1 Tesalonita 5 - ꞌRe Ihâimana Uꞌâsi Mono Zadawa Wasuꞌu

Wanhib'apito apâ wei morĩ õ ré, 're idanomro wẽ mono zé wasu'u

¹ Wasiré isazei'wa norĩ, Wanhib'apito apâ wei wazô imorĩzé hã, wa tô aima waihu'u pese za'ra wa'aba ni. Tane nherẽ, wa za duré apâ ãma aima rob'rãzarõtõ za'ra wa'wa, rob'ui'éré na. Niwapsi, te za we apâ wazô hã timorĩ za'ra. Tane nherẽ, bâdâ hã wa te waihu'u za'ra õ di. Nimahã na we imorĩzé hã, sena na hã wa te duré waihu'u za'ra õ di. A norĩ wa'wa hã ma tô ãne hã iwaihu'u pese za'ra wa'wa.

² Wanhib'apito nhibâdâ hã, bara na isimisaihuri zô 're danhimipari za'ra mono õ nherẽ, we datẽme imorĩ ne, te za tô iwa waptãrã. Ãne hã aima waihu'u pese za'ra wa'aba di.

³ Sô 're danhimipari za'ra mono õ wa, te za isazei'õ'wa norĩ hã da te dasima 're rowasu'u za'ra, ãne: “Rowẽ na wa za oto 're wasi'ubumroi u'âsi, marĩ hã wazô 're wairébé mono ãna.” Ãne te za dasima da te 're rowasu'u za'ra, da te 're waihu'u za'ra mono õ wa. Ãne, da te dasima 're rowasu'u za'ra mono wapsi, awa'awi te za ropipa hã dazô 're wairébé, Wamama hã za te te dama irob'manharĩzém na hã. Tiwi dasimani waihu'u za'ra õ di za, pi'õi ma, i'ra tãma 're rere'e mono da, iwasã ãma 're sépu'u za'ra mono wa, ai'uté zépu'u wi tiwi 're isimani za'ra mono õ ne.

⁴ Wasiré isazei'wa norĩ, a norĩ wa'wa hã Wanhib'apito apâ wei imorĩzéb zô, te sô 're asimipari za'ra wa'aba mo. Tahawa, awa'awi za wei morĩ nherẽ, tãma a'rãmi za'ra wa'aba õ di za, bara na isimisaihuri norĩ ma, 're idasi'rãmi za'ra mono ne.

⁵ Tawamhã Wanhib'apito apâ we imorĩzéb zô, aihĩni 're i'asimipari za'ra wa'aba mono norĩ hã, rowa'a na 're idahâimana za'ra mono zém ne, 're aihâimana za'ra wa'aba mono zé hã, a norĩ wa'wa hã ti'ai ãma. Apâ we imorĩzéb zô 're idanhimipari za'ra mono õ norĩ ne, robra na wa norĩ hã 're wahâimana za'ra mono õ di oto.

⁶ Tahawa, 're idanhotõ za'ra mono ne, wanhimiza'rese ãna 're wahâimana za'ra mono tõ da, wa za sô 're wanhopré u'âsi.

⁷ Bara na si te danhimiza'rese ãna hã 're danhotõ za'ra. Bara na si te duré âzézei'wa norĩ hã 're si'rãiwamnarĩ za'ra.

⁸ Tazahã, wa norĩ hã Wanhib'apito apâ we imorĩzéb zô, 're wanhimipari za'ra mono wa, wanhimi'ẽ na sô 're wanhopré mono sina, wa za 're wahâimana za'ra. Tawamhã wa za wasi'upari za'ra ni za, wanhitob'rui wi, Wanhib'apito wa te 're isaze za'ra mono zém na, duré 're iwanhimizawi pese za'ra mono zém na, duré Zezusi te te 're iwanho'reptu za'ra mono zéb zô, 're iwanhimipari za'ra mono zém na. Da'wapéi'wa norĩ hã, tinho'utu'u ihâtete na te 're si'uza za'ra. Te duré ti'rãzaza ihâ tete na 're si'rãzaza za'ra, tinhitob'rui wi, da te 'manhiptâ'â tõ da. Ãne na wa norĩ hã, Wanhib'apito wa te 're isaze za'ra mono zém na, duré 're wanhimizawi pese za'ra mono zém na, wa za 're wahâimana za'ra, wapẽ'ẽ wẽ te te wawi wasété tõ da, wanhitob'ru hã. Duré Zezusi te te 're iwanho'reptu za'ra mono zéb zô, 're iwanhimipari za'ra mono zém na, wa za 're wahâimana za'ra, wanhimirosa'rata na te te wawi 're ro'wa'rutu tõ za'ra mono da.

