2 Corĩtu 7 - ꞌRe Ihâimana Uꞌâsi Mono Zadawa Wasuꞌu

¹ Ĩsisãnawã norĩ, ĩma asawi pese za'ra wa'aba norĩ, ãne hã uburé 'Re ihâimana u'âsi mono te te wama 're i'aropisutu mono zé hã, oto wama 're hâimana za'ra mono wa, uburé marĩ iwasété wi, wa za 're wasi'madâ'â pese za'ra, ãma 're wasihâiba wasété za'ra mono tõ da, duré 'râwi wapẽ'ẽ 're, ãma 're wasiwasété za'ra mono tõ da. Tahawa, 'Re ihâimana u'âsi mono hã wa za wa te wasiwi 're wazé pese za'ra. Wa za duré tãma 're wasisõmri u'âsi za'ra, ãma 're wanomro wẽ u'âsi mono da.

Paulu hã dama 're itoi u'âsi mono zé wasu'u

² Ma'ãpé, asiwi 're wazawi wẽ za'ra wa'aba mono, apâ 're wawaibui wẽ wa'aba mono da. Ni'wam norĩ hã asiré 're hâimana za'ra wa'aba mono nherẽ, ma tô wawasédé hã wa'ãma sa'ra. Tane nherẽ, duré wa te aima romhuri za'ra wa'aba ré hã, marĩ iwasédé hã wa te aima 'manharĩ za'ra wa'aba õ di, nimahã na hã. Duré wanhimiromhuri zarina, aihâimana wasété na 'râwimhã asi'marõpãrĩ za'ra wa'aba õ di. Duré rob'uiprazéb zô, marĩ taré, wa te aima 'manharĩ za'ra wa'aba õ di. Mare uptabi di.

³ E aiwasédé hã te ai'ãma sa'ra wa'aba da, wa ãne ãma aima rowasu'u za'ra wa'wa. Mare di. Ãne da hãi õ di. A norĩ wa'wa hã wama asawi uptabi za'ra wa'aba di. Tahawa, niha wama 're romhâimana za'ra mono wa, 're wadâ'â za'ra mono da nherẽ, wama 're rowẽ za'ra mono di za. Ãne na, wa tô aima wasiwasu'u pari za'ra wa'aba ni.

⁴ A norĩ wa'wa hã ĩma ai'umnhasi za'ra wa'aba di oto. Wa aima 're ĩtoi u'âsi za'ra wa'wa. Aiwasu'u wẽ wa'aba na, ma tô asina ĩma 're irowẽ zani za'ra wa'aba mo. Rowasédé hã wazada 're wairébé u'âsi mono nherẽ, wa ĩtoi uptabi na 're ĩhâimana u'âsi.

⁵ Masédonia u, we wasimasisi wamhã, wa te ãma ãpusi waihu'u õ di. Ãmemhã wazada hã ro'wa'rutu uptabi di, da'ahâ na wazada dahâimana za'ra wa. Duré ai'ãma wahâtâ'â za'ẽtẽ za'ra wa'aba di. E marĩ wa. Wanhib'apito wasu'uwẽ nhiti, aipizari za'ra wa'aba õ'umnhasite.

⁶ 'Re ihâimana u'âsi mono hã, taha si dapẽ'ẽ nomri'wa te 're hâimana, dawi 're robzei'õ za'ra mono nherẽ. Ta hã ma tô wapẽ'ẽ hi, Titu hã aihawi wa'aba, nimosi wei watẽme wisi wa.

