1 Samuéu 1 - ꞌRe Ihâimana Uꞌâsi Mono Zadawa Wasuꞌu

Samuéu mama norĩ wasu'u

¹ Tawamhã aibâ te 're 'maihâimana, Efraĩhĩ nhihudu, Eucana na isisi 'ri nho'u Rama na isisi ãma 're ihâimana mono, Efraĩhĩ nhihudu norĩ nhipti'ai 'rã nho'õmo ãma hã, ẽtẽ 'rãihâ si 're iromhâimana mono ãma. Ta hã Zero'ãhã 'ra, Eri'uhu nhihudu, To'uhu 'ra nhihudu, duré Zupihi 'ra nhihudu 'ra.

² Tawamhã Eucanahã mro maparane. Isisi zahuré hã ãne: Ãna, duré Penina. Tawamhã Penina ma tô aiwabzu. Ãnahã si siwabzuri õ di.

³ Wahup sidâpâsi te Eucana tite 'ri nho'õmo hawimhã 're ne, Silo na 'ri nho'õmo nhisi u hã, Uburé Danhib'apito iwaihu'u pese ãma 're wata mono da, duré danhimizama zata na tãma 're sõpru mono da. Duré tamemhã ma tô 're hâimana zahuré, Erihi 'ra norĩ hã, Uburé Danhib'apito ma, da'ãma romhuri'wa norĩ hã. Isisi zahuré hã: Hopini na, duré Finéa na.

⁴ Tawamhã Eucana 'Re ihâimana u'âsi mono ma, danhimizama zata na tãma 're sõpru mono sidâpâsi ma tô timro ma te te 're po'o, Peninahã ma. Duré uburé ti'ra norĩ ma zama ma tô te te 're po'o.

⁵ Tane nherẽ, Ãnahã ma si, maparane inhi wa'õno hã ma tô te te tãma 're sõmri. E marĩ wa. Tãma sawi uptabi wa, Eucanahã ma hã, zahadu Uburé Danhib'apito te te tãma pisutu õ nherẽ, 'ra da hã.

⁶ Tawamhã Penina ma tô nasi ãma tinhitob'ru. Duré ma tô nasi ãma tito, Ãnahã ãma. Tahawa, ma tô nasi ãma sisém no, nasi ãma itozém na hã. E marĩ wa. Zahadu Uburé Danhib'apito hã te te tãma pisutu õ wa, i'ra da hã. Tane nherẽ te nasi tô ãma tito.

⁷ Ãne ma tô nasi tãma rob'manha Penina hã, wahup sidâpâsi. Uburé Danhib'apito nhorõwa u, 're nomro mono sidâpâsi te Penina hã wi te te 're ro'wa'ré, Ãna hã. Tane nherẽ, te te ãma tãma 're wa'rãmi mono õ di, Ãna hã. Tiwawa si te te 're 'manharĩ. Tahawa duré, 're sai mono õ di, mram na hã.

⁸ Tawamhã nimahã bâtâ na te Eucana imro hã sadanha, ãne: — Ãna. E marĩ wa, te aiwawa. E marĩ wa, asai õ di. E marĩ wa, te duré õne u'â robzei ãna aihâimana mo. E niha. E 10 na ai'ra aima ipoto za'ra nhipai u hã, wa hã bété aima hã ĩwẽ õ di.

Ãna ti'ra te te iwaptẽrẽzé wasu'u, 'Re ihâimana u'âsi mono wi

⁹ Tawamhã nimahã bâtâ na saihuri pari, te Silo ãma asimro. Tawamhã Eri sasedoti 'Re ihâimana u'âsi mono ma da'ãma romhuri'wa hã te romhâ 'manharĩ na 'ri iwazéb zahi, 'ridawa ãma 're idanhisisi mono zéb ãma nhamra, romhâ 'manharĩ na 'ri iwazéb zahi 'ridawa ãma, tisimasisizém na.

¹⁰ Tawamhã Ãna hã tãma robzei'õ pese na ma tô wahudu hâiwi, duré wawa sina. Tawamhã ma tô mre, Uburé Danhib'apito ma hã.

¹¹ Tawamhã te ropisudu sena na tãma 'manha ãne: — Wanhib'apito 'Re ihâimana u'âsi mono I'aiwaihu'upe, ma'ãpé asib'a'uwẽ hã, ĩ'madâ'â! Duré sa'ẽtẽ na, robzei'õ te te ĩ'azârizé hã 'madâ'â! Tahawa, asib'a'uwẽ ãma, ĩ'ãma aipo're si'âri õ di za! Duré a hã ĩ'ra ĩma sõmri wamhã, wa za aima ropisutu, apâ te aima sõmri da za. Duré niwamhã ta hã tizéré hã te te sihâri õ di za.

¹² Tawamhã Ãna, 'Re ihâimana u'âsi mono ma, mreme ré ma tô ãma ronomro pe. Tawamhã Eri hã te 'madâ'â pese isaihâ popo u.

¹³ Ãna mreme wamhã, imreme hã watobro õ di. Ari'iwi ma tô taré saihâ popo, mreme na hã. Tahawa, ma tô Eri hã ãma rosa'rata upa, 'rã siwamnarĩ newa.

¹⁴ Tahawa, te ãne tãma tinha: — E momo te za asi'rãiwamnarĩzé hã ti'rãsutu. Tahawa, ma'ãpé sazâri, uwa 'rãi wa'u isé hâsi hã!

