1 Samuéu 29 - ꞌRe Ihâimana Uꞌâsi Mono Zadawa Wasuꞌu

Filisteu norĩ, Dawi te te siwi i'umnhasi'õzé wasu'u

¹ Tawamhã uburé filisteu dasi'wapéi 'manharĩ'wa norĩ hã ma tô si'rã'õtõ, Afeca na 'ri nho'õmo nhisi ãma. Taha ré, Izaraéu nhihudu norĩ hã ma tô sima 'ri nhoré za'ra, Zezereu na ẽtẽ siwa'aba nhisi ãma, u siromo 'rata.

² Tawamhã 5 na dama i'rãnho'õmo norĩ filisteu hã ma tô te te ropãrĩ za'ra mono sina, sisõré pese na ai'aba'ré tite dasi'wapéi 'manharĩ'wa norĩ ré, nima norĩ 100 na ãma sima isipo'o za'ra ré, duré nima norĩ miu na ãma sima isipo'o za'ra ré. Tahawa, Dawi tite aibâ norĩ ré ma tô isa'u za'ra mo, te te ropãrĩ za'ra mono sina, sisõré pese na, Aqui na isisi siré.

³ Tawamhã filisteu norĩ te dasi'wapéi 'manharĩ'wa norĩ 'madâ'â'wa hã ma tô ãne anharĩ za'ra: — E marĩ te hebreu norĩ hã ãmemhã 'manharĩ za'ra. Tawamhã Aqui ma tô ãma sada'âbâ za'ra ãne: — Ã hã Dawi, Izaraéu nhihudu norĩ nhib'apito ma romhuri'wa aré, Sauhu ma hã. Duré ma tô bâtâ ahâ na hã ĩsiré 're hâimana, Sau te te irẽme hawim haré. Tô ĩtẽme wisi hawim haré, marĩ hã te 'madâ'â õ di, te te i'manharĩ upazé hã, ĩwi.

⁴ Tane nherẽ, ãne te te tãma wasu'u za'ra wa, ma tô filisteu norĩ te dawada'uri'wa norĩ hã sada tizahi za'ra, Aquihi da hã. Tahawa, te ãne tãma nharĩ za'ra: — Ã hã aibâ apâ morĩ da te za isatõ za, 'ri'ahâ tãma isõmri u apâ morĩ da hã. Tãma rowairébé õ di za, dasi'wapéi u wame isébré za'ra da hã, wazada za'ra sipi'rai õ'umnhasite, dasi'wapéi ré hã. Tãma iwẽ hã tô aré, wate aibâ norĩ te te isimrozéb zarina, isib'ihâ'a te te iwẽsãmri da hã.

⁵ Dawihi ãmamhã ma tô pi'õ norĩ hã tinho're za'ra, si'rẽne za'ra sina ãne: “Sau hã ma tô dapã miu na. Dawi hã 10 miu na ma tô dapã”

⁶ Tawamhã Aqui hã ma tô sô hâ Dawihi zô. Tahawa, te ãne tãma tinha: — Uburé Danhib'apito idâ'â'õ nhisi na wa tô sena na ai'ãma waihu'u ãne: A hã sena na ma tô ĩma ai'umnhasi na ĩma 're aihâimana mo. Duré ĩma rowẽ uptabi di za, ĩsiré ai'wapéi wamhã, dasi'wapéi u hã. Niwamhã marĩ na i'upazém na hã te ai'madâ'â õ di, ĩtẽme aiwisizém hawim haré, ã bâtâ u hã. Tane nherẽ, filisteu dama i'rãnho'õmo norĩ ma hã aiwẽ za'ra õ di.

⁷ Tahawa, rowẽ na apâ aimorĩ za 'ri'ahâ u hã, marĩ hã 'manharĩ ãna, filisteu norĩ te i'rãnho'õmo norĩ hã, te te siwi aiwẽ'õ za'ra tõ da.

⁸ Tawamhã Dawi ma tô ãma sada'â ãne: — E marĩ te 'manharĩ bâ. Niwamhã a hã ĩzô irobaba na hã asimrami õ di, romhurizém na te aima isãna'ratazé bâtâ hawim haré. Ĩnhib'ihâ'a, duré ĩnhib'apito, ãne nherẽ, e marĩ wa bété, aime ĩmorĩ õ di za, asitob'ru norĩ te i'a'wapé da hã.

⁹ Tawamhã ma tô duré Aqui hã ãma sada'â ãne: — Wa hã tô tane hã ĩma waihu'u pese di, asimi'manharĩzé mono hã. A hã ĩma ai'umnhasi uptabi di, hâiwa ãma 'Re ihâimana u'âsi mono ma romhuri'wa ne hã. Tane nherẽ, dama i'rãnho'õmo norĩ hã ma tô nharĩ za'ra, wame aimorĩ za'ra tõ da, dasi'wapéi u hã.

¹⁰ Tahawa, awẽmhã te za duréi uptabi ai'utu za'ra wa'wa, Sau te te irẽme za'ra norĩ me ã hawi ai'aba'réi wa'aba da.

¹¹ Tawamhã ãne ma tô Dawi tisiré aibâ norĩ me hã ti'utu za'ra mararé uptabi, si'aba'ré da apâ, Filistéa na 'ri'ahâ nhisi u. Tahawa, filisteu norĩ hã ma tô ai'aba'ré, Zezereu u.