1 Samuéu 31 - ꞌRe Ihâimana Uꞌâsi Mono Zadawa Wasuꞌu

Sau norĩ, ti'ra norĩ me isi'utõrĩzé wasu'u

¹ Tawamhã filisteu norĩ hã ma tô Izaraéu nhihudu norĩ hã 'wapé za'ra ẽne Ziuboa na isisi ãma. Tahawa, ma tô Izaraéu nhihudu norĩ hã ahâ na uprosi ni, tame. Ni'wam norĩ si ma tô dawi aimani za'ra.

² Tawamhã filisteu norĩ ma tô Sau norĩ wi i'ra norĩ me hã, tiwi atob za'ra. Tawamhã ma tô Zonata hã siwi tiwĩ, Abinadabi hã, duré Ma'uquisua hã.

³ Tawamhã Sau mana wawi, filisteu norĩ hã si'wapé za'ra wamhã, ma tô tisi'wapézé hã te te 'rãza'a u'âsi za'ra. Tahawa, Sau hã ma tô ibu na hã siwi hâzu. 'Wa're ahâ uptabi di duré ibu na hã.

⁴ Tawamhã Sau ma tô tãma isimnhi'ãsi 'wapéi'wai ma tinha ãne: — Ma'ãpé ĩzada wazere ate sib'ézé 'wapa hã ãma ĩwĩrĩ da, filisteu iwasété norĩ hã ĩ'ãma sima to za'ra tõ da, duré ta norĩ hã te te siwi ĩwĩrĩ tõ da. Tane nherẽ, isimnhi'ãsi 'wapéi'wa ma tô tipahi pese. Tahawa, te te sima wẽ õ di, ãne hã te te tãma i'manharĩ da hã. Tahawa, ma tô Sau hã tite sib'ézé 'wapa hã ti'â. Tawamhã si'uihâ na itẽme simei wa, ma tô oto 'râwi taha na sima apese.

⁵ Tawamhã tãma isimnhi'ãsi 'wapéi'wa, Sauhu dâ'âzé te te 'madâ'â wamhã, ma tô taha zama 'râwi si'uihâ na tite sib'ézé 'wapa u hã sime. Tawamhã taha zama, ma tô duré isiré dârâ oto.

⁶ Ãne ma tô Sau norĩ tidâ'â za'ra taha bâtâ na hã si'ubdatõ i'ra hâiba norĩ me hã, duré tãma isimnhi'ãsi 'wapéi'wa zama. Duré uburé Sauhu te dasi'wapéi 'manharĩ'wa norĩ zama ma uburé ai'utõ.

⁷ Tawamhã Izaraéu nhihudu norĩ Zezereu na ẽtẽ siwa'aba nhisi zara niwĩ 're ihâimana za'ra mono norĩ hã, duré panho'u Zodã pa zara niwĩ bâtâ pusizém niwĩ 're ihâimana za'ra mono norĩ zama, ma tô Izaraéu nhihudu norĩ dasi'wapéi 'manharĩ'wa isimani za'ra na hã waihu'u za'ra, duré Sau norĩ ti'ra norĩ me idâ'â za'ra na hã. Tahawa, ma tô tite za'ra 'ri'ahâ hã siwi tirẽ. Tawamhã ma tô filisteu norĩ hã itẽme zâmo, 'ri'ahâ wa iwa 're hâimana za'ra mono da.

⁸ Tawamhã dasi'wapé na bâdâ misi ãma morĩ pari, filisteu norĩ hã idâ'â za'ra norĩ nhibro hã te te siwi sani za'ra da, si'aba'réi wamhã, ma tô siwi tisã Sauhu hâiba hã, duré si'ubdatõ i'ra norĩ hâiba hã rere'e haré isimi'wara hã ẽne Ziuboa na isisi ãmamhã.

⁹ Tawamhã ma tô Sau hã siwi 'rã ta. Ma tô duré siwi waze, dasi'wapé da danho'utu ubuzé ihâ tede, te te sima 're izai mono hã. Taha parimhã ma tô duré siwi 'mazatõ, tinhipti'a za'ra u hã rowasu'u wẽ te te i'âri da hã, tite za'ra romhâibarĩ ma hã, duré uburé tinhib'a'uwẽ norĩ ma hã.

¹⁰ Romhâibarĩ na ãma 're iwata za'ra mono zé 'ri 'remhã, ma tô Sau nhimnhi'ã hã siwi sa'ra. Tawamhã duré Bete-Sã na 'ri nho'õmo nhisi ãma, ma tô 'ri'ahâ 'wawi wa'ra 'rãihâ na hã, ihâiba na ãma siwi romnhiptâ'â hâiwi sa'o da.

¹¹ Tawamhã Ziliadi ti'ai 'remhã Zabesi na 'ri nho'õmo nhisi ãma 're ihâimana za'ra mono norĩ hã filisteu norĩ Sauhu ma te te i'manharĩ za'ra zém na te te waihu'u za'ra wamhã,

¹² ma tô isiti'ru norĩ hã ta hawimhã wairé, te te ropãrĩ za'ra mono sina, sisõré pese na. Mara bâre te taha wamhã Bete-Sã u sihutu da hã sina mara 'rẽne za'ra. Tawamhã oto sihutu wamhã, ma tô siwi si'ra, Sauhu hâiba hã 'ri'ahâ 'wawi wa'ra hawimhã. I'ra norĩ hâiba zama ma tô duré siwi wamirĩ za'ra. Taha pari, ma tô apâ 'wasa, Zabesi u. Tawamhã tame ma tô ãma siwi sazu, ihâiba za'ra na hã.

¹³ Taha parimhã ma tô Sau hi hã i'ra norĩ hi me ãma dasiwi ti'a za'ra ni, 'ri'ahâ ãma, tãmara wede zahâpâ. Taha pari, ma tô dasai ãna hã tahâimana za'ra ni, 7 na bâtâ 'remhã.