¹⁵ Tawamhã ma te ãma tãma wa'rã ãne: — Ma. Ĩsi'rãiwamnarĩ õ di, ĩnhib'apito. Duré te hâ'rẽne õ di, uwa 'rãi wa'u isé hã, duré âzaipro hã. Wa hã wa tô tãma mre, Uburé Danhib'apito nho'remhã, ĩma robzei õ uptabi wa. Duré wa tô tãma wasu'u, te irobzépatazé hã.

¹⁶ Tahawa, ĩ'ãma rosa'rata tõ, wa hã pi'õ siwa'ru 're ĩhâimana mono na hã. Wa hã wa tô mre, Wanhib'apito ma. E tihai wa. Ĩma robzei mono õ wa, duré te robzépata mono wab zama.

¹⁷ Tawamhã Eri te tãma tinha ãne: — Rowẽ na si aimorĩ. Wa aima wẽ tô, Izaraéu nhihudu norĩ te, 'Re ihâimana u'âsi mono si marĩ tiwi iwaptẽrẽzé hã te te aima sõmri da.

¹⁸ Tawamhã te asa tãma tinha ãne, Erihi ma: — Ĩnhib'apito, ĩ'ãma 're rosa'rata wẽ u'âsi mono da hã ĩma wẽ di. — Ãne te te tãma nharĩ pari, ma te oto watobro. Tawamhã te oto tisa. Duré tawamhã tiwi robzei'õ õ di oto.

Samuéu ipotozé wasu'u

¹⁹ Tawamhã awẽ bâtâ na ma tô Eucana norĩ hã ti'utu za'ra awẽ wi, duré ãma wata za'ra da, Uburé Danhib'apito ãma hã. Tawamhã ma tô apâ aihutu tinhorõwa Rama u hã. Eucana tame timro Ãnahã ãma ma tô oto ãma hâimana. Tahawa, Uburé Danhib'apito hã ma tô oto wapa, te te tiwi irowaptẽrẽzém na hã.

²⁰ Tahawa, ma tô oto tiwasã Ãna hã. Duré za tãma ipotozé bâtâ uwaibaba ma te tãma podo. Tawamhã ma tô sisi ina hã, Samuéu na. Tahawa, te ãne ãma rowasu'u: — Wa hã ã hã ĩ'ra, te tiwi iwaptẽrẽ, Uburé Danhib'apito wi.

²¹ Tahawa, Eucana norĩ hã ma tô ai'aba'ré, timro ti'ra norĩ me hã Silo u, wahup sidâpâsi tinhimizama zata na Uburé Danhib'apito ma 're isõpru mono zé hã te te tãma 'manharĩ da, te te tãma iropisutuzéb zarina.

²² Tane nherẽ, Ãna hã ime morĩ za'ra õ di. Tahawa, te ãne tãma tinha, timro Eucanahã ma: — Ĩhâ te te rẽme wapsi, wa za subza, Uburé Danhib'apito nhorõwa u hã, õmem haré oto 're hâimana u'âsi mono da.

²³ Tawamhã Eucana ma ãma sada'â, ãne: — Ma'ãpé 'manharĩ tô, asima iwẽzéb zarina. Tahawa, 'ri 're a'â tô iré aihâimana, aihâ te te irẽmezéb u. Duré ĩma wẽ di, Uburé Danhib'apito hã te te aipawaptob da hã, tãma ãma uwaimrami da, asimiropisudu i'manharĩzé hã. Tahawa, ma tô Ãna hã 'ri 'rep si iré hâimana, i'ra ihâ te te irẽmezéb u.

²⁴ Tawamhã tina hâ te te rẽme parip si, te oto Ãna hã subza ti'ra hã, Silo u hã. Duré powawẽ iba'õmo zapu si'ubdatõ na ãma iwahub zama ma tô siré saprõ. Duré trigu zub'a ré zama ma tô siré ti'â, 10 na ipire pibuzém na. Tawamhã ub'rẽ romhâ 'manharĩ na uwa 'rãi wa'u isé ré i'masi hã ma tô duré siré ti'â. Tawamhã Samuéu ina te te saprõni wamhã, Uburé Danhib'apito nhorõwa u hã zahadu re di.

²⁵ Tawamhã Samuéu mama norĩ ma tô ãma tinhoprub zahuré, powawẽ iba'õmore zata na hã. Tahawa, 'watébrémi hã ma tô saprõni zahuré, Erihi ma, te te sãrĩ zahuré da hã.

²⁶ Tawamhã Ãna te ãne tãma tinha: — Ĩnhib'apito! Tô sena wa aima ĩsiwasu'u. Wa hã pi'õ hâiwi ĩzab ré ĩ'madâ, 'Re ihâimana u'âsi mono ma ĩmreme ré hã.

²⁷ Wa hã ã hã ai'uté hã wa tô tiwi waptẽ, Uburé Danhib'apito wi. Ta hã ma tô ĩma tisõ, te tiwi iwaptẽrẽzé hã.

²⁸ Tahawa, ãhã na awa'awi na hã wa hã wa za apâ tãma tisõ, Uburé Danhib'apito ma, ite da, ã hã 'watébrémi hã. Duré ti'ai ãma 're hâimana mono ré hã, ite hã za tô. Tawamhã tame ma tô oto ãma tiwata za'ra, 'Re ihâimana u'âsi mono ãma hã, imama norĩ hã.