1 Samuéu 28 - ꞌRe Ihâimana Uꞌâsi Mono Zadawa Wasuꞌu

¹ Tawamhã nimahãna si ma tô filisteu norĩ hã si'rã'õtõ dasi'wapéi 'manharĩ'wa norĩ hã, Izaraéu nhihudu norĩ te te 'wapé za'ra da hã. Tahawa, te Aqui hã tãma tinha ãne, Dawihi ma: — Ma'ãpé niha waihu'u za: Te za ĩsiré i'a'wapé, ate dasi'wapéi 'manharĩ'wa norĩ ré.

² Tawamhã Dawi ma ãma sada'â ãne: — Marĩ õ di, wẽ di. Ãhãta wa hã wa ãme ĩhâiba, te i'aipawaptob da hã. Tahawa, te za i'madâ, za marĩ te i'manharĩzé iwaihu'u'õ hã. Tahawa, ma ãne Aqui hã ãma saze: — Wẽ di tô. Tawamhã te duré tãma tinha ãne: — A hã te za duré ĩ'madâ'â'wa na õne u'â ĩma 're aihâimana mo.

Sau hã adâ'â zadaihu'u'wa te te isadanharĩzé wasu'u

³ Tawamhã Samuéu dâ'â wamhã, ma tô uburé Izaraéu nhihudu norĩ hã sô ti'ru'ru. Ma tô duré ãma siwi ti'a, 'ri'ahâ Rama na isisi wa, ipotozéb ãma. Tawamhã Sau hã ma tô uburé adâ'â zadaihu'u'wa norĩ hã, satõrĩ za'ra Izaraéu nhihudu norĩ nhipti'ai hawimhã.

⁴ Tawamhã ma tô dasi'wapéi 'manharĩ'wa norĩ filisteu norĩ hã si'rã'õtõ, te te sima 'ri nhoré za'ra da, 'ri'ahâ Sune na isisi 'rata. Tahawa, Sau ma tô Izaraéu nhihudu norĩ hã duré 'rã'õtõ, te te sima 'ri nhoré za'ra da, ẽne hã Ziuboa na isisi ãma.

⁵ Tawamhã Sau hã dasi'wapéi 'manharĩ'wa filisteu norĩ hã te te 'madâ'â za'ra wamhã, ma tô tãma tipahi pese za'ra.

⁶ Tahawa, te Uburé Danhib'apito hã sadanha ãne: — Ĩnhib'apito, e marĩ, wa za 'manha. Tane nherẽ, 'Re ihâimana u'âsi mono hã te te ãma sada'âbâ õ di, sõtõ 'rowim na hã duré ẽne Urĩ na hã duré 'Re ihâimana u'âsi mono zadawa 'mahârâ'wa norĩ nhimirowasu'u na hã.

⁷ Tahawa, ma tô Sau hã tãma waihu'u za'ra, tizahâpâ romhuri'wa norĩ ma hã ãne: — Airĩtĩ za'ra wa'aba mono, pi'õ dazadaihu'u'wa hã te sadawa pibu da. Tawamhã ma ãma sada'âbâ za'ra ãne: — Te 're 'maihâimana, Ẽdo na 'ri nho'õmo nhisi ãmamhã.

⁸ Tawamhã Sau hã ma tô da'uza ihâiba amo na hã si'uza, da te hâiba waihu'u tõ da. Tawamhã robza'rã wamhã oto, ma tô maparane tizapari'wa norĩ me hã mo, tô õ hã pi'õ te te sadanharĩ da. Tahawa, te ãne tãma tinha: — Ma'ãpé ĩma sadawa pibu za'ra na 're idadâ'â za'ra mono norĩ hâiba warõ hã te te ĩma 'mairowasu'u da, za marĩ ĩhâimanazém na hã. Wa hã wa za aima 'maiwasu'u za aibâ nhisi hã. Tawamhã a hã te za ãma tãma i'mairob'ru, 're idâ'â za'ra mono hâiba warõ ma hã, ãma ĩtẽme te te i'mazai'uri da hã.

⁹ Tawamhã pi'õ, ma Sauhu ma ãma tãma wa'rã, ãne: — Tô sena aima waihu'u pese di, apito Sau marĩ te te i'manharĩzé hã: Ta hã ma tô Izaraéu nhihudu norĩ nhipti'ai hawi satõrĩ za'ra, dazadaihu'u'wa norĩ hã. E tiha da, ma tô danhimimramizém na ĩ'âri pibu da hã irosa'ra, apito zadawa para da te dasiwi ĩwĩrĩ da.

¹⁰ Tahawa, ma tô Sau hã Uburé Danhib'apito nhisi na ropisutu ãne: — Wanhib'apito 'Re ihâimana u'âsi mono, idâ'â'õ nhisi na wa aima ropisutu, ãne hã ĩma i'manharĩzéb zarina, za da te aima irob'manharĩ õ na hã.

¹¹ Tawamhã te pi'õ sadanha ãne: — E 'wa hã te asima iwẽ, te te ãma isai'uri da, te tãma i'manharĩ da hã, wa hã. Tawamhã ma tô ãma sada'â: — Samuéu!

¹² Tawamhã pi'õ, Samuéu te te 'madâ'â wamhã, ma tô tãma tizadari. Tahawa, te Sauhu ma tinha ãne: — E tiha da, ma tô ĩma asadawa nhipe. A hã apito Sau!

