1 Corĩtu 9 - ꞌRe Ihâimana Uꞌâsi Mono Zadawa Wasuꞌu

Zezusihi zadawa wasu'u'wa na, Paulu hã dama isiwasu'uzé wasu'u

^1-2 Ni'wam norĩ hã ma tô te te ĩ'ãma 're rosa'rata za'ra, Zezusihi zadawa wasu'u'wa, sena na dama 're ĩhâimana mono õ na hã. Tane nherẽ, a norĩ wa'wa hã ma tô ĩ'ãma iwaihu'u za'ra wa'wa, sena na isadawa wasu'u'wa na 're ĩhâimana mono zém na hã. Wa hã danhimiroti zarina, 're ĩhâimana mono õ di. 'Re ihâimana u'âsi mono si, ma tô ĩpisutu, Zezusihi zadawa wasu'u'wa na dama 're ĩhâimana mono zéb da hã, isadawa para. Wanhib'apito Zezusi hã wa tô duré 'madâ, ĩtõmo na. A norĩ wa'wa hã bété. E 'wa simiroti zarina, ma tô 're isaze za'ra wa'aba mo. Wanhib'apito ma, te ai'ãma 're iromhuri za'ra wa'aba mono zéb zarina, ma tô 're isaze za'ra wa'aba mo. Tawamhã e marĩ te wasu'u, ã hã, Zezusi hã te aima 're iwasu'u za'ra wa'aba mono zéb zarina, 're isaze za'ra wa'aba mono zé hã. 'Re ihâimana u'âsi mono nhimipisutuzéb zarina, wa hã tô sena dama Zezusihi zadawa wasu'u'wa, te aima ĩwasu'u za'ra wa'wa.

³ Ni'wam norĩ hã, senai õ na te te dama 're ĩwasu'u wasété za'ra mono wamhã, wa ãne ĩmreme na 're ĩsimapa:

⁴ Wa norĩ hã Zezusihi zadawa wasu'u'wa norĩ hã, e wasai ãna, duré wa te 're hâsi mono ãna, wa za bété wa te 're romhuri. Tô i'uwaibaba, wa za wa'âbâ ãna ãne hã wa te dawi 're awaibu.

⁵ Zezusihi zadawa wasu'u'wa norĩ, wasiré norĩ hã Zezusi te te dama 're sadawa wasu'u za'ra mono da, nimomo 're nomro mono wamhã, timro hã te za siré te te 're simro. Duré Wanhib'apito no norĩ zama, te za timro hã siré te te 're simro. Pedruhu zama te za duré timro hã siré te te 're saprõni. Wa hã bété. Ĩmro ré, 're ĩhâimana mono 'wa'âhã, duré isazei'wa si'uiwa 're wahâimana mono wamhã, e i'uwaibaba 're ĩhâimana mono õ di aré, daza'rui mono bâ, ĩsiré te 're saprõni mono wamhã. Duré wasazéb da, ĩmro ãma zama, 're ana wa'aba mono wamhã, e i'uwaibaba õ di bété aré. I'uwaibaba tô aré, wahâimanazé hã.

⁶ Wa hã Paulu, duré ĩsiré romhuri'wa Banabé, Zezusihi zadawa wasu'u'wa norĩ siré, 're wahâimana mono nherẽ, e wa norĩ si, wa za wanhib'rata na wa te wasima 're romhuri pese, wasazéb da hã, ãma 're iwahâimana mono zéb da hã. E ãne hã i'uwaibaba bâ bété. I'uwaibaba õ di.

⁷ Da'wapéi'wa norĩ hã bété. E tinhib'apito ma, te te 're romhuri za'ra mono ré, te za si'uihâ na 're siwa'âbâ za'ra, tihâimanazéb da hã. Mare di. Si'uihâ na 're siwa'âbâ za'ra mono õ di za. Duré uwa 'ru na romhuri'wa norĩ hã te te 're 're za'ra mono pari, uwa 'ru 'rã hã oto 're 'rãi prédub za'ra mono wamhã, e misi si te te sima 're suhâri za'ra mono õ di za bété, te te 're huri mono da hã. Te za tô misi si te te sima 're suhâri za'ra, romhuri'wa norĩ hã. Duré dama pone'ẽrebâ 'madâ'â'wa norĩ hã, e a'ubuni wi te te 're 'madâ'â za'ra mono ré, ihâiwa'u hã te te 're âhuri mono õ di za bété. Te za tô te te sima 're hâiwa'u za'ra, te te 're âhuri mono da hã.

