2 Corĩtu 13 - ꞌRe Ihâimana Uꞌâsi Mono Zadawa Wasuꞌu

Paulu hã roti na te te i'rãsutuzém na rowasu'u

¹ Si'ubdatõ, ãma atẽme za'ra wa'aba ĩmorĩ na hã wa za oto sahu, te asabu za'ra wa'aba da. Duréihã Mozési hã ma tô ãne na ibaihâ na rob'ui'éré, 'Re ihâimana u'âsi mono nhimiroti na hã: “Ni'wam norĩ da, 're dawasété za'ra mono wamhã, maparane dahâiba ma, te za 're siwasu'u za'ra, ta norĩ hã danho'a te te 're sadawa waptob za'ra mono da, tãma 're isiwasu'u za'ra mono zém na hã.” Ãne duréihã 'Re ihâimana u'âsi mono nhimiroti na rob'ui'éré hã. Tawamhã wa hã ãma atẽme ĩmorĩ aba wamhã, taha zarina, wa za tô sena zarina, aiwasété za'ra wa'aba na hã aiwaihu'u za'ra wa'wa.

² Maparane ãma, ĩmorĩ na te ãma atẽme sahu za'ra wa'aba wamhã, wa tô aima waihu'u siromo za'ra wa'wa, aiwasédé 're i'manharĩ u'âsi za'ra wa'aba mono norĩ, za te i'aihâ za'ra wa'aba zém na hã. Ĩnhimi'ui'éré na, wa za oto ãne na aima ãma sahu za'ra wa'wa, asiti za'ra wa'aba ĩhâimana nherẽ. Ãma atẽme ĩmorĩ aba wamhã, ĩnhimi'ahârizé hã te aima ba'a za'ra wa'aba õ di za, aiwasédé 're i'manharĩ u'âsi za'ra wa'aba mono norĩ ma hã, duré ĩza'u si tiwasété zô 're isipizari za'ra mono norĩ ma zama.

³ Sena na Cristuhu zadawa para, te aima 're irowasu'u za'ra wa'aba mono na, asiwi ĩwaihu'u za'ra wa'aba da, ma tô ãne na asima ĩ'ãma irosa'rata za'ra wa'wa. Tane tô wẽ di, ĩma hã. Ãma atẽme ĩmorĩ aba wamhã, Cristuhu zadawa para, wa za tô aihâ za'ra wa'wa. Tawamhã ãté te za oto asiwi ĩwaihu'u za'ra wa'wa, sena na Cristuhu zadawa para, te aima 're irowasu'u za'ra wa'aba mono na hã. Cristu hã niha te te aima irob'manharĩ za'ra wa'aba zéb da hã, e sib'uware bâ za, asada za'ra wa'aba hã za. Mare di. Siptete uptabi di ta hã, te te i'aihâ za'ra wa'aba zéb da hã.

⁴ Cristu hã wedepo'o nhonhi'rãmi na, da te dasiwi sasõmri wamhã, ihâiba hã sib'uware di. Tane nherẽ, 'Re ihâimana u'âsi mono nhiptetezém na ma tô apâ hâiwa'udu, 're hâimana u'âsi mono da oto. Tane, wa tô duré wa norĩ hã wanhib'uware na 're wahâimana. Tane nherẽ, 'Re ihâimana u'âsi mono nhiptetezém na, wa duré 're wahâimana, Cristuhu ne. Taha zarina, wa za niha aima rob'manharĩ za'ra wa'aba ni, wasi'uihâ nai õ nherẽ.

⁵ Aipẽ'ẽ 're, te za a'â 'râwi asi'madâ'â za'ra wa'wa, isazei'wa norĩ hâimanazéb zarina, tô sena 're aihâimana za'ra wa'aba mono zô. Ãne na asina tãma 're uwaimrami za'ra wa'aba mono wamhã, Zezu Cristu, aipẽ'ẽ 're, 're isãmra aba mono na, te za asina iwaihu'u za'ra wa'wa. E ãne hã asina 're waihu'u za'ra wa'aba mono õ di bété. Tane nherẽ, Cristu hã aipẽ'ẽ 're, 're sãmra aba mono õ wamhã, asina tãma 're i'uwaimrami za'ra wa'aba mono õ na, te za asina iwaihu'u za'ra wa'wa, asi'uihâ na 'râwi.

⁶ Wa hã wa ãma ĩsima aiwẽ za'ra wa'wa, ãma atẽme ĩmorĩ aba wamhã, asiwi wawaihu'u za'ra wa'aba da, 'Re ihâimana u'âsi mono zadawa 'mahârâ'wa norĩ 're ihâimana za'ra mono zém na, wa te wasina ãma i'uwaimramizém na hã.

