2 Tesalonita 1 - ꞌRe Ihâimana Uꞌâsi Mono Zadawa Wasuꞌu

^1-2 Isazei'wa norĩ, wa hã Paulu, Sila norĩ me, Timotiu norĩ me, wa ãma aima rob'ui'éré za'ra wa'aba ni, Tesalonita na 'ri nho'õmo nhisi ãma asiré 're asi'rã'õtõ aba mono norĩ ma. Wamama hã 'Re ihâimana u'âsi mono hã, duré Wanhib'apito Zezu Cristu hã te asina 're i'umnhasi za'ra wa'aba mo, isib'a'uwẽ 're aihâimana za'ra wa'aba mono da. Wamama ma, wa ai'ãma 're wamreme zusi u'âsi 'wa, 'Re ihâimana u'âsi mono ma, duré Wanhib'apito Zezu Cristuhu ma zama, isimizawizé hã ai'ãma 're hâimana u'âsi za'ra wa'aba mono da, rowẽ u'âsi, duré ãma 're anomro aba mono da.

Zezu Cristu apâ wei morĩ wa, dahâimanazéb zarina za te te dama i'arowairébézé wasu'u

³ Wasisãnawã norĩ, 'Re ihâimana u'âsi mono ãma, wa 're wawata u'âsi za'ra, 're aihâimana wẽ za'ra wa'aba mono wa. Ta hã te te 're aipawaptob za'ra wa'wa, tiwaihu'u pese na. Tawamhã ma tô oto 're isazei pese za'ra wa'aba mo. Awẽ sidâpâsi 're isazei pese za'ra wa'aba mono zé hã, te ãma asima 're isa'ẽtẽ za'ra wa'aba mo. Aihâiba mono bâ, te 're asisawi za'ra wa'aba mo. Duré awẽ sidâpâsi 're asisawi pese za'ra wa'aba mono zé hã te ãma 're isa'ẽtẽ za'ra wa'aba mo. Tahawa, 'Re ihâimana u'âsi mono ãma, wa 're wawata u'âsi za'ra. Ãne, wa te 're 'manharĩ za'ra mono da, wama 're wẽ za'ra mono di. Tô i'uwaibaba na si.

⁴ Tahawa, wa norĩ hã wa wa te 're aiwẽsãmri za'ra wa'wa, wato sina. Isazei'wa norĩ hã, daro mono bâ siré 're isi'rã'õtõ mono norĩ ma, wa tô wa te 're aiwasu'u wẽ za'ra wa'wa. Tawamhã 're sazei pese za'ra wa'aba mono wa, ma tô da te ai'ãma 're rowasété za'ra wa'wa. Iwasédé hã da te aima 're i'manharĩ za'ra wa'aba mono zé hã, ma tô 're isépata za'ra wa'aba mo. Tazahã, asimi'ẽ na te asina 're i'umnhasi za'ra wa'aba mo. Taha na, wa tô wa te dama 're aiwasu'u wẽ za'ra wa'wa, wapẽ'ẽ 're wato sina.

⁵ Tawamhã wa tô wa norĩ hã waihu'u za'ra ni. 'Re ihâimana u'âsi mono hã, sena na te za dahâimanazéb zarina te te dama 're arowairébé. A norĩ wa'wa hã 're sazei pese za'ra wa'aba mono wa, te 're irobzépata za'ra wa'aba mo. Tawamhã 'Re ihâimana u'âsi mono hã te te 're aipawaptob za'ra wa'wa, ãma 're anomro wẽ u'âsi aba mono da. Tahawa, te za te te 're aipisutu za'ra wa'wa, i'rata 're aihâimana u'âsi za'ra wa'aba mono da, isimiroti ré 're anomro wẽ u'âsi aba mono da. Tahawa, za iré 're anomro wẽ wa'aba mono wa, te a'â 're irobzépata za'ra wa'aba mo, asirõiwi da, 're sazei pese za'ra wa'aba mono wa. Ãne na te te 're aipawaptob za'ra wa'aba mono na, wa tô waihu'u za'ra ni, tô ibâ isimirowairébézé hã.