⁸ Ãne na danhimirosa'rata zarina, te ãma aima rowasu'u za'ra wa'aba õ di. Duréihã 'Re ihâimana u'âsi mono nhimiroti na Mozési te te ãma irob'ui'érézéb zarina si, wa aima ãma rowasu'u za'ra wa'wa. Ĩsi'uihâ na hã, mare di.

^9-10 Ãne duréihã Mozési te te ãma irob'ui'érézé hã: “Amnho trigu hã, powawẽ tipara na te te aima 're sub za'ra wa'aba mono ré, 're wata wasisi za'ra wa'aba mono õ di za, 're saihuri tõ mono da.” E tawamhã, powawẽ si te 'Re ihâimana u'âsi mono hã te te 're azawi. Mare di. Taha zawi nhipai u, te duré wa norĩ hã te te 're wa'azawi pese. Tahawa, duréihã ãne na te te rowasu'u wamhã, taha wasu'u nhipai u, ma tô duré wa'ãma zama romnhimiré'é. Buru da, ti'a te te 're ihâibâdâ za'ra mono norĩ hã duré oto 're 'rãi'ré za'ra mono wa, te te 're i'rãihâri za'ra mono norĩ hã, e buru tede'wa te te tãma 're ipo'o za'ra mono zéb zô, 're simnhasi za'ra mono õ di za bété. Te za tô sô 're simnhasi za'ra. Ãne hã aiwa, te wasu'u.

¹¹ Tane duré, robzuri'wa norĩ hã ro ubuni ré te te 're irobzuri za'ra mono ne, wa tô Cristuhu wasu'uwẽ na wa te 're aipawaptom na'rata za'ra wa'wa. E tawamhã ãne hã ibâi õ di, aima za'ra wa'aba hã, wanhimipawaptobzé wa'rãmi, marĩ zô aiwi 're iwanhimnhasi za'ra wa'aba mono hã, wasazéb zô, ãma 're iwahâimana za'ra mono zéb da hã. Wa za tô 're wanhimnhasi za'ra, i'uwaibaba wa.

¹² Ni'wam norĩ hã Cristuhu wasu'uwẽ na te te 're idapawaptob za'ra mono norĩ hã, tô ibâre te marĩ na 're ipawaptob u'âsi za'ra wa'aba mo, ãma 're ihâimana za'ra mono zéb da hã. Tawamhã wa norĩ hã Zezusi, wa te aima 're wasu'u 'rata za'ra wa'aba mono nherẽ, e ta norĩ nhipai u, marĩ zô aiwi 're wanhimnhasi za'ra wa'aba mono õ di za bété. E ãne hã isarinai õ di, aima za'ra wa'aba hã. Tô ãne hã, isarina. I'uwaibaba nherẽ, niwamhã marĩ zô, aiwi 're wanhimnhasi za'ra wa'aba mono õ di. Mare di. Duré, wa te aiwi 're rowaptẽrẽ za'ra wa'aba mono ãna, wa tô wa te 're robzépata za'ra, iwasu'uwẽ ré daro mono bâ, wa te 're iropéi mono zé hã, wa te dawi ãma 're 'wa'rutu tõ za'ra mono da.

¹³ 'Re ihâimana u'âsi mono nhorõwa 're, 'ri 'remhã sasedoti norĩ hã, ta norĩ hã 'Re ihâimana u'âsi mono ma, danhoprubzéb da, dasa hã da te tãma 're isõmri za'ra mono hã, te za te te sima 're po'o za'ra suru na, ãma 're saihuri mono da. Danhimizama hã, 'Re ihâimana u'âsi mono ma, danhoprubzéb da, da te tãma 're isõmri za'ra mono nhi zama, te za duré te te sima 're po'o za'ra suru na, da'ãma romhuri'wa norĩ hã, wedeza ne na 'Re ihâimana u'âsi mono ma, te te 're izata za'ra mono hã. E ãne hã aima waihu'u za'ra wa'aba õ di bété.

¹⁴ Tane duré, Wanhib'apito hã ma tô te te wama 're pisutu za'ra, iwasu'uwẽ hã wa te dama 're iwasu'u za'ra mono norĩ ma hã, danhibzari na da te 're iwapawaptob za'ra mono na, ãma 're iwahâimana za'ra mono zéb da hã, wanhimirowasu'u wẽ wa'rãmimhã, dama.

