2 Tesalonita 2 - ꞌRe Ihâimana Uꞌâsi Mono Zadawa Wasuꞌu

Wanhib'apito Zezu Cristu apâ za we imorĩzé wasu'u

^1-3 Ãté ni'wa hã ma tô aima rowasu'u za'ra wa'wa, Wanhib'apito Zezu Cristu za we apâ wazô iwisizéb za'ra na hã. Ãté bâdâ hã iwa waptã'ã newa, ma tô aima rowasu'u za'ra wa'aba ni. Tawamhã iwasu'u hã tô sena newa, ãma 're rosa'rata za'ra wa'aba mono õ di za, 're aipẽ'ẽwara za'ra wa'aba mono tõ da. Ãté 'Re ihâimana u'âsi mono hã, marĩ hã ni'wai ma, te te iwaihu'u zarina newa, ãté duré marĩ hã te te iwapari zarina newa, ãté duré wanhimi'ui'éré zarina newa, ni'wa hã ma tô ãne na aima rowasu'u za'ra wa'wa. Mare di. Ãne danhimirowasu'u hã 're saze za'ra wa'aba mono õ di za, dazadawa nhipese na da te aiwi 're udâ tõ za'ra wa'aba mono da. Wanhib'apito wei morĩ õ ré, daro mono bâ te za 'Re ihâimana u'âsi mono nhimiroti zada 're dahâimana za'ra. Duré ni'wa hã iwasété uptabi hã te za dama sihâi'ré. Ta hã, ropipa ãma za oto 're ihâimana mono zé hã.

⁴ Ta hã, 'Re ihâimana u'âsi mono upana waihu'u pese newa, ãma 're idawata za'ra mono norĩ hã te za dawi wẽ'õ za'ra, ta norĩ ãma 're dawata za'ra mono tõ da oto. Romhâiba hã te za duré dawi wẽ'õ za'ra, ãma 're dawata za'ra mono tõ da. Duré 'Re ihâimana u'âsi mono te te dama 're i'apisutu mono hã te za dawi wẽ'õ za'ra. Uburé ãma 're idawata za'ra mono na te te ãma ida'rãnhipa na, te za siwasu'u ãne dama: “Wa hã, Ĩwaihu'upe. Wa hã 'Re ihâimana u'âsi mono.” Ãne te za siwasu'u. Tawamhã ti'ai ãma 'Re ihâimana u'âsi mono nhorõwa 'ri u, te za ãzé, tame sãmra da.

⁵ E ma tô tawamhã ãne na hã aiwi aimani za'ra wa'wa, te aima irowahutu za'ra wa'aba zé hã ai'rata ĩnhamra za'ra wa'aba ré.

⁶ Tane nherẽ, aibâ iwasété uptabi hã 'Re ihâimana u'âsi mono, bâdâ te te tãma pisutu õ ré, we datẽme watobro õ di za a'â. Niwa bâdâ hã iwa waptã'ã wapsi, te za wei watobro, 'Re ihâimana u'âsi mono nhimipisutuzéb zarina si. Ãne na hã ma tô duré iwaihu'u za'ra wa'wa.

⁷ Ãhã na pi'uriwi, ma tô Wa'uburé hã tinhimiromhuri na ãma sãna'rata. Tawamhã 'Re ihâimana u'âsi mono te te tiwi isawizé hã te za a'â ãma 're hâimana, iwasété uptabi ãma, bâdâ iwa waptã'ã õ wa a'â. Taha parip si, te te tiwi isawizé hã ãma 're hâimana mono õ di za oto.

⁸ Tawamhã iwasété uptabi hã te za we sihâi'ré oto, danho'a te te romhuri da. Tane nherẽ, Wanhib'apito Zezusi hã wei morĩ wamhã, tizadawa wa'u'u na te za tiwĩ. Rowa'a za'ẽtẽ ré wei wisi wamhã, taha wamhã iwasété uptabi hã tâibâ za oto.

