1 Samuéu 9 - ꞌRe Ihâimana Uꞌâsi Mono Zadawa Wasuꞌu

Sau hã Samuéu te te isõpẽtẽzé wasu'u

¹ Tawamhã aibâ Quisi na isisi te 're hâimana, Bẽzamihĩ nhihudu hã. Ta hã Abi'éhé 'ra, duré Zeroho nhihudu, duré Becuratihi 'ra nhihudu, duré Api'asihi 'ra 'ra nhihudu. Tawamhã Quisi hã sibro pese di, duré dama pire na 're ihâimana mono.

² Tawamhã taha 'ra aibâ iprédupté iwẽ uptabi, isisi hã Sau. Izaraéu nhihudu norĩ 'remhã taha nhipai u iwẽ uptabi hã 'maihâimana õ di. Duré uburé nhipai u te te sina irowabzu. Tahawa, Izaraéu nhihudu norĩ wa'wa hâimana wamhã, te za sisé watobro danhipai u, 'rãihâ wa.

³ Tawamhã awaru po'repore sipi'õ, Quisi Sauhu mama te hã ma tô aimani za'ra. Tahawa, te Sauhu ma tinha ãne, imama hã: — Ĩ'ra, ma'ãpé ãma asiré saprõni, wama romhuri'wa hã, taha me sô airĩtĩ aba mono da, awaru po'repore sipi'õ isimani za'ra zô.

⁴ Tawamhã ãne imama te te tãma waihu'u wa, ma tô oto tineb zahuré Sau norĩ hã uburé te te sô rowaimrami zahuré mono da, Efraĩ nhihudu norĩ nhipti'a na ẽtẽ 'ratamhã, duré Sarisa na romnhisi ãma ti'a na. Tane nherẽ, te te anhopẽtẽ zahuré õ di, awaru po'repore sipi'õ hã. Tahawa, ma tô sô rĩtĩ zahuré, Sa'arĩhĩ na romnhisi ãma. Tane nherẽ, tamemhã duré robaba di. Tawamhã Bẽzamihĩ nhihudu norĩ nhipti'a na ma tô duré sô rĩtĩ zahuré. Tane nherẽ, tamemhã te te duré anhopẽtẽ zahuré õ di, taré ma ro ãma wazere zahuré.

⁵ Tawamhã Zupi na romnhisi ti'ai u oto zasi wamhã, ma tô Sau hã tãma tinha, tite zahuré romhuri'wai ma hã ãne: — Oto wane na apâ 'ri u. Ĩmama hã hâtâ'â dai õ di awaru po'repore sipi'õ norĩ ãma hã. Wa'ãma si te za hâtârâ, apâ wasimasisi su'u õ wa.

⁶ Tawamhã romhuri'wa ma tô ãma tãma wa'rã ãne: — A'âza pé. Ã hã 'ri nho'õmo ãma hã te aibâ hã 're sãmra, 'Re ihâimana u'âsi mono ãma si 're imorĩ hã. Ta hã dama iwazéb za'ẽne, uburé marĩ na te te 're inharĩ mono zéb zarina, marĩ hã 're hâimana mono wa. Tahawa, oto itẽme wane na, wa te tãma wasu'u da. Tawamhã ãté ta hã te za wama wasu'u za awaru po'repore sipi'õ norĩ za wa te isõpẽtẽzéb da hã.

⁷ Tawamhã te Sau sadanha ãne: — Tawamhã bété itẽme wane wamhã, e marĩ, wa za tãma âri ni za tawamhã. Wasa hã tâibâ wanhimiro'wapézéb 'remhã. Marĩ õ di, wa te tãma isõmri da hã. E marĩ wa za tãma sõmri ni.

⁸ Tawamhã romhuri'wa hã ma tô ãma tãma wa'rã ãne: — Ĩte iré hã surure na ẽtẽ waipo prã prata hã za te tãma sõmri wa, te te wama iwasu'uzéb da hã, awaru po'repore isimasabzé hã.

