1 Tesalonita 3 - ꞌRe Ihâimana Uꞌâsi Mono Zadawa Wasuꞌu

Timotiu hã isazei'wa norĩ ma rowẽ zô, Tesalonita u imorĩzé wasu'u

^1-3 Tawamhã ai'ãma wapẽ'ẽzé uptabi za'ra wa'aba wa, apâ wasi'aba'rézéb zô wanhimipari waihu'u za'ra õ di oto. Tahawa, wa tô wasisaze za'ra ni, Timotiu hã wa te ãma atẽme satõrĩ za'ra wa'aba da, wa hã ĩsiwaprosi Atena na 'ri nho'õmo nhisi ãma ĩnhamra da nherẽ. Tawamhã wa tô ãma atẽme satõrĩ za'ra wa'aba ni, Timotiu hã. Ta hã wasiré isazei'wa, 'Re ihâimana u'âsi mono ma romhuri'wa, Cristuhu wasu'uwẽ na te te dama 're irowasu'u mono, wasiré. Tahawa, wa tô atẽme satõrĩ za'ra wa'aba ni, te te 're aipawaptob za'ra wa'aba mono da, aihâimana nhiptete sina 're sazei pese za'ra wa'aba mono da, iwasu'uwẽ hawi apâ 're aipizari za'ra wa'aba mono tõ da, da te ai'ãma 're rowasété pese za'ra wa'aba mono nherẽ. A norĩ wa'aba ma hã aima waihu'u pese za'ra wa'aba di, 'Re ihâimana u'âsi mono nhimipisutu zarina, da te wa'ãma 're rowasété za'ra mono wa, wa te 're irobzépata za'ra mono na hã.

⁴ Ãne na wa tô iwana aima rowaihu'u siromo za'ra wa'wa, ai'rata wasi'ubumroi wa'aba ré, za da te wama 're irob'manharĩ pipa za'ra mono zém na hã. Ãhã na, tô sena na ma tô asina iwaihu'u za'ra wa'wa, tô wa'ãma 're romhâimana za'ra mono wa.

⁵ Tahawa, asada 're dazahi za'ra wa'aba mono wa, apâ ãma atẽme ĩmorĩ aba neza, 're isazei'õ utõrĩ za'ra wa'aba mono zé hã te aiwi waihu'u za'ra wa'aba da. Tahawa, Timotiu hã wa tô ãma atẽme satõrĩ za'ra wa'wa, apâ te te we wama aiwasu'u za'ra wa'aba 'wa da hã. Wa'uburé hã dawasété da, dawada'uri'wa hã te te aipibu za'ra wa'aba wa, 're saze zahâri za'ra wa'aba mono õ'umnhasite, wa tô ai'ãma 're ĩhâtâ'â za'ra wa'wa. Aima wanhimiromhuri za'ra wa'wa hã taré 're hâimana mono õ'umnhasite, wa tô ãma atẽme satõrĩ za'ra wa'wa Timotiu hã, te te aiwaihu'u za'ra wa'aba da.

Timotiu hã, rowasu'u wẽ Paulu norĩ ma, te te i'ãwisizé wasu'u

⁶ Tawamhã Timotiu hã ma tô we apâ watẽme tiwisi za'ra, aihawib za'ra wa'aba. Ma tô aiwasu'u wẽ za'ra wa'wa hã wei wama ãwisi za'ra. Ãhã wamhã, aiwasu'u wẽ za'ra wa'wa hã wa te wapari ze za'ra di. Cristu hã te, u, asina 're i'umnhasi pese za'ra wa'aba mo. Asimizawi pese za'ra wa'aba na te, u, 're anomro aba mo. Duré, iwẽ na si te, u, wa'ãma 're irosa'rata za'ra wa'aba mo. Iwazabu za'ra wa'aba da si, te, u, 're asimipari za'ra wa'aba mo. Ãne, aiwasu'u wẽ za'ra wa'wa hã, wa te wapari ze za'ra di. Tane tô, wa norĩ zama wa te asabu za'ra wa'aba neza. Wa duré sô mapari za'ra ni aré, wa te i'asabu za'ra wa'aba zéb zô hã.

⁷ Wasisãnawã norĩ, da te wa'ãma 're rowasété za'ra mono nherẽ, duré marĩ ipire na wa te 're robzépata za'ra mono nherẽ, 'Re ihâimana u'âsi mono zadawa wasu'u hã 're sazei pese za'ra wa'aba mono wa, wa tô apâ pẽ'ẽ daba'wara pese ni.

⁸ Ãne wa, wahâtâ'â ãna wa oto 're wahâimana za'ra apâ, Wanhib'apito ãma asiptete sina ãma 're anomro aba mono wa.

⁹ Tahawa, wa oto Wanhib'apito 'Re ihâimana u'âsi mono ãma 're wawata u'âsi za'ra, isõ'a, wama 're robze zani za'ra wa'aba mono wa, Zezusi hã asina 're i'umnhasi pese za'ra wa'aba mono zém na hã.

¹⁰ Awẽ sidâpâsi, wa wanhimi'ẽ na tãma 're wamreme zusi, bâtâ na bara na zama, ta hã te te wama pisutu za'ra da, nimahã na ãma atẽme za'ra wa'aba iwasi'aba'rézéb da hã, 'râwi wasisabu za'ra da apâ, duré zahadu iwaihu'u za'ra wa'aba õ hã, wa te aima waihu'u za'ra wa'aba da, 're isazei uptabi za'ra wa'aba mono zéb da hã.

¹¹ Wanhib'apito 'Re ihâimana u'âsi mono wi, Wamama wi hã, duré Wanhib'apito Zezusihi wi hã, wa wa te 're rowaptẽrẽ za'ra, te te wama ropese za'ra da, apâ wasihutu da, atẽme wa'aba.

¹² Tô sena ma tô 're asisawi pese za'ra wa'aba mo. Uburé ma tô duré 're idazawi pese za'ra wa'aba mo. Tane tô, wẽ di. Tahawa, wa duré wa te tiwi 're rowaptẽrẽ za'ra, Wanhib'apito wi, te te 're aipawaptob za'ra wa'aba mono da, awẽ sidâpâsi asimizawi pese za'ra wa'aba zé hã, te te aima 're sa'ẽtẽ za'ra wa'aba mono da. Sa'ẽtẽ na, wa te 're i'asawi pese za'ra wa'aba mono zém ne, aiwa sa'ẽtẽ na 're dazawi pese za'ra wa'aba mono da, wa wa te tiwi 're rowaptẽrẽ za'ra.

¹³ Tawamhã taha na te za te te 're aipawaptob u'âsi za'ra wa'wa, aihâimana nhiptete za'ra wa'aba sina, iwẽ uptabi na si ãma 're anomro aba mono da. Tawamhã Wanhib'apito Zezusi hã, uburé tinhib'a'uwẽ norĩ me, wei wazô si'aba'réi wapsi, asi'wa'rutu za'ra wa'aba ãna te za isõ'a aimasa wa'wa, Wamama 'Re ihâimana u'âsi mono nho'a.