2 Corĩtu 1 - ꞌRe Ihâimana Uꞌâsi Mono Zadawa Wasuꞌu

¹ Wa hã Paulu, wa ãma aima rob'ui'éré za'ra wa'wa, Corĩtu ãma, iwasu'uwẽ u 're asi'rã'õtõ aba mono norĩ ma, asiré. Uburé Ataza na danhipti'a nho'õmo nhisi ãma, 'Re ihâimana u'âsi mono nhib'a'uwẽ 're aihâimana za'ra wa'aba mono norĩ ma zama, wa ãma aima rob'ui'éré za'ra wa'wa. 'Re ihâimana u'âsi mono hã ma tô ĩpisutu, Cristu Zezusihi zadawa wasu'u'wa na isadawa para dama 're ĩhâimana mono da, daro mono bâ, te te sima ĩwẽzéb uwaibaba. Wano hã te duré ãma ĩzadawa wapto, uburé te aima ãma irowasu'u za'ra wa'aba zém na hã, Timotiu na wano nhisi hã.

² Wamama ma, wa ai'ãma 're ĩmreme u'âsi za'ra wa'wa, 'Re ihâimana u'âsi mono ma, duré Wanhib'apito Zezu Cristuhu ma zama, isimizawizé hã ai'ãma 're hâimana u'âsi za'ra wa'aba mono da, rowẽ u'âsi, ãma 're i'anomro aba mono zéb da hã.

Paulu hã, 'Re ihâimana u'âsi mono ãma iwatazé wasu'u

³ 'Re ihâimana u'âsi mono ãma si, 're wawata za'ra wa'aba mono za, Wanhib'apito Zezu Cristuhu mama ãma. Ta hã te wa'ãma 're siwamri u'âsi. Te duré te te 're wa'apawaptob u'âsi, wapẽ hã i're wama 're simi'wara u'âsi mono da.

⁴ Wa norĩ hã, Timotiuhu me, uburé marĩ ipire wa te 're sépata mono wamhã, te za tô te te 're wapawapto, wapẽ i're wama 're sa'wari mono da hã. Tahawa, wama waihu'u pese di oto duré, isarina, wa te 're idapawapto mono zéb da hã, wasine 're dapẽ'ẽ nhimi'wara mono da, marĩ ipire hã da te 're sépata za'ra mono wamhã. 'Re ihâimana u'âsi mono te te 're iwapawapto mono ne, wa za tô wa norĩ zama wa te 're dapawaptob za'ra, dapẽ hã i're dama 're simi'wara mono da apâ.

⁵ Wa norĩ hã Cristuhu zazei'wa 're wahâimana mono wa, wa wa te 're robzépata tô, ti'ab ré Cristu hã te te 're irobzépata mono ne. Isine, wa te 're robzépata mono nherẽ, ta hã te za te te 're wapawaptob u'âsi, wapẽ i're wama 're sa'wari mono da, wato sina duré 're wahâimana u'âsi mono da.

⁶ Wa norĩ hã, Cristu, wa te dama 're sadawa wasu'u mono wa, te da te wama 're rob'manharĩ wasété u'âsi. Taha zarina, wa te 're robzépata mono nherẽ, tô wama 're rowẽ mono di. E marĩ wa. Wanhimiromhuri zarina 're isaze za'ra wa'aba mono zéb zarina, 'Re ihâimana u'âsi mono te te 're asõ'reptu za'ra wa'aba mono wa, duré isimipawaptobzéb zarina, aipẽ hã i're aima 're simi'wara aba mono wa. Wa norĩ hã wa te 're robzépata mono wamhã, te tô 'Re ihâimana u'âsi mono hã te te 're wapawapto, wapẽ i're wama 're sa'wari u'âsi mono da. Ãne hã aima waihu'u pese za'ra wa'aba wa, te za 'râwi asima 're inharĩ za'ra wa'aba mo, ãne: “Paulu norĩ hã te te 're robzépata zahuré mono nherẽ, 'Re ihâimana u'âsi mono te te 're ipawaptob u'âsi zahuré mono ne, te za duré te te 're wa'apawapto, wapẽ i're wama 're simi'wara u'âsi mono da.” Ãne te za 'râwi asima 're inharĩ za'ra wa'aba mo. Tahawa, wasine 're robzépata za'ra wa'aba mono wamhã, te za asiptete sina ãma 're anomro aba mo, 'Re ihâimana u'âsi mono ãma. Tawamhã te te 're iwapawapto mono ne, te za tô 'Re ihâimana u'âsi mono hã te te 're aipawaptob za'ra wa'wa, aipẽ i're aima 're simi'wara aba mono da.

