1 Corĩtu 3 - ꞌRe Ihâimana Uꞌâsi Mono Zadawa Wasuꞌu

Paulu hã Apoluhu me, 'Re ihâimana u'âsi mono ma, te te 're iromhuri zahuré mono zé wasu'u

¹ Ĩsisãnawã norĩ, 'Re ihâimana u'âsi mono pẽ'ẽzani, ipẽ'ẽ 're, tãma 're ihâimana za'ra mono norĩ ma si, wa Zezusihi wasu'uwẽ wama ipire uptabi si te tãma 're wasu'u za'ra, dama isa'rese'õ hã. Tane nherẽ, ai'rata 're ĩnhamra aba mono ré, ãne na te aima 're rowasu'u waihu'u za'ra wa'aba mono õ di. E marĩ wa. Isazei'õ'wa norĩ 're ihâimana za'ra mono ne, zahadu 're aihâimana za'ra wa'aba mono wa, duré ai'uté hã marĩ te te 're isa'rese za'ra mono õ ne, Zezusihi wasu'uwẽ hã 're wapari za'ra wa'aba mono nherẽ, asima 're waihu'u pese za'ra wa'aba mono õ wa.

² Ai'uté hã tisai uptabi na 're saihuri waihu'u mono õ wa, te za tina hâiwa'u si te te 're wapsõmri za'ra. Ina hã isai uptabi hã te te tãma 're sõmri waihu'u za'ra mono õ di. Tane, wa tô wa hã roti iwapure na si te aima 're roti za'ra wa'wa, Zezusihi wasu'uwẽ na hã, zahadu aima pibui prã za'ra wa'aba wa, 're iwaihu'u pese za'ra wa'aba mono zéb da hã. Ãhã na hã bété. Zahadu tô aima waihu'u pese za'ra wa'aba õ di.

³ E marĩ wa. Isazei'õ'wa norĩ 're ihâimana za'ra mono zéb zarina, zahadu 're anomro aba mono wa. Tahawa, te zahadu 're asi'ruiwapari za'ra wa'aba mo, marĩ na. Te duré 're asisada'âbâ u'âsi za'ra wa'aba mo. Ãne na 're aihâimana za'ra wa'aba mono zé hã, e marĩ te aima wasu'u za'ra wa'wa. Cristu hã 're saze za'ra wa'aba mono õ ré, aiwasété na 're aihâimana za'ra wa'aba mono zé, zahadu 're irẽme waihu'u za'ra wa'aba mono õ zé, te aima wasu'u za'ra wa'wa, isazei'õ'wa norĩ 're ihâimana za'ra mono zém ne hã.

⁴ Ni'wam norĩ me asiré 're aihâimana za'ra wa'aba mono nherẽ, te ãne dama 're asiwasu'u za'ra wa'aba mo: “Wa norĩ hã Pauluhu nhimiroti si, wa wa te 're 'madâ'â za'ra.” Duré ni'wam norĩ hã te ãne 're siwasu'u za'ra: “Wa norĩ hã Apoluhu nhimiroti si, wa wa te 're 'madâ'â za'ra.” Ãne na dama 're asiwasu'u za'ra wa'aba mono wamhã, e marĩ te wasu'u. Tô isazei'õ'wa norĩ 're ihâimana za'ra mono zém na, zahadu 're aihâimana wasété za'ra wa'aba mono zé, te aima wasu'u za'ra wa'wa.

⁵ Tazahã, ãhã zarina si te za wa'ãma 're irosa'rata u'âsi za'ra wa'aba mo. Wa norĩ hã 'Re ihâimana u'âsi mono ma si, wa te 're iromhuri mono, wa 're wahâimana. Iwasu'uwẽ na, wa te aima 're irowasu'u za'ra wa'aba mono zéb zarina, te oto asina 're i'umnhasi za'ra wa'aba mo, Wanhib'apito hã. Ta hã te te wama ipisutuzéb zarina si, wa wa te tãma 're romhuri pese. Taha da si, wa wa norĩ hã 're wahâimana.

