1 Tesalonita 4 - ꞌRe Ihâimana Uꞌâsi Mono Zadawa Wasuꞌu

'Re idanomro wẽ mono zéb zarina, 'Re ihâimana u'âsi mono, dama 're itoi mono zé wasu'u

¹ Wasisãnawã norĩ, wa tô aima waihu'u pari za'ra wa'aba ni, 're i'anomro wẽ wa'aba mono zéb da na, taha zarina, 'Re ihâimana u'âsi mono hã ai'ãma 're toi u'âsi za'ra wa'aba mono da. Taha zarina, te tô oto ãma 're anomro wẽ wa'aba mo. Ãhã na wa za duré aima roti pese za'ra wa'aba ni, 're anomro wẽ wa'aba mono zém nhipai u, asima 're sa'ẽtẽ za'ra wa'aba mono da, Wanhib'apito Zezusihi zadawa para.

² Taha zadawa para, wa te aima 're iroti za'ra wa'aba mono zé hã ma tô oto iwaihu'u pese za'ra wa'wa.

³ 'Re ihâimana u'âsi mono hã ma tô te te sima 're aiwẽ za'ra wa'wa, 're anomro wẽ wa'aba mono da, pi'õ norĩ, duré aibâ norĩ zama aihâiba na asiwi 're asimisaihuri si'uiwa za'ra wa'aba mono zé hã ai'ãma 're hâimana za'ra wa'aba mono tõ da oto.

⁴ Aibâ norĩ hã aimro si te za 're i'madâ'â za'ra wa'aba mo, aiwasédé hã 're 'manharĩ za'ra wa'aba mono tõ da.

⁵ 'Re irowasutu za'ra wa'aba mono zô si asima 're rob'ruiwapari za'ra wa'aba mono õ di za. Ta hã, isazei'õ'wa norĩ 're ihâimana za'ra mono zé, 'Re ihâimana u'âsi mono te te waihu'u za'ra õ wa.

⁶ Tane 're anomro aba mono õ di za. Isazei'wa norĩ hã, asisãnawã te 're anomro aba mo. Tahawa, asisãnawãi mro nherẽ, asiwi 're upi za'ra wa'aba mono õ di za, asiwi 're asimisaihuri za'ra wa'aba mono tõ da, aiwasédé hã duré asi'ãma 're 'manharĩ za'ra wa'aba mono tõ da. Tane, ni'wa hã tiwasédé te te 're 'manharĩ mono wamhã, 'Re ihâimana u'âsi mono hã te za niha tãma rob'manha. Ãne tô sena, wa tô aima waihu'u za'ra wa'aba ni, waihu'u pese za'ra wa'aba da. Tane nherẽ, wa duré ãma aima sahu za'ra wa'aba ni.

⁷ Aibâ norĩ, aimro hâiba upana aimawi pi'õ hã 're upi za'ra wa'aba mono õ di za. Duré pi'õ norĩ hã aimro hâiba upana aimawi aibâ hã 're upi za'ra wa'aba mono õ di za. Dahâimana nhiséb õ ré, 're wanomro mono da, 'Re ihâimana u'âsi mono te te sima 're wa'apisutu mono õ di. Wanhimi'ẽ na ãma 're wanomro wẽ uptabi mono da si, ma tô te te sima 're wa'apisutu.

⁸ Tahawa, ãne wa te aima iroti za'ra wa'wa hã, asiwi wẽ'õ za'ra wa'aba õ di za. Ni'wa hã te te siwi wẽ'õ wamhã, e ta hã ti'ai ãma dahâiba te za siwi wẽ'õ. Mare di. 'Re ihâimana u'âsi mono te za siwi wẽ'õ, wama Tipẽ'ẽzani nhomri'wa hã.

⁹ Isazei'wai mono bâ 're asisawi pese za'ra wa'aba mono zém na, wa te aima rob'ui'éré za'ra wa'aba õ di za oto. Tô sena ma tô 'Re ihâimana u'âsi mono hã si'uihâ na ãma aima rowahutu za'ra wa'wa, 're asisawi pese za'ra wa'aba mono zéb da hã.

