1 Samuéu 8 - ꞌRe Ihâimana Uꞌâsi Mono Zadawa Wasuꞌu

Izaraéu nhihudu norĩ, tite da, apito te te siwi iwaptẽrẽzé wasu'u

¹ Tawamhã Samuéu si'ihi wamhã oto, ma tô ti'ra norĩ hã pisutu zahuré, Izaraéu nhihudu norĩ ma rowairébé'wa na 're hâimana zahuré mono da.

² I'ra idub'rata nhisi hã ãne, Zuéu na, duré ino nhisi hã ãne, Abi'asi na. Ta norĩ hã da'ãma rowairébé'wa Beseba na 'ri nho'õmo nhisi ãma.

³ Tane nherẽ, i'ra norĩ hã timama hâimanazém na 're hâimana zahuré mono õ di. Ma tô rob'uiprazém na si te te sima 're rosa'rata zahuré, taha na si 're hâimana zahuré mono da. Rob'uiprazé pi'uriwi te te dawi 're i'awaibu zahuré mono wa'rãmi, ma tô duré te te dama 're rowairébé zahuré. Tahawa, duré i'uwaibaba na te te dama 're arowairébé zahuré mono õ di.

⁴ Tahawa, uburé Izaraéu nhihudu norĩ ma i'rãnho'õmo za'ra norĩ hã ma tô si'rã'õtõ. Tawamhã ma tô ai'aba'ré Rama u, Samuéu tẽme, te te tãma nharĩ za'ra da.

⁵ Itẽme sihutu wamhã, te ãne tãma nharĩ za'ra: — A hã ma tô aihâiba prédu pe oto. Duré ai'ra norĩ hã aihâimanazém na 're hâimana zahuré mono õ di. Tahawa, te za a hã wama i'maipisutu za'ra, wama isi'apito da hã, te te 're wa'a'madâ'â mono da, ti'ai wa'õtõ nho'õmo amoi ãma apito da te 're iséme mono ne.

⁶ Tane nherẽ, Samuéu ma hã wẽ õ di, te te tiwi iwaptẽrẽ za'ra zé hã. Tahawa, ma tô tãma mre, Uburé Danhib'apito ma.

⁷ Tawamhã ãne ma tô ãma sada'â, tãma imremezém na 'Re ihâimana u'âsi mono hã: — Te za ãma isada'âbâ za'ra, Izaraéu nhihudu norĩ te te aiwi irowaptẽrẽ za'ra na hã. Duré aiwétési te te siwi aiwẽ'õ õ di. Ĩzama ma tô duré siwi ĩwẽ'õ, Tinhib'apito za'ra na hã.

⁸ Ezitu hawi wa hã te isani za'ra hawim haré ma tô õne u'â ĩwi 're sipizari za'ra, aimawi ihâiba'õ norĩ ãma si 're wata za'ra mono da. Tahawa, ãhã na hã ma tô duré aima rob'manharĩ za'ra, õne u'â te te ĩma 're irob'manharĩ za'ra mono ne hã.

⁹ Tahawa, ma'ãpé ãma saze za'ra na te te aiwi irowaptẽrẽ za'ra zém na hã. Tane nherẽ, po're pu'u za'ra na Izaraéu nhihudu norĩ hã. Duré ãma tãma rowasu'u pese za'ra na, za niha apito te te 're i'madâ'â za'ra mono zém na hã.

¹⁰ Tawamhã Samuéu hã ma tô ãma tãma rowasu'u za'ra, Izaraéu nhihudu norĩ ma Uburé Danhib'apito te te tãma iwaihu'uzéb zarina.

¹¹ Tawamhã te tãma rowasu'u za'ra ãne: — Ãne te za apito hã aima 're ihâimana za'ra wa'aba mono hã te te 're romhuri za. Ai'ra norĩ wa'wa hã te za awaibu, dasi'wapéi 'manharĩ'wa da hã. Te za duré ni'wam norĩ hã waibu, tite wedewara zapore na dasi'wapézém na isisa'rei mono da hã, ihâiba amo norĩ awaru na isisa'rei mono da hã, duré wedewara zapore na dasi'wapézém nhowa za isisa'rei mono da hã.

