2 Corĩtu 2 - ꞌRe Ihâimana Uꞌâsi Mono Zadawa Wasuꞌu

¹ Ãne wa, wa tô ĩsima ãma saprĩ, apâ ãma atẽme ĩmorĩ aba tõ da a'â, te ĩsina aima ropisutu za'ra wa'aba nherẽ, ĩmreme na te duré aihâ za'ra wa'aba wa, aiwi robzei'õ za'ra wa'aba tõ da. Ãma atẽme za'ra wa'aba ĩmorĩ 'rata wamhã, ĩnhimiroti na te aihâ za'ra wa'aba zém na hã ma tô aiwi tirobzei'õ za'ra wa'wa. Ãne tõ da duré, ãma atẽme ĩmorĩ aba õ di za a'â.

² Ãma atẽme ĩmorĩ za'ra wa'aba 'wa'âhã, ãté te aré duré aiwi tirobzei'õ pese za'ra wa'wa, ai'rata ĩnhamra za'ra wa'aba wa. Ãne wamhã, e 'wam norĩ te aré duré sina ĩma rowẽ wazere za'ra, ĩwi robzei'õ pese wamhã. Ãté aré ni'wai õ di, te te sina ĩma irowẽ wazere da hã. E marĩ wa. A norĩ wa'aba wi, aiwi robzei'õ za'ra wa'aba wa.

³ Ãne wa, wa tô rob'ui'éré si ãma aima sõmri za'ra wa'wa a'â, te ĩsina iropisutuzém nhibrob're. Wa tô duré ĩsima rosa'rata, ãne: “Ãté itẽme ĩmorĩ za'ra wamhã, te za ĩwi tirobzei'õ pese, ĩnhimiroti hã te te 're wapari za'ra mono õ wa, ta norĩ hã. Ãne wa, wa za rob'ui'éré si tãma sõmri za'ra a'â. Tawamhã ĩnhimiroti hã te te saze za'ra wamhã, ĩto sina, wa za itẽme ĩmorĩ za'ra oto. Ãne wamhã, tãma ĩto za'ra zéb zarina, te za duré to sina sima 're hâimana za'ra, ta norĩ hã.” Ãne wa tô ĩsima rosa'rata, ai'ãma za'ra wa'aba hã. 'Re aihâimana za'ra wa'aba mono zém na, 're ĩtoi mono õ di. E ãne hã i'uwaibaba, ĩma hã. Mare di. I'uwaibaba õ di. Tahawa, wa tô a'â rob'ui'éré si ãma aima sõmri za'ra wa'wa.

⁴ Te ãma aima rob'ui'éré 'rata za'ra wa'aba wamhã, wa tô ai'ãma robzépata za'ẽtẽ za'ra wa'wa, ĩpẽ'ẽ 're. Ãne wa, ĩpẽ'ẽzé uptabi di. Tahawa, wa tô duré aiwa'õ. E tawamhã, aiwi robzei'õ za'ra wa'aba da, wa tô ãne na hã ãma aima rob'ui'éré za'ra wa'wa. Mare di. Ãne da hãi õ di. Ĩma asawi uptabi za'ra wa'aba zém na asiwi ĩwaihu'u za'ra wa'aba da si, wa tô ãne na hã ãma aima rob'ui'éré za'ra wa'wa.

Aibâ ãma, iwasédé hã da te oto 're i'madâ'â za'ra mono õ zé wasu'u

⁵ Ni'wa hã, asiré 're ihâimana za'ra wa'aba mono hã misi ma tô tihâimana wasété na sina ĩwi robzei'õ. Tane nherẽ, e ĩwi si ma tô tirobzei'õ. Mare di. A norĩ wa'aba wi zama, ma tô aiwi tirobzei'õ za'ra wa'wa suru na, aibâ 're ihâimana wasété mono paramhã. E aiwi robzei'õ pese za'ra wa'aba wa, wa tô ãne na hã aima ãma rowasu'u za'ra wa'wa. Mare di. Suru na ma tô aiwi tirobzei'õ za'ra wa'wa. Ĩwi si sa'ẽtẽ na hã ma tô tirobzei'õ pese, tiwasédé hã te te 're ab'manharĩ mono wa, ta aibâ hã.

