2 Corĩtu 12 - ꞌRe Ihâimana Uꞌâsi Mono Zadawa Wasuꞌu

Paulu hã, sõtõ 'rowim ne, marĩ hã te te i'ab'madâ'âzé wasu'u

¹ Marĩ dai õ nherẽ, wa za duré ãne na aima ãma ĩsiwasu'u za'ra wa'wa, Zezusihi zadawa wasu'u'wa, sena 're ĩhâimana mono zéb zarina ĩnhimiromhuri wẽ na, ãma asiwi ĩwaihu'u za'ra wa'aba da. Zezusihi zadawa wasu'u'wa newa, tô senai'õ na te te aima 're iroti za'ra wa'aba mono norĩ hã te sina 're wata za'ra, sõtõ 'rowim ne, marĩ hã ta norĩ si te te 're 'madâ'â za'ra mono newa. Tane nherẽ, wa tô duré ĩzama marĩ iwaihu'u'õ hã te 're a'madâ'â, ĩnhotõ 'rowim ne, Wanhib'apito te te ĩma 're i'awaihu'u mono zéb zarina si.

² Duréihã 'Re ihâimana u'âsi mono, ma tô ĩzaprõ, hâiwa u, 're isãmra mono zéb u. Wa hã Cristuhu zazei'wa. Ĩnhotõ 'rowim ne, hâiwa u ĩmorĩzém na hã 14 na ma tô ĩ'ãma tiwahu oto. Ãté ĩhâiba u'âsi na, wa tô wi. Ãté ĩpẽ'ẽzani na si. Wa hã ĩsiwaihu'u õ di. 'Re ihâimana u'âsi mono ma si, waihu'u pese di, ãne hã.

^3-4 Ãne na hã ãma ĩsiwaihu'u õ di, wa hã. Ãté ĩpẽ'ẽzani na si, wa wi, tô. Ãté ĩhâiba wahuré. 'Re ihâimana u'âsi mono ma si, ãne hã tãma waihu'u pese di. Ãne si, wa tô wa hã ĩsiwaihu'u, rowẽ uptabi u ĩwisi na hã tô. Tame rowasu'u iwẽ uptabi hã wa tô te awapari, ĩsi'uihâ na. Rowasu'u wẽ uptabi wa, damreme na i'uwaibaba da te dasima ãma 're irowasu'u za'ra mono zéb da hã, da te dasima ãma 're uwaimrami waihu'u za'ra mono õ di.

⁵ Ãne na ĩma romhâimana wamhã, ãté ibâre, wa aré aima ĩsiwasu'u za'ra wa'wa, 'Re ihâimana u'âsi mono te te ĩwẽsãmrizém na hã. Tane nherẽ, taha na aima ĩsiwasu'u za'ra wa'aba õ di za. Ĩsi'uihâ na marĩ da, ĩnhib'uware na 're ĩhâimana mono zém na si, wa za aima ĩsiwasu'u za'ra wa'wa, asiwi ãma ĩwaihu'u za'ra wa'aba da hã.

⁶ Ãne na ĩma iromhâimanazém na aima ĩsiwasu'u za'ra wa'aba da, te ĩsina rosa'rata 'wa'âhã, e ĩnhimiza'rese'õre zarina, wa aré aima ĩsiwasu'u za'ra wa'wa. Mare di. E marĩ wa. Tô sena, ãne na hã aré aima ĩsiwasu'u za'ra wa'aba wa. Tane nherẽ, taha na aima ĩsiwasu'u za'ra wa'aba õ di za. Ĩnhimiromhuri hã 're i'madâ'â za'ra wa'aba mono zéb zarina si, duré ĩnhimiroti hã aipo're na 're iwapari za'ra wa'aba mono zéb zarina si, te za ĩhâimanazém na ĩ'ãma 're irosa'rata za'ra wa'aba mo, asima.

