1 Corĩtu 4 - ꞌRe Ihâimana Uꞌâsi Mono Zadawa Wasuꞌu

Paulu hã, Cristuhu zadawa wasu'u'wa na dama isiwasu'uzé wasu'u

¹ Wa hã Paulu, Apoluhu me, duré ni'wam norĩ me, wa Cristuhu ma si, wa te 're romhuri za'ra. Iwasu'uwẽ hã dama iwaihu'u'õ hã, i'uwaibaba si, wa te dama 're wasu'u za'ra mono da, ma tô wapisutu za'ra, 'Re ihâimana u'âsi mono hã. Taha na si, wanhimiromhurizéb za'ra hã. Tahawa, te za ãne na si wa'ãma 're irosa'rata za'ra wa'aba mo.

² Ni'wa hã isibro, da te tãma 're 'madâ'â mono da, te te sima da'maipisutu wamhã, e niha ihâimanazé hã za, tãma irob'madâ'â'wa da hã. Isib'apito ma, tãma umnhasi na, te za te te tãma 're rob'madâ'â wẽ, te te wẽsãmri da hã.

³ Wa hã bété. 'Re ihâimana u'âsi mono ma, ĩ'umnhasi na, wa tô te dama 're rowasu'u, Cristuhu wasu'uwẽ na hã. Tane nherẽ, a norĩ wa'wa hã ĩ'umnhasi na iwasu'uwẽ na te dama 're irowasu'u mono na asiwi ĩwaihu'u aba zéb zarina, asiwi ĩwẽsãmri aba zô, ĩsina 're ĩnhimnhasi mono õ di. Mare di. Duré ni'wam norĩ hã te te siwi ãma ĩwaihu'u za'ra zô, ĩsina 're ĩnhimnhasi mono õ di. Ĩzama, 're ĩsi'umnhasi mono na, iwasu'uwẽ hã te dama 're iwasu'u mono na hã 'râwi ĩsi'uihâ na ĩsiwaihu'u da hã, mare di.

⁴ Ãhã na hã, 'Re ihâimana u'âsi mono wi, te ãma i'upazém na hã marĩ õ di, ĩnhimirosa'rata 'remhã oto. E taha zarina, tãma ĩ'umnhasi sina, iwasu'uwẽ te dama 're iwasu'u mono zé, te wasu'u. Mare di. Wanhib'apito si te za ĩwaihu'u, tãma ĩ'umnhasi na hã, duré tãma ĩ'umnhasi õ na hã.

⁵ Tahawa, asiwi 're dawẽ'õ za'ra wa'aba mono õ di za, zahadu bâdâ hã wisi õ nherẽ. Wanhib'apito uburé za te te ida'awaihu'uzé wana, asiwi ĩwaihu'u aba zarina, asiwi ĩwẽ'õ za'ra wa'aba da, asima ĩ'ãma 're rosa'rata za'ra wa'aba mono õ di za, Wanhib'apito apâ wei morĩ õ ré hã. Ni'wam norĩ zama asiwi iwaihu'u aba zéb zarina, asiwi wẽ'õ za'ra wa'aba da, asima ãma 're rosa'rata za'ra wa'aba mono õ di za, bâtâ na Wanhib'apito za da'ãma isipo'ozé wana. Taha si te za dawi a'upsibi nhamra oto sõ'awi, uburé dapẽ'ẽ 're, 'râwi da te dasima 're irosa'rata za'ra mono zé hã. Marĩ hã bara na, da te 're 'madâ'â za'ra mono da, da te 're i'uiwẽ za'ra mono ne, te za Wanhib'apito hã sõ'awi oto dawi a'upsibi nhamra, uburé marĩ hã da te 're 'manharĩ za'ra mono da, da te dasima 're iwẽ za'ra mono zém na, danhimirosa'rada hã. Tawapsi te za 'Re ihâimana u'âsi mono hã wasu'u wẽ za'ra ni'wam norĩ hã, ti'ab ré tihâimana wẽ zém na te te tãma ãma 're uwaimrami za'ra mono wa, te te 're i'awaihu'u mono zéb zarina.

⁶ Ĩsisãnawã norĩ, te 're aipawaptob za'ra wa'aba mono da, wa tô ãne na aima ĩsiwasu'u za'ra wa'wa ĩhâimanazém na hã, Apoluhu hâimanazém na zama. 'Re ihâimana u'âsi mono nhimiroti 'rata na rob'ui'éré zarina si, 're aihâimana za'ra wa'aba mono da, wa tô ãne na aima roti za'ra wa'wa, wasiré rowahutu'wa norĩ hã tisiré norĩ nhimiroti nhipai u, wẽ uptabi newa, ta norĩ niwĩ 're aihâimana za'ra wa'aba mono wẽ te, asina 're aiwata za'ra wa'aba mono tõ da duré.