¹³ Tawamhã Sau ma ãma tãma wa'rã ãne: — Aipahi tõ. E marĩ te i'madâ. — 'Re idadâ'â za'ra mono hâiba warõ ti'ai hawi hâimo imorĩ hã wa 'madâ. — Ãne te pi'õ hã tãma wasu'u, marĩ te te i'madâ hã.

¹⁴ Tawamhã Sau te duré ãma sadanha ãne: — E niha tawamhã ihâiba hã. — Aibâ ihire te we sai'u. Uburé zazahâ hâpa na hâiba ubu ré. — Ãne ma te pi'õ hã ãma tãma wa'rã asa. Tawamhã Sau hã ma tô waihu'u, Samuéu na hã. Tahawa, ma tô hi'rãtitõ nhamra. Ma tô ti'ubu na ropto ti'ai u hã, te te iwazéb zarina.

¹⁵ Tahawa, te Samuéu hã Sauhu ma tinha ãne: — E marĩ da, ma tô ĩzô irowasu. E marĩ da, ma tô ãne hã ĩma i'manha, apâ we ĩmorĩ da hã. Tawamhã Sau ma ãma tãma wa'rã ãne: — Ĩma ropire uptabi di ãhã na hã, filisteu norĩ hã te te siwi ĩ'wapéi u'âsi mono wa. Duré 'Re ihâimana u'âsi mono hã ma tô ĩma ai'ré, ĩme hâimana tõ da hã. Tahawa, marĩ na te te ĩzada'âbâ õ di, isadawa 'mahârâ'wa nhimirowasu'u na hã, duré ĩnhotõ 'rowim na hã. Tahawa, ãme ĩma rowasu'u da hã wa asô hâ, za marĩ te i'manharĩ da na hã.

¹⁶ Tawamhã Samuéu te duré asa tãma tinha ãne: — E marĩ da, te ĩzô aihâ ãhã na awa'awi na hã Wanhib'apito 'Re ihâimana u'âsi mono te te airẽme nherẽ, duré asitob'ru na oto aima hâimana nherẽ.

¹⁷ Wanhib'apito hã te te ai'ãma iropisutuzéb zarina hã ma tô aima 'manha, te aima isadawa wasu'u zarina ma tô aiwaze apito hawimhã, aimawi ma te te sõmri da oto, apito da hã, Dawi na isisi ma.

¹⁸ A hã Wanhib'apito te te aima iwaihu'uzém na hã sadawa zamarĩ õ di. Õne haré amalequita norĩ hã uprosi pese õ di, isimarĩ za'ra zama. Tahawa, ma tô Wanhib'apito hã ãhã na awa'awi na hã ãne na hã aima rob'manha.

¹⁹ Tahawa, te za a hã, Izaraéu nhihudu norĩ me, filisteu norĩ ma hã aihâiba nhomri za'ra wa'wa. Duré awẽmhã te za a hã ai'ra norĩ ré hã ĩsiré aihâiba. Tawamhã Izaraéu nhihudu norĩ te dasi'wapéi 'manharĩ'wa norĩ hã, te za hâiba nhomri za'ra filisteu norĩ ma hã.

²⁰ Tawamhã ãne te te tãma waihu'u wi, ma tô Sau hã hâiba wahu na dumana na tô õme ti'ai u hã waptãrã, Samuéu te te tãma inharĩzé ma, pahi uptabi wa. Sib'uwa uptabi di, marĩ te te 'rẽne õ wa, ã bâtâ wahuré na hã, duré ã mara wahuré na zama.

²¹ Tawamhã ma tô pi'õ hã 'râwi itẽme wi. Tahawa, ipahizém na ma tô 'madâ. Tahawa, te ãne tãma tinha: — Wa hã te ĩsima romnhimimnhasi nherẽ, wa tô ĩwi iwaptẽrẽzé hã 'manha tô.

²² Tahawa, ma'ãpé ĩmreme hã wapari, te aiwi iwaptẽrẽzé hã. Ma'ãpé duré asima wẽ na dasa hã suru na te we aima i'âri da hã, ãma ai'upari da, taha pari duré asiptete sina apâ aimorĩ da.

²³ Tane nherẽ, Sau hã te siwi wẽ'õ. Te duré tinha, tô sa tõ da hã. Tane nherẽ, isahâpâ romhuri'wa norĩ zama te nasi tãma 'ru zadawa za'réi õ za'ra tô sa da hã. Tawamhã Sau ta norĩ hã ma tô oto sina saze za'ra. Tahawa, ma tô oto wahudu ti'ai hawimhã. Ma tô duré oto nhamra, waptâmhã.

²⁴ Tawamhã ma tô pi'õ hã waptu na tiwĩ powawẽ zapu hâi pe hã. Ma tô duré ti'â amnho trigu zub'a ré zama. Ma tô warutu. Tawamhã ma tô duré sebre tãma, i'u'ẽtẽ wapu duptoi ãna.

²⁵ Tawamhã dasa te te tãma 'manharĩ za'ra pari ma tô oto tãma tisã Sauhu nho're isa hã, duré isahâpâ romhuri'wa norĩ nho're ãma zama, ma tô tãma sõré za'ra. Tawamhã ma tô oto tisa hã tihu. Taha pari, te bara na hã oto ai'aba'ré.