2 Corĩtu 11 - ꞌRe Ihâimana Uꞌâsi Mono Zadawa Wasuꞌu

Cristuhu wasu'uwẽ upana, roti senai'õ na te te dama 're iroti za'ra mono norĩ wasu'u

¹ Ãhã na, wa za ĩsisõwa ãma ĩsina aipo're pu'u za'ra wa'wa, ĩ'ãma aiwa'a za'ra wa'aba tõ da, ĩnhimiza'rese'õ na ĩ'ãma 're rosa'rata za'ra wa'aba mono nherẽ.

² Wa hã te 're asawi pese za'ra wa'aba mono wa, wa tô te ai'ãma 're rosa'rata u'âsi za'ra wa'wa, 'Re ihâimana u'âsi mono te te 're i'asawi pese za'ra wa'aba mono ne. Ni'wa hã aibâ ma, ti'ra hâiba ubuni hã mro da, te te tãma ipisutu ne, wa tô aipisutu za'ra wa'wa, Cristuhu ma si oto 're aihâimana za'ra wa'aba mono da.

³ Tane nherẽ, wa ĩhâtâ'â sina, te ai'ãma 're rosa'rata u'âsi za'ra wa'wa. E marĩ wa. Cristuhu ãma si, 're sasõmri pese za'ra wa'aba mono nherẽ, ãté ni'wam norĩ hã roti tô senai'õ na taré te te aima 're irowasu'u za'ra wa'aba mono zéb zarina, te za Cristuhu wasu'uwẽ hã irẽme za'ra wa'wa. Duréihã Wa'uburé hã wahi na sihâiba wa, Ewaha ma, sadawa nhipese na te te irowasu'u ne, te za tô ãté ni'wam norĩ hã te te aima 're rowasu'u za'ra wa'wa, roti tô senai'õ na hã.

⁴ Zezusihi wasu'uwẽ tô sena uptabi si, wa tô aré aima wasu'u za'ra wa'aba ni. Tawamhã taha wasu'u na, wa te aima irowasu'u za'ra wa'aba zéb zarina, ma tô isaze za'ra wa'wa. Taha zarina, ma tô duré asima iwẽ za'ra wa'wa, 'Re ihâimana u'âsi mono pẽ'ẽzani hã aipẽ'ẽ 're, aima 're hâimana u'âsi za'ra wa'aba mono da. Tane nherẽ, ni'wam norĩ hã Zezusihi wasu'uwẽ upana, tô senai'õ na te te aima 're rowasu'u za'ra wa'aba mono nherẽ, Wanhib'apito wasu'uwẽ ne, tô senai õ nherẽ, 'râwi asiwi 're wẽ'õ za'ra wa'aba mono õ di. Õne haré ma tô ãma 're isasõmri za'ra wa'aba mo. 'Re ihâimana u'âsi mono pẽ'ẽzani upana, ma tô ihâiba'õ mreme si asima 're iwẽ za'ra wa'aba mo.

⁵ E ta norĩ hã Cristuhu zadawa wasu'u'wa pâ, ma tô bété isimirowasu'u na ãma isaze za'ra wa'wa. E ĩnhimiromhuri hã tãma wapu bâ, ta norĩ nhimiromhuri ma hã.

⁶ Ãté ĩmreme hã, ĩma pibu prã ti tô, da'ahâ nho'a te dama 're irowahutu mono zéb da hã. Tane nherẽ, Cristuhu wasu'uwẽ si, tô sena hã ĩma waihu'u pese di. Ãne na ma tô oto ĩ'ãma iwaihu'u pese za'ra wa'wa, a norĩ wa'wa hã.

⁷ Asiwi ĩpawa'âbâ aba ãna, wa tô 'Re ihâimana u'âsi mono wasu'uwẽ na si te 're aipawaptob za'ra wa'wa. Taha wa'rãmi, a norĩ wa'aba si, ĩma aipire na aihâimana za'ra wa'aba da, wa tô ĩhâimanazéb da hã, ĩsi'uihâ na nasi wa'â, ĩpire na aima ĩhâimana za'ra wa'aba tõ da. E ãne wamhã, ĩwasédé wa tô 'manha. E tô 're ĩhâimana mono zéb zarina, ma tô ãne na ĩ'ãma irosa'rata wasété za'ra wa'wa, asima.