⁶ Wa hã Paulu, buru na da te dasima 're robdi'i za'ra mono õ ré, da te 're irobzuri mono ne, wa tô dawana te aima 're rowasu'u za'ra wa'wa, Cristuhu wasu'uwẽ na hã. Duré, da te 're robzuri mono pari, da te oto 're irobdi'i za'ra mono ne, ma tô Apolu hã ĩza'u hã te te aima ãma 're rowasu'u wẽ za'ra wa'wa. Tane nherẽ, 'Re ihâimana u'âsi mono si waihu'u pese di, te te 're i'aipawaptob za'ra wa'aba mono zéb da hã, ãma 're aihâimana prédub za'ra wa'aba mono da, Zezusihi si asina 're umnhasi u'âsi za'ra wa'aba mono da. Buru na hã 'Re ihâimana u'âsi mono waihu'u pese na si, dama 're iro'wanhipré za'ra mono ne, ma tô 'Re ihâimana u'âsi mono si te te 're aipawaptob za'ra wa'wa, ãma 're aihâimana prédub za'ra wa'aba mono da.

⁷ Tahawa, robzuri'wa norĩ ne, iwasu'uwẽ na te te dama 're irowasu'u 'rata za'ra mono norĩ hã, pire na 're hâimana za'ra mono õ di. Duré robdi'i'wa norĩ ne, daza'u te te dama ãma 're irowasu'u za'ra mono norĩ hã, duré dama pire na 're hâimana za'ra mono õ di. 'Re ihâimana u'âsi mono si, te pire uptabi na 're hâimana u'âsi, taha si te te 're da'apawapto wẽ mono wa, Zezusihi ne dahâimana prédup sina, oto 're idahâimana za'ra mono zéb da hã.

^8-9 Robzuri'wa norĩ hã robdi'i'wa norĩ me, tãma 're iro'wanhipré za'ra mono da si, te aiwa misi haré siré te te 're romhuri za'ra. Tane duré, wa hã iwasu'uwẽ na te aima 're rowasu'u 'rata za'ra wa'aba mono wamhã, duré Apolu hã ĩza'u te te aima ãma 're rowasu'u za'ra wa'aba mono wamhã, aiwa wa tô wa zahuré, wa te wasima 're aiwẽ za'ra wa'wa, iwasu'uwẽ hã 're waihu'u pese za'ra wa'aba mono da. 'Re ihâimana u'âsi mono ma si, wa wa zahuré, wa te tãma 're romhuri, aiwa. Tahawa, wa te tãma 're iromhuri mono zéb zarina, te za 'Re ihâimana u'âsi mono hã wapawa'â, iwẽ uptabi na. Duré daburu hã, e 'wa te hã. E ãma iromhuri'wa norĩ te hã, buru hã. Mare di. Misire te itede'wa na 're hâimana, buru tede'wa hã. Tane duré, a norĩ wa'wa hã ĩnhib'a'uwẽ, 're anomro aba mono õ di. Duré Apoluhu nhib'a'uwẽ, 're anomro aba mono õ di. Mare di. 'Re ihâimana u'âsi mono nhib'a'uwẽ si, te oto 're aihâimana za'ra wa'aba mo. Ãne wa za duré aima ãma romnhimiré'é za'ra wa'wa, 'ri na. 'Ri hã 'ri'wa norĩ tei õ di. 'Ri tede'wa te, 'ri hã. Tane, a norĩ wa'wa hã wanhib'a'uwẽ, 're anomro aba mono õ di, iwasu'uwẽ na, wa te aima 're rowasu'u za'ra wa'aba mono nherẽ. E marĩ wa. 'Re ihâimana u'âsi mono nhib'a'uwẽ si, oto 're anomro aba mono wa.

