1 Corĩtu 6 - ꞌRe Ihâimana Uꞌâsi Mono Zadawa Wasuꞌu

Isazei'wa norĩ hã sisada 're ihâimana za'ra mono zé wasu'u

¹ Ni'wa hã asiré isazei'wa nherẽ, marĩ hã te te aiwi 're 'mai'manharĩ wasété aba mono wa, sada 're ai'maihâimana za'ra wa'aba mono wamhã, e isazei'õ'wa norĩ u, te za 're isimroi wa'aba mo, marĩ te te aiwi 're i'manharĩ wasété aba mono zém na, tãma 're wasu'u za'ra wa'aba mono da, da'ãma rowairébé'wa norĩ ma. Mare di. I'uwaibaba õ di. 'Re ihâimana u'âsi mono nhib'a'uwẽ u si, te za 're isimroi wa'aba mo, ta norĩ si te te 're waihu'u za'ra mono da, marĩ hã te te aiwi 're i'manharĩ wasété za'ra wa'aba mono zém na hã, tãma 're wasu'u za'ra wa'aba mono da.

² Apto'oré si, da'ãma isipo'ozéb ãma, wa norĩ hã 'Re ihâimana u'âsi mono nhib'a'uwẽ norĩ hã, Cristuhu siré, wa za wapire na dama rowairébé za'ra ni, 're idahâimana wasété za'ra mono zém na hã. Oro ãne hã aima waihu'u pese za'ra wa'aba za. Ãne hã Cristuhu siré, wapire na za wa te dama rowairébé za'ra wamhã, e tawamhã ti'ab ré, marĩre hã asiré isazei'wa norĩ wi 're 'mai'manharĩ wasété aba mono wa, asisada 're ai'maihâimana aba mono wamhã, e aima waihu'u pese za'ra wa'aba õ di bété, i'uwaibaba tô sena asima ãma 're asiwaihu'u za'ra wa'aba mono zéb da hã, marĩ asiwi 're i'mai'manharĩ wasété aba mono zém na hã. Ãne hã tô aima waihu'u pese za'ra wa'aba di, ãma 're asiwaihu'u za'ra wa'aba mono zéb da hã.

³ Duréihã 'Re ihâimana u'âsi mono ma, hâiwa ãma romhuri'wa norĩ hã tiwi isipizari za'ra hã, wa za duré wapire na tãma rowairébé za'ra ni isiré, za da'ãma isipo'ozéb ãma hã. E ãne hã zahadu aima pibui prã za'ra wa'aba di bété. Tahawa, ti'ab ré, marĩ wa, wasisada 're wahâimana za'ra mono wamhã, wa za wawaimri wa te wasima 're rowaihu'u za'ra, apâ wa te wasima ãma 're rowẽ zani za'ra mono da. Ãne wamhã, wa za tô wa te wasima ãma 're uwaimrami za'ra.

⁴ Tahawa, marĩ hã asiré isazei'wai wi 're 'mai'manharĩ wasété aba mono wa, asisada 're ai'maihâimana za'ra wa'aba mono wamhã, e marĩ wa, te isazei'õ'wa norĩ u 're asisimroi wa'aba mo, ta norĩ si aiwasété na te te 're aiwaihu'u za'ra wa'aba mono da hã, ta norĩ hã asiré isazei'wa na 're hâimana za'ra mono õ nherẽ, dawasété na dawaihu'u'wa norĩ hã.

⁵ Ĩnhimiroti ma, aséb za'ra wa'aba da nherẽ, wa ãne na aima rowaihu'u za'ra wa'wa. E asiré isazei'wa, 're 'maihâimana mono ã bâ bété, aiwasété za'ra wa'aba na aiwaihu'u aba 'wa da hã.

⁶ E ãne hã i'uwaibaba bâ, te asiré isazei'wa 're aihâimana za'ra wa'aba mono nherẽ, asisada 're aihâimana za'ra wa'aba mo, isazei'õ'wa norĩ u si 're asisimroi wa'aba mono da, ta norĩ si te te 're aiwaihu'u za'ra wa'aba mono da, aiwasété aba na. E ãne hã i'uwaibaba, aima za'ra wa'aba hã.

⁷ Ãne zarina, asisada 're aihâimana za'ra wa'aba mono wa, da'ãma rowairébé'wa norĩ u, 're asisimroi wa'aba mono wamhã, isazei'wai hâimanazém na asima 're uwaimrami za'ra wa'aba mono õ di za. Ni'wam norĩ hã asiré isazei'wa nherẽ, te te aima 're rob'manharĩ wasété za'ra wa'aba mono wamhã, tãma ãma 're wa'rãmi za'ra wa'aba mono ãna, te za tô õne haré 're aihâimana za'ra wa'aba mo. Ni'wam norĩ hã asibrom na aiwi 're sipsaihuri za'ra wa'aba mono wamhã, tãma ãma 're wa'rãmi za'ra wa'aba mono õ di za duré. Tawapsi, te za asina ãma 're i'uwaimrami za'ra wa'aba mo, isazei'wai hâimanazém na hã.