¹² Tawamhã te za awaibu za miu na danhib'ihâ'a da hã, duré 50 na danhib'ihâ'a da hã. Tawamhã te za duré awaibu, tite buru na te te 're iromhuri za'ra mono da hã, duré tãma 're 'rã za'ra mono wa, te te 're itehâri za'ra mono da hã. Duré umnhi'ãsi 'manharĩ na te te 're irob'ma'wamarĩ mono da hã te za duré awaibu.

¹³ Tawamhã ai'ra sipi'õ norĩ hã te za apisutu, dasisadazezé 'manharĩ na te te 're romhuri za'ra mono da apito ma, duré isipi'wa na, duré i'u'ẽtẽ 'manharĩ na.

¹⁴ Tawamhã te za duré aiwi waibu za'ra wa'wa, ti'a na rob're iwẽ norĩ hã, uwa'ru na rob're iwẽ norĩ hã duré oriwera wede na rob're iwẽ norĩ hã uburé tite romhuri'wa norĩ ma, te te 're sõmri za'ra mono da.

¹⁵ Tawamhã ta norĩ hã amnho 10 na te te itehâri za'ra mono wasi hã tãma 're isimi'wara mono hã duré uwa'ru 'rã norĩ hã te za te te tãma 're sõmri za'ra, misi iwasisi na amnho teihi wasi hã, uwa'ru rã hã, tite da'madâ'â'wa norĩ ma hã, duré ihâiba amo tite romhuri'wa norĩ ma hã.

¹⁶ Tawamhã te za duré awaibu, aima romhuri za'ra wa'aba 'wa norĩ hã, powawẽ iwẽ uptabi norĩ hã, duré awaru po'repore iwẽ uptabi norĩ hã, te te tãma 're iromhuri za'ra mono da hã.

¹⁷ Tawamhã te za duré awaibu, asimizama za'ra wa'wa, 10 na simasa wamhã, misi si hã te za te te awaibu. Tawamhã tô a norĩ wa'wa hã te za aipawa'âbâ ãna tãma 're iromhuri za'ra wa'aba mo.

¹⁸ Tawamhã ãne asib'apito za'ra wa'wa hã marĩ te te aima pisutu za'ra wa'aba wamhã, isimirob'manharĩzé te, te za a norĩ wa'wa hã 're ai'ru'ru wa'aba mo, apito asiwi ipisutu za'ra wa'aba nhimi'manharĩzé te. Tane nherẽ, Uburé Danhib'apito hã te te iwapari da hã mare di za, tãma i'aiwapsari za'ra wa'aba zé hã.

¹⁹ Tane nherẽ, te te ãma saze za'ra õ di Izaraéu nhihudu norĩ hã ãne na Samuéu te te ãma ipo're pu'u za'ra zém na hã. Tahawa, ma tô ãne tãma nharĩ za'ra, iwa'rãmi: — Mare di. Apito si wa tô wasima wẽ za'ra ni.

²⁰ Daza'ru ihâiba amoi ãma wasiré a'uwẽ õ norĩ te ne hã apito wama 're 'maihâimana mono da hã, wa wasima wẽ za'ra ni, te te 're wa'a'madâ'â mono da, duré dasi'wapéi wa, te te 're wa'anhimroi mono da, te te duré wama 're da'a'wapéi mono da hã.

²¹ Tawamhã Samuéu ãne na da te tãma inharĩ za'ra zé hã te te wapari pari, ma tô 'Re ihâimana u'âsi mono Uburé Danhib'apito ma hã tãma wasu'u uburé.

²² Tahawa, ma ãma sada'â ãne, 'Re ihâimana u'âsi mono hã: — Tãma 'manharĩ za'ra na tô, Izaraéu nhihudu norĩ te te sima iwẽ za'ra zéb zarina. Duré tô tãma sõmri za'ra na, apito hã. Taha pari, ma tô Samuéu hã tiwi waptẽrẽ za'ra Izaraéu nhihudu norĩ si'aibâ norĩ wi, apâ si'aba'ré da, tinhorõwa za'ra u hã.