⁷ E asiré norĩ nhipai u 're aihâimana pire za'ra wa'aba mono bâ, te bété ãne na 're asi'madâ'â ze za'ra wa'aba mo. E marĩ te aré aima 're hâimana za'ra wa'wa, 'Re ihâimana u'âsi mono te te aima 're sõmri za'ra wa'aba mono õ 'wa'âhã. Marĩ iwẽ hã aima 're hâimana za'ra wa'aba mono õ di aré. Uburé iwẽ hã 'Re ihâimana u'âsi mono nhoprubzéb si, te oto aima 're hâimana za'ra wa'wa. E marĩ wa, te bété asina 're aiwata za'ra wa'aba mo, uburé marĩ iwẽ hã aima 're ihâimana za'ra wa'aba mono hã, 'Re ihâimana u'âsi mono nhoprubzéb õ newa, aihawim na aima 're wairébé aba mono newa.

⁸ A norĩ wa'wa hã, 'Re ihâimana u'âsi mono, Tipẽ'ẽzani na rowẽ te te aima 're ipisutu za'ra wa'aba mono zô, aiwi sô 're irowaptâ'â za'ra wa'aba mono õ na, te 'râwi 're asi'madâ'â ze za'ra wa'aba mo, dasa hã da te 're huri mono wa, da te 're i'mahâpãrĩ pese za'ra mono ne. E ãne bâ, te 'râwi asi'ãma 're irosa'rata ze za'ra wa'aba mo. Danhibro pese wa, marĩ zô dawi 're irowaptâ'â za'ra mono õ ne, te asina 're aiwata za'ra wa'aba mo, 'Re ihâimana u'âsi mono, Tipẽ'ẽzani na rowẽ te te aima 're ipisutu za'ra wa'aba mono zô, aiwi 're rowaptâ'â za'ra wa'aba mono õ newa. Ti'ai ãma danhib'apito norĩ hã tinhib'a'uwẽ norĩ ma, pire na 're ihâimana za'ra mono ne, te asiré isazei'wa norĩ ma aipire na 're aihâimana za'ra wa'aba mono na 're asi'madâ'â ze za'ra wa'aba mo, wa norĩ hã 'Re ihâimana u'âsi mono zadawa 'mahârâ'wa norĩ hã danhib'apito norĩ ne wapire na 're wahâimana za'ra mono õ nherẽ. E ãne hã i'uwaibaba bâ. Wẽ di tô. Tane hã aima wẽ za'ra wa'aba ze te bâ, taha na si 're aihâimana za'ra wa'aba mono, aipire na isazei'wa norĩ ma ãma 're aihâimana za'ra wa'aba mono da. Niha hã 'wa'âhã, wa aré tô wa norĩ zama wapire na asiré 're wahâimana za'ra wa'wa, uburé isazei'wa norĩ ma hã.

⁹ Wa norĩ hã Zezusihi zadawa wasu'u'wa na dama 're iwahâimana za'ra mono hã, isazei'wa norĩ ma, wawapure na damana wawi taré 're iwahâimana za'ra mono da si, ma tô te te 're wa'apisutu. Wa hã ãne na wa tô rosa'rata na hã ĩsina waihu'u. Ni'wam norĩ hã marĩ te te 're i'manharĩ wasété za'ra mono zéb zarina, te za da te dasima ãma 're roti za'ra, dasisõ'a da te 're simroi mono wa, ãma 're dawa'ẽ za'ra mono da. Tane duré, wa norĩ hã sõ'awi wa te dama 're sadawa wasu'u za'ra mono da, ma tô 'Re ihâimana u'âsi mono hã te te 're wa'apisutu, da te dasiwi 're wawẽ'õ za'ra mono wa, uburé dasisõ'a wa'ãma 're dawa'ẽ za'ra mono da nherẽ, duré hâiwa ãma 'Re ihâimana u'âsi mono ma, romhuri'wa norĩ nho'a zama.