¹⁰ 'Ri na romhuri'wa norĩ hã 'ri na'rata uimrehẽne, te za siwi 'manha, sipese na. Tane duré wa hã, ĩnhimiromhuri wẽ na, wa tô sãna'rata, te aima 're irowasu'u za'ra wa'aba mono na hã, Cristuhu wasu'uwẽ na, 'Re ihâimana u'âsi mono, tiwaihu'u pese na te te oto 're ĩpawapto mono zéb zarina. Duré 'ri na'rada hã da te dasiwi 'manharĩ pari, ihâiba amo 'ri'wa norĩ isisiwi te te oto siwi i'ri ne, tane te duré ni'wam norĩ hã te te aima ãma 're rowasu'u za'ra wa'wa, ĩza'u hã. 'Ri na'rata 'manharĩ nhisiwi, da te dasiwi 'ri wamhã, pibui pese na te za dasiwi 'ri ni, marĩ iwẽ na si hã oto. Tane ni'wam norĩ hã Cristuhu wasu'uwẽ na te te dama 're rowasu'u za'ra mono wamhã, pibui pese na te za oto te te dama ãma 're rowasu'u za'ra, i'uwaibaba si.

¹¹ 'Ri'wa norĩ hã, 'ri na'rata nhana'rada te te siwi 'manharĩ wamhã, misi haré iwẽ na si te za tô siwi 'manha. Tane duré, misire iwasu'uwẽ hã te 're hâimana, dawana te aima 're iwasu'u za'ra wa'aba mono hã, tô õ hã Zezu Cristuhu wasu'uwẽ hã. Iwasu'u aimawi hã 're 'maihâimana mono õ di, da te ãma 're saze za'ra mono wa, 'Re ihâimana u'âsi mono te te ãma 're ida'anho'reptui mono zéb da hã.

^12-13 Ni'wam norĩ hã, 'ri na'rata 'manharĩ nhisiwi te te siwi 'ri wamhã, ãté marĩ hã unhama ro'o na 're isi'unhama mono õ na si, te za siwi 'ri, iwa'âbâ za'ẽtẽ na, ẽtẽ waipo pré oru na, duré ẽtẽ waipo prã prata na, duré ẽtẽ waipo na. Ãté ihâiba amo norĩ hã te za marĩ iwa'âbâ surure na si siwi 'ri, unhama wa iro'o pese na si, wede na hã, duré du na hã, duré amnho teihi na hã. Tawamhã nimahã na 'ri hã ro'o nherẽ, si'unhama õ wamhã, te za waihu'u za'ra ni, marĩ iwẽ na si 'ri'wa norĩ hã te te siwi i'manharĩ na hã. Tazahã si'unhama wamhã, te za marĩ iwẽ prã na si te te siwi i'manharĩ na waihu'u za'ra ni. Tane te ni'wam norĩ hã Cristuhu wasu'uwẽ na, i'uwaibaba si te te dama 're rowasu'u za'ra. Duré ni'wam norĩ hã senai'õ na te te dama ãma 're roti za'ra. Tawamhã niwapsi te za 'Re ihâimana u'âsi mono hã pibu za'ra, Zezusihi wasu'u na te te dama 're irowasu'u za'ra mono zé hã, pé tô sena zô. Za da'ãma isipo'ozéb ãma, te za pibu za'ra. Tawamhã te za waihu'u za'ra, sena na Cristuhu wasu'uwẽ na te te dama 're irowasu'u za'ra mono norĩ hã, duré senai'õ na te te dama ãma 're irowasu'u za'ra mono norĩ zama.

¹⁴ 'Ri'wa norĩ hã marĩ iwẽ na si te te siwi 'ri wa, unhama ro'o na zata õ wamhã, 'ri tede'wa hã te za waihu'u, tiwi izata õ na hã, tãma 're isab u'âsi mono na hã. Taha zarina, te za 'ri'wa norĩ ma, marĩ iwẽ hã tãma sõmri za'ra, iwa'rãmi. Tane duré, ni'wam norĩ hã iwasu'uwẽ na tô sena na te te dama 're irowasu'u za'ra mono zém na, 'Re ihâimana u'âsi mono, te te waihu'u za'ra wamhã, tawapsi te za iwẽ hã tãma sõmri za'ra iwa'rãmi, za da'ãma isipo'ozéb ãma hã.

