2 Corĩtu 9 - ꞌRe Ihâimana Uꞌâsi Mono Zadawa Wasuꞌu

Zudéa ãma isazei'wa norĩ ma, idanhoprub za'ra zé wasu'u

¹ E wa hã wa za ãne na aima ãma roti na sahu za'ra wa'wa, ĩnhimi'ui'éré na hã, Zudéa na danhipti'a nho'õmo nhisi ãma 'Re ihâimana u'âsi mono nhib'a'uwẽ norĩ ma, asõprub za'ra wa'aba da, dame. Mare di. Ãne na, te aima ãma roti na sahu za'ra wa'aba õ di za, ãhã na hã.

² E marĩ wa. Zudéa ãma isazei'wa norĩ hã asiwi pawaptob za'ra wa'aba da, asi'uihâ na ato sina, ãma asima rosa'rata za'ra wa'aba wa. Ãne na, wa tô wa hã ãma aiwaihu'u za'ra wa'wa, tô sena na. Ãme Masédonia ãma isazei'wa norĩ 're ihâimana za'ra mono norĩ ma, wa tô aiwasu'u wẽ za'ra wa'wa. Ãne, wa tô ta norĩ ma hã tãma aiwasu'u wẽ za'ra wa'wa: “Ataza ãma isazei'wa norĩ hã ma tô rob'uiprazé ubumro na sãna'rata za'ra, wahub 'rata na hã.” Ãne na, wa tô tãma aiwasu'u wẽ za'ra wa'wa. Rob'uiprazé hã ato sina, asiwi i'ubumro siromo za'ra wa'aba zéb zarina, ma tô ta norĩ zama sima ãma rosa'rata za'ra, to sina, aiwa asine wa'aba, te te siwi 'manharĩ wẽ da, aiwab da.

³ Ãne na, wa tô dama aiwasu'u wẽ za'ra wa'wa. Tane nherẽ, wa za ĩsisõwa ãma atẽme satõrĩ za'ra wa'wa, wasisãnawã norĩ hã, rob'uiprazé ubumro na te te aipawaptob za'ra wa'aba da, ĩwana ré asiwi 'rã'õtõ pari aba da, te dama aiwasu'u wẽ za'ra wa'aba zéb zarina. Duré te dama aiwasu'u wẽ za'ra wa'aba zém na, taré te ai'umnhasi baba za'ra wa'aba tõ da, wa za tô ãne hã 'manha.

⁴ Ãté Masédonia hawimhã, wasisãnawã norĩ hã te za ãma ĩsiré ai'aba'ré, atẽme za'ra wa'aba. Tawamhã ãma atẽme wasihutu aba wamhã, rob'uiprazé hã asiwi 'rã'õtõ pari aba õ wamhã, ãté wa aré aima aséb za'ra wa'aba ni, taré wa te ai'umnhasi baba za'ra wa'aba wa. A norĩ wa'wa hã bété. Te aré tô aséb za'ra wa'wa, tô sena i'ubumro na, ãma uwaimrami za'ra wa'aba õ wa.

⁵ Tahawa, wa tô ãne rosa'rata ĩsima, wasisãnawã norĩ hã ĩsisõwa te ãma atẽme satõrĩ za'ra wa'aba da, rob'uiprazé ubumro na te te aipawaptob za'ra wa'aba da, asiwi 'rã'õtõ pari aba hâ ĩzô, ĩma iropisutu za'ra wa'aba zéb zarina. Tawamhã ãma atẽme ĩwisi za'ra wa'aba wamhã, õne haré wa za ti'â, asi'uihâ na ato sina, dama asõprub za'ra wa'aba zém na, da te dasiwi aiwaihu'u za'ra wa'aba da.

⁶ Ãne na, wa za duré ãma aipo're pu'u za'ra wa'wa, ãma rosa'rata za'ra wa'aba da. Amnho hã suru na da te 're izuri mono zéb zarina, te za suru na da te 're ubumro za'ra, dama 're 'rã za'ra mono wamhã. Sa'ẽtẽ na, da te 're zuri mono wapsi, te za oto sa'ẽtẽ na da te 're ubumro za'ra. Tane duré, dasima 're idanhoprub za'ra mono zéb zarina, te za 'Re ihâimana u'âsi mono hã dama 're sõpru, iwa'rãmi.

