1 Timotiu 3 - ꞌRe Ihâimana Uꞌâsi Mono Zadawa Wasuꞌu

Wanhib'apito zazei'wa norĩ 'madâ'â'wa na rowasu'u

¹ Ã hã te aima iwaihu hã, tô sena uptabi. Ãté ni'wa hã te za sima wẽ, isazei'wa norĩ hã te te 're 'mai'madâ'â mono da. Ãne wamhã, te te sima iwẽzé hã wẽ di, da'madâ'â na te te 're i'mairomhuri mono da hã.

² Isazei'wa norĩ 'madâ'â'wai mono bâ, te za 're hâimana wẽ za'ra. Tawamhã iwasédé hã da te ãma 're isa'ra mono da hã, mare di. Timro uptabi si te za duré te te sima 're 'madâ'â za'ra, misi haré. Hâimana prédum na te za duré dama 're hâimana za'ra. Tiwasété wi te za sina 're siptete u'âsi za'ra, 're nomro wẽ mono da. Te za duré dama 're hâimana wẽ za'ra. Duré itẽme 're dasihutu mono wamhã, te za te te 're da'mazasi su'u za'ra. Duré roti na rowaihu hã te za tãma 're hâimana za'ra, te te ãma 're idapawaptob za'ra mono zéb da hã.

³ Duré âzézei'wa, 're nomro mono õ di za. Duré da'ahâri zei 'wa, 're hâimana za'ra mono õ di za. Simizawi pese uptabi na, te za dama 're hâimana za'ra. Duré rob'uiprazéb zô si te te sima 're rob'ruiwapari za'ra mono õ di za.

⁴ Isõrõwa 're, 're ihâimana za'ra mono norĩ, te za duré te te 're 'madâ'â pese za'ra, timama mreme si te te 're wapari pese za'ra mono da, timama hã isimiroti na te te 're wazéb za'ra mono da.

⁵ Ni'wa hã isõrõwa 're, 're ihâimana za'ra mono norĩ 're nomro wẽ mono da, te te 're 'madâ'â pese za'ra mono õ nherẽ, e niha te za tawamhã õ hã 'Re ihâimana u'âsi mono zazei'wa norĩ hã te te 're 'madâ'â wẽ za'ra duré, 're nomro wẽ mono da, ta norĩ zama. Tãma hã waihu'u õ di za tô.

⁶ Ni'wa hã Wanhib'apito te te isazezém na ãma ronomro õ nherẽ, da'madâ'â'wa na 're 'maihâimana mono õ di za. E marĩ wa. Isazeté'wa hã da'madâ'â'wa, 're 'maimorĩ wamhã, ãté da'madâ'â'wai wa, te za 'râwi sina 're 'maiwata, tipire na taré. Ãne wamhã, 'Re ihâimana u'âsi mono hã wa'uburé norĩ nhib'apito hã 'râwi sina 're wata mono wa, te te iwẽ'õ ne, te za ta hã wẽ'õ.

⁷ Isazei'wa norĩ 'madâ'â'wai mono bâ te za dama 're hâimana wẽ za'ra. Ãne wamhã, dama 're ihâimana wẽ mono zém na te za isazei'õ'wa norĩ zama te te dama 're wasu'u wẽ za'ra. Dama 're hâimana wẽ za'ra mono õ wamhã, te za damreme hã te te sina 're 'rã'õtõ za'ra. Ãne wamhã, wa'uburé norĩ nhib'apito te te da'ãma sima iroti wasété zé hã te za te te sina 're 'mai'uwaimrami tãma, da'madâ'â'wa norĩ hã.

Dapawapto'wa norĩ wasu'u

⁸ Dapawapto'wai mono bâ te za 're hâimana wẽ za'ra. Duré âzézei'wa na 're hâimana za'ra mono õ di za. Rob'uiprazéb zô si mreme si'ahâ na 're hâimana za'ra mono õ di za.