⁸ Tane nherẽ, a norĩ wa'wa hã asiré isazei'wa nherẽ, dawasété na dawaihu'u'wai u, 're asisimroi wa'aba mono wa, te tô asima 're irob'manharĩ wasété za'ra wa'aba mo, 'râwi. Tahawa, te duré asima 're asimiza'repese za'ra wa'aba mo 'râwi, ãne na hã, asiré isazei'wa 're aihâimana za'ra wa'aba mono nherẽ.

^9-10 Tiwasété si te te 're i'manharĩ u'âsi za'ra mono norĩ hã, ta norĩ hã 'Re ihâimana u'âsi mono, da'ãma 're isib'a'uwẽ mono zé hã te te dame sina 're uwaimrami za'ra mono õ di za. E ãne hã, zahadu waihu'u za'ra wa'aba õ di bété. Ãne na hã taré 'râwi asima 're asadawa nhipese za'ra wa'aba mono õ di za. Dahâiba na dawasédé te te 're i'manharĩ za'ra mono norĩ hã, ta norĩ hã 'Re ihâimana u'âsi mono, da'ãma 're isib'a'uwẽ mono zém na, dame 're hâimana za'ra mono õ di za, duré 'Re ihâimana u'âsi mono upana, romhâiba 'manharĩ ãma 're iwata za'ra mono norĩ hã, duré damro na dawi 're isimisaihuri za'ra mono norĩ hã, duré aibâ si'uiwa na si'ãma 're iwasété za'ra mono norĩ hã, duré danhibrom na dawi 're isipsaihuri za'ra mono norĩ hã, duré danhibrom na te te 're ida'ruiwapari za'ra mono norĩ hã, duré âzézei'wa 're ihâimana za'ra mono norĩ hã, duré te te da'ãma 're iwasété za'ra mono norĩ hã, duré danhibrob zô dapãrĩ'wa norĩ hã. Ta norĩ hã dasiré 're hâimana za'ra mono õ di za, 'Re ihâimana u'âsi mono, da'ãma 're isib'a'uwẽ mono zéb ãma hã.

¹¹ Ãne na si, ma tô ni'wam norĩ a norĩ wa'wa aré 're aihâimana wasété u'âsi za'ra wa'aba mo, 're saze za'ra wa'aba mono õ ré hã. Tane nherẽ, 'Re ihâimana u'âsi mono hã Zezusihi dâ'âzém na, ma tô oto te te 're ai'upsõ za'ra wa'wa, aiwasété hawi. Ma tô duré te te 're aipisutu za'ra wa'wa, isib'a'uwẽ si oto ãma 're anomro wẽ wa'aba mono da. Aiwasédé hã te te oto ai'ãma 're i'ab'madâ'â aba mono õ zéb zarina, ma tô duré te te 're aiwẽsãmri za'ra wa'wa, Wanhib'apito Zezu Cristuhu zadawa para, 'Re ihâimana u'âsi mono pẽ'ẽzani nhimipawaptobzém na hã.

Dahâiba na 're idasiwasété za'ra mono zé wasu'u

¹² Ni'wam norĩ hã te ãne te te sima 're nharĩ za'ra: “Marĩ hã wa te 're 'manharĩ za'ra mono tõ da, 'Re ihâimana u'âsi mono te te wawi 're awẽ'õ mono õ nherẽ, wa norĩ zama, wa te wasiwi 're wẽ'õ za'ra mono õ di za, wa te 're 'manharĩ za'ra mono tõ da. Wa za tô wa te 're 'manharĩ za'ra, wa te wasima 're iwẽ za'ra mono zéb uwaibaba.” Ãne na te ni'wam norĩ hã te te sima 're nharĩ za'ra. Tane tô. Ta hã wẽ di. Tane nherẽ, te duré tô marĩ hã 're hâimana za'ra, iwẽ prã hã, 'Re ihâimana u'âsi mono te te wawi 're i'awẽ'õ mono õ hã. Tane nherẽ, taha si, wa te 're 'manharĩ za'ra mono õ di za. Duré wa hã marĩ hã te 're 'manharĩ mono tõ da, 'Re ihâimana u'âsi mono te te ĩwi 're awẽ'õ mono õ nherẽ, ãté taha zô si, wa za ĩsima te 're rob'ruiwapari u'âsi. Ãne tõ da, taha zarina 're ĩhâimana mono õ di za.