⁷ 'Râwi aipẽ'ẽ 're, asima iwaihu'u za'ra wa'aba zéb zarina si, te za aihâiba mono bâ dama asõprub za'ra wa'wa, ãté sa'ẽtẽ na, ãté suru na. Robzei'õ nherẽ, dama asõprub za'ra wa'aba õ di za. Duré taré da te aima i'ru za'ra wa'aba zéb zarina, dama asõprub za'ra wa'aba õ di za. Mare di. Asi'uihâ na si te za asima iwẽ za'ra wa'aba zéb zarina, dama asõprub za'ra wa'wa, ato sina. Ãne si iwẽ uptabi hã, 'Re ihâimana u'âsi mono ma hã, dato sina dasima 're idanhoprub za'ra mono zé hã.

⁸ 'Re ihâimana u'âsi mono hã waihu'u pese uptabi di, uburé marĩ iwẽ hã te te aima 're i'anhomri aba mono da hã, marĩ zô aiwi 're rowaptâ'â za'ra wa'aba mono tõ da, ãma 're aihâimana za'ra wa'aba mono zéb da hã, duré ãma 're idapawaptob za'ra wa'aba mono zéb da hã.

⁹ Duréihã ni'wa hã ma tô ãne na rob'ui'éré, ibaihâ na hã: “Isibrob'õ norĩ ma, te 're sõprub u'âsi, sa'ẽtẽ na. Isimizawi pese zé hã dawi 're si'utõrĩ waihu'u za'ra mono õ di za. Te za dama 're hâimana u'âsi za'ra.”

¹⁰ E 'wa hã te robzâ hã robzuri'wa norĩ ma, te te 're anhomri. E 'wa hã, te dasazé hã te te dama 're anhomri. Ta hã, 'Re ihâimana u'âsi mono. Tane te za duré isõprubzé hã aima 're sa'ẽtẽ za'ra wa'wa, dama 're asõprub za'ra wa'aba mono zé wa'rãmi, sa'ẽtẽ uptabi na oto dama ãma 're asõprub za'ra wa'aba mono da, nimahã na hã.

¹¹ Sa'ẽtẽ na te za tô iwẽ hã te te aima 're sõmri u'âsi za'ra wa'wa, taha zarina, oto a norĩ wa'wa hã sa'ẽtẽ na ãma 're dapawaptob u'âsi za'ra wa'aba mono da, aiwab da. Tahawa, da'ahâ na te za oto 'Re ihâimana u'âsi mono ãma tawata za'ra ni, asõprub za'ra wa'aba zé hã za wa te datẽme ãwisi za'ra wẽ te.

¹² Iwẽ hã te za tô i'manharĩ za'ra wa'wa, ãne na dapawaptob za'ra wa'aba wamhã. E marĩ wa. Ta norĩ wi hã, marĩ zô tiwi 're rowaptâ'â za'ra mono õ di za oto, 'Re ihâimana u'âsi mono nhib'a'uwẽ norĩ wi hã, Zudéa ãma 're ihâimana za'ra mono norĩ wi hã. Taha zarina, te za duré ahâ na oto ãma 're wata za'ra, 'Re ihâimana u'âsi mono ãma hã.

¹³ A norĩ wa'wa hã tãma asõprub za'ra wa'aba zém na, pawaptob za'ra wa'aba wa, te za tãma ãma i'uwaimrami za'ra wa'wa, 'Re ihâimana u'âsi mono ma hã. Tahawa, ahâ na te za tô 'Re ihâimana u'âsi mono ãma tiwata zara, Cristuhu wasu'uwẽ zarina 're anomro wẽ wa'aba mono na, duré asõprub uptabi na pawaptob za'ra wa'aba wa, ta norĩ hã, duré darob amoi ãma 're ihâimana za'ra mono norĩ hã, pawaptob za'ra wa'aba wa.

¹⁴ Ta norĩ hã te te 're asawi pese za'ra wa'aba mono wa, te za ai'ãma 're mreme zusi u'âsi 'wa, 'Re ihâimana u'âsi mono ma, ta hã tinhimizawi pese zéb zarina, te te aipisutu za'ra wa'aba wa, asimarĩ na tãma asõprub za'ra wa'aba da, isimarĩ'õ norĩ ma hã.

¹⁵ 'Re ihâimana u'âsi mono ãma si, wa za 're wawata u'âsi za'ra, ti'ra na wama isõprub za'ra zé wa'rãmi. Isõprubzé hã wẽ uptabi nherẽ, damreme na i'uwaibaba na, da te dasima ãma 're irowasu'u za'ra mono zé hã, da te dasima ãma 're uwaimrami waihu'u za'ra mono õ di.