⁹ Wanhib'apito nhimiroti hã aré dama sa'rese õ nherẽ, ma tô oto te te dama 're awaihu'u, 'Re ihâimana u'âsi mono hã, da te ãma 're isaze za'ra mono zéb da hã. Isimiroti hã tô sena wa, te za dapawapto'wa norĩ hã te te 're 'madâ'â pese za'ra, hâimana wẽ sina. Iwasu'uwẽ hã tô sena na te za te te 're saze za'ra. Ãne wamhã, 'râwi tipẽ'ẽ na 're siwẽ'õ za'ra mono õ di za, tô sena na te te 're isaze za'ra mono õ na hã.

¹⁰ Dapawapto'wa da, da te dasiwi pisutu õ ré hã, te za a'â da te dasiwi 're 'mai'madâ'â, dama 're i'maihâimana wẽ mono zô. Tawamhã dama 're 'maihâimana wẽ mono wamhã, te za oto dapawapto'wa na 're 'maihâimana.

¹¹ Imro zama te za dama 're hâimana wẽ, pi'õ hã. Damreme hã iwẽ'õre na te te dama 're robzanhamri mono õ di za. Hâimana prédup sina te za dama 're hâimana. Tiwasété wi, te za sina 're siptete. Hâimana nhiptete na, te za 're hâimana.

¹² Dapawapto'wai mono bâ timro uptabi si te za sima te te 're 'madâ'â pese za'ra, misi haré. Duré ti'ra norĩ hã te za te te 're 'madâ'â pese za'ra, 're nomro wẽ mono da. Duré uburé isõrõwa ãma isiré 're ihâimana za'ra mono norĩ zama, te za te te 're 'madâ'â pese za'ra, ta norĩ zama 're nomro wẽ mono da.

¹³ Dapawapto'wa norĩ hã te te 're dapawapto wẽ za'ra mono wamhã, isimipawapto wẽ na te za da te 're wasu'u wẽ za'ra. Ãne wamhã, mreme nhiséb ãna te za duré dama 're siwasu'u za'ra, Cristu Zezusi hã te te 're isaze za'ra mono zém na hã.

Wanhib'apito wasu'uwẽ hã dama isihâi'rézé wasu'u

^14-15 Atẽme ãma ĩwisi su'u da hã ĩma wẽ nherẽ, ãma ĩwisi su'u õ na dâ'âsina, wa ãne na ãma aima rob'ui'éré. E marĩ da. Niha dama 're iwahâimana za'ra mono zéb da na waihu'u da. Wa norĩ hã 'Re ihâimana u'âsi mono 'ra, wa 're wanomro. Isib'a'uwẽ, wa oto 're wahâimana za'ra, daro mono bâ wa te 're isaze za'ra mono hã. Wanhib'apito nhimiroti hã tô sena wa, isazei'wai mono bâ wa za wa te 're 'madâ'â u'âsi za'ra. Õne haré te za dama 're hâimana u'âsi, da te ãma 're isaze za'ra mono zéb da hã.

¹⁶ Tô sena Zezu Cristuhu wasu'uwẽ hã wẽ uptabi di, aré dama sa'rese õ nherẽ, Wamama hã te te oto dama ihâi'ré hã wa te 're isaze za'ra mono zé hã, ãma 're iwanomro wẽ mono zéb da hã. Ãne te te dama iwaihu'uzé hã: “A'uwẽ na ma podo, ti'ai ãma. Duré tô sena i'ra 're imorĩ wẽ uptabi na, ma tô Tipẽ'ẽzani na dama waihu'u za'ra. Duré hâiwa ãma 'Re ihâimana u'âsi mono ma romhuri'wa norĩ hã ma tô titõmo na 'madâ'â za'ra. Duré a'uwẽ mono bâ 're idahâimana za'ra mono norĩ hã ma tô iwasu'uwẽ na da te 're dapo're pu'u za'ra, daro mono bâ. Ma tô duré da te dasina 're umnhasi za'ra. Duré rowẽ uptabi u ma tô mo, hâiwa u.”