1 Timotiu 4 - ꞌRe Ihâimana Uꞌâsi Mono Zadawa Wasuꞌu

Danhimiroti senai'õ na rowasu'u

¹ 'Re ihâimana u'âsi mono hã, Tipẽ'ẽzani na ma tô ãne dama waihu'u: “Rob'rãsutuzéb u romhuture wapsi, te za ni'wam norĩ hã tinhimizaze rẽme za'ra, Zezu Cristuhu nhimiroti te te aré 're isaze za'ra mono zé hã. Ihâiba'õ norĩ nhimiroti hã tô sena newa te za te te 're wapari za'ra, wa'uburé norĩ nhimiroti zarina 're nomro mono da oto.” Ãne ma tô dama waihu'u.

² Wa'uburé nhimiroti hã te za te te datẽme 're ropé, aibâ norĩ zadawa hawi. Aibâ norĩ hã roti tô sena na te te dama 're rowasu'u za'ra mono newa, te sadawa nhipese na te te dama 're rowasu'u za'ra. Tane nherẽ, ta norĩ hã 'râwi 're siwaihu'u za'ra mono õ di, tizadawa nhipese na hã.

³ Ta norĩ hã te za dasina 're idamro za'ra mono zé hã dawi sawi za'ra, dasina 're damro za'ra mono tõ da, dasiwaprosi 're dahâimana za'ra mono da. Te za duré dasazé hã dawi sawi za'ra, marĩ mono bâ 're dasaihuri tõ mono da, 'Re ihâimana u'âsi mono hã uburé dasazé hã te te apoto mono nherẽ, ãma 're idasaihuri mono zéb da hã. Isazei'wai mono bâ wama waihu'u pese za'ra di, dasazém na isimiroti hã. Ãne wa, sõpru wa, ãma 're wawata za'ra mono pari, wa za isimipoto na 're wasaihuri.

^4-5 Uburé dasazé hã wẽ di, 'Re ihâimana u'âsi mono nhimipodo hã ãma 're iwasaihuri mono zéb da hã. Wẽ wa, wa te wasiwi 're wẽ'õ za'ra mono õ di za, ãma 're wasaihuri mono tõ da hã. Sõpru wa, ãma 're wawata za'ra mono sina, wa za ãma 're wasaihuri, iwẽ na te te ãma nharĩ wa, 'Re ihâimana u'âsi mono hã. Ãhã wa, tãma wẽ di, isimipoto na 're iwasaihuri mono zéb da hã.

⁶ Tawamhã uburé te aima i'awaihu'uzéb zarina si, te za wasiré isazei'wa norĩ ma 're i'awaihu'u mo. Ãne wamhã, Cristu Zezusihi ma, romhuri wẽ 'wa, te za tô 're aimo. Wanhib'apito nhimiroti hã wa te 're isaze za'ra mono zéb zarina, 're aimorĩ u'âsi sina, te za tãma 're iwaihu'u u'âsi za'ra mo, roti tô sena zarina zama, ãma 're aimorĩ u'âsi ne. Õhõ na si 're aimorĩ wamhã, asiptete sina te za 're aihâimana mo, Wanhib'apito ãma hã.

⁷ Dahi'rata norĩ nhimirob'rãzarõtõ 'ratare hã 're wapari mono õ di za, ta hã isazei'õ'wa norĩ te hã, tarére wa, uptabi õre wa. Ta hã te za asima 're i'madâ'â pese mo, 're aihâimana wẽ mono da, Wamama nhimiroti zarina.

^8-9 Ãne wa za duré aima waihu'u. Ãté ni'wam norĩ hã te za te te sima 're pisutu za'ra, 're sihâiba wairob za'ra mono da, dahâiba wairobzé hã wẽ wa, dahâiba ma hã. Ãne hã dama 're rowẽ za'ra mono nherẽ, 'Re ihâimana u'âsi mono nhimiroti zarina 're danomro wẽ mono da, da te dasima 're pisutu pese za'ra mono wamhã, dama 're rowẽ uptabi za'ra mono di za. Rowẽ na te za ãma 're danomro, ti'ai ãma, hâiwa ãma zama. Tô sena wa tô aima rowaihu'u. Ãhã wasu'u hã tô sena wa, aihĩni te za da te ãma 're saze za'ra.

¹⁰ Taha da, wa za sada 're wanhiptete u'âsi za'ra, wa te 're dapawaptob za'ra mono da, da te ãma 're saze za'ra mono da. 'Re morĩ u'âsi wa, wa tô wasina wa te 're umnhasi za'ra, te te 're wapawaptob u'âsi za'ra mono da. Ta hã uburé Danho'reptui'wa, te 're hâimana. Isazei'wai mono bâ te za tô te te 're wa'anho'reptu.

¹¹ Tahawa, uburé te aima i'awaihu'uzém na te za isazei'wa norĩ ma 're i'awaihu'u mo, asimiroti pire sina.

¹² Aihâiba prédu pese õ nherẽ, te za 're aimorĩ wẽ, aihâiba prédu pese õ wa, asimiroti na isazei'wa norĩ hã te te 're aiwẽ'õ za'ra mono tõ da. Te za dama 're asanho mo, aimreme wẽ na, duré dama aihâimana wẽ na, duré asimizawi pese na, duré asimirosa'rata wẽ na. Taha na, te za dama 're asanho u'âsi mo, asirã zarina 're nomro wẽ mono da, isazei'wa norĩ hã.

¹³ Nimahã na wa za ãma atẽme wi. Ma'ãpé, ãma atẽme ĩwisi õ ré hã, dama 're sõré u'âsi mono za, 'Re ihâimana u'âsi mono nhimiroti 'rata na rob'ui'éré hã. Te za duré Wanhib'apito wasu'uwẽ na dama 're irowasu'u u'âsi mo. Te za duré 're idapawaptob u'âsi mo, isimiroti zarina 're danomro wẽ mono da. Taha da, te za asina 're i'madâ'â u'âsi mo.

¹⁴ Marĩ iwẽ hã ma tô Wamama hã aipẽ'ẽ 're aima tisõ, ãma 're idapawapto mono zéb da hã. Hâiwa hawi te te tãma iwaihu'u za'ra zém na, ma tô isadawa wasu'u'wa norĩ hã aima waihu'u za'ra, iwẽ hã za te te aima isõmri na. Duré ma tô da'madâ'â'wa norĩ hã, tinhib'rada hã ai'ãma sa'ra za'ra, ai'rã nhisiwi. Taha ré ma tô 'Re ihâimana u'âsi mono hã iwẽ hã aima tisõ. Taha zarina, te za asina tãma 're i'uwaimrami u'âsi mo, dapawaptom na, asimiromhuri hã Wamama ma.

¹⁵ Uburé te aima i'awaihu'u mono zéb zarina, te za asina 're i'madâ'â u'âsi mo. Õhõ si te za asima 're ipisutu pese mo, asina 're i'uwaimrami mono zéb da si. Ãne wamhã, dapawaptom na rowaihu hã asima ãma 're isa'ẽtẽ mono na te za da te ai'ãma 're waihu'u za'ra.

¹⁶ 'Re aimorĩ wẽ da, duré i'uwaibaba si dama 're sadawa wasu'u mono da, te za 'râwi 're asi'madâ'â pese mo. Ãne wamhã, te za 're asisõ'reptui u'âsi mo. Aiwapari'wa norĩ zama, te za duré 're i'anho'reptui u'âsi mo.