¹⁰ Cristuhu wasu'uwẽ na si, wa te dama 're rowasu'u za'ra mono wa, te isazei'õ'wa norĩ hã wanhimiza'rese'õ na 're iwahâimana za'ra mono na te te wa'ãma 're rosa'rata upa za'ra. E a norĩ wa'wa hã, 'Re ihâimana u'âsi mono nhimiroti, wanhipai u aima waihu'u pese za'ra wa'aba bâ, te ãne hã 'râwi asimirosa'rada hã asi'ãma 're i'manharĩ za'ra wa'aba mo, Cristuhu ãma 're aihâimana za'ra wa'aba mono na. Duré wa norĩ hã isazei'õ'wa norĩ ma, wawapure na 're iwahâimana za'ra mono na, te ta norĩ hã te te wa'ãma 're rosa'rata za'ra. E a norĩ wa'aba si, tãma aipire za'ra wa'aba bâ, te bété 'râwi ãne na asi'ãma 're irosa'rata za'ra wa'aba mo. Duré wa norĩ hã dama wawapure na 're iwahâimana za'ra mono na, da te wa'ãma 're rosa'rata za'ra mono wa, da te dasiwi 're wawazéb za'ra mono õ di. Ãté a norĩ wa'aba si, da te 're aiwazé pese za'ra wa'aba mono na, te 'râwi asi'ãma 're irosa'rata ze za'ra wa'aba mo. E ãne hã i'uwaibaba. Mare di.

¹¹ Wa norĩ hã bété, iwasu'uwẽ na si, wa te dama 're irowasu'u za'ra mono norĩ hã. E niha 're iwahâimana za'ra mono zé hã. Ãhã na zama wa mra hã wa te 're sépata za'ẽtẽ za'ra, 'rubu zama. Wa'uza hâ'ratare ré si, wa duré 're wanomro. Te duré da te 're wahâ za'ra danhib'rata na, da te 're iwa'ruiwapari za'ra mono zéb zarina. Daro mono bâ 're wanomro mono ré, 're iwanhimi'wara mono zéb da, duré da te wama 're pisutu za'ra mono õ di. Hâiwi si, wa 're wanomro u'âsi.

¹² Wahâimanazéb da hã, wawasutu nherẽ, wa wanhib'rata na wa te 're romhuri pese za'ra. Duré da te wa'ãma 're wasété za'ra mono nherẽ, wa da'ãma 're wamreme zusi u'âsi, 'Re ihâimana u'âsi mono ma, iwẽ hã te te dama 're anhomri mono da. Duré da te wama 're rob'manharĩ wasété za'ra mono nherẽ, wa wanhiptete na õhõ ãma si 're wahâimana za'ra, asa wa te dama ãma 're wa'rãmi za'ra mono ãna.

¹³ Duré da te dasima 're wawasu'u wasété za'ra mono nherẽ, wa wamreme wẽ na si, wa te dama ãma 're wa'rãmi za'ra, wawaimri na. Duré, ropru hã da te dasiwi 're isa'wari za'ra mono ne, te da te dasiwi 're wawẽ'õ pese za'ra. Ãne 're iwahâimana za'ra mono zé hã, ãhã na hã.

¹⁴ E ãne na te aima iroti za'ra wa'aba zé ma, asiséb za'ra wa'aba da, wa tô ãne na aima ãma rob'ui'éré za'ra wa'wa. Mare di. Taha dai õ di. Taré ĩnhimiroti hã waihu'u pese za'ra wa'aba da, wa ãne na aima ãma rob'ui'éré za'ra wa'wa, ĩ'ra ne oto ĩma 're aihâimana za'ra wa'aba mono wa, ĩma asawi uptabi za'ra wa'aba wa.

¹⁵ Ãté da'ahâ na te oto da te aima 're roti u'âsi za'ra wa'wa, Zezusihi nhimiroti wẽ na hã, taha na si ãma 're anomro wẽ wa'aba mono da. Da'ra hã da te dasisô 're i'madâ'â pese za'ra mono ne, te ta norĩ hã te te 're ai'madâ'â pese za'ra wa'wa, Zezusi hã 're rẽme za'ra wa'aba mono tõ da. Tane nherẽ, ĩsiwaprosi wa aimama uptabi aba ne, aima 're ĩhâimana za'ra wa'wa. Iwasu'uwẽ na te aima 're irowasu'u za'ra wa'aba mono zéb zarina, Cristu Zezusi hã 're saze za'ra wa'aba mono wa, wa oto aimama uptabi aba ne, 're ĩhâimana, da'ra hã damama siwasutu hawi, dama 're ipoto za'ra mono ne.