^9-11 Tawamhã Sau ma ãma sada'â ãne: — Wẽ di tô, iwaihu hã. Tane wamhã, oto wane na pé. Tahawa, ma tô oto tineb zahuré, aibâ 'Re ihâimana u'âsi mono ãma si 're imorĩ 're ihâimana mono zéb u hã. Tawamhã oto 'ri nho'õmo tẽme sõ'a na neb zahuré ré, ma tô ni'wam norĩ azarudu hã sõpẽtẽ za'ra bâdâdi wa, â te te amrami za'ra da, isi'aba'ré hã. Tawamhã Sau norĩ hã ma tô sadanharĩ za'ra ãne: — E aibâ hã te 'ri nho'õmo ãma 're sãmra, sõtõ 'rowim ne marĩ 'madâ'â'wa hã. (Duréihã ni'wa hã 'Re ihâimana u'âsi mono te te sadanharĩ da, te te sima wẽ wamhã, te za tinha ãne, tisiré ma hã: “Oto wane na, sõtõ 'rowim ne marĩ 'madâ'â'wai u, wa te wasima rowasu'u za'ra da.” E marĩ wa, ma tô ãne hã te te sima 're 'manharĩ za'ra. Duréihã 'Re ihâimana u'âsi mono zadawa 'mahârâ'wa norĩ hã sõtõ 'rowim ne marĩ 'madâ'â'wa na da te 're sisi za'ra mono wa.)

¹² Tawamhã azarutu norĩ hã ma tô ãma sada'âbâ za'ra ãne: — Ĩhe. Ãme te nhamra. Õhõta te oto mo aiwana wa'aba. Tahawa, ma'ãpé ai'aba'ré na ãma itẽme ane wa'aba. Ta hã ma tô we 'ri nho'õmo u hã ãzé, ã bâtâ na danhimizama zata na 'Re ihâimana u'âsi mono ma, za da te tãma sõmri za'ra wa, danhoprubzé hã, wedezane nhisiwimhã ẽtẽ ãma 're isa mono nhisiwimhã.

¹³ Tawamhã 'ri nho'õmo u azasi aba wi, te za isõpẽtẽ 'wa, sa da, sõ'a na zahadu morĩ õ ré, ẽtẽ nhisi u hã. Duré zahadu datẽme wisi õ ré, dasa na da te sãna'rata za'ra õ di. E tihai wa. Imorĩ'rata na za a'â danhimizama zata na 'Re ihâimana u'âsi mono ma, mreme wa. Taha parip si te za tisaihu, sô idahãsi norĩ hã. Tahawa, sa'ẽtẽ anep su'u aba, sõpẽtẽ aba hâ.

¹⁴ Tawamhã te oto tineb zahuré, 'ri nho'õmo u. Tawamhã oto zasi zahuré wi, ma tô Samuéu 'madâ'â zahuré, sõ'a na morĩ ré, 'Re ihâimana u'âsi mono ãma 're idawata za'ra mono zéb u.

¹⁵ Sau iwisizé bâtâ wana ré, ma tô Samuéu ma hã waihu'u, Uburé Danhib'apito hã ãne:

¹⁶ — Awẽmhã tô ãne bâtâ na wa za we aibâ hã atẽme satõ, Bẽzamihĩ nhihudu hã. Tawamhã a hã te za i'rãti za ĩnhib'a'uwẽ Izaraéu nhihudu norĩ te, i'rãnho'õmo da hã. Duré ta hã te za Izaraéu nhihudu norĩ hã anho'reptu, filisteu norĩ nhiptetezé wi hã. E marĩ wa. Wa hã wa tô te 're 'madâ'â, ĩnhib'a'uwẽ te te 're irobzépata za'ra mono zé hã. Duré wa tô te 're wapari za'ra, te 're pawaptob za'ra mono da, te te ĩwi 're irowaptẽrẽ za'ra mono zé hã.

¹⁷ Tawamhã Samuéu, Sau te te 'madâ'â wamhã, ma tô Uburé Danhib'apito hã tãma tinha ãne: — Õ hã aibâ na wa aima tinha. Õ hã te za ĩnhib'a'uwẽ norĩ ma si'ĩ'rãnho'u.

¹⁸ Tawamhã Sau ma tô oto sõpẽtẽ Samuéu hã, 'ridawa za'ẽtẽ 'rata. Tawamhã te sadanha ãne: — Ĩzawi na hã ĩma wasu'u na. E mame te aibâ hã nhamra, sõtõ 'rowim ne marĩ 'madâ'â'wa hã.