⁹ Tane tô. 'Re ihâimana u'âsi mono hã niha te te wama 're arob'manharĩ mono da, te te sima 're wa'awẽ mono õ di. Ma tô te te sima 're wa'awẽ, Wanhib'apito Zezu Cristu hã te te 're wa'anho'reptui mono da si.

¹⁰ Ta hã ma tô wazada tidâ'â za'ra, i'rata 're wasi'ubumroi mono da. Tawamhã apâ wei wazô morĩ wapsi, wahâiba ré 're iwanomro mono norĩ hã, wawana 're idadâ'â za'ra mono norĩ me, wa za i'rata wasiré 're wasi'ubumroi u'âsi.

¹¹ Tahawa, te za 're asipawaptob za'ra wa'aba mo, aipẽ'ẽ wẽ za'ra wa'aba na asiptete sina 're aihâimana za'ra wa'aba mono da. Tô sena na ãhã na hã ãma 're asipawaptob za'ra wa'aba mono ne, te za duré ãma 're asipawaptob u'âsi za'ra wa'aba mo, õne u'âsi.

'Re idanomro wẽ mono zéb da na roti wasu'u

¹² Wasiré isazei'wa norĩ, wa aima roti za'ra wa'aba ni, te te aima 're iromhuri za'ra wa'aba mono norĩ hã 're wazéb za'ra wa'aba mono da. Ta norĩ hã, Wanhib'apito ma romhuri'wa norĩ. Tahawa, te za marĩ hã iwẽ si te te aima 're wẽ za'ra wa'wa. Duré timreme wẽ na si te za aima te te 're roti za'ra wa'wa. Tawamhã ta norĩ mreme, te za 're iwapari pese za'ra wa'aba mo.

¹³ Ta norĩ hã te te aima 're romhuri pese za'ra wa'aba mono wa, te za 're iwazéb za'ra wa'aba mo. Te za duré 're isawi pese za'ra wa'aba mo. Asima 're aimreme wasété za'ra wa'aba mono ãna, te za asiré 're aihâimana za'ra wa'aba mo, rowẽ na si.

¹⁴ Wasiré isazei'wa norĩ, wa za duré aima roti za'ra wa'aba ni. Ni'wam norĩ hã 're wa'a za'ra mono wamhã, te za tãma 're iroti pese za'ra wa'aba mo, simi'ẽ na si'uihâ na te te tô sima 're romhuri za'ra mono da. Duré ni'wam norĩ hã robzei ãna 're hâimana za'ra mono wamhã, te za tô duré 're ipawaptob za'ra wa'aba mo, robzei'õ u'âsi 're nomro mono tõ da. Duré ni'wam norĩ hã, 'Re ihâimana u'âsi mono zadawa wasu'u te te waihu'u za'ra nherẽ, iwẽ na si 're nomro tõ mono da, te te sima 're rosa'rata za'ra mono õ wamhã, te za 're ipawaptob za'ra wa'aba mo. Da'ãma 're aiwa'a za'ra wa'aba mono õ di za. Aiwaimri te za 're aihâimana za'ra wa'aba mo, sada.