⁸ Cristuhu wasu'uwẽ na te aipawaptob za'ra wa'aba da, ai'rata ĩnhamra aba ré, rob'uiprazém na ĩma asõprub za'ra wa'aba õ nherẽ, ma tô ai'upana za'ra wa'aba, isazei'wa norĩ hã ĩpawaptob za'ra, darob amoi ãma 're isi'ubumroi mono norĩ hã. Ta norĩ hã Wanhib'apito wasu'uwẽ na te pawaptob za'ra dai õ nherẽ, ma tô tite rob'uiprazém na ĩpawaptob za'ra, aima za'ra wa'aba si, te ãma iromhurizéb da hã.

⁹ Ai'rata ĩnhamra aba ré, asimarĩ zô, te aiwasutu za'ra wa'aba da, te nasi aiwi rowaptẽrẽ za'ra wa'aba õ di, marĩ zô ĩwi rowaptâ'â wamhã. Wasisãnawã norĩ si, ma tô uburé marĩ na siwi ĩpawapto, ãma ĩhâimana mono zéb da hã, Masédonia hawi, ãma ĩsiré isi'aba'ré norĩ hã. Tahawa, ai'rata ĩnhamra aba ré hã, ĩnhiwari na hã te nasi ropire hã aima 'manharĩ za'ra wa'aba õ di. Tane, wa za duré ĩhâimana, apâ ĩmorĩ na te sahu wamhã, ãma atẽme za'ra wa'aba.

¹⁰ Ni'wa hã marĩ na te wari ãna, wa tô aipawaptob za'ra wa'wa, ai'rata ĩnhamra aba ré hã, asiwi ĩpawa'âbâ aba ãna. Ãne hã ĩma wẽ uptabi di tô. Ãhã wasu'u hã da te ĩwi pari waihu'u õ di, Ataza ãma, 're idahâimana za'ra mono norĩ hã. Cristuhu nhimiroti hã tô sena uptabi, te 're hâimana. Tane duré, wa hã tô sena, wa ãne na aima ãma rowaihu'u za'ra wa'wa.

¹¹ E marĩ wa, wa tô ĩnhiwari ãna aima romhuri za'ra wa'wa. E ĩma asawi za'ra wa'aba õ wa. Mare di. Ĩma asawi uptabi za'ra wa'aba di. Ãne na ma tô 'Re ihâimana u'âsi mono si ĩwaihu'u, 're ĩhâimana mono zém na hã.

¹² Zezusihi zadawa wasu'u'wa newa, tô senai'õ na te te dama 're iroti za'ra mono norĩ hã, aiwa ĩsine hã te te dama 're iromhuri za'ra mono na dama 're siwasu'u za'ra mono tõ da, wa za tô ĩpawa'âbâ ãna te 're da'apawaptob u'âsi.

¹³ Ta norĩ hã Zezusihi zadawa wasu'u'wa na, tô sena 're hâimana za'ra mono õ di. Sadawa nhipese na, te tô te te 're romhuri za'ra, Zezusihi zadawa wasu'u'wa newa, da te ãma 're rosa'rata wẽ za'ra mono da, dasima.

¹⁴ Tô ibâre, te ta norĩ hã ãne hã te te 're 'manharĩ za'ra. E marĩ wa. Satanasihi nhimiroti na si, te te dama 're romhuri za'ra mono wa, ta norĩ hã. Duré Satanasihi ma hã waihu'u pese di, tihâiba na rowa'a na dama 're isihâi'ré mono da hã, hâiwa ãma 'Re ihâimana u'âsi mono ma romhuri'wa newa, da te ãma 're saze za'ra mono da.

¹⁵ Tahawa, tô ibâre te za tãma iromhuri'wa norĩ hã isadawa para, sadawa nhipese na dama 're hâimana za'ra, 'Re ihâimana u'âsi mono ma, romhuri wẽ 'wa, 're hâimana za'ra mono newa, da te ãma 're irosa'rata wẽ za'ra mono zéb da hã, dasima. Tahawa, ta norĩ hã tiwasédé te te 're i'manharĩ za'ra mono zéb zarina, te za tô 'Re ihâimana u'âsi mono hã te te 're ahâ za'ra.