¹⁵ Tane nherẽ, nimahã na hã marĩ zô aima ĩnhimnhasi za'ra wa'aba õ di, asibzari na asiwi 're ĩpawaptob za'ra wa'aba mono da hã, Cristuhu wasu'uwẽ na te 're aipawaptob za'ra wa'aba mono wa'rãmimhã. Mare di. Taha wasu'u na si, wa ãma 're ĩtoi uptabi, ĩpẽ'ẽ 'remhã, ĩnhimiromhuri wa'rãmi, marĩ zô aima 're ĩnhimnhasi za'ra wa'aba mono õ wa. Duré marĩ zô aima ĩnhimnhasi za'ra wa'aba zém na, te sãna'rata da, te ĩsina aima ãma rob'ui'éré za'ra wa'aba õ di, ãhã na hã. Ãne 'wa'âhã, aré ĩma 're robzei mono õ di. Ĩdâ'â da si, aré ĩnhimirosa'rada hã.

¹⁶ 'Re ĩsi'madâ'â zei waihu'u mono õ di, te dama 're iwasu'u mono zém na iwasu'uwẽ hã. Tô ĩnhimiromhuri wa, wa te te dama 're wasu'u, 'Re ihâimana u'âsi mono nhimipisutuzéb zarina. Iwasu'uwẽ hã te dama 're wasu'u mono õ 'wa'âhã, aré ĩma 're ropipa uptabi mono di.

¹⁷ Ãne na te tãma 're iromhuri mono zéb da hã, wa hã ĩsi'uihâ na ĩsipisutu 'wa'âhã, aré ibâre ĩpawa'âbâ ré, iwasu'uwẽ na te tãma 're iromhuri mono da hã. Tane nherẽ, ĩsi'uihâ na ĩsipisutu õ di. 'Re ihâimana u'âsi mono si, ma tô ĩpisutu, taha ma ĩ'umnhasi zarina, te tãma 're romhuri wẽ u'âsi mono da.

¹⁸ E marĩ na tawamhã, ĩpawa'âbâzé hã. 'Re ihâimana u'âsi mono zadawa 'mahârâ'wa norĩ siré 're ĩhâimana mono nherẽ, marĩ zô dama 're ĩnhimnhasi mono õ zarina, da te 're ĩpawa'âbâ mono ãna, wa iwasu'uwẽ si te dama 're wasu'u. Taha na si, wa 're ĩtoi u'âsi. Taha na si ĩpawa'â hã, ãma 're ĩtoi u'âsi mono zém na si.

¹⁹ Wa hã ĩpawa'âbâ ré, 're ĩhâimana mono õ di. Tahawa, ĩwada'uri zarina si, te 're romhuri mono õ di. Tane nherẽ, wa tô ĩsima wẽ, dapawa'âbâ ãna dama romhuri'wa norĩ ne, te dama 're romhuri u'âsi mono da, ĩnhimirowasu'u zarina, Cristu hã da te 're isaze za'ra mono da si, da'ahâ na.

²⁰ Zudeu norĩ hã iwasu'uwẽ na te 're pawaptob za'ra mono da, i'rata 're ĩhâimana za'ra mono ré, zudeu hâimanazéb zarina, wa tô 're ĩhâimana, ĩnhimirowasu'u zarina, ta norĩ hã ahâ na te te 're saze za'ra mono da, Cristu hã. Ta norĩ hã duréihã 'Re ihâimana u'âsi mono nhimiroti 'rata na Mozési te te ãma irob'ui'érézé hã te zahadu te te 're 'madâ'â pese za'ra, taha zarina, 'Re ihâimana u'âsi mono te te 're iwẽsãmri za'ra mono da si. Tane hã, wa hã i'rata 're ĩhâimana za'ra mono ré, 'Re ihâimana u'âsi mono nhimiroti 'rata zarina, wa tô ta norĩ hâimanazéb zarina si 're ĩhâimana, ta hã te 're i'madâ'â pese mono zéb zarina, te te 're ĩwẽsãmri mono da newa, isine za'ra, ãne na ĩsina 're ĩnhimnhasi mono õ nherẽ. Sõ'awi te tiwi wẽ'õ za'ra õ di, zudeu norĩ hâimanazé hã. Da'ahâ na da te 're saze za'ra mono da si, wa tô ãne na si te 're rosa'rata.

²¹ Tane duré, zudeu'õ norĩ 'rata, 're ĩhâimana mono ré, ta norĩ hâimanazéb zarina, wa tô duré 're ĩhâimana. Zudeu norĩ nhimiroti hã te 're 'madâ'â pese mono õ di. E tawamhã 'Re ihâimana u'âsi mono nhimiroti hã te 're 'madâ'â mono õ di, zudeu'õ norĩ 'rata 're ĩhâimana mono ré hã. Wa tô te 're 'madâ'â u'âsi tô. Cristuhu nhimiroti si, wa tô te 're 'madâ'â u'âsi. Ãne si, wa tô te 're 'manharĩ, ta norĩ zama ahâ na Wanhib'apito te te 're saze za'ra mono da, zudeu'õ norĩ hã.