⁷ E tawamhã, Titu wei watẽme iwisizém na si, ma tô wapẽ hã i're wama nomro. Mare di. Taha na si õ di. Aiwasu'u wẽ wa'aba na zama, ma tô wapẽ hã i're wama nomro. Duré Titu hã asiwi ipẽ'ẽ hiri aba na aiwasu'u wẽ za'ra wa'aba na zama, ma tô wapẽ hã i're wama nomro. Ta hã Titu hã ma tô wama aiwasu'u wẽ za'ra wa'wa, ãne: “Corĩtu ãma isazei'wa norĩ hã te sima aiwẽ za'ra, 'râwi te te duré asabu za'ra da, tãma asawi uptabi za'ra wa. Ta norĩ hã ma tô duré 'râwi sina tipẽ'ẽzé za'ra, marĩ hã iwasétére hã te te siwi i'manharĩ za'ra zém na hã. Te duré sima aiwẽ za'ra, te te siwi ai'upari wẽ za'ra da, asitob'ru norĩ wi.” Ãne na ma tô wama aiwasu'u wẽ za'ra wa'wa, Titu hã. Tahawa, aima ĩtoi uptabi za'ra wa'aba di, ãhã na hã.

⁸ Rob'ui'éré te aima isõmri 'rata za'ra wa'wa hã sõré za'ra wa'aba wamhã, ma tô aiwi tirobzei'õ pese za'ra wa'wa, te ãma aima inharĩ za'ra wa'aba zém na hã. Tahawa, wa tô wa hã ĩsiwi ãma robzei'õ, te aiwi ãma irobzei'õ za'ra wa'aba zém na hã. Tane nherẽ, te ãma ĩsiwi irobzei'õ na te sahu õ di oto. E marĩ wa. Te aiwi ãma irobzei'õ za'ra wa'aba zém na, ãma aihâimana za'ra wa'aba õ wa oto.

⁹ Tahawa, wa hã ĩtoi uptabi di, ãhã na hã. E ĩnhimi'ui'éré na te aiwi robzei'õ pese za'ra wa'aba wa, wa ĩto sina ĩhâimana. Mare di. Aiwi irobzei'õ pese za'ra wa'aba zéb zarina, aiwasété wi aipizari za'ra wa'aba wa, wa ĩto sina ĩhâimana. 'Re ihâimana u'âsi mono te te aima iwẽ za'ra wa'aba zéb zarina si, ma tô aiwi tirobzei'õ za'ra wa'wa. Tahawa, wa hã marĩ iwasédé hã te ãma aima 'manharĩ za'ra wa'aba õ di, ĩnhimi'ui'éré na te ãma aima inharĩ za'ra wa'aba zém na hã.

¹⁰ Isazei'õ'wa norĩ hã 're inomro wasété mono zéb zarina, robzei'õ u'âsi 're hâimana za'ra mono wa, te ta norĩ hã dâ'â u'âsi ne 're hâimana za'ra, tipẽ'ẽ 're. Tane nherẽ, 'Re ihâimana u'âsi mono te te dama 're i'apisutu mono zéb zarina si, dawi 're robzei'õ pese za'ra mono wamhã, tawapsi te za dawasété wi 're dasipizari za'ra. Taha zarina si, te za oto 'Re ihâimana u'âsi mono hã te te 're da'anho'reptu. Ãne wamhã, 're idahâimana wasété za'ra mono zém na 're dasiwẽ'õ za'ra mono õ di za oto.

¹¹ Ma'ãpé, ãne na ãma asipo're pu'u za'ra wa'aba, 'Re ihâimana u'âsi mono te te sima aiwẽ za'ra wa'aba zéb zarina, aiwi irobzei'õ pese za'ra wa'aba zém na hã. Taha zarina, ma tô oto asiwaihu'u za'ra wa'wa, uburé iwasédé hã 'râwi asiwi wẽ'õ pese za'ra wa'aba da. Tahawa, ma tô oto asima iwẽ uptabi za'ra wa'wa, aiwasédé hã 're i'manharĩ za'ra wa'aba mono zém na ĩma asiwasu'u za'ra wa'aba da, apâ asima ropese za'ra wa'aba da. Ma tô duré asiwẽ'õ pese za'ra wa'wa, aiwasédé hã aima ihâimana za'ra wa'aba zém na hã. 'Re ihâimana u'âsi mono nhimihâzém na, isadawa para ĩmreme na te aihâ za'ra wa'aba õ'umnhasite, ma tô ĩma aipahi za'ra wa'wa. Tane nherẽ, ma tô asima ĩwẽ za'ra wa'wa oto, apâ ãma atẽme ĩmorĩ aba da, wasisabu su'u za'ra da. I'uwaibaba na si, niha ãma rosa'rata za'ra wa'aba da, ma tô asi'madâ'â za'ra wa'wa, aibâ hã tiwasédé te te i'manharĩzém na hã asiwi wẽ'õ za'ra wa'aba da. Tahawa, aiwasédé hã ãma 'manharĩ za'ra wa'aba õ di. Ãne, wa tô ã hawim nherẽ ãma aiwaihu'u za'ra wa'wa.