⁶ Õ aibâ hã ma tô asiwi iwẽ'õ za'ra wa'wa. Ai'ahâ na ma tô duré asiwi iwaihu'u 'wa ta hã, asiré 're asi'rã'õtõ aba mono wa, asiré 're hâimana za'ra wa'aba mono tõ da a'â. Ãne hã tô wẽ di asiwi i'manharĩ 'wa hã.

⁷ Tane nherẽ, a norĩ wa'wa hã iwasédé hã ãma 're 'madâ'â za'ra wa'aba mono õ di za oto. Tâibâ. Ma tô siwẽ'õ, tiwasété na hã. Apâ te za asiwi i'âri wẽ wa'wa, robze na asiré 're hâimana aba mono da oto apâ. Tiwi robzei'õ pese wa, 'Re ihâimana u'âsi mono te te rẽme tõ da, te za apâ asiwi i'âri wẽ wa'wa.

⁸ Tahawa, ma'ãpé asiwi pawapto wẽ wa'aba, aima isawi pese za'ra wa'aba zém na, te te sina aiwaihu'u pese za'ra wa'aba da, robzei'õ u'âsi 're hâimana tõ mono da, asiti za'ra wa'aba.

⁹ Ĩnhimi'ui'éré 'rata na, wa tô aima ãma roti za'ra wa'wa, aibâ hã tô õ hã asiwi wẽ'õ za'ra wa'aba da. Ĩnhimiroti si 'madâ'â za'ra wa'aba zô, wa tô aima ãma rob'ui'éré za'ra wa'wa, aibâ hâiba na hã.

¹⁰ A norĩ wa'wa hã, dawasédé da te 're i'manharĩ za'ra mono zém na hã oto da'ãma 're 'madâ'â za'ra wa'aba mono tõ da, asima 're pisutu za'ra wa'aba mono wamhã, ĩzama te oto da'ãma 're ab'madâ'â mono õ di za tô. Tahawa, aibâ hã tiwasédé ipire hã tô sena te te 'manharĩ wamhã, wa za tô ĩsima pisutu, asarina wa'aba, iwasédé hã te oto ãma 're 'madâ'â tõ mono da, simisutu ato sina asiré 're aihâimana za'ra wa'aba mono da apâ. Cristuhu nho'a, wa ãne na hã aima ĩsiwasu'u za'ra wa'wa, iwasédé hã za te oto ãma 're i'madâ'â mono õ na hã, aibâ ãma.

¹¹ Aibâ hã tiwasédé te te 're i'manharĩ mono zém na hã, wa te oto ãma 're 'madâ'â za'ra mono tõ da, wa te wasima pisutu za'ra õ wamhã, Satanasi hã te za tizadawa nhipese zéb zarina, wama 're simiza'repese za'ra. Marĩ na te za te te wawi 're ro'wa'rutu u'âsi za'ra, wasiré isazei'wa norĩ wi, robzei ãna wasiré 're wahâimana za'ra mono da oto. Satanasihi hâimanazé hã wama waihu'u pese za'ra di. Tahawa, wa za tô wasima pisutu pese za'ra ni, iwasédé hã wa te oto ãma 're 'madâ'â za'ra mono tõ da, aibâ ãma hã.

Paulu hã Trowadi ãma sãmra ré, hâtâ'â na isãmrazé wasu'u

¹² Ãne wa za duré aima ĩsiwasu'u za'ra wa'wa. Trowadi na 'ri nho'õmo nhisi u, wa tô mo, tame Cristuhu wasu'uwẽ hã te dama wasu'u da. Tamomo ĩmorĩ wamhã, Wanhib'apito hã ma tô ĩma 'ridawa ĩnhowa, tame te oto tãma romhuri da.