²² Duré ni'wam norĩ hã wasiré Zezusihi zazei'wa 're hâimana za'ra mono nherẽ, sib'uware na ãma 're ihâimana za'ra mono norĩ hã iwasu'uwẽ na te 're apawapto mono wamhã, wa za ta norĩ hâimanazéb zarina si 're ĩhâimana, ĩnhimipawaptobzéb zarina, te te 're sazei pese za'ra mono da. Ãne hã dapoto mono bâ 're idahâimana za'ra mono zép sidâpâsi, wa za dasine dama 're ĩhâimana, da'ahâ na Cristu hã da te 're isaze za'ra mono zéb da si.

²³ Cristuhu wasu'uwẽ hã daro mono bâ da te 're iwaihu'u za'ra mono zéb da si, wa ãne dama 're ĩhâimana. Duré iwasu'uwẽ zarina, 'Re ihâimana u'âsi mono, isazei'wa norĩ ma, uburé marĩ iwẽ hã te te tãma 're i'anhomri mono zém na, dame 're ĩhâimana mono da, wa tô ãne dama 're ĩhâimana.

²⁴ Ãne, wa za oto aima ãma romnhimiré'é za'ra wa'wa. Dawara na da'ahâ na 're dasipibu za'ra mono nherẽ, ãté misi te za ni'wa hã dawi watobro. Tawamhã dawi iwatobro si, te za marĩ iwẽ hã dawi sima ti'â. Ãne hã aima waihu'u pese za'ra wa'aba di. Tane duré, a norĩ wa'wa hã te za asiptete sina Cristuhu ãma si 're anomro wẽ wa'aba mo, marĩ iwẽ uptabi hã 'Re ihâimana u'âsi mono te te aima 're ipisutu za'ra wa'aba mono zép si, asina 're uwaimrami za'ra wa'aba mono da, ni'wa hã dawara na wara tete wa, dawi watobro wẽ te, marĩ iwẽ hã te te sima i'âri ne.

²⁵ Ni'wa hã dawara na dame hâimana da, te te sima wẽ wamhã, te za nasi sihâiba wairo, dazada sihâiba wapu da. Tawamhã dawi watobro wamhã, ropsu 'manharĩ na te za ãma sõpre ni, te te da'mairẽme wẽ te. Tane nherẽ, te za tiwi tiwasété su'u, ropsu 'manharĩ hã. Tanei õ di, wa norĩ hã. Isi'utõrĩ'õ zô si, wa za Cristuhu ãma si wasina 're wanhiptete u'âsi za'ra, 'Re ihâimana u'âsi mono, marĩ iwẽ uptabi hã te te wama 're i'apisutu mono zô si.

²⁶ Dawara na 're dasipibu za'ra mono wamhã, siwa'ru dasiwi 're dasisa'rei mono õ di. Awa'awi u'âsi te za 're dasisa're, 're dasirẽme za'ra mono da. Tane duré, wa hã siwa'ru 're ĩhâimana mono õ di, Cristuhu ãma hã. Taha ãma si, wa za õhõ haré 're ĩhâimana u'âsi, 'Re ihâimana u'âsi mono, iwẽ uptabi hã te te ĩma ipisutuzéb zô si, i'upana marĩ zô tiwi 're ĩsipai mono ãna. Ãne duré, sib'rata ubu ré, da'wapéi'wa norĩ hã da'ubu wi simi'ahâri waihu'u õ wamhã, taré te za nasi da'ãma pahairĩ siwa'ru, te te da'ãma simirei ãna. Tanei õ di, wa hã. Siwa'ru 're ĩhâimana mono õ di. Cristuhu ãma 're ĩhâimana wẽ mono zém na si, wa ĩsina te tãma ãma 're uwaimrami u'âsi, Cristuhu ma hã.

²⁷ Ni'wa hã dame wara da, te te sima wẽ wamhã, te za 're siwasutu u'âsi, dazada siptete da. Tane, wa duré wa hã 'râwi 're ĩsi'wapéi u'âsi, ĩwasété na 're ĩhâimana 'rata mono zéb zarina, 're ĩhâimana tõ mono da oto. Ĩpẽ'ẽ 're, te ĩsima 're irosa'rata wasété mono zé hã wa tô oto 'râwi te ĩsima 're a'uprosi. Tahawa, wa tô ãne si te ĩsima 're ab'manharĩ, ĩnhimirowasu'u zarina, da'ahâ na da te 're saze za'ra mono nherẽ, 'Re ihâimana u'âsi mono, iwẽ uptabi hã te te ĩma pisutu nherẽ, 'râwi te ĩsiwi simini tõ da.