1 Samuéu 25 - ꞌRe Ihâimana Uꞌâsi Mono Zadawa Wasuꞌu

Samuéu dâ'âzé wasu'u

¹ Tawamhã Samuéu hã ma tô dârâ. Dâ'â wamhã, ma tô uburé Izaraéu nhihudu norĩ hã itẽme si'rã'õtõ, ãma 'ru'ru da hã. Tawamhã ma tô ãma siwi ti'a, Rama ãma 're ihâimana mono zéb ãma. Tawamhã Samuéu ãma te te siwi ti'ai pari, ma tô Dawi hã mo, Parã na rop si 're irosa'wari mono nhisi u.

Dawi hã, pi'õ Abigaiuhu ãma imrozé wasu'u

^2-3 Tawamhã aibâ hã te 're hâimana, Calebihi nhihudu hã, Nabau na isisi hã, 'ri'ahâ Ma'õ hawimhã, duré Carmeru na 'ri'ahâ nhisi ãma te te 're iromhuri mono. Isib'ro pe hã, 3 miu na isimizama hâiba hã pone'ẽrebâ zéré mapure hã, duré miu na isimizama hâiba hã pone'ẽrebâ zéré uzé hã. Duré imro nhisi hã Abigaiu na. Ta hã iwẽ uptabi, duré te te irowaihu'u pe. Tane nherẽ, imro hã aibâ iwasédé. Isahi. Tahawa, te Nabau hã tihâiba, Carmeru na 'ri nho'õmo nhisi ãma te te tinhimizama pone'ẽrebâ zéré mapure azéré nhihâri da hã.

⁴ Tawamhã Dawi hã a'ubuni wi hâimana ré, ma tô ãne hã waihu'u.

⁵ Tahawa, ma tô 10 na ai'reputu norĩ hã satõrĩ za'ra Carmeru u hã. Taha wana ré ma tô ãne tãma waihu'u za'ra: “Ĩmreme hã te za asiwi i'âri 'wa, Nabauhu ma. Tawamhã asiwi sõpẽtẽ aba wamhã, te za asiwi isawi wa'wa, ĩnhisi na.

⁶ Taha pari, te za oto tãma irowasu'u za'ra wa'wa ãne: Ĩsiwaihu, Dawi hã te we asawi. Rowẽ na 're aihâimana mono da si, te we aima tinha, ai'ra norĩ zama duré uburé aima 're ihâimana za'ra mono norĩ zama.

⁷ Õ hã ma tô waihu'u, ate pone'ẽrebâ zéré mapure i'a zéré nhihârizé hã. Tawamhã te wama nharĩ za'ra, wa te aima wasu'u za'ra da, asimizama 'madâ'â'wa norĩ wame ihâimana za'ra rowẽ na ihâimana za'ra na hã, marĩ wa te tãma 'manharĩ wasété za'ra ãna. Carmeru ãma hâimana za'ra ré, duré isimarĩ za'ra hã wa te tiwi 'manhimi'uri za'ra õ di.

⁸ Ma'ãpé asimizama 'madâ'â'wa norĩ sadanharĩ za'ra na, te te aima wawasu'u za'ra da. Dawi hã te we aiwi rowaptẽ, wawaibui wẽ da, datozé bâtâ na we wasi'aba'ré dâ'âsina. Ãne wa, ma'ãpé aima romhuri'wai ma, marĩ wama sõmri za'ra na, duré asiwaihu aima isawi Dawihi ma zama.”

⁹ Ãne te te tãma waihu'u za'ra pari, ma tô ai'aba'ré, ai'reputu norĩ hã. Oto itẽme sihutu wamhã, ma tô tãma mreme wasu'u za'ra Dawi hã, Nabauhu ma, isisi na. Taha pari, te oto mapari za'ra, te te ãma isada'âbâ za'ra zéb zô asa.

¹⁰ Tawamhã Nabau ma tô ãma tãma wa'rãmi za'ra ãne: — E 'wa hã Dawi. E 'wa merẽ Zéséhé 'ra. Niwamhã taha na hã te da'maiwapari õ di. Ãhã na hã te pawa'âbâ ãna dama romhuri'wa norĩ hã ahâ na tinhib'apito wi hã 're simani za'ra.