¹⁰ Ma tô 're idazawi pese za'ra wa'aba mo tô, Masédonia na danhipti'a nho'õmo nhisi ãma 're idasi'ubumroi mono norĩ hã, 'Re ihâimana u'âsi mono te te 're isaze za'ra mono norĩ hã. Tane nherẽ, wa aima roti pese za'ra wa'aba ni, asimizawi pese zém nhipai u, asima 're sa'ẽtẽ za'ra wa'aba mono sina, iwẽ uptabi hã 're 'manharĩ za'ra wa'aba mono da.

¹¹ Ai'rata wasi'ubumroi wa'aba ré, ãne wa tô aima roti za'ra wa'aba ni, rowẽ na si 're aihâimana za'ra wa'aba mono da, duré asima 're ropibui wẽ za'ra wa'aba mono da, duré asimi'ẽ na asi'uihâ na aihâimanazéb da, 're romhuri za'ra wa'aba mono da, aihâiba mono bâ wa'aba. Ãne, wa tô aima roti za'ra wa'aba ni. Ãne iwẽ uptabi hã te za tô 're i'manharĩ u'âsi za'ra wa'aba mo.

¹² Tawamhã danho'a 're anomro wẽ wa'aba mono wa, isazei'õ'wa norĩ hã te za te te 're aiwẽsãmri za'ra wa'wa. Te za duré te te oto 're aiwazéb za'ra wa'wa. Duré asimi'ẽ na 're romhuri za'ra wa'aba mono wamhã, 're dawari za'ra wa'aba mono ãna, te za 're anomro aba mo.

Uburé Danhib'apito Zezu Cristu apâ za we imorĩzé wasu'u

¹³ Wasisãnawã norĩ, ni'wa hã 'Re ihâimana u'âsi mono zazei'õ'wa, dawi dâ'â wamhã, te za isiré norĩ hã ãma 're pẽ'ẽzé pese za'ra, apâ 're idahâiwa'utu za'ra mono zé wasu'u hã te te 're waihu'u za'ra mono õ wa. Tanei õ di za, a norĩ wa'wa hã. Tahawa, wa wasima wẽ za'ra ni, sena na waihu'u za'ra wa'aba da, dadâ'â wasu'u hã.

¹⁴ Zezusi hã ma tô dârâ. Ma tô pẽ'ẽhai'utõ. Pẽ'ẽ si'utõrĩ nherẽ, ma tô apâ hâiwa'udu. Ãhã na te oto 're morĩ u'â. Ãne na hã wa tô saze za'ra ni. Tahawa, wa tô duré waihu'u za'ra ni, isazei'wa norĩ hã 're dâ'â za'ra mono wamhã, apâ 're ihâiwa'utu za'ra mono zém na hã. 'Re ihâimana u'âsi mono hã te za apâ te te 're ahâiwa'utu, Zezusi te te apâ ihâiwa'utu ne.

¹⁵ Tawamhã Wanhib'apito we apâ wazô morĩ za'ra wamhã, ãté wa norĩ hã zahadu wahâiba ré 're wanomro mono ré, te za wei mo. Tawamhã 're idâ'â za'ra mono norĩ wana, itẽme wasihutu õ di za. Ãne Wanhib'apito te te wama irowahutu za'ra zarina, wa aima rowasu'u za'ra wa'aba ni.

¹⁶ Tô sena, Wanhib'apito hã te za wei wazô si'ra za'ra, hâiwa hawi. Tawamhã te za tãma wa'ru za'ra, hâiwa ãma tãma iromhuri pese 'wai ma. Hâiwa ãma tãma iromhuri pese 'wa hã, te za wei hâ, hârâ 'rãihâ na, 'Re ihâimana u'âsi mono nhimnhihârâzém na. Tawamhã isazei'wa norĩ hã 're idâ'â za'ra mono norĩ hã, te za uimrehẽne apâ hã hâiwa'utu za'ra za.

¹⁷ Tawamhã wa norĩ hã isazei'wa norĩ, zahadu wahâiba ré 're iwahâimana za'ra mono norĩ hã, apâ ihâiwa'utu za'ra norĩ me, te za sitẽme wa'ubumro awa'awi, hâiwa'a ãma. Tawamhã Wanhib'apito ãhã wamhã wa za oto aihĩni sõpẽtẽ za'ra ni, hâiwa nho're ãma. Tawamhã i'rata wa za oto 're wahâimana u'âsi za'ra.

¹⁸ Ãne te za iwasu'u na 're asipawaptob u'âsi za'ra wa'aba mo.