¹² Tahawa, e taré aibâ hã tiwasédé te te da'ãma i'manharĩ ãma, ĩpẽ'ẽzé wa, wa tô ãne na ãma aima rob'ui'éré za'ra wa'wa, taha hâiba na te ãma aima nharĩ za'ra wa'aba da. Mare di. Duré e taré aibâ hã te pawaptob da, wa tô ãma aima rob'ui'éré za'ra wa'wa, ãne na hã. Mare di. A norĩ wa'wa hã aima wazawi pese za'ra wa'aba wa, ĩnhimiroti hã 're i'madâ'â za'ra wa'aba mono na 'Re ihâimana u'âsi mono nho'a 'râwi asiwaihu'u za'ra wa'aba da si, wa tô ãne na hã ãma aima rob'ui'éré 'rata za'ra wa'wa.

¹³ Ãne hã wa te ai'ãma waihu'u za'ra wa'aba wa, ma tô apâ wapẽ hã i're wama nomro. Tane nherẽ, taha zarina si õ di, aima wato za'ra wa'aba zé hã. Titu hã we watẽme wisi wamhã, ma tô wama aiwasu'u wẽ za'ra wa'wa. Ai'rata sãmra aba ré hã, ma tô, u, asiwi ipẽ'ẽ hiri 'wa, asiwi ipawapto wẽ wa'aba zém na hã. Ãne wa, ma tô, to sina hã we watẽme wi, aihawi wa'aba hã. Ãne wa, wa duré wa norĩ zama hã watoi uptabi na isabâdâmhã wahâimana.

¹⁴ Titu hã ãma atẽme morĩ aba õ ré, wa tô tãma aiwasu'u wẽ za'ra wa'wa, isõwa, te te aiwaihu'u siromo za'ra wa'aba da. Tahawa, taré te ãma tãma ai'umnhasi baba za'ra wa'aba õ di, isõwamhã. Wa norĩ hã wazadawa nhipese ãna, wa tô wanhimirowasu'u wẽ na si, wa te aima 're rowasu'u u'âsi za'ra wa'wa, tô sena na ãma 're iwawaihu'u za'ra wa'aba mono zéb da hã. Taha zarina, Tituhu ma, wa te i'aiwasu'u wẽ za'ra wa'aba zém na hã, tô sena na te za taha zarina si oto da te 're aiwaihu'u za'ra wa'wa, a norĩ wa'wa hã.

¹⁵ Titu hã ai'rata sãmra aba ré, ma tô isimiroti hã asiwi iwapari pese 'wa. Ma tô duré asiwi iwazéb za'ra wa'aba sina, asiwi i'âri wẽ wa'wa. Tawamhã taha na nasi ai'ãma po're pu'u za'ra wa'aba wamhã, ma tô isimizawizé ai'ãma za'ra wa'aba hã te te sina tãma 're hâimo u'âsi.

¹⁶ Tahawa, wa hã duré, aima ĩto za'ẽtẽ za'ra wa'aba di. E marĩ wa. Ĩma ai'umnhasi za'ra wa'aba wa oto, ãne na 're i'aihâimana za'ra wa'aba mono zém na hã.