¹⁵ Ni'wai ma iwẽ'õ hã da te 'manharĩ wamhã, te za 're asipawaptob za'ra wa'aba mo, asa marĩ iwẽ'õ hã dama 're 'manharĩ za'ra wa'aba mono tõ da. Marĩ iwẽ'õ hã da te aima 're 'manharĩ za'ra wa'aba mono nherẽ, iwẽ na si te za 're asipawaptob za'ra wa'aba mo, asa tãma ãma 're wa'rãmi za'ra wa'aba mono tõ da. Iwẽ na si te za asima 're i'manharĩ u'âsi za'ra wa'aba mo, asiré isazei'wa norĩ ma. Uburé te za dama 're i'manharĩ wẽ u'âsi za'ra wa'aba mo, a'uwẽ mono bâ.

¹⁶ Ato sina, te za 're anomro u'âsi aba mo.

¹⁷ 'Re ihâimana u'âsi mono ma, te za 're aimreme zusi u'âsi aba mo.

¹⁸ Wẽ wa, te za ãma 're aiwata u'âsi za'ra wa'aba mo. Rowẽ na 're anomro aba mono wamhã, duré robzei'õ na 're anomro aba mono nherẽ, wẽ wa, te za tô ãma 're aiwata u'âsi za'ra wa'aba mo. Ãne na 're aihâimana za'ra wa'aba mono da, 'Re ihâimana u'âsi mono, ma tô aima pisutu za'ra wa'wa, Cristu Zezusihi nhib'a'uwẽ 're anomro aba mono wa.

¹⁹ 'Re ihâimana u'âsi mono pẽ'ẽzani nhimipawaptobzém na asiwi 're ro'wa'rutu za'ra wa'aba mono õ di za.

²⁰ Ni'wa hã, 'Re ihâimana u'âsi mono pẽ'ẽzani zarina, marĩ hã te te waihu'u wamhã, isimirowasu'u hã asiwi 're wẽ'õ za'ra wa'aba mono õ di za, taré newa.

²¹ Uburé marĩ hã te za niha hã 're ipibu za'ra wa'aba mo, iwẽ zô. Tawamhã marĩ iwẽ si te za asima 're itété za'ra wa'aba mo.

²² Uburé marĩ iwasédé hã te za asiwi 're iwẽ'õ pese za'ra wa'aba mo, iré 're anomro aba mono tõ da.

²³ 'Re ihâimana u'âsi mono wi, rowẽ nhomri'wai wi, wa wa te 're rowaptẽrẽ za'ra, te te 're aipawaptob za'ra wa'aba mono da, asimi'ẽ na isine, iwẽ na si ãma 're aihâimana u'âsi za'ra wa'aba mono da, duré uburé asimirosa'rata wẽ na si, 're aihâimana u'âsi za'ra wa'aba mono da. Wanhib'apito Zezu Cristu hã apâ wei wazô morĩ za'ra wapsi, te za iwẽ na si hã ai'madâ'â za'ra wa'wa za.

²⁴ 'Re ihâimana u'âsi mono hã tinhib'a'uwẽ da, te te 're i'aipisutu za'ra wa'aba mono hã, umnhasi uptabi wa, te za tô te te 're aipawaptob za'ra wa'wa, iwẽ na si 're anomro u'âsi aba mono da.

Rob'ui'éré 'rãsutu zé

²⁵ Wasiré isazei'wa norĩ, te za wa'ãma 're aimreme zusi aba mo, Wamama ma.

²⁶ Uburé asiré isazei'wa 're aihâimana za'ra wa'aba mono wa, te za asõ'utu na asisawi sina 're asitob'rata hârâ za'ra wa'aba mo.

²⁷ Wanhib'apito zadawa para, ĩmreme pire na wa aima nharĩ za'ra wa'wa, ã hã wa te aima irob'ui'éré za'ra wa'wa hã, dama 're sõré za'ra wa'aba mono da, isazei'wai mono bâ.

²⁸ Wanhib'apito Zezu Cristuhu wi, wa wa te 're rowaptẽrẽ za'ra, tinhimipawaptobzé hã te te aima 're sõmri za'ra wa'aba mono da, ai'ãma 're hâimana za'ra wa'aba mono da.