¹⁵ Duré 'ri'wa norĩ hã marĩ iwẽ prã na si te te siwi 'ri wa, unhama ro'o na zata wamhã, 'ri tede'wa nhoprubzé hã te te sina uwaimrami za'ra õ di za, 'ri'wa norĩ hã. Te za simini za'ra, 'ri tede'wa nhoprubzé hã. Tane duré, ni'wam norĩ hã taré ãma 're datob'uzu za'ra mono da, Cristuhu wasu'uwẽ na te te dama 're rowasu'u za'ra mono wamhã, 'Re ihâimana u'âsi mono iwẽ hã te te tãma 're sõmri za'ra mono õ di za iwa'rãmimhã, za da'ãma isipo'ozéb ãma hã. Ta norĩ hã te za tô simini za'ra. 'Re ihâimana u'âsi mono nhoprubzé hã za te te simini za'ra nherẽ, tane nherẽ, te za tô sõ'reptu za'ra, ropipa hawi. Ãté ni'wa hã 'ri para sãmra ré, te za isõrõwa hã iré ãro. Tawamhã ãté unhama ro'o za'ẽtẽ 'rowim nherẽ, te za watobro rob u, sisõ'reptu da. Tawamhã aré dâ'â da nherẽ, te za 'râwi sisõ'reptu. Tane, ni'wam norĩ hã taré ãma 're datob'uzu za'ra mono da, Cristuhu wasu'uwẽ na te te dama 're irowasu'u za'ra mono norĩ hã, ropipa u si'aba'ré da nherẽ, te za 'Re ihâimana u'âsi mono hã sõ'reptu za'ra, Cristuhu zazei'wa 're hâimana za'ra mono wa. Tinhoprubzé hã za te te tãma sõmri za'ra dai õ nherẽ, te za tô ta norĩ hã sõ'reptu za'ra, 'Re ihâimana u'âsi mono hã.

¹⁶ Duréihã 'Re ihâimana u'âsi mono nhorõwa 'ri 're, ma tô õ hã dama 're hâimana, 'ri iwẽ uptabi wa. Tane te oto aipẽ'ẽ 're, ai'ãma 're sõrõwa za'ra wa'wa. Ipẽ'ẽzani hã te oto duré aipẽ'ẽ 're, 're sãmra u'âsi za'ra wa'wa. E ãne hã 'râwi asina waihu'u za'ra wa'aba õ di bété.

¹⁷ 'Re ihâimana u'âsi mono hã tite da si, ma tô sima pisutu, ti'ai ãma isõrõwa 're, 'ri 're wa'wa hã siwaprosi ãma 're hâimana mono da, wẽ uptabi na. Tane ma tô duré a norĩ wa'wa hã aipisutu za'ra wa'wa, isib'a'uwẽ si oto 're anomro aba mono da, taha ãma si 're aihâimana wẽ u'âsi za'ra wa'aba mono da. Tahawa, ni'wam norĩ hã apâ te te 're aiwasété za'ra wa'aba mono wamhã, 'Re ihâimana u'âsi mono si te za ta norĩ hã te te 're a'uprosi.

¹⁸ A norĩ wa'wa hã aihâimanazé senai'õ na, taré 'râwi asima 're asadawa nhipese za'ra wa'aba mono õ di za. Ni'wam norĩ hã asiré 're aihâimana za'ra wa'aba mono nherẽ, te rosa'rada hã te te si'ãma 're upa za'ra, waihu'u pese newa, ti'ai ãma isazei'õ'wa norĩ nhimirowaihu'u pese si te te 're waihu'u za'ra mono nherẽ, te te sima 're i'ruiwapari za'ra mono hã. 'Re ihâimana u'âsi mono nhimiroti iwẽ uptabi hã ta norĩ te te 're waihu'u za'ra mono õ nherẽ, te 'râwi waihu'u pese newa, te te si'ãma 're rosa'rata upa za'ra, asiré 're i'aihâimana za'ra wa'aba mono norĩ hã. Tahawa, 'Re ihâimana u'âsi mono nhimiroti iwẽ uptabi zô si, te za asima 're asõpré u'âsi aba mo, asimiza'rese sina 're aihâimana za'ra wa'aba mono da. Isazei'õ'wa norĩ hã asimiza'rese ãna 're aihâimana za'ra wa'aba mono newa, te za te te ai'ãma 're rosa'rata upa za'ra wa'wa. Tane nherẽ, te za tô 're aihâimana wẽ za'ra wa'aba mo, asimiza'rese sina.