¹⁹ Tawamhã Samuéu ma asa ãma sada'â ãne: — Wa hã ĩnhotõ 'rowim ne marĩ 'madâ'â'wa. Mo oto ĩnhowa ane wa'aba, 'Re ihâimana u'âsi mono ãma 're idawata za'ra mono zéb u. Ãhã na a norĩ wa'wa hã te za ĩme asai wa'wa, ã mara na hã. Duré awẽ mararé si wa za ãma asada'âbâ 'wa, uburé ĩzadanharĩ aba mono zém na hã. Taha parip si te za apâ ane wa'wa.

²⁰ Aihâtâ'â aba tõ awaru po'repore sipi'õ isimani za'ra ãmamhã, si'ubdatõ bâdâ ãma ineb za'ra na hã. E marĩ wa. Ma tô sõpẽtẽ za'ra ni. Tazahã e 'wa hã ma tô bété Izaraéu nhihudu norĩ hã sima wẽ za'ra. A hã ma tô sima aiwẽ za'ra. Duré aimama hawi a'uwẽ norĩ zama te tô sima aiwẽ zahi za'ra.

²¹ Tawamhã Sau ma tô ãma tãma wa'rã ãne: — Wa hã Bẽzamihĩ nhihudu. Bẽzamihĩ nhihudu norĩ nhipti'a hã, uburé Izaraéu nhihudu norĩ nhipti'ai ma surure di. Duré tô ĩmama norĩ hã tisiré Bẽzamihĩ nhihudu norĩ ma iwapure. Tawamhã e marĩ da, te ãne na hã ãma ĩma inha.

²² Tawamhã ãne na tãma siwasu'u wa, te oto Samuéu hã saprõni zahuré Sau norĩ hã, tite romhuri'wai me, 're idasaihuri mono zéb u. Tawamhã ma tô tãma nharĩ zahuré simasisi da, dasimasisizé ipire ãmamhã, dame sa zahuré da, 30 na dahâiba na sô idahãsi norĩ siré.

²³ Tawamhã Samuéu te tãma tinha oto ãne, api'wai ma hã: — We âri romnhi wa'õno hã, te aré aima isõmri hã, ĩza hiri da.

²⁴ Tawamhã api'wa iza nhi romnhi iwẽ uptabi hã ma tô ti'â. Te te âri wamhã, ma tô tihi, Sauhu nho're. Tawamhã Samuéu te tãma tinha ãne: — Ãhãta romnhi, da te asô ihiri. 'Rẽne, 'rẽne da, da te asô ihiri wa, dazô ĩhârâzé bâtâ 're wa. Ãne ma tô tawamhã Sau hã tisa, Samuéu siré hã.

²⁵ Tawamhã sa zahuré pari, ma tô oto tineb zahuré apâ, ẽtẽ nhisi ãma 'Re ihâimana u'âsi mono ãma 're idawata za'ra mono zém hawimhã, 'ri nho'õmo u. Tawamhã Samuéu ma tô tãma waptâ, Sauhu ma, 'ri nhisi hâbâ hâimo ãma.

²⁶ Tawamhã ma tô tame oto nhono. Tawamhã Samuéu awẽ u ma tô sai'u, 'ri nhisi hâpâ u. Te 'mahâ, ãne Sau hã: — Ai'utu, aimorĩ hâ. Wa hã wa za a'â asiré mo, suru na. Tahawa, ma tô oto Sau hã udu. Tawamhã ma tô Samuéu siré watobro, 'ri nhi'riti u hã.

Samuéu, Sau hã te te i'rãti'izé wasu'u

²⁷ Tawamhã 'ri nho'õmo hawi 're idawairébé mono zéb u oto simasisi wamhã, ma tô Samuéu hã tãma tinha ãne, Sauhu ma: — Ma'ãpé tãma rob'ru na, aima romhuri'wai ma, asõwa morĩ da. Tawamhã a hã te za ãme a'â aihâiba za isa'u. Tawamhã tãma iromhuri'wa hã ma tô isõwamhã mo. Oto morĩ za'usi, te Samuéu, Sauhu ma tinha ãne: — Wa hã 'Re ihâimana u'âsi mono mreme, te aima iwasu'u da hã te ĩma tihâiba.