⁷ Ãne na, wa tô wa te ai'ãma 're rosa'rata u'âsi za'ra wa'wa, 're robzépata za'ra wa'aba mono nherẽ, 'Re ihâimana u'âsi mono za 're irẽme za'ra wa'aba mono õ na hã. Tahawa, wasine 're robzépata za'ra wa'aba mono wamhã, tô sena te za duré 'Re ihâimana u'âsi mono hã te te 're aipawaptob za'ra wa'wa, te te 're iwapawaptob u'âsi mono ne, apâ 're aipẽ'ẽ nhimi'wara u'âsi aba mono da.

⁸ Wasisãnawã norĩ, wa duré wasima wẽ ni, wa te ãma aipo're pu'u za'ra wa'aba da, Azia na danhipti'a nho'õmo nhisi ãma wahâimana ré, rowasédé hã wazada ihâimanazém na hã. Tame, wa te robzépata za'ẽtẽ uptabi wa, wa tô aré wasina rosa'rata ni, za wadâ'â da newa oto.

⁹ Ãne, wa tô wasina rosa'rata ni aré: “Tô sena, wa za wadâ'â ni, romhutu na.” Tawamhã e marĩ da, ma tô ãne hã bété wazada hã tiromhâiba. 'Râwi wawaihu'u pese na 're wasi'madâ'â tõ mono da, 'Re ihâimana u'âsi mono si, wa te 're umnhasi pese mono da si, ma tô ãne hã wazada tiromhâiba. 'Re ihâimana u'âsi mono si waihu'u pese di, te te 're ida'ahâiwa'utu mono da hã. Duré tãma hã waihu'u pese di, te te 're ida'ab'madâ'â mono da hã, rowasédé dazada 're hâimana mono wamhã.

¹⁰ Ta hã ma tô wanho'reptu tô, wadâ'âzém hawi, wa te wasina romnhimimnhasi uptabi nherẽ. Taha zarina, te za te te 're wanho'reptu duré, wazada 're iromhâimana wasété mono zém hawimhã. Tahawa, wama umnhasi uptabi di, 'Re ihâimana u'âsi mono hã te te 're iwanho'reptui mono da hã.

¹¹ A norĩ wa'wa hã wa'ãma 're aimreme zusi aba mono zém na 're wapawaptob za'ra wa'aba mono wamhã, 'Re ihâimana u'âsi mono hã te za te te 're aiwapari za'ra wa'wa, te te 're wanho'reptui u'âsi mono da. Ãne wamhã, iwẽ na si te za tô wama 're sõprub u'âsi. Taha zarina, te za tô da'ahâ na ãma 're dawata za'ra, 'Re ihâimana u'âsi mono ãma hã, iwẽ na si wama 're sõprub u'âsi mono wa.

Paulu hã datẽme morĩ tõ da, te te ãma isaprĩzé wasu'u

¹² Ni'wam norĩ hã asiré 're hâimana za'ra wa'aba mono nherẽ, ma tô wahâimana nhipese na hã wa'ãma siwi tihi. Tane nherẽ, senai õ di ta hã. Wa norĩ hã 'râwi wapẽ'ẽ na 're wasiwẽ'õ mono õ di. E marĩ wa. Marĩ hã wa te ai'ãma 're 'manharĩ za'ra wa'aba mono õ wa, 're iwahâimana wẽ u'âsi mono zarina. Pi'uriwi aiwi 're wahâimana za'ra wa'aba mono õ di. Marĩ iwẽ si, wa tô wa te aima 're 'manharĩ za'ra wa'wa. Ti'ai ãma isazei'õ'wa norĩ nhimirowaihu'u pese zarina, 're wahâimana mono õ di. 'Re ihâimana u'âsi mono nhimizawi pese zéb zarina si, wa ãne na hã 're wahâimana oto.