⁹ Tane nherẽ, Wanhib'apito wei morĩ õ ré, te za iwasété uptabi hã Satanasihi waihu'u pese zéb zarina, te te dama 're romhõsi. Marĩ hã tô sena newa, da te ãma iwaihu'u za'ra zéb da hã, duré marĩ na idatob'uzu za'ra zéb da, te za te te dama 're romhõsi.

¹⁰ Tinhimiromhuri wasété na te za dawi udâ pese za'ra, 'Re ihâimana u'âsi mono nhiti za 're idahâimana u'âsi za'ra mono norĩ wi. Ta norĩ hã te iwasu'uwẽ hã te te siwi 're wẽ'õ za'ra, tô sena iwasu'uwẽ hã. Tahawa, ta norĩ hã te te 're sõ'reptu za'ra mono õ di za, 'Re ihâimana u'âsi mono hã.

¹¹ Tô sena iwasu'uwẽ hã da te dasiwi 're wẽ'õ za'ra mono wa, 'Re ihâimana u'âsi mono hã te te dapawaptob õ di za. Tawamhã te te dapawaptob õ wa, te za oto dama pisutu za'ra, tizadawa nhipese na tô sena newa te te dawi i'udâ nhimiroti si, da te 're sazei pese za'ra mono da oto.

¹² Tahawa, sisiti te za dazatõrĩ za'ra ropipa u, tô sena iwasu'uwẽ hã da te 're isaze za'ra mono õ norĩ hã, iwasété si, da te dasima 're iwẽ za'ra mono norĩ hã.

'Re idasisõ'reptu za'ra mono zé wasu'u

¹³ Wasisãnawã norĩ, 'Re ihâimana u'âsi mono ãma, wa 're wawata u'âsi za'ra, ãma 're anomro wẽ wa'aba mono wa, Wanhib'apito te te 're i'asawi pese za'ra wa'aba mono norĩ hã. 'Re ihâimana u'âsi mono hã ma tô marĩ õ uptabi ré sima aipisutu za'ra wa'wa, imorĩ'rata na te te 're asõ'reptu za'ra wa'aba mono da. Tawamhã Tipẽ'ẽzani hã ma tô te te aima 're anhomri 'wa, itẽme 're anomro wẽ wa'aba mono da. Ma tô duré ai'ãma tinhib'a'uwẽ uptabi za'ra wa'wa. Ma tô duré te te 're aipawaptob u'âsi za'ra wa'wa, tô sena iwasu'uwẽ hã 're sazei pese za'ra wa'aba mono da.

¹⁴ Te te 're asõ'reptu za'ra wa'aba mono da, ma tô aipẽ'ẽ 're aima nharĩ za'ra wa'wa, iwasu'uwẽ, wa te aima wasu'u za'ra wa'aba wamhã, Wanhib'apito Zezu Cristuhu siré rowẽ uptabi ré 're aihâimana u'âsi za'ra wa'aba mono da, isine rowa'a za'ẽtẽ ré.

¹⁵ Tahawa, wasiré isazei'wa norĩ, 're sazei pese za'ra wa'aba mono za, sena na wa te aima 're irowahutu za'ra wa'aba mono na hã. Uburé wamreme na duré uburé wanhimi'ui'éré na, wa te aima ãma 're irowahutu za'ra wa'aba mono zé hã te za 're isazei pese za'ra wa'aba mo, isarina 're anomro wẽ wa'aba mono da.

^16-17 'Re ihâimana u'âsi mono hã Wamama hã, te te 're wa'azawi pese. Te duré te te 're wa'apawapto, wapẽ'ẽ 're, 're wanomro wẽ u'âsi mono da, wahâimana nhiptete sina wanhimi'ẽ na sô 're wanhimipari u'âsi za'ra mono da, iwẽ zô. Tahawa, wa za Wamama wi, wa te 're rowaptẽrẽ u'âsi za'ra, duré Wanhib'apito Zezu Cristuhu wi zama, ato sina 're aihâimana za'ra wa'aba mono da, duré asiptete sina iwẽ na si tãma 're romhuri pese za'ra wa'aba mono da, asimirowasu'u wẽ za'ra wa'aba na hã.