¹¹ Tahawa, e marĩ da, wa za ĩte i'u'ẽtẽ wapu hã ĩma romhuri'wa norĩ ma da nherẽ aima 'manhomri za'ra wa'wa, duré ĩte â hã, duré ĩnhimizama te isimro norĩ hã. Aibâ norĩ ĩma iwaihu'u'õ norĩ, nima hawi we isi'aba'ré norĩ ma, te tãma isõmri za'ra da hã mare di.

¹² Tawamhã Dawihi hawi aibâ isi'aba'ré norĩ hã ma tô apâ ai'aba'ré. Tahawa, ma tô Dawihi ma sadawa wasu'u za'ra, Nabau te te tãma inharĩ za'ra zé hã.

¹³ Tawamhã ma tô Dawi hã tãma nharĩ za'ra ãne: — Ma'ãpé ai'usisi na sib'ézé 'wapa asima séme aba! Tawamhã ãne te te tãma 'ru za'ra wa, ma tô imreme zarina sima sé. Dawihi zama ma tô tite sib'ézé 'wapa hã ti'â. Taha pari, ma tô oto watobro, tite aibâ norĩ 400 na ihâiba za'ra ré hã. Taha ré, ma tô 200 na ihâiba za'ra, asi ré hã isa'u za'ra a'â tihâimana za'ra.

¹⁴ Tawamhã Nabauhu ma romhuri'wa te pi'õ Abigaiuhu ma tinha ãne, Nabauhu mro ma hã: — E ma tô iwaihu. Dawi hã tite romhuri'wa norĩ hã ma tô aré we satõrĩ za'ra, tinhimizawizéb ré, wanhib'ihâ'a u hã. Tane nherẽ, ma tô ãma wasété za'ra.

¹⁵ Ãne nherẽ, ma tô wama tihâimana wẽ za'ra. Marĩ iwasédé hã te te wama 'manharĩ za'ra õ di. A'ubuni wi isiré wahâimana za'ra ré hã marĩ te te wawi 'manhimi'uri za'ra õ di, wate hã.

¹⁶ Õ norĩ hã ma tô wa'wawimhã 're sõpré bâtâ na hã duré mara na zama. Ime 're wahâimana za'ra mono ré hã ma tô duré wanhimizama te te wama 're 'madâ'â za'ra.

¹⁷ Tahawa, ãne na rosa'rata wamhã, ma'ãpé asima rowairébé, marĩ 'manharĩ da hã. E marĩ wa. Iwasédé hã za oto watobro wa, wanhib'ihâ'a tẽmemhã, duré uburé i'ra norĩ tẽmeb zama. Õ hã wasété uptabi wa, ni'wa hã te te tãma irobzanhamri da hã waihu'u õ di.

¹⁸ Tahawa, ma tô Abigaiu hã waibu 200 na i'u'ẽtẽ wapu hã. Ma duré timra maparane romhâ 'manharĩ na ub'rẽ i'masi hã uwa 'rãi wa'ui ré hã. Ma tô duré timra 5 na pone'ẽrebâ isebre hã, duré amnho trigu 'rã zebre hã 17 na ipire pibuzém na. Duré 100 na ma tô timra i'ru 'ré na uwa 'rãi'ré prã 'manharĩ na i'u'ẽne hã, duré 200 na figuera wede 'rãi'ré prã 'manharĩ na i'u'ẽne hã. Taha pari, ma tô oto sima wasisi, awaru po'repore ba nhisiwimhã.

¹⁹ Tawamhã te tite romhuri'wa norĩ ma nharĩ za'ra ãne: — Ĩnhowa te za ai'aba'réi wa'wa, wa hã asa'u za'ra wa'aba ãma ĩmorĩ da. Ãne te te sima rowairébé nherẽ, timro ma hã te te wasu'u õ di.

²⁰ Tawamhã Abigaiu, tite awaru po'repore te te saprõni ré, ma tô bâdâdi nhi'odo i'rãsipra ãma sõpẽtẽ Dawi hã, duré ite aibâ norĩ we pi'õi tẽme isi'aba'ré hã.

²¹ Dawi hã ma tô aré sima rosa'rata ãne: “E marĩ da, wa tô merẽ aiwétési ã hã aibâ nhimarĩ hã a'ubuni wimhã 'madâ'â wẽ. Wa norĩ hã marĩ wa te tiwi simi'uri za'ra õ nherẽ, iwẽ si wa te tãma 'manharĩ za'ra nherẽ, ma tô iwasété na si wama wa'âbâ za'ra.