Paulu hã te te 're irobzépata mono zé wasu'u

¹⁶ Ãne wa za ĩsiwasu'u na ãma aima sahu za'ra wa'wa. Ĩnhimiromhuri wẽ na, aima 're ĩsiwasu'u za'ra wa'aba mono nherẽ, ĩnhimiza'rese ãna 're ĩhâimana mono zém na, ĩ'ãma rosa'rata za'ra wa'aba õ di za. Tane nherẽ, ãté te za tô ãne na hã duré ĩ'ãma irosa'rata za'ra wa'wa, ĩnhimiza'rese õ na 're ĩhâimana mono zém na hã. Ãne na ĩ'ãma 're rosa'rata za'ra wa'aba mono nherẽ, te za tô asiwi ĩwẽ'õ za'ra wa'aba ãna, ĩwapari pese za'ra wa'wa, Wanhib'apito wasu'uwẽ na te dama 're iromhuri wẽ mono zém na aima ĩsiwasu'u za'ra wa'aba da na hã. 'Re ihâimana u'âsi mono zadawa wasu'u uptabi õ 'wa norĩ, aima 're siwasu'u pari za'ra wa'aba mono nherẽ, wa za tô aima ĩsiwasu'u za'ra wa'wa.

¹⁷ Ãté Wanhib'apito te te ĩma iwaihu'uzéb zarina, aima ĩsiwasu'u za'ra wa'aba õ di, ãhã na hã. Ãté danhimiza'rese ãna 're idahâimana za'ra mono zéb zarina si, wa za aima ĩsiwasu'u za'ra wa'wa, ĩnhimiromhuri wẽ na hã.

¹⁸ Ni'wam norĩ hã te Wanhib'apito wasu'uwẽ na te te dama 're iromhuri wẽ za'ra mono zém na hã aima 're siwasu'u za'ra wa'wa, ãma 're iwẽsãmri za'ra wa'aba mono zéb da hã. Tane, wa za duré wa hã aima ĩsiwasu'u za'ra wa'wa, Wanhib'apito wasu'uwẽ na te dama 're iromhuri wẽ mono zém na hã, asiwi ĩwaihu'u za'ra wa'aba da.

¹⁹ A norĩ wa'wa hã asimiza'rese sina 're i'aihâimana za'ra wa'aba mono zém na, 'râwi 're asi'madâ'â ze za'ra wa'aba mono nherẽ, e niha te bété simiza'rese ãna 're ihâimana za'ra mono norĩ nhimiroti si, 're iwapari pese za'ra wa'aba mo, asiwi 're wẽ'õ za'ra wa'aba mono ãna. Tane duré, wa hã ĩnhimiza'rese ãna 're ĩhâimana mono di pâ, te za pé ĩzama asiwi ĩwapari pese za'ra wa'wa duré.

²⁰ Ni'wam norĩ hã ma tô 're ihâimana za'ra mono zéb zarina, 're aihâimana za'ra wa'aba mono da, te te aima 're 'rui u'âsi za'ra wa'wa, ta norĩ zadawa para si, uburé marĩ hã 're 'manharĩ za'ra wa'aba mono da si. Tane nherẽ, asiwi 're wẽ'õ za'ra wa'aba mono õ di, ta norĩ hã. Sadawa nhipese na, aiwi 're sipsaihuri u'âsi za'ra wa'aba mono nherẽ, duré ta norĩ ma si, 're aihâimana za'ra wa'aba mono da, te te 're aiwaibui wa'aba mono nherẽ, e niha bâ bété, asiwi 're wẽ'õ za'ra wa'aba mono õ di. Ta norĩ si, aima pire na 're hâimana za'ra wa'aba mono newa, 'râwi 're si'madâ'â ze za'ra mono nherẽ, duré te te ai'ãma 're wasété za'ra wa'aba mono da, atob'rata wi te te 're aihâ za'ra wa'aba mono nherẽ, e asiwi hã 're wẽ'õ za'ra wa'aba mono ãna bété.