^13-14 Wa te ãma aima irob'ui'éré za'ra wa'aba zé hã e pire di, 're sõré za'ra wa'aba mono wamhã, duré ãma iwaihu'u za'ra wa'aba da hã. Mare di. Aima wapu za'ra wa'aba di. E marĩ wa. Wazadawa nhipese na, marĩ na wa te ãma aima rob'ui'éré za'ra wa'aba õ wa, aimawi na wa te ãma aima 're roti za'ra wa'aba mono õ wa duré. Ãne na hã sena na 're iwahâimana mono zé hã aima waihu'u pese za'ra wa'aba õ di. Tane nherẽ, wa tô wa te wasima 're aiwẽ za'ra wa'wa, nimahã na asiwi wawaihu'u pese za'ra wa'aba da, wazadawa nhipese õ na 're iwahâimana mono na hã. Tawapsi te za Wanhib'apito Zezusi hã nimahã bâtâ na apâ we imorĩzéb ãma, wa'ãma atob'uzu za'ra wa'wa, wa norĩ hã za duré ai'ãma iwatob'uzu za'ra wa'aba ne, tô taha bâtâ na hã.

^15-16 'Re ĩhâimana mono zém na, ĩwẽsãmri za'ra wa'aba newa, wa tô aré ĩsima rowẽ, ã hawi Masédonia na danhipti'a nho'õmo nhisi hawi, apâ ĩmorĩ wamhã, ãma atẽme ĩmorĩ aba na, te sahu da duré. Masédonia u we ĩmorĩ 'rata wa, ãma atẽme ĩmorĩ aba ne, duré ãma atẽme ĩwisi aba da, te asabu na sahu za'ra wa'aba da, wa tô ĩsima rowẽ aré. Ãhã wamhã, te aré asiwi ĩpawapto wa'wa, Zudéa u ĩmorĩzéb da hã. Ãhã 'wa'âhã, te aré tô oto maparane ĩnhimipawapto wẽ zé hã tihâiba aima za'ra wa'aba, ĩnhimiromhuri na hã.

¹⁷ Tane nherẽ, ãma atẽme ĩmorĩ aba zém na, te sahu õ di, Masédonia hawi apâ ĩmorĩ ré, ãma atẽme ĩsipai waihu'u za'ra wa'aba õ wa. Marĩ hã ĩma hâimana wa, wa tô ĩnhimirosa'rata na ãma saprĩ, ãma atẽme ĩmorĩ aba tõ da a'â. Ãne wa, ni'wam norĩ hã asiré 're ihâimana za'ra wa'aba mono norĩ hã ma tô ĩ'ãma rosa'rata wasété za'ra, ĩzadawa nhipese na hã, ĩmreme hã tô senai õ newa. E ĩnhimirosa'rata na 'râwi te ĩsiwi ro'wa'rutu wa, wa tô ãne hã ĩsima pisutu, ãma atẽme ĩmorĩ aba tõ da hã. Mare di. E isazei'õ'wa norĩ hã sima si 'râwi te te 're irosa'rata za'ra mono ne, wa tô ãne hã ĩsima pisutu. Mare di. Ãne wab õ di. Isazei'õ'wa norĩ hã marĩ na te te dama 're ropisutu za'ra mono wamhã, awa'awi te za te te dawi ãma 're saprĩ za'ra, simirosa'rata na saprĩ pese wa, ta norĩ hã. Isimiropisutu na ropsi'âri õ nherẽ, te za te te dama 're nharĩ za'ra, siwa'rãmi. E ãne, 're ĩhâimana mono zé hã, wa hã. Mare di. Ãnei õ di.

¹⁸ 'Re ihâimana u'âsi mono hã, dama umnhasi uptabi di. Niwamhã dama sadawa nhipese õ di. Ta hã ma tô ĩpisutu, te dama 're sadawa wasu'u mono da, sena na. Tahawa, wa hã nimahã na hã aima ĩzadawa nhipese za'ra wa'aba õ di. Te aima 're irowasu'u za'ra wa'aba mono zé hã, taréi õ di. Ĩnhimirosa'rata waptu na hã te duré ãma 're saprĩ mono õ di.