²² 'Re ihâimana u'âsi mono te te ĩma rob'manharĩ za, aibâ norĩ hã uburé pese te simroi õ wamhã, rowa'a õ ré.”

²³ Tawamhã Abigaiu, Dawi te te oto 'madâ'â wamhã, ma tô waptu na sa'ẽtẽ si'ra awaru po'repore hawimhã. Tawamhã ma tô hi'rãtitõ tãma nhamra isõ'remhã. Ma tô duré ti'ubu na tãma ropto, ti'ai u hã.

²⁴ Tawamhã ipara ãma ti'ubu na te te roptop sina te ãne tãma tinha: — Ĩnhib'apito, ma'ãpé ĩwapari. Ĩ'ãma si hiri ĩwasédé hã.

²⁵ Nabau hã waparire tõ. E tihai wa. Tiha dai õre di ta hã tarére hã. Tô ibâ õhõ nhisi te te iwasu'u hã: Isimiza'rese'õ. Duré wa hã tô te 'madâ'â za'ra õ di, aima romhuri'wa ãma isatõrĩ za'ra hã.

²⁶ Wanhib'apito 'Re ihâimana u'âsi mono hã ma tô aiwi sawi asi'ruiwa'âbâ tõ da, duré asitob'ru norĩ uprosi tõ da. Tahawa, ãhã na hã wa tô sena aima waihu'u Wanhib'apito nhisi na hã. Tô sena te za asitob'ru norĩ ma rob'manharĩ za'ra ni za, Nabau ma da te tãma irob'manharĩ ne. Te za uburé te te aima rob'manharĩ za'ra da, te te sima iwẽ za'ra norĩ ma zama tãma rob'manharĩ za'ra ni za.

²⁷ Ma'ãpé, ĩnhoprubzé te we aima i'âri hã asiwi wẽ'õ ãna te za i'â, ate dasi'wapéi 'manharĩ'wa norĩ ma, sõmri za'ra da.

²⁸ Ma'ãpé siwa'ru tiha na ĩwasédé te i'manharĩzém na hã ĩ'ãma 'madâ'â õ di za. Wanhib'apito 'Re ihâimana u'âsi mono te za aipisutu za, asi'apito da hã, duré asihudu norĩ zama si'apito za'ra da hã. E tihai wa. A hã 'Re ihâimana u'âsi mono te te aima i'ruzéb zarina dasi'wapé hã i'upana 're 'manharĩ mono õ wa. Tahawa, tiha hã iwasédé hã ai'ãma 're hâimana mono õ di za, 're aihâimana mono ré hã.

²⁹ Ni'wa hã te te aiwĩrĩ da, te te ai'wapéi pibui wamhã, te za ate 'Re ihâimana u'âsi mono hã ai'wawi aimapa, aibâ tiha iwa'âbâ za'ẽtẽ 'wawi 're isimapa mono ne. Tahawa, te za duré asitob'ru norĩ hã romhâ na aima sãmra za, aibâ ẽne tite powawẽ hâ 'manharĩ na te te 're i'anhamra mono ne.

³⁰ Wanhib'apito 'Re ihâimana u'âsi mono hã te za uburé tiha iwẽ na hã ãma aima uwaimra, te te aima iropisutuzéb zarina. Te za duré tawamhã aipisutu, Izaraéu nhihudu norĩ ma asi'apito da hã.

³¹ Ãne uburé tiha iwẽ aima hâimana wamhã, a hã i'asiwẽ'õ da hã maze di za. E tihai wa. Niwamhã asima iwẽ na hã siwa'ru da'maiwĩrĩ õ wa, duré asi'uihâ na niwamhã 'râwi asi'ruiwa'âbâ õ wa. Tahawa duré nimahãna Wanhib'apito 'Re ihâimana u'âsi mono iwẽ na te te aipawapto wamhã, ĩ'ãma hã aipo're si'âri õ di za.

³² Tawamhã Dawi ma tô ãma sada'â ãne: — Wanhib'apito Izaraéu nhihudu norĩ te 'Re ihâimana u'âsi mono ãma 're wawata za'ra wa'aba mono za, ta hã ã bâtâ na te te we asatõrĩ wa, ĩnhopẽtẽ da hã.

³³ Wẽ uptabi di ãhã na a hã i'manharĩ hã ĩpawaptobzém na. Wa hã wa tô aré ĩsima rowairébé, marĩ iwasédé te 'manharĩ da hã. Wa tô duré aré ĩsima wẽ, 'râwi ĩsi'ruiwa'âbâ da hã.

