1 Corĩtu 10 - ꞌRe Ihâimana Uꞌâsi Mono Zadawa Wasuꞌu

Romhâiba 'manharĩ ãma 're idawata za'ra mono zé wasu'u

¹ Ĩsisãnawã norĩ, ãne hã wa za oto aima ãma rob'rãzarõtõ za'ra wa'wa, aima ãma ĩpo're pu'u za'ra wa'aba zém na, ãma 're aipo're simrami za'ra wa'aba mono tõ da. Duréihã wahi'rata norĩ Mozési hã Ezitu hawi te te sani za'ra wamhã, 'Re ihâimana u'âsi mono hâiwa'a na te isõwab za'ra hã mo, bâdâdi te te tãma wasu'u za'ra mono da, te te 'madâ'â pese za'ra mono sina. Â pré na pu'u nhisi wa'wai baba, ma tô duré te te simro, rob'ré na, zara u te te saprĩ za'ra da, ezipsiu norĩ wi hã, te te sõ'reptu za'ra da.

² Ãne na hâiwa'a 'rowi 're danomro mono wa, duré â wa'wai baba rob'ré na da te saprĩ za'ra wa, ma tô Mozésihi ãma uburé da te ãma 're sasõmri za'ra, wa norĩ hã â dawabzuri, wa te 're 'manharĩ za'ra mono wa, Cristuhu ãma, wa te oto 're isasõmri za'ra mono ne.

³ Duré a'ubuni wi 're danomro mono ré, 'Re ihâimana u'âsi mono, hâiwa hawi te te 're idapawapto mono na, ma tô dasa da te 're huri, aihĩni.

⁴ Â hã 'Re ihâimana u'âsi mono te te dama i'õb za'ra mono na ma tô duré da te 're âhuri, aihĩni pese. Ẽtẽ zahâbâ itõmo wawẽ sipo'ozém hawi 're ipu'u mono na, ma tô da te 're âhuri, isimipawaptobzéb zarina. Ẽtẽ zahâbâ hã a'ubuni wi 're isa mono na, â hã da te ãma 're i'âhuri mono ne, ma tô Cristu hã 'râwi dasiré 're hâimana, te te 're da'apawapto mono da.

⁵ Tane nherẽ, ãne na 'Re ihâimana u'âsi mono te te 're dapawapto mono nherẽ, ma tô da'ahâ na siwi da'awẽ'õ, dapo're ãna 're danomro mono 'ru te. Tahawa, a'ubuni wi 're danomro mono ré, ma tô te te 're da'a'uprosi, danhimizahâri mono sidâpâsi.

⁶ E marĩ, te tawamhã wama wasu'u za'ra, ãne na wahi'rata norĩ wasu'u hã. Ta norĩ ne, wawasété si, wa te wasima 're 'ruiwapari za'ra mono tõ da, te wama wasu'u za'ra.

⁷ Duré ta norĩ ne, romhâiba 'manharĩ ãma waihu'u pese newa, ãma 're idawata za'ra mono ãma, 're wawata za'ra mono tõ da, te duré wama wasu'u za'ra. Duréihã 'Re ihâimana u'âsi mono zadawa 'mahârâ'wa, ma tô ãne na ibaihâ na ãma rob'ui'éré: “Tawamhã dato hã ma tô dasiwi 'manharĩ ni, powawẽ hâiba ne, oru 'manharĩ ãma idawata za'ra zéb da hã. Tahawa, ma tô duré siwa'ru ãma apese za'ra ni, dahâimana wasété si dama wẽ za'ra wa.”

⁸ Ta wahi'rata norĩ hã ahâ na ma tô duré aibâ norĩ pi'õ na tiwasédé hã 'manharĩ za'ra. Ãne wa, ma tô duré 'Re ihâimana u'âsi mono hã da'uprosi, 23 miu na dahâiba na. Tahawa, wa norĩ wawasédé hã ãne na wa te 're 'manharĩ za'ra mono õ di za, wahi'rata norĩ ne.

⁹ Ta norĩ hã ma tô duré tiwasédé hã 'manharĩ za'ra, 'Re ihâimana u'âsi mono hã niha te te tãma rob'manharĩ za'ra õ zô, te te pibu za'ra da. Ãne 'ru te, ma tô duré wahi nhipsari na hã da'ahâ na da'uprosi, 'Re ihâimana u'âsi mono hã. Ãne na hã wa norĩ zama, wa te 're pibu za'ra mono õ di za, Wanhib'apito hã, wawasédé wa te 're 'manharĩ za'ra mono nherẽ, niha te te wama 're arob'manharĩ mono õ zô.

¹⁰ Wahi'rata norĩ hã ma tô duré Mozésihi ma nharĩ wasété za'ra. Ma tô duré taha wamhã tãma aiwapsari za'ra. Tahawa, ma tô 'Re ihâimana u'âsi mono hã hâiwa ãma tãma iromhuri'wa hã we satõ, Dapãrĩ'wa na isisi hã, ta hã te te da'uprosi da. Ãne õ'umnhasite, wa norĩ zama hã 'Re ihâimana u'âsi mono ma, wa te tãma 're nharĩ wasété za'ra mono õ di za.

¹¹ Ãne ma tô wahi'rata norĩ ma tiromhâiba duréihã, tiwasédé te te 're i'manharĩ za'ra mono zéb zarina, 'Re ihâimana u'âsi mono te te 're ihâ za'ra mono zém na, da te 're waihu'u za'ra mono da. Ma tô duré ãne na ni'wa hã ãma rob'ui'éré, ãma 're iwasipo're pu'u za'ra mono zéb da hã, isine wa te 're 'manharĩ za'ra mono tõ da. Romhuture di oto, