri za'ra, isimirosa'rada hã wa te waihu'u za'ra da. Tawamhã wa tô ãma saze za'ra ni, wanhimiroti ahâ na wa te aima 're roti za'ra wa'aba mono tõ da. Ãne si wa za aima roti za'ra wa'aba ni:

²⁹ ‘Danhimizama hã romhâiba 'manharĩ ãma 're dawata za'ra mono da, da te 're isimroi mono nhi hã 're huri aba mono õ di za. Duré iwapru hã 're âhuri aba mono õ di za. Duré danhimizama da te 're isõ'reti za'ra mono nhi hã 're huri aba mono õ di za. Duré siwa'ru aihâimanazé iwasédé hã 're 'manharĩ za'ra wa'aba mono õ di za, pi'õ na aibâ na zama.’ Ãne na si wanhimiroti za'ra hã, aima za'ra wa'aba hã. Ãne na wanhimiroti zarina 're anomro aba mono wamhã, aima 're rowẽ za'ra wa'aba mono di za. Wa ãma asawi za'ra wa'aba ni, irẽme ma.”

³⁰ Tawamhã Zeruzalẽ hawi, dasi'upana da te isatõrĩ zahuré hã ma tô tineb zahuré, Ãtioquia u. Paulu norĩ me te tineb zahuré. Sihutu wamhã, isazei'wa norĩ zô hârâ za'ra wa, ma tô ubumro. Rob'ui'éré, ma tô tãma sõmri za'ra.

³¹ Tahawa, ma tô sõré za'ra. Te te sõré za'ra wamhã, toi uptabi za'ra di, roti hã wẽ wa.

³² Zuda norĩ hã Silaha me, 'Re ihâimana u'âsi mono zadawa 'mahârâ'wa zahuré. Tawamhã ta norĩ hã ma tô isazei'wa norĩ ma roti zahuré. Simiroti hâ zahuré di, ta norĩ hã. Tahawa, ma tô isazei'wa norĩ hã ãma aptete za'ra, isimiroti zahuré na. Marĩ iwẽ hã te te 'manharĩ ze za'ra di.

^33-34 Tahawa, ma tô bâdâ hã nasi ãma si'utõrĩ zahuré, Sila norĩ ãma Ãtioquia ãma simasisi zahuré ré hã. Tawamhã isazei'wa norĩ hã ma tô apâ siwi satõrĩ za'ra, rowẽ na apâ neb zahuré da, te te siwi isatõrĩ za'ra norĩ u.

³⁵ Paulu norĩ hã te a'â aimasisi zahuré, Ãtioquia ãma, Banabéhé me. Tame ni'wam norĩ me te te dama 're rowahutu zahuré mono da, duré Wanhib'apito zadawa wasu'u na te te dama 're rowasu'u zahuré mono da, ma tô a'â aimasisi zahuré.

Paulu norĩ hã siwi isiwanhizarizé wasu'u

³⁶ Tawamhã ãma ronomro pese zahuré pari, te Paulu hã Banabéhé ma tinha, ãne: — Oto wane na apâ, 're iwanebzé na'rata niwĩ. 'Ri nho'õmo u datẽme 're iwaneb na'rata zéb uwaibaba, Wanhib'apito, wa te dama isadawa wasu'u na'rata zéb u, wa za wanem ni, isazei'wa norĩ hã wa te duré sabu na sitéb za'ra da, rowẽ na 're hâimana za'ra mono zô.

³⁷ Tawamhã Banabé hã ma tô sima wẽ, Zuwã Marcu hã isiré morĩ zahuré da.

³⁸ Tane nherẽ, Paulu hã ma tô wẽ'õ, isiré morĩ zahuré tõ da, iwana wamhã, Zeruzalẽ u Pãfilia hawi apâ morĩ siromo da, te te rẽme zahuré wa, Zuwã Marcu hã. Timorĩ hã te te ime 'rãsutu zahuré õ wa, ma tô siwi wẽ'õ.

³⁹ Tawamhã te sima ãma nharĩ zahuré, Zuwã Marcu hâiba na. Tane nherẽ taha wamhã siwapari zahuré õ di. Tahawa, ma tô siwi aiwãnhizari zahuré, ãma sisaze zahuré õ wa. Tawamhã Banabé hã ma tô Zuwã Marcu hã siré saprõ. Taha wamhã, rowa'u'u na uba'renem na te tineb zahuré dame, Sipri na rob'ré za'iti nhisi u.

⁴⁰ Tawamhã Paulu hã ma tô Sila hã pisutu, isiré morĩ da. Taha wamhã, isazei'wa norĩ hã ma tô ãma mreme zu, 'Re ihâimana u'âsi mono ma, ta hã te te pawaptob zahuré da, ineb zahuré zém na hã.

⁴¹ Taha pari, ma tô oto tineb zahuré Paulu norĩ hã, Siria wa'wai baba, duré Sirisia wa'wai baba. Tinhimiroti na ma tô te te 're da'apawapto, isazei'wa hâimanazém na danhiptete na 're dahâimana za'ra mono da, dasiré 're idasi'rã'õtõ mono bâ hã.