2 Tesalonita 3 - ꞌRe Ihâimana Uꞌâsi Mono Zadawa Wasuꞌu

Paulu norĩ ãma isazei'wa norĩ 're imreme zusi mono zé wasu'u

¹ Wasisãnawã norĩ, te za wa'ãma 're aimreme zusi aba mo, 'Re ihâimana u'âsi mono ma, te te 're wapawaptob u'âsi za'ra mono da, Wanhib'apito zadawa wasu'u hã, dahâiba mono bâ da te 're wapari su'u za'ra mono wa, da te 're saze za'ra mono da, asine za'ra wa'aba.

² Tazahã, aihĩni da te 're saze za'ra mono õ di, isadawa wasu'uwẽ hã. Tahawa, te za duré wa'ãma tãma 're aimreme zusi aba mo, te te dawi wanho'reptu za'ra da, iwasété uptabi na si 're idanomro mono norĩ wi.

³ Wanhib'apito Zezusihi si, umnhasi za'ẽtẽ uptabi di. Tahawa, te za te te 're aipawaptob za'ra wa'wa, 're sazei utõrĩ za'ra wa'aba mono tõ da, aihâimana nhiptete sina ãma 're anomro aba mono da. Duré Wa'uburé wi, iwasété uptabi wi, te za tiwi aihâiba zawi za'ra wa'wa.

⁴ Wa norĩ hã Wanhib'apito ãma simisutu 're wanomro mono wa, wa wa te ai'ãma 're umnhasi za'ra wa'wa. Tahawa, wa aiwaihu'u za'ra wa'aba ni, tô sena, wanhimiroti zarina ãma 're i'anomro aba mono na hã. Tane tô, õne u'â te za ãma 're anomro aba mo.

⁵ 'Re ihâimana u'âsi mono wi, wa wa te 're rowaptẽrẽ u'âsi za'ra, isimizawizé hã asina waihu'u pese za'ra wa'aba da, duré Cristuhu nhimipawaptobzéb zarina asimi'ẽ na ãma 're i'aihâimana za'ra wa'aba mono zé hã asina waihu'u pese za'ra wa'aba da.

Isazei'wa norĩ, tinhimarĩ zô te te sima 're iromhuri za'ra mono zé wasu'u

⁶ Wasisãnawã norĩ, Wanhib'apito Zezu Cristuhu zadawa para, wa aima roti pese za'ra wa'aba ni, ni'wam norĩ wi, a'â 're aihâimana za'ra wa'aba mono da. Ta norĩ hã asiré isazei'wa norĩ nherẽ, wa'a u'âsi te 're hâimana za'ra. Wanhimiroti zarina 're hâimana za'ra mono õ di. Tahawa, ihâiba zu 're aihâimana za'ra wa'aba mono õ di za.

⁷ Wa norĩ hã ai'rata wahâimana za'ra wa'aba ré, wa tô ãma aima asanho za'ra wa'aba ni, isazei'wa norĩ hâimanazém na hã. Siwa'ru 're wahâimana za'ra mono õ di. Mare di. Tahawa, ãma aima iwasisanho za'ra wa'aba zé hã ma tô iwaihu'u za'ra wa'wa, isarina ãma 're anomro wẽ wa'aba mono da.

⁸ Ai'rata wahâimana za'ra wa'aba ré, dasa hã wa'âbâ ãna wa te 're huri mono õ di. Wa tô wa te wasima 're romhuri pese za'ra, wapatâ'â nherẽ, duré wawasutu nherẽ. Bâdâ 'rãi watobro õ ré, duré bâdâ sébré nherẽ, wa tô wa te wasima 're romhuri za'ra, wama 're asõprub za'ra wa'aba mono zô si, aima wapire za'ra wa'aba na 're wahâimana za'ra mono tõ da.

⁹ Wanhib'apito wasu'uwẽ na, wa te aima 're iromhuri za'ra wa'aba mono zé wa'rãmi, marĩ na 're wapawaptob za'ra wa'aba mono da, wama 're i'ru za'ra wa'aba mono zé hã, tô sena te aré tô wama 're i'ru za'ra wa'aba mo. Tane nherẽ, marĩ na wa te 're rowaptẽrẽ za'ra mono õ di, ai'rata 're wahâimana za'ra wa'aba mono ré hã. Ãne wa tô aima ãma asanho za'ra wa'aba ni, 're iwahâimana za'ra mono zéb zarina, 're anomro aba mono da.

¹⁰ Ai'rata 're wahâimana za'ra wa'aba mono ré hã, wa tô ãne na nasi aima roti za'ra wa'aba ni: “Ni'wa hã, te te 're romhuri mono õ wamhã, dame 're sai mono õ di za, mram na hã.”

¹¹ Ni'wam norĩ hã asiré wa'aba 're isi'ubumroi mono norĩ hã, isazei'wa nherẽ, taré te, u, 're hâimana za'ra. Te te 're romhuri za'ra mono õ di, u. Taré te, u, te te dawi 're ro'wa'rutu za'ra, da te 're iromhuri pese za'ra mono norĩ wi. Ãne wa, wa aima ãma sahu za'ra wa'aba ni, wanhimiroti na hã.

¹² Tawamhã Wanhib'apito Zezu Cristuhu zadawa para, wa tô tãma roti pese za'ra ni, ta norĩ ma, rowẽ na te te 're romhuri pese za'ra mono da, tihâimana za'ra zéb da hã.

¹³ Wasisãnawã norĩ, marĩ hã dama 're 'manharĩ wẽ za'ra wa'aba mono da, 're aiwa'a za'ra wa'aba mono tõ.

¹⁴ Ã rob'ui'éré na wa te aima inharĩ za'ra wa'aba na, ni'wa hã asiré isazei'wa nherẽ, ãma 're morĩ wẽ da, te te sima wẽ õ wamhã, ta hã te za oto ãma iwaihu'u za'ra wa'wa. Tawamhã ihâiba zu ãma 're anomro aba mono da, asima 're wẽ za'ra wa'aba mono õ di za, siséb za'ra da, ta norĩ hã.

¹⁵ Tane nherẽ, asitob'ru na ãma 're rosa'rata za'ra wa'aba mono õ di za. Asisãnawãi ma, 're iroti za'ra wa'aba mono ne, te za tô tãma 're iroti pese za'ra wa'aba mo.

Rob'ui'éré na rowasu'u 'rãsudu

¹⁶ Wanhib'apito wi, wama rowẽ nhomri'wai wi, wa wa te 're rowaptẽrẽ za'ra, rowẽ u'â hã ai'ãma 're hâimana u'âsi za'ra wa'aba mono da.

¹⁷ Ĩsi'uihâ na wa aima ãma rob'ui'éré za'ra wa'wa, ĩnhib'rata na, ãhã na hã: “Wa hã Paulu, wa asawi za'ra wa'wa.” Ãne u'âsi, wa nasi dama rob'ui'éré, ĩnhisi na. Ãne wa aima rob'ui'éré za'ra wa'wa.

¹⁸ Wanhib'apito Zezu Cristuhu wi, wa wa te 're rowaptẽrẽ za'ra, isimizawizé hã uburé aihâiba mono bâ wa'aba ai'ãma 're hâimana za'ra wa'aba mono da.