¹³ Tane nherẽ, wa tô ĩhâtâ'â sina ĩhâimana, wasisãnawã Titu hã ĩzô sãmra õ wa, tame te sõpẽtẽ da nherẽ aré. Tahawa, wa tô õne haré ta hawimhã mo, Masédonia u we ĩmorĩ da hã.

Wedewa'u isadazei uptabi hã dama 're isadazei pu'u mono ne, Cristuhu wasu'uwẽ na da te ãma 're iropéi mono zé wasu'u

¹⁴ Tane nherẽ, 'Re ihâimana u'âsi mono ãma si, wa za 're ĩwata u'âsi. Ta hã te za sisarina te te 're wa'anhimroi u'âsi, Cristuhu ãma 're iwahâimana za'ra mono zéb zarina, wa'ãma 're sib'a'uwẽ za'ra mono wa. Da'wapéi'wa norĩ nhib'apito hã tinhitob'ru norĩ ãma te te ai'uté za'ra wẽ te, da'ahâ nho'a sisarina te te 're isimroi mono ne, taha ma si wa te oto tãma 're romhuri za'ra mono da, te za sisarina si te te 're wanhimroi u'âsi, 'Re ihâimana u'âsi mono hã. Te duré te te 're wapawaptob u'âsi za'ra, Cristuhu wasu'uwẽ si daro mono bâ wa te dama ãma 're ropéi mono da, Cristu hã aihĩni da te oto 're waihu'u za'ra mono da. Wedewa'u isadaze hã da te 're zata za'ra mono wa, 're isadazei pu'u za'ra mono ne, wa za wa te dama ãma 're ropé, Cristuhu wasu'uwẽ hã.

^15-16 Wedewa'u isadaze hã 're sadazei wairébé mono wa, dama 're iwẽ wairébé mono ne, te duré 'Re ihâimana u'âsi mono hã wama 're toi u'âsi za'ra, Cristuhu wasu'uwẽ hã wa te dama 're wasu'u za'ra mono wẽ te. Tane nherẽ, aiwa da te dasima 're wẽ za'ra mono õ di, Cristuhu wasu'uwẽ hã. Ni'wam norĩ hã iwasu'uwẽ te te siwi 're wẽ'õ za'ra mono wamhã, ta norĩ hã te za tipẽ'ẽ 're dâ'â u'âsi ne 're hâimana u'âsi za'ra, 'Re ihâimana u'âsi mono nhiti. Marĩ hã dama uzé pire wa, da te dasiwi 're iwẽ'õ za'ra mono ne, te ta norĩ hã te te siwi 're wẽ'õ pese za'ra, iwasu'uwẽ hã. Ni'wam norĩ si iwasu'uwẽ te te sima 're iwẽ za'ra mono norĩ si, te za 'Re ihâimana u'âsi mono hã te te 're anho'reptu, hâiwa ãma i'rata 're si'ubumroi u'âsi mono da. Ta norĩ ma si, tãma 're wẽ u'âsi za'ra mono di Cristuhu wasu'uwẽ hã, marĩ isadazei uptabi hã 're sadazei wairébé mono wa, dama 're iwẽ wairébé mono ne. E 'wa hã 're hâimana mono bâ, si'uihâ na tiwaihu'u pese na Cristuhu wasu'uwẽ na romhuri na te te ãma 're i'uwaimrami mono da hã, 'Re ihâimana u'âsi mono ma. Ni'wa hã sada hâimana õ di.

¹⁷ Ni'wam norĩ hã 're simarĩ ahâ za'ra mono da si, te 'Re ihâimana u'âsi mono zadawa wasu'u na te te dama 're romhuri za'ra. Tane nherẽ, wa norĩ hã ta norĩ ne, 're wahâimana za'ra mono õ di. Duré marĩ aimawi zô, wa te wasima 're romhuri za'ra mono õ di wa norĩ hã, 'Re ihâimana u'âsi mono zadawa wasu'u na hã. Cristuhu waihu'u pese zarina si, wa tô wa te dama 're rowasu'u za'ra sena na, 'Re ihâimana u'âsi mono nho'a, ãne da, te te sima wapisutu za'ra wa, ta hã.