¹⁹ Ti'ai ãma isazei'õ'wa norĩ hã tinhimirowaihu te te sima 're i'ruiwapari u'âsi za'ra mono hã, tarére 'Re ihâimana u'âsi mono ma hã. Duréihã ma tô ãne na ni'wa hã 'Re ihâimana u'âsi mono ãma rob'ui'éré siro, ibaihâ na hã: “'Re ihâimana u'âsi mono hã te isazei'õ'wa norĩ nhimirowaihu'u na 're ihâimana za'ra mono norĩ ma, te te tãma 're rob'manharĩ za'ra, tinhimirowaihu'u pese na, 'râwi 're sisimini za'ra mono da.”

²⁰ Apito Dawi hã ma tô duré ãne na ãma rob'ui'éré siro, duréihã: “Ĩnhib'apito ma si, 'Re ihâimana u'âsi mono ma si, waihu'u pese di, ti'ai ãma isazei'õ'wa norĩ nhimirowaihu hã marĩ da, ihâimana õ na hã. Tarére tãma hã, isazei'õ'wa norĩ nhimirowaihu hã.”

^21-22 Ni'wam norĩ hã asiré 're aihâimana za'ra wa'aba mono hã te sina 're wata za'ra mono sina, te te sima 're nharĩ za'ra, ãne: “Pauluhu nhimiroti si, wa za wa norĩ hã wa te 're 'madâ'â za'ra, uburé rowahutu'wa norĩ nhimiroti nhipai u, wẽ uptabi wa.” Ni'wam norĩ hã te duré ãne te te sima 're nharĩ za'ra: “Wa norĩ hã Apoluhu nhimiroti si, wa za wa te 're 'madâ'â za'ra, uburé rowahutu'wa norĩ nhimiroti nhipai u, wẽ uptabi wa, wama za'ra hã.” Ãne na 'râwi asima 're rosa'rata za'ra wa'aba mono õ di za. Wa hã Paulu, duré Apolu, duré Pedru, duré uburé wasiré rowahutu'wa norĩ zama, simisutu wa wasiré wa te aima 're romhuri za'ra wa'wa, Zezusi hã 're isazei pese za'ra wa'aba mono da si. Uburé marĩ hã ti'ai ãma 're ihâimana za'ra mono hã, te aima 're hâimana za'ra wa'wa. Aihâiba ré, 're aihâimana za'ra wa'aba mono zé hã te duré aima 're hâimana za'ra wa'wa, Zezusihi ãma si 're i'anomro aba mono zéb da hã. 'Re i'atâ'â za'ra wa'aba mono zé hã, te duré aima 're hâimana za'ra wa'wa. Ãhã na uburé marĩ hã ai'ãma 're iromhâimana za'ra wa'aba mono zé hã, te aima 're hâimana za'ra wa'wa, za ai'ãma 're iromhâimana za'ra wa'aba mono zéb zama, 'Re ihâimana u'âsi mono te te aima 're ipisutu za'ra wa'aba mono zéb zarina, Zezusihi si 're sazei pese za'ra wa'aba mono da. Ãne te uburé marĩ hã aima 're hâimana za'ra wa'wa, isazei'wa norĩ ma hã.

²³ Duré a norĩ wa'wa hã te Cristuhu ma si 're aihâimana za'ra wa'aba mo, isib'a'uwẽ na hã. Ta hã, 'Re ihâimana u'âsi mono te te pisutu wa, ma tô wei mo ti'ai u, Danho'reptui'wa da hã. Tahawa, Cristuhu nhib'a'uwẽ na si, te za asima 're asiwasu'u za'ra wa'aba mo. Wanhib'a'uwẽ na, asima 're asiwasu'u za'ra wa'aba mono õ di za.