²¹ Wa hã ãne, te aima 're i'manharĩ za'ra wa'aba mono da hã, ãté aré sada ĩnhib'uware di. Ta norĩ si hã tinhimirosa'rata na sina 're siptete za'ra mono di, ãne te te aima 're irob'manharĩ wasété za'ra wa'aba mono zéb da hã. E ãne da hã, 're ĩhâimana mono bâ, wa hã bété. Mare di. Ta norĩ hã marĩ wasu'u wẽ na, dama 're isiwasu'u za'ra mono zém na hã te te siwi ãma ĩwabzu za'ra õ di, Wanhib'apito wasu'uwẽ na te dama 're iromhuri wẽ mono zém na hã. Tane nherẽ, wa hã ãne na aima ĩsiwasu'u za'ra wa'aba 'wa'âhã, ãté tô ĩnhimiza'rese'õ ne, wa aré aima 're ĩhâimana za'ra wa'wa.

²² Zezusihi zadawa wasu'u'wa newa, tô senai'õ na te te aima 're iroti za'ra wa'aba mono norĩ hã te sina aima 're wata za'ra wa'wa, hebreu na 're ihâimana za'ra mono na hã, duré Izaraéu nhihudu 're ihâimana za'ra mono na hã, duré Abra'ãhã nhihudu 're ihâimana za'ra mono na hã. Tane, wa duré wa hã hebreu na, duré Izaraéu nhihudu na, duré Abra'ãhã nhihudu na ĩwamri na hã 're ĩhâimana. Ãne na wawamri na 're iwahâimana za'ra wa'aba mono hã aiwa tô wama za'ra hã.

²³ Cristuhu ma romhuri'wa na, te duré ta norĩ hã aima 're siwasu'u u'âsi za'ra wa'wa. Tane nherẽ, wa wa hã ta norĩ nhipai u, Cristuhu ma romhuri'wa na hã 're ĩhâimana. (Ãté ĩnhimiza'rese õ na 're ĩhâimana mono na, ĩ'ãma rosa'rata za'ra wa'aba da nherẽ, wa za tô ãne na aima ĩsiwasu'u za'ra wa'wa.) E marĩ wa, wa merẽ ta norĩ nhipai u Cristuhu ma romhuri wẽ 'wa na hã 're ĩhâimana. Wa tô te tãma 're romhuri pese uptabi, ta norĩ nhipai u. Dazazéb 're, ma tô da te dasiwi 're ĩzai u'âsi, ta norĩ 're ihâimana za'ra mono zém nhipai u. Ma tô duré da te dasiwi 're ĩ'ahâri u'âsi, powawẽ hânhorõ na, senai'õ na rowasu'u'wa norĩ hã da te dasiwi 're ihâ za'ra mono zém nhipai u. Ãne wa, wa tô aré 're ĩdâ'â u'âsi, te ĩsina 're romnhimimnhasi za'ẽtẽ mono wa.

²⁴ Ĩsiré zudeu norĩ hã ma tô duré nimahã na hã te te siwi 're ĩpré'é. Ãne na hã nimahã bâtâ na ma tô 5 na ĩzada tiromhâiba. Misi bâtâ na, 39 na da te dasiwi 're ĩpré'é mono zé hã, zudeu norĩ te te sima 're irob'manharĩ za'ra mono zéb zarina.

²⁵ Romanu norĩ hã ma tô duré te te siwi 're ĩpré'é, wedehu na. Ãne na hã si'ubdatõ oto duré, ĩzada iromhâimana wasété zé hã nimahã bâtâ na. Ẽtẽ na ma tô duré dasiwi ĩhâ ni, da te dasiwi ãma ĩwĩrĩ da. Duré, uba're hã ma tô ĩré ãzé, â 'rowi, â sisasi hã sa'ẽtẽ wa. Ãne, taha na si'ubdatõ te oto duré irobzépatazé hã. Ãne hã uba're hã misi â na ĩré sipo'o pese wamhã, bâtâ na wa tô â poré wa'wa ĩhâiba, bâtâ bâre, duré mara bâre.