¹³ Ni'wam norĩ hã te duré ãne na te te sima 're nharĩ za'ra: “Wasa hã wadub 'reb da si, te wama 're hâimana za'ra. Duré wadu hã wasai ubumrozéb da si, te wama 're hâimana za'ra. Tane, te duré wahâiba hã misi wama 're hâimana za'ra wahâiba mono bâ, uburé marĩ hã siwa'ru wa te ãma 're i'manharĩ za'ra mono zéb da hã.” Ãne te ni'wam norĩ hã 'râwi te te si'ãma 're rosa'rata wasété za'ra, tihâiba na hã. Tane nherẽ, dasa hã duré dadu hã niwapsi te za 'Re ihâimana u'âsi mono hã uprosi zahuré si'uiwa na. Dasa hã da te 're huri mono wamhã, dawasédé, da te ãma 're 'manharĩ za'ra mono õ di. Tane nherẽ aihâiba na asiwi 're asimisaihuri za'ra wa'aba mono zéb da hã, aihâiba aimawi hã aima 're hâimana za'ra wa'aba mono õ di. Wanhib'apito ma, wa te ãma 're iromhuri pese za'ra mono zéb da si, te wahâiba hã wama 're hâimana za'ra. Taha si te wahâiba hã te te wama 're ab'madâ'â pese, Wanhib'apito hã.

¹⁴ Wanhib'apito hã dâ'â uptabi nherẽ, 'Re ihâimana u'âsi mono te te ihâiwa'utu ne, te za tiwaihu'u pese na wa'ahâiwa'utu. Tahawa, te wahâiba hã pire na wama 're hâimana za'ra oto, taré hãi õ wa.

¹⁵ A norĩ wa'wa hã aihâiba mono bâ, te oto Cristuhu nhib'a'uwẽ si 're anomro aba mo. Taha siré si, te oto duré 're aihâimana za'ra wa'aba mo. E ãne hã asina 're waihu'u za'ra wa'aba mono ã bâ bété. E tawamhã, Cristuhu nhib'a'uwẽ oto 're wanomro mono nherẽ, wa za pi'õ iwa'âbâ zô 're isisõmri mono hâiba me hã, wasina 're wasihâiba tob za'ra. Mare di.

¹⁶ Duré aibâ hã pi'õ iwa'âbâ zô 're isisõmri mono hâiba hã te te sina hâiba to wamhã, ihâiba hã misi ne oto, maparane ihâiba nherẽ. E ãne hã zahadu aima waihu'u za'ra wa'aba õ di bété. Duréihã 'Re ihâimana u'âsi mono zadawa 'mahârâ'wa, ma tô ãne na imreme na ãma rob'ui'éré, pi'õi wasu'u na hã: “Aibâ hã pi'õi me siré 're simi'wara mono wamhã, ihâiba hã misi ne oto, maparane ihâiba nherẽ. Misi tô oto ihâiba zahuré hã.”

¹⁷ Tane nherẽ, ni'wam norĩ hã Wanhib'apito te te sina 're hâiba tob za'ra mono wamhã, 'râwi te za isiré 're hâimana za'ra, ipẽ'ẽ 're.

¹⁸ Tahawa, ma'ãpé, dahâiba na dawasédé, da te 're i'manharĩ za'ra mono wi, asina 're asiptete u'âsi za'ra wa'aba mono. Dawasédé aimawi hã da te 're 'manharĩ za'ra mono wamhã, ãma 're dasihâiba wasété za'ra mono õ di. Aibâ norĩ hã pi'õ na tiwasédé te te 're 'manharĩ za'ra mono wapsi, te za ãma 're sihâiba wasété za'ra. Duré, pi'õ norĩ hã aibâ na tiwasédé te te 're 'manharĩ za'ra mono wapsi, te za duré ta norĩ hã ãma 're sihâiba wasété za'ra aiwa.

¹⁹ 'Re ihâimana u'âsi mono pẽ'ẽzani si, te oto aipẽ'ẽ 're ai'ãma 're sõrõwa za'ra wa'wa. Aipẽ'ẽ 're, te oto aima 're hâimana u'âsi za'ra wa'wa. 'Re ihâimana u'âsi mono hã ma tô te te aima 're sõmri za'ra wa'wa. Tahawa, aihâiba za'ra wa'wa hã ate za'ra wa'aba õ di oto. 'Re ihâimana u'âsi mono te si, te oto aihâiba za'ra wa'wa hã 're hâimana za'ra. E ãne hã zahadu asina waihu'u za'ra wa'aba õ di.

²⁰ E marĩ wa, aihâiba hã ate za'ra wa'aba õ di oto. 'Re ihâimana u'âsi mono, ma tô aiwa'âbâ za'ra wa'wa, Cristuhu dâ'âzém na. Tahawa, uburé marĩ hã aihâiba na tãma 're i'manharĩ wẽ za'ra wa'aba mono zém na, te za ãma 're aiwata u'âsi za'ra wa'aba mo, 'Re ihâimana u'âsi mono ãma hã.