¹⁶ Taha zarina, wa za oto aima roti za'ra wa'wa, Cristuhu nhirã zarina 're ĩmorĩ wẽ ne, oto 're anomro wẽ wa'aba mono da, aima ãma 're ĩsisanho za'ra wa'aba mono zéb zarina.

¹⁷ Taha da, wa tô Timotiu hã atẽme satõrĩ za'ra wa'wa, te te ãma 're aipawaptob za'ra wa'aba mono da. Ta hã ĩ'ra ne, oto ĩma 're hâimana mono wa, ĩma sawi uptabi di duré. Ta hã te Wanhib'apito si te te 're 'madâ'â pese, tiwi sipi'rai ãna. Ta hã atẽme wisi aba wapsi, te za Cristu Zezusihi ãma si 're ĩhâimana mono zém na ãma aipo're pu'u za'ra wa'wa, daro mono bâ isazei'wa norĩ hã 're isi'rã'õtõ mono norĩ ma, te 're iroti mono zém na zama.

¹⁸ Ni'wam norĩ hã 'Re ihâimana u'âsi mono nhimiroti na, ĩnhipai u te te 're iwaihu'u pese za'ra mono na, ma tô 'râwi 're si'madâ'â pire za'ra, asiré 're aihâimana za'ra wa'aba mono norĩ hã. Tahawa, ta norĩ ma ĩpahi za'ra newa, ma tô ĩ'ãma rosa'rata za'ra, atẽme wa'aba, za ãma ĩmorĩ su'u õ na hã. Taha zarina, ma tô duré 'râwi sina 're wata za'ra.

^19-20 Tane nherẽ, Wanhib'apito te te ĩma pisutu wamhã, wa za tô ãma atẽme ĩmorĩ su'u za'ra wa'wa, romhutu na. Ni'wam norĩ hã 'Re ihâimana u'âsi mono nhib'a'uwẽ 're nomro mono wamhã, timreme nhipese na Cristuhu wasu'uwẽ na te te dama 're rowasu'u za'ra mono õ di za, da te 're wapari ze za'ra mono da. 'Re ihâimana u'âsi mono pẽ'ẽzani, tiwaihu'u pese na te te 're ipawaptob za'ra mono zém na si, te za te te 're dapawaptob za'ra, da te ãma 're saze za'ra mono da. Taha zarina si, te za ãma 're hâimana wẽ u'âsi za'ra, ta norĩ hã. Tahawa, ãma atẽme ĩmorĩ za'ra wa'aba wamhã, wa za ĩsina aiwaihu'u za'ra wa'wa, aiwaihu'u pese na 'râwi 're i'asi'madâ'â ze za'ra wa'aba mono norĩ hã. 'Re ihâimana u'âsi mono pẽ'ẽzani, tiwaihu'u pese na te te 're aipawaptob za'ra wa'aba mono zéb zarina, sena na 're idapawaptob za'ra wa'aba mono na, wa za duré ĩsina aiwaihu'u za'ra wa'wa, sena na ãma 're idapawaptob za'ra wa'aba mono õ na zama. Asina 're aiwata za'ra wa'aba mono sina, aiwaihu'u pese na dama 're asiwasu'u za'ra wa'aba mono zép si, te waihu'u tõ da, wa za ãma atẽme ĩmorĩ za'ra wa'wa, sena na 'Re ihâimana u'âsi mono pẽ'ẽzani nhimipawaptobzéb zarina, 're aihâimana za'ra wa'aba mono na si, 'râwi te aiwaihu'u za'ra wa'aba da, ĩsi'uihâ na.

²¹ Ãne, wa tô aima ãma roti za'ra wa'wa. Tawamhã e ma hã te za asima iwẽ za'ra wa'wa. Atẽme ãma ĩmorĩ aba wamhã, e da'ra, da te 're ihâ za'ra mono ne, wa za ĩmreme na aihâ za'ra wa'wa, ĩnhimiroti hã 're wapari za'ra wa'aba mono õ 'ru te. Ãté wa za tô aihâ za'ra wa'wa, aihâimanazém na 're uwaimrami za'ra wa'aba mono õ wa. E ĩhâimanazém na atãma na wa za aima ĩhâimana za'ra wa'wa, ĩnhimizawi pese zéb zarina, ĩnhimiroti hã 're wapari pese za'ra wa'aba mono wẽ te. Ma'ãpé, 'râwi oto asi'uihâ na asima pisutu za'ra wa'aba, niha 're anomro aba mono zéb da hã.