1 Samuéu 21 - ꞌRe Ihâimana Uꞌâsi Mono Zadawa Wasuꞌu

Dawi hã Sauhu wi isimanizé wasu'u

¹ Tawamhã Dawi ma tô mo, sasedoti Aimeretihi ma te te nharĩ da, Nobi na 'ri wa'õtõ nhisi u. Tawamhã oto itẽme wisi wamhã, ma tô sasedoti rẽrẽ'ẽ sina itẽme watobro, Dawihi tẽmemhã. Tahawa, te ãne sadanha: — E marĩ wa, te we asiwaprosi aimo ãwamhã.

² Tawamhã Dawi ma ãma sada'â ãne: — Apito zadawa para wa wei mo ãwamhã. Ta hã ma tô ĩma waihu'u, ni'wai ma te wasu'u tõ da, marĩ te te ĩma i'ru, za te i'manharĩzé hã. Tahawa, ĩte dasi'wapéi 'manharĩ'wa norĩ ma wa tô 'ru za'ra, nimame ĩzô simipari za'ra da, tame te te siwi ĩnhopẽtẽ da.

³ Ma'ãpé ĩma rowasu'u na, ãhã na awa'awi na hã: E marĩ iré hã za te i'rẽne da hã. I'u'ẽtẽ wapu imrotõ na ĩma sõmri, niha wamhã, siwa'ru marĩ hâimana wamhã ĩma 'manhomri.

⁴ Tawamhã sasedoti ma ãma sada'â ãne: — I'u'ẽtẽ wapu tarére hã ĩma 'maihâimana õ di. 'Re ihâimana u'âsi mono ma danhoprubzéb da si, te i'u'ẽtẽ wapu iwazéb zahi hã ĩma tihâiba. Tane nherẽ, te za tawamhã tô ãma idu, ate dasi'wapéi 'manharĩ'wa norĩ nimosi pi'õ na ãma hâimana za'ra õ wamhã.

⁵ Tawamhã Dawi ma duré ãma tãma wa'rã ãne: — Ma. Te te 'manharĩ za'ra õ di tô, tane hã. Wa norĩ hã pi'õ siré wahâimana za'ra õ di. Ĩte aibâ norĩ hã te wẽ na sihâiba uptob ãna 're hâimana za'ra marĩ zô 're wawairébé mono wamhã. Tahawa, ãhã na hã marĩ ipire zô wawairébé wa, te sihâiba uptob ãna hã tihâimana za'ra.

⁶ Ãne te te tãma wasu'u za'ra wa, ma tô sasedoti hã Dawihi ma sõmri za'ra, i'u'ẽtẽ wapu iwazéb zahi hã. E marĩ wa. Taha si hâimana wa, Uburé Danhib'apito ma, ãma 're isõpru mono zé hã. I'u'ẽtẽ wapu wedeza iwazéb zahi hawi da te iwaibu hã, iwa'rãmi da te sa'ra da, wedeza nhisiwi iwahâ hã.

⁷ Tawamhã Doedi, edomita norĩ siré hã Sauhu ma romhuri'wa hã ma tô taha bâtâ na hã dame tihâiba tame. E marĩ da. Te te ãma uwaimrami da, za marĩ te te i'manharĩzém na, 'Re ihâimana u'âsi mono nho'a.

⁸ Tawamhã Dawi te Aimereti sadanha ãne: — E ate iré hã sib'ézé 'wapa, niha wamhã, isi'uwazi 'rã'wa ĩma sõmri da hã a'â. Wa hã te we âri õ di, ĩte sib'ézé 'wapa hã, duré ihâiba amo ĩsi'wab'ézé hã. Apito hã waptu na te te we ĩma rob'rui wa, wa tô we ĩsi'aba'ré na watobro, we ĩmorĩ da ãwamhã. Tahawa, ĩ'ubana hã wa tô wei mo.

⁹ Tawamhã Aimereti ma ãma tãma wa'rã ãne: — Iré hã filisteu Gulia iwĩrĩ nhi'wa Era na ẽtẽ siwa'aba nhisi ãma. Ta hã te 're sa'wari ubu pese na, sasedoti norĩ si'uzazé 're isa'wari mono babarãi ãma. Wẽ wamhã, taha si âri. Taha si te ãmemhã 're sa'wari, dasi'wapézé hã. Tawamhã Dawi te tãma tinha ãne: — Tô aimawi iwẽ hã 'maihâimana õ di isipai u hã. Tahawa, ma'ãpé taha si ĩma sõmri.

¹⁰ Tawamhã Dawi tô taha bâtâ na ma aimani, Sauhu wi hã. Tahawa, ma tô mo, apito Aqui na isisi zô, 'ri'ahâ Gati na isisi ãmab zô 're rĩtĩ mono da.

¹¹ Tawamhã 'ri'ahâ 're dama ipire norĩ hã ma tô tãma wasu'u za'ra ãne, Aquihi ma: — Oro ã hã Dawi, Izaraéu nhihudu norĩ nhipti'ai ãma apito za. Pi'õ norĩ hã ma tô taha ãmamhã tinho're za'ra, si'rẽne sina ãne: “Sau hã ma tô dapã miu na, duré Dawi hã ma tô dapã 10 miu na.”

¹² Tawamhã ãne te te tãma rob'rãzarõtõ za'ra wa, ma tô Dawi hã isimirowasu'u za'ra ma a'rã. Tahawa, ma tô tãma tipahi, Aquihi ma hã.

¹³ Tahawa, uburé idahâimana za'ra norĩ nho're, ma tô i'rã siwamnarĩ ne tihâiba. Tawamhã duré te te siwi tété da, te te siwi âri pibui wamhã, ma tô i'rãsiwamnarĩ ne tihâimana. 'Ridawa za'ẽne hã 'ri'ahâ u 're idanhisisi mono zé hã ma te te wabza. Isada'u tiwi watobro wa, ma duré ãma siwatasu upto.

¹⁴ Tahawa, ma tô Aqui hã tite rob'madâ'â'wa norĩ ma nharĩ za'ra ãne: — Ã hã aibâ hã i'rã siwamnarĩ! E marĩ da, ma tô we ãwa asiwi isaprõni 'wa.

¹⁵ E ãmemhã robaba bâ i'rã siwamnarĩ norĩ hã ma tô bété i'rãsiwamnarĩ amo hã we asiwi isaprõni 'wa ãwamhã, 'rãsiwamnarĩ da ĩnho'remhã, duré nasi marĩ hã te te awamnarĩ da, ĩhâimanazéb 'remhã.