1 Timotiu 2 - ꞌRe Ihâimana Uꞌâsi Mono Zadawa Wasuꞌu

'Re ihâimana u'âsi mono ma, 're idamreme zusi mono zém na rowasu'u

¹ Ãhã na marĩ ipire na wa za aima rowasu'u. 'Re ihâimana u'âsi mono ma 're damreme zusi mono wamhã, te za uburé da'ãma tãma 're damreme zusi, te te 're da'apawapto mono da. Marĩ zô dawi 're rowaptâ'â za'ra mono wamhã, uburé dama te za da te tiwi 're rowaptẽrẽ za'ra, marĩ hã te te dama 're anhomri mono da. Duré marĩ na dama 're sõpru mono wamhã, te za ãma 're dawata za'ra.

² Danhib'apito mono bâ, dama 're ihâimana za'ra mono norĩ ãma, te za tãma 're damreme zusi, uburé dama ipire za'ra norĩ ãma zama. E marĩ da. Ta norĩ hã te te dama 're roti wẽ za'ra mono da, taha zarina 're dasi'wapé za'ra mono õ wa, rowẽ na dasiré 're wanomro mono da, duré dama 're wahâimana wẽ za'ra mono da, 'Re ihâimana u'âsi mono nhimiroti 'madâ'â sina.

^3-4 'Re ihâimana u'âsi mono hã Wa'anho'reptui'wa. Ta hã ma tô te te sima 're da'awẽ, uburé te te 're da'anho'reptui mono da. Ma tô duré te te sima 're da'awẽ, aihĩni pese isimiroti hã da te 're waihu'u za'ra mono da, ãma 're danomro wẽ mono da, isimiroti hã tô sena uptabi wa. Aihĩni ãma 're wamreme zusi mono wamhã, tãma rowẽ di. Tahawa, te za wama 're to za'ra.

⁵ Misire hâiwa ãma 're ihâimana mono si, uburé Danhib'apito uptabi hã. Misire da'ãwisi wẽ 'wa Wamama u hã. Ta hã Cristu Zezusi, aibâ na 're ihâimana mono.

⁶ Ta hã ma tô dazada sisõ, uburé te te da'awa'âbâ da. 'Re ihâimana u'âsi mono hã bâdâ te te ipisutuzém na, ma tô da'awa'â. Tahawa, 'Re ihâimana u'âsi mono te te sima 're ida'awẽ mono zé hã, uburé pese te te 're ida'anho'reptui mono zéb da hã, wa tô waihu'u za'ra ni.

⁷ Ta hã ma tô ĩpisutu, isadawa wasu'u'wa 're ĩhâimana mono da, zudeu'õ norĩ hã te 're po're pu'u za'ra mono da, isadawa para, Wanhib'apito wasu'uwẽ na. E marĩ da. Wanhib'apito hã te te 're saze za'ra mono da, duré te te ãma 're sasõmri za'ra mono da, isimiroti zarina si 're nomro wẽ mono da, tô sena uptabi wa, isimiroti hã. Ĩzadawa nhipese na aima ĩsiwasu'u õ di. Tô sena wa tô aima 're ĩsiwasu'u.

⁸ Wa za oto aima waihu'u, te ĩsima 're ida'awẽ mono zém na hã. Aibâ norĩ hã nimame 're ihâimana za'ra mono zé mono bâ te za 're mreme zusi, 'Re ihâimana u'âsi mono ma. Ta norĩ hã dama 're hâimana wẽ za'ra mono wamhã, te za tãma 're mreme zusi, tãma 're simiwẽ za'ra mono sina, hâiwa u, te te 're da'ruiwapari za'ra mono ãna, duré tizadawa na 're isi'wapé za'ra mono ãna.

^9-10 Pi'õ norĩ hã, aibâ norĩ te te sima 're 'madâ'â ze za'ra mono da, dama 're si'uza wamnarĩ za'ra mono õ di za. Duré dama 'madâ'â ze da, 're siséré tété wẽ za'ra mono da hã mare di za. Duré tinho'rebzui wẽ na si, sima 're isipese za'ra mono õ di za. Duré tinhipsisi wẽ na si, sima 're isipese za'ra mono da hã mare di za. Duré da'uzazé iwa'âbâ za'ẽtẽ na si, 're isi'uza za'ra mono da hã mare di za. Dama rob'manharĩ wẽ zéb zô si, te za sina 're sõpré, 'Re ihâimana u'âsi mono nhimiroti 'madâ'â'wa na 're isiwasu'u za'ra mono zéb zarina.

¹¹ Isazei'wa norĩ 'madâ'â'wa norĩ hã te te dama 're rowahutu za'ra mono ré, te za pi'õ norĩ hã ari'iwi te te 're wapari za'ra. I'madâ'â'wa norĩ zapari 're ihâimana za'ra mono na te za 're si'madâ'â za'ra pi'õ norĩ hã, ari'iwi te te 're iwapari za'ra mono da hã.

^12-13 Pi'õ norĩ hã aibâ norĩ ma, te te 're irowahutu za'ra mono da hã, mare di. Aibâ norĩ ma, timreme pire na 're si'madâ'â za'ra mono õ di za. Ari'iwi te za 're si'ubumro, pi'õ norĩ hã. E marĩ wa, wa ãne aima waihu'u. 'Re ihâimana u'âsi mono hã ma tô aibâ hã poto na'rata, Adã na isisi hã. Taha za'u si ma duré pi'õ hã poto, Ewa hã.

¹⁴ Pi'õ si, Wa'uburé nhimiroti hã tô senai'õ na te te waihu'u õ di. Tanei õ di, Adã hã. Pi'õ si Wa'uburé nhimiroti hã tô senai'õ na te te iwaihu'u õ zéb zarina, ma tô Wamama nhimiroti na hã upa na'rata.

¹⁵ Tane nherẽ, pi'õi mono bâ hâimana wẽ na 're hâimana za'ra mono wamhã, tãma 're rowẽ za'ra mono di za. Wanhib'apito umnhasi sina, te za 're hâimana za'ra. Te za duré te te 're dazawi pese za'ra. Hâimana wẽ uptabi na te za dama 're hâimana za'ra. Tawamhã iwasã hã ãma 're sépu'u za'ra mono wamhã, i'ra hã tãma 're rere'e wẽ mono da, te za Wamama hã te te 're anho'reptu, pi'õ norĩ hã.