⁶ Tane tô, 'Re ihâimana u'âsi mono, tô sena. Tawamhã te za niha te te dama 're arob'manharĩ, te te aima 're irob'manharĩ wasété za'ra wa'aba mono norĩ ma.

⁷ Duré te za te te 're aipawaptob za'ra wa'wa, rowẽ na si 're aihâimana za'ra wa'aba mono da. Wa norĩ zama, robzépata na 're iwahâimana za'ra mono norĩ zama, te za te te 're wapawaptob za'ra, rowẽ na si 're wahâimana za'ra mono da. Tô sena, te za Wanhib'apito Zezusi hã wei wama sihâi'ré za'ra hâiwa hawi, te te tãma 're iromhuri pese za'ra mono norĩ me. Tawamhã wei morĩ wamhã, te za tô dahâ za'ra. Te za duré wa norĩ hã wapawaptob za'ra.

⁸ Tawamhã unhama ro'o wa'wam ne na, te za we nhamra, Zezusi hã. Niha na te za ãhã wamhã dama arob'manha, 'Re ihâimana u'âsi mono, da te dasima 're iwẽ'õ pese za'ra mono norĩ ma, duré Wanhib'apito Zezusihi nhiminho'reptuzém na, iwasu'uwẽ te te 're isazei õ za'ra mono norĩ ma zama.

⁹ Ta norĩ hã te za sisiti satõrĩ za'ra, isiti 're si'ubumroi u'âsi mono da, rowẽ'õ u'âsi ãma. Taha na te za te te 're robzépata u'âsi za'ra. Tawamhã Wanhib'apito nhiti 're dahâimana za'ra mono wamhã, tiwaihu'u pese na marĩ hã rowẽ uptabi na, te te 're da'apawapto mono õ di za. Taha ré 're dahâimana za'ra mono õ di za. Ãne, sena na te za dama arowairébé.

¹⁰ Tawamhã wei morĩ wamhã, isimiroti zarina 're danomro wẽ mono da, te te 're idapawaptob za'ra mono norĩ hã te za ãma tiwata za'ra, te te sina 're i'umnhasi za'ra mono norĩ hã. Te za tô ãma titob'uzu za'ra. A norĩ wa'aba zama, wanhimirowasu'u zarina iwasu'uwẽ na 're isaze za'ra wa'aba mono norĩ hã, te za ãma dame aiwata za'ra wa'wa za. Te za duré ãma atob'uzu za'ra wa'wa za. Tane tô, bâdâ ipire, iwa waptã'ã wapsi, te za uburé dama ãma uwaimra.

¹¹ Tahawa, Wanhib'apito 'Re ihâimana u'âsi mono wi, wa wa te 're rowaptẽrẽ u'âsi za'ra, iwẽ na te te 're aipawaptob za'ra wa'aba mono da, taha zarina, 're idanomro mono zép tém na 're anomro wẽ wa'aba mono da, te te aima 're ipisutu za'ra wa'aba mono zéb zarina si. Wa duré wa te tiwi 're rowaptẽrẽ za'ra, asimirosa'rata wẽ 'manharĩ'wai wa'wa hã, tiwaihu'u pese na te te aima ãma 're uwaimrami za'ra wa'aba mono da, marĩ hã, iwẽ si 're 'manharĩ za'ra wa'aba mono da, 're sazei pese za'ra wa'aba mono wa.

¹² Tawamhã Wanhib'apito Zezusihi ãma te za 're dawata za'ra, Wanhib'apito 'Re ihâimana u'âsi mono me, te te 're i'aipawaptob za'ra wa'aba mono zém na ãma 're aihâimana wẽ za'ra wa'aba mono wa. Te za duré te te dama 're aiwasu'u wẽ za'ra wa'wa, Wanhib'apito Zezusi hã.