⁷ Wa duré 're wamreme u'âsi, ai'ãma za'ra wa'aba, 'Re ihâimana u'âsi mono ma, ta hã te te 're aipawaptob u'âsi za'ra wa'aba mono da, marĩ iwasétére hã 're 'manharĩ za'ra wa'aba mono tõ da. E ai'ãma za'ra wa'aba, wa te 're iromhuri mono na, da te dasiwi 're wawẽsãmri mono da, wa ãne hã ai'ãma 're wamreme u'âsi za'ra wa'wa. Mare di. Taré a norĩ wa'wa hã iwẽ si oto 're 'manharĩ u'âsi za'ra wa'aba mono da si, wa ai'ãma 're wamreme u'âsi za'ra wa'wa, 'Re ihâimana u'âsi mono ma hã. Iwẽ si tô 're 'manharĩ za'ra wa'aba mono wamhã, wa te aihâ za'ra wa'aba õ di za. Ãne wamhã, ãté te za ãne na wa'ãma irosa'rata za'ra wa'wa, asima: “Oro Paulu norĩ hã, Zezusihi zadawa wasu'u'wa, tô sena 're hâimana zahuré mono za, te te wahâ za'ra õ di.” Ãté ãne na te za wa'ãma irosa'rata za'ra wa'wa. Tane nherẽ, wama wẽ di tô, iwẽ si tô 're 'manharĩ u'âsi za'ra wa'aba mono wamhã.

⁸ Cristuhu wasu'uwẽ hã tô sena uptabi hã, ni'wa te te dawi pari waihu'u õ di, dama siptete uptabi wa, iwasu'uwẽ hã. Taha zarina si, wa za tô 're wahâimana, wa norĩ hã, 'râwi wa te wasiwi 're wẽ'õ mono ãna.

⁹ A norĩ wa'wa hã tô sena Cristuhu ãma asiptete sina 're anomro wẽ wa'aba mono wamhã, wa za tô aima 're wato za'ra wa'wa. Ãne wamhã, Cristuhu zadawa para, wa te aihâ za'ra wa'aba õ di za. Wa te aihâ za'ra wa'aba õ wamhã, ãté ni'wam norĩ hã te za wa'ãma sima rosa'rata wasété za'ra, wawẽ'õ'wa norĩ hã, aima wapahi za'ra wa'aba na hã. Tane nherẽ, wẽ di tô wama hã, tô sena Cristuhu ãma si oto 're anomro wẽ wa'aba mono wamhã.

¹⁰ Ãne wa, wa asiti ĩnhamra aba ré, aima ãma rob'ui'éré za'ra wa'wa, za ãma atẽme ĩwisi aba wa, asõ'a te aima nharĩ za'ra wa'aba tõ da, Wanhib'apito zadawa para te te ĩma ipisutuzéb zarina. Ma tô ĩma pisutu tô, isadawa para si te 're aipawapto wẽ za'ra wa'aba mono da. E tawamhã ĩnhimipawaptobzéb zarina, ãma 're anomro wẽ wa'aba mono zé hã te aiwi 're uprosi za'ra wa'aba mono da, ma tô ãne hã ĩma pisutu. Mare di. Taré isadawa para si, te 're aipawapto wẽ za'ra wa'aba mono zéb zarina, asiptete sina ãma 're anomro aba mono da si, ma tô ĩma pisutu tô, Wanhib'apito hã.

¹¹ Ĩsisãnawã norĩ, ĩnhimi'ui'éré na wa za oto aima ãma 'rãsutu za'ra wa'wa. 'Re aihâimana wasété za'ra wa'aba mono zé hã te za oto irẽme pese za'ra wa'wa. Te aima 're iroti za'ra wa'aba mono zé hã te za 're iwapari pese za'ra wa'aba mo. Tahawa, te za simisutu asimirosa'rata na 're asisazei pese za'ra wa'aba mo. Rowẽ na si asiré 're aihâimana u'âsi za'ra wa'aba mono da, te za duré asina 're irosa'rata wẽ u'âsi za'ra wa'aba mo. Ãne wamhã, 'Re ihâimana u'âsi mono hã isimizawi pe hã, te za 'râwi asiré 're hâimana u'âsi za'ra wa'wa, dama rowẽ nhomri'wa hã.

¹² Tahawa, te za uburé asiré isazei'wa na 're aihâimana za'ra wa'aba mono wa, asõ'utu na asisawi sina 're asitob'rata hârâ za'ra wa'aba mo. Ãme, 'Re ihâimana u'âsi mono nhib'a'uwẽ 're isi'ubumroi mono norĩ hã te ãma asawi za'ra wa'wa, uburé.

¹³ Wanhib'apito Zezu Cristuhu ma, wa ai'ãma 're ĩmreme u'âsi za'ra wa'wa, ta hã te te 're asawi pese za'ra wa'aba mono wa, te te 're aipawaptob u'âsi za'ra wa'aba mono da. 'Re ihâimana u'âsi mono hã tinhimizawi pese zéb zarina, iwẽ si te te aima 're pisutu za'ra wa'aba mono da, wa duré ai'ãma tãma 're ĩmreme u'âsi za'ra wa'wa, duré Ipẽ'ẽzani hã te te 're aipawaptob u'âsi za'ra wa'aba mono da, simisutu ãma 're anomro wẽ wa'aba mono da, taha ãma si.