³⁴ Tahawa wa waptẽ Wanhib'apito 'Re ihâimana u'âsi mono hã te te ĩwi sawi da hã, marĩ iwasédé te aima 'manharĩ tõ da. Tahawa, wa tô sena na aima waihu'u, Wanhib'apito Izaraéu nhihudu norĩ te 'Re ihâimana u'âsi mono nhisi na. A hã ĩnhopẽtẽ da, sa'ẽtẽ we aimorĩ õ 'wa'âhã, Nabauhu te aibâ norĩ hã, duré ai'uté norĩ zama, te aré awẽm na mararé uburé pese ai'utõ.

³⁵ Tawamhã Dawi hã ma tô wẽsã, Abigaiu marĩ te te tãma iduri hã. Taha pari te ãne tãma tinha: — Apâ asõrõwa u te za aimo, asina aihâtâ'â ãna. Wa za tô asima iwẽzé hã aima 'manha.

^36-37 Tawamhã Abigaiu ma tô mo apâ, timro Nabauhu u hã. Ta hã dasa isa'ẽne hã apito te te sima 're i'manharĩ za'ra mono ne, 'ri paramhã te te 'manharĩ ré, ma itẽme wi, imro hã. Tahawa, ma tô si'rãiwamna. To ti duré. Tawamhã imro Abigaiu niha hã marĩ te te tãma wasu'u õ di. Awẽm na isi'rãiwamnarĩ zahu õ zéb ãmap si ma tô uburé tãma wasu'u. Tahawa, ma tô õne haré timorĩ'õ, siri siwamnarĩ wa.

³⁸ Tawamhã 10 na bâdâ ãma morĩ parip si, ma tô 'Re ihâimana u'âsi mono hã azâ Nabau hã. Tahawa, ma tô oto dârâ, õne haré.

³⁹ Tawamhã Dawi, Nabauhu dâ'âzé te te waihu'u wamhã, te ãne tinha: — Wanhib'apito 'Re ihâimana u'âsi mono ãma 're wawata za'ra wa'aba mono! Ta hã ma tô ĩ'ruiwa'â, Nabau ĩ'ãma iwasété'wa na hã. Ãne ma tô ĩpawapto, isib'a'uwẽ marĩ te 'manharĩ wasété tõ da hã. Wanhib'apito ma tô tãma rob'manha Nabauhu ma hã, wasété uptabi wa. Tawamhã Dawi hã ma tô romreme hã tãma tisõ, Abigaiuhu ma ãma mro da hã.

⁴⁰ Tawamhã tãma romhuri'wa norĩ hã ma tô ai'aba'ré Carmeru u hã. Tahawa, te ãne tãma rowasu'u za'ra, itẽme sihutu wamhã: — Dawi hã ma tô we asô wazatõrĩ za'ra, wa te wasiwi asaprõni da, ãma aimro da.

⁴¹ Tawamhã ãne te te tãma rowasu'u za'ra wa, ma tô Abigaiu hã hi'rãtitõ tãma tinhamra za'ra isõ'reb za'ra. Tahawa, ma tô ti'ubu na ropto ti'ai u hã. Tawamhã te ãne tinha: — Wa hã Dawihi ma romhuri'wa. Tahawa, tãma romhuri'wa norĩ hã ĩma wẽ di, te oto ipara upsõ za'ra da si.

⁴² Tawamhã ma tô wara sina wahudu, awaru po'repore na sarõtõ da hã oto. Tahawa, 5 na tãma romhuri'wa sipi'õ norĩ ré hã ma tô mo, Dawihi ma romhuri'wa norĩ siré. Tawamhã ma tô oto ãma timro.

⁴³ Dawi hã ma tô aré timro, Aino'ã na isisi ãma hã, 'ri'ahâ Zezereu na isa'ru nhisi hawim na. Tawamhã ma tô duré Abigaiuhu ãmab zama timro.

⁴⁴ Ãne romhâimana mono ré, ma tô Sau, Pautihi ma hã, ti'ra Micau hã tãma tisõ ãma mro da, aré Dawihi ma te te isõmri hã ãma imro da hã. Pauti hã Laisihi 'ra, 'ri'ahâ Garĩ na isisi ãmamhã 're ihâimana mono.