²⁶ Daro mono bâ 're ĩmorĩ ré hã, ĩma romnhimimnhasi uptabi nherẽ, wa tô âpré na te 're saprĩ, panho'õmo na hã. Duré isimisaihuri norĩ ahâ di, bâdâdi na hã, danhibrob zô dapãrĩ'wa norĩ hã. Ni'wam norĩ hã ĩsiré zudeu 're hâimana za'ra mono nherẽ, ma tô duré ĩzada 're hâimana wasété u'âsi za'ra, zudeu'õ norĩ zama hã duré. 'Ri nho'õmo mono bâ, ma tô duré da te dasima 're ĩ'ru za'ra, niha na da te ĩma 're rob'manharĩ za'ra mono da. A'ubuni wi 're ĩmorĩ ré hã, ĩsina romnhimimnhasi na, wa tô duré 're ĩhâimana, â poré na zama 're ĩmorĩ ré hã. Ni'wam norĩ hã tô sena Cristuhu zazei'wa 're hâimana za'ra mono newa, ma tô duré ĩzada 're hâimana za'ra, ta norĩ zama. Tahawa, ĩsina romnhimimnhasi uptabi nherẽ, wa tô 're ĩhâimana u'âsi.

²⁷ Duré ãma 're ĩhâimana mono zéb da hã, wa tô te ĩsima 're romhuri pese, ĩnhib'rata na. Bâtâ ahâ na wa tô duré ĩnhotõ ãna hã ĩza'wari. Mram na zama hã te duré robzépata ahâ di, duré 'rubu na zama. Ĩsai ãna te 're iromhuri mono zém na hã, wa tô duré te 're robzépata. Ĩ'uza ãna 're ĩhâimana mono zém na zama, wa tô duré te 're robzépata.

²⁸ Tane nherẽ, taha si õ di, te 're irobzépata mono zé hã. Awẽ sidâpâsi, wa ĩpẽ'ẽ na te 're robzépata u'âsi, daro mono bâ isazei'wa norĩ, siré 're isi'rã'õtõ mono norĩ ãma, te ãma 're rosa'rata u'âsi za'ra mono wa. Ta norĩ ãma, wa 're ĩhâtâ'â za'ẽtẽ za'ra.

²⁹ Ni'wam norĩ isazei'wa norĩ hâimanazéb 're, sib'uware na 're ihâimana za'ra mono norĩ ãma hã, e niha wa za te ãma 're rosa'rata za'ra. Ta norĩ ãma hã wa za tô ãma 're ĩpẽ'ẽzé za'ra. Duré ni'wam norĩ hã tisiré nhimi'manharĩ wasété zarina, tiwasété na 're si'marõpãrĩ za'ra mono 'ru te, wa za sada 're ĩhâimana za'ra, tiwasédé te te 're i'manharĩ 'rata za'ra mono norĩ zada hã, ta norĩ hã po're ãna 're hâimana za'ra mono wa.

³⁰ Ãté niwapsi, wa za tô ãne na hã aima ĩsiwasu'u za'ra wa'wa, uburé marĩ na te 're irobzépata mono zém na si, taha zarina, marĩ da hã, ĩsi'uihâ na ĩnhib'uware na 're ĩhâimana mono zém na, asiwi ĩwaihu'u za'ra wa'aba da.

³¹ 'Re ihâimana u'âsi mono hã, Wanhib'apito Zezusihi mama hã, taha ma si ĩwaihu'u pese di, ĩzadawa nhipese ãna aima ĩsiwasu'u za'ra wa'aba zém na hã za. Taha ãma si, wa za 're wawata u'âsi za'ra, wa norĩ hã.

³² Uburé marĩ da, ĩsi'uihâ na ĩnhib'uware na 're ĩhâimana mono zém na hã wa za aima ãma ĩsiwasu'u za'ra wa'wa. Damascu na 'ri nho'õmo nhisi ãma ĩnhamra ré, apito Aretaha zapari da'madâ'â'wa hã ma tô damrami'wa norĩ ma ĩ'ru, 'ri nho'õmo 'wawi wa'ra, 'ridawa nhitob za'ẽtẽ mono bâ, te te ĩzô rob'madâ'â za'ra mono da, te te siwi ĩsãmri wa, te te siwi ĩ'âri da.

³³ Tane nherẽ, ni'wam norĩ hã ma tô si'õtõ na siwi ĩ'ãma si'ra, 'ri nho'õmo 'wawi wa'ra zadazâri hawi. Tahawa, wa tô rowẽ na dawi watobro rob u, da'wapéi'wa norĩ wi hã.