¹⁹ Zezu Cristu hã bété, 'Re ihâimana u'âsi mono 'ra hã. Ta hã tinhimiroti ahâ na te te ãma 're azaprĩ mono õ di. Tô õhõ si isimiroti hã te tãma 're hâimana. Tane duré, wa norĩ hã isadawa wasu'u'wa norĩ hã, Sila norĩ me duré Timotiu, tô i'uwaibaba si, wa tô wa te aima 're wasu'u za'ra wa'wa. Ta norĩ me hã, wa tô wa te aima 're sadawa wasu'u za'ra wa'wa, Cristu hã.

²⁰ 'Re ihâimana u'âsi mono, iwẽ na te te dama 're i'aropisutu mono zé hã ahâ uptabi nherẽ, ma tô Zezu Cristu hã pisutu, uburé te te dama ãma 're i'a'uwaimrami mono da hã. Tahawa, Zezusi hã wama umnhasi di oto, uburé te te wama ãma 're i'a'uwaimrami mono zém na hã. Wa norĩ hã wasiré isazei'wa norĩ hã wasiré 're wasi'rã'õtõ mono wamhã, 'Re ihâimana u'âsi mono ãma 're wawata za'ra mono wamhã, wa 're wamreme zusi, ãne: “Tane tô.” E marĩ te wasu'u, ã hã. Cristu, tô sena uburé marĩ na te te wama 're i'a'uwaimrami mono zé, te wasu'u. Tane duré, wa norĩ hã isadawa wasu'u'wa norĩ sena na, wa wa te aima 're rowasu'u za'ra wa'wa, iwasu'uwẽ wasu'u na hã.

²¹ 'Re ihâimana u'âsi mono hã ma tô te te 're wapawaptob u'âsi za'ra, wanhiptete sina Cristuhu ãma 're wahâimana za'ra mono da. A norĩ wa'aba zama, te duré te te 're aipawaptob u'âsi za'ra wa'wa, asiptete sina ãma 're anomro u'âsi aba mono da. 'Re ihâimana u'âsi mono hã ma tô wapisutu za'ra, iwasu'uwẽ na, wa te tãma 're romhuri za'ra mono da.

²² Tipẽ'ẽzani hã ma tô duré te te wama 're anhomri, wapẽ'ẽ 're, wama 're ihâimana za'ra mono da hã. E marĩ te tawamhã wama wasu'u za'ra, Ipẽ'ẽzani hã wapẽ'ẽ 're, 're ihâimana mono zé hã. 'Re ihâimana u'âsi mono nhib'a'uwẽ 're iwahâimana za'ra mono zé, te wama wasu'u za'ra. Duré, Ipẽ'ẽzani hã wapẽ'ẽ 're, oto 're sãmra mono wa, wa za wa te 're waihu'u pese za'ra, 'Re ihâimana u'âsi mono, sena na za te te wama ãma 're i'a'uwaimrami mono zém na hã, uburé te te wama 're i'aropisutu mono zéb zarina.

²³ Wa hã apâ ĩmorĩ wamhã, ãma atẽme ĩsipa za'ra wa'aba õ di tô, Corĩtu u hã. E marĩ wa. Marĩ hã 'manharĩ wasété za'ra wa'aba wa, te aihâ za'ra wa'aba tõ da, ãma atẽme ĩwisi aba õ di tô, apâ hã. Tô sena, wa ãne hã aima ĩsiwasu'u za'ra wa'wa, 'Re ihâimana u'âsi mono nho'a. Tahawa, ĩzadawa nhipese wamhã, 'Re ihâimana u'âsi mono te za tô ĩ'azâ pé niha hã wamhã.

²⁴ E wa norĩ hã asib'apito aima 're wahâimana za'ra wa'aba mono bâ, te za bété wanhimiroti hã 're isaze za'ra wa'aba mo. Mare di. Asib'apito hã aima 're wahâimana za'ra wa'aba mono õ di. A norĩ wa'wa hã te asiptete sina ãma 're anomro aba mo, Cristuhu ãma, 're sazei utõrĩ za'ra wa'aba mono ãna. Taré, wa wasiré wa te tãma 're romhuri za'ra, ato sina ãma 're i'aihâimana za'ra wa'aba mono zéb da hã.