⁷ Danhotõ 'rowi, da te 're irosawẽrẽ za'ra mono ne, wa tô marĩ iwẽ uptabi hã te ab'madâ'â tô, ĩnhotõ nem na te i'awaihu'u ne. Tahawa, danhipai u dama ĩpire newa, 'râwi ãma 're ĩsi'madâ'â zei mono tõ da, ma tô 'Re ihâimana u'âsi mono hã ĩma pisutu, ĩhâiba na te tô 're robzépata mono da, ro'wa hã te te 're danhiptâ'â za'ra mono wa, dawa 're si'ẽ za'ra mono wa, da'ãma 're isépu'u siroptub za'ra mono ne. Taha zarina, te tô Satanasi hã te te 're ĩpibui u'âsi, te ãma 're irobzépata u'âsi mono da hã. Tane nherẽ, 'Re ihâimana u'âsi mono hã te te tiwi 're ĩzawi mono õ di, ãne na te te 're ĩpibu tõ mono da hã. E marĩ wa. Dama ĩpire newa, 'râwi te ĩsina 're rosa'rata tõ mono da.

⁸ Tahawa, wa tô si'ubdatõ Wanhib'apito wi hã ĩsi'ãma rowaptẽ, tô õhõ na te 're irobzépata mono zém na hã ta hã simisaré te te ĩ'ãma sizâri da, te ãma 're robzépata zahu tõ mono da.

⁹ Tane nherẽ, ãne si ma tô nasi ĩma waihu'u asa, te tiwi rowaptẽrẽ wamhã: “Te ai'ãma sizâri õ di za. Ĩnhimizawi pese zéb zarina si, te za 're aihâimana mo. Asi'uihâ na marĩ da hã, asib'uware na 're aihâimana mono nherẽ, te za asiptete sina ĩ'ãma 're aihâimana mo, ĩnhimipawaptobzéb zarina.” Ãne si, ma tô nasi ĩma waihu'u na wa'rã asa, Wanhib'apito hã. Tahawa, ĩsi'uihâ na marĩ da hã, ĩnhib'uware na 're ĩhâimana mono zém na si, wa za tô ĩto sina aima ĩsiwasu'u za'ra wa'wa, taha wa'rãmi Cristuhu nhiptetezéb ré si, 're ĩhâimana u'âsi mono da.

¹⁰ Ĩsi'uihâ na marĩ da hã, ĩnhib'uware na 're ĩhâimana mono nherẽ, duré Cristuhu ma, te 're romhuri mono wa, da te ĩ'ãma 're wasété za'ra mono nherẽ, duré ĩma ropire na 're ĩhâimana mono nherẽ, duré da te ĩma 're rob'manharĩ wasété za'ra mono nherẽ, duré marĩ na te 're robzépata mono nherẽ, wa ĩto sina 're ĩhâimana u'âsi. E marĩ wa. Ĩsi'uihâ na marĩ da hã, ĩnhib'uware na 're ĩhâimana mono nherẽ, wa za taha wa'rãmi, ĩnhiptete sina 're ĩhâimana, Cristuhu nhimipawaptobzém na si.

Corĩtu ãma isazei'wa norĩ ãma, Paulu hã ihâtâ'â za'ra zé wasu'u

¹¹ Cristuhu zadawa wasu'u'wa na, asiwi ĩwaihu'u za'ra wa'aba õ wa, wa tô ĩnhimiromhuri wẽ na si aima ĩsiwasu'u za'ra wa'wa, ãne hã te ĩsima wẽ õ nherẽ. Ãté ĩnhimiza'rese'õ ne, wa tô ãne na aima ĩsiwasu'u za'ra wa'wa, a norĩ wa'wa hã dama 're ĩwasu'u wẽ za'ra wa'aba mono õ 'ru te. 'Re ihâimana u'âsi mono te te 're ĩpawapto mono õ 'wa'âhã, aré marĩ dai õ di, 're ĩhâimana mono zé hã tô. Tane nherẽ, Zezusihi zadawa wasu'u'wa newa, senai'õ na te te aima 're iroti za'ra wa'aba mono norĩ ma, ĩwapu na tãma 're ĩhâimana za'ra mono õ di.

¹² Ai'rata ĩnhamra aba ré, wa tô ĩnhimi'ẽ na marĩ dama i'manharĩ waihu'u'õ hã aima 'manharĩ za'ra wa'wa, Zezusihi zadawa wasu'u'wa norĩ nhimiromhuri na. Ãne zarina, te za sena na Zezusihi zadawa wasu'u'wa na asiwi ĩwaihu'u za'ra wa'wa.

¹³ E tawamhã ai'upana za'ra wa'aba si, wa tô darob amoi ãma isazei'wa norĩ 're ihâimana za'ra mono norĩ hã te 're apawapto pese, ta norĩ si ĩma sawi pese za'ra wa. Mare di. E marĩ na, wa tô bété a norĩ wa'wa hã ai'mararé za'ra wa'wa, sena na Zezusihi zadawa wasu'u'õ'wa na asiwi ĩwaihu'u za'ra wa'aba zéb da hã. Ãté asimarĩ aba zô, te 're aiwasutu za'ra wa'aba mono õ zém na si, wa tô ai'mararé za'ra wa'wa, ai'rata ĩnhamra aba ré hã. Ma'ãpé, ãne na tô ĩwasédé hã te aima 'manharĩ za'ra wa'aba ze te bâ, ĩma pari za'ra wa'aba.

¹⁴ Si'ubdatõ ãma, wa za oto ãma atẽme ĩmorĩ 'wa, te duré asabu na sahu za'ra wa'aba da. Tawamhã ãma atẽme ĩmorĩ aba wamhã, asiwi ĩpawa'âbâ aba da, te aiwi rowaptẽrẽ za'ra wa'aba õ di za, asimarĩ za'ra wa'aba zô, ãma atẽme ĩmorĩ aba õ wa za. Taré Cristuhu wasu'uwẽ na te aipawaptob za'ra wa'aba da si, wa za tô ãma atẽme ĩmorĩ 'wa. E damama norĩ ma, te za da'ra norĩ hã te te 're ubumroi pese za'ra, dasazé hã. Mare di. Damama norĩ si, te za te te 're rob'ubumroi pese za'ra, ti'ra sazéb da hã. Tane duré wa hã, aimama za'ra wa'aba ne, aima 're ĩhâimana za'ra wa'aba mono wa, te 're aipawaptob za'ra wa'aba mono da si, wa tô te ai'ãma 're rosa'rata u'âsi za'ra wa'wa, ĩsima. Tahawa, asiwi ĩpawa'âbâ aba õ di za.

¹⁵ Tawamhã ãma atẽme ĩmorĩ za'ra wa'aba wamhã, ĩto sina, wa za uburé ĩnhimarĩ hã uprosi, te ãma aipawaptob za'ra wa'aba da, te ãma i'âri hã za. Taha da, wa za duré aima romhuri pese za'ra wa'wa, ĩwasutu uptabi nherẽ. Ãne na hã ĩma asawi pese za'ra wa'aba nherẽ, e te za ãne wa'rãmi ĩzawi za'ra wa'aba ãna da hã ĩwi asisawi za'ra wa'wa.

¹⁶ Asiwi ĩpawa'âbâ za'ra wa'aba da, te aiwi irowaptẽrẽ za'ra wa'aba õ na, ma tô asina ĩwaihu'u za'ra wa'wa tô. Tane nherẽ, ma tô ni'wam norĩ hã rosa'rata na ĩ'ãma upa za'ra, rob'uiprazé hã ĩzadawa nhipese na te aiwi i'ubumro za'ra wa'aba na hã. E ãne hã i'uwaibaba. Mare di. I'uwaibaba õ di.

¹⁷ Wasisãnawã norĩ hã, ĩzadawa para ãma atẽme si'aba'réi wa'aba da, te ãma isatõrĩ za'ra hã e ma tô aima sadawa hapese za'ra wa'wa, rob'uiprazém na. Mare di. Ãne na hã aima sadawa nhipese za'ra wa'aba õ di, ta norĩ hã.

¹⁸ Titu hã bété. Ta hã wa tô duré ãma atẽme satõrĩ za'ra wa'wa, ãma atẽme aba morĩ da hã. Wasisãnawã hâiba amo hã wa tô duré ãma isiré satõ. E Titu hã ma tô ãhã wamhã aima sadawa hapese 'wa, asimarĩ za'ra wa'aba zô hã. Mare di. Tane duré, wa hã 're ĩhâimana mono zé hã. Aiwa tô ãne na 're iwahâimana mono zé hã, rob'uiprazém na aiwi 're iwanhimisaihuri za'ra wa'aba mono õ na hã.

¹⁹ E taré wa'ãma 're rosa'rata wẽ za'ra wa'aba mono da, wa ãne na aima wasiwasu'u za'ra wa'aba ni. Mare di. Cristuhu zazei'wa oto 're wahâimana mono wa, wa ãne na aima wasiwasu'u za'ra wa'aba ni, 'Re ihâimana u'âsi mono nho'a. Wasisãnawã norĩ, wama asawi pese za'ra wa'aba norĩ hã, wa te 're aipawaptob za'ra wa'aba mono da si, wa tô uburé marĩ hã wa te 're ab'manharĩ, asiptete sina Cristuhu ãma si 're anomro aba mono da oto.

²⁰ Ai'ãma 're ĩhâtâ'â za'ra wa'aba mono sina, wa tô ai'ãma te 're rosa'rata u'âsi za'ra wa'wa, za ãma atẽme ĩmorĩ aba na dâ'âsina, duré 're aihâimana za'ra wa'aba mono zém na, za te aiwẽsãmri za'ra wa'aba õ na dâ'âsina. Ãté a norĩ wa'wa hã te za duré asiwi ĩwẽ'õ za'ra wa'wa, za ãma atẽme ĩmorĩ za'ra wa'aba wamhã. Ãté ãhã na hã te 're asisada'âbâ u'âsi za'ra wa'aba mo 'râwi. Ãté te duré marĩ na 're asi'ruiwapari za'ra wa'aba mo. Ãté te duré asisada 're asiti'ru za'ra wa'aba mo. Ãté asi'ãma si te duré 're irosa'rata za'ra wa'aba mo. Ãté te duré asi'ãma 're iwasété za'ra wa'aba mo. Ãté te duré asima 're idabâsi wasété za'ra wa'aba mo. Ãté dama aipire newa, te duré 'râwi 're asi'madâ'â ze za'ra wa'aba mo. Ãté siwa'ru te duré 're aihâimana za'ra wa'aba mo. Ãne na 're aihâimana za'ra wa'aba mono õ'umnhasite, wa ai'ãma te 're romnhimimnhasi u'âsi za'ra wa'wa, wa hã.

²¹ Ãma atẽme ĩwisi aba wamhã, ãté ĩpẽ'ẽzé te, wa za aiwa'õ, ai'ãma ĩpẽ'ẽzé uptabi za'ra wa'aba wa. Duréihã ai'ahâ na ma tô aiwasédé hã 're i'manharĩ za'ra wa'aba mo aré. Ma tô duré asina 're asimisaihuri za'ra wa'aba mo, pi'õ na, aibâ na zama. Asiséb ãna, ma tô duré marĩ iwasétére zô si asima 're asõpré wa'aba mo. Ãne na aiwasédé hã 're 'manharĩ za'ra wa'aba mono nherẽ, aiwasété wi 're aipizari za'ra wa'aba mono õ wa, ãté te za ĩwi tirobzei'õ pese. Tahawa, ãté ĩnhiséb di za, Ĩnhib'apito ma hã, duré 'Re ihâimana u'âsi mono ma hã, ai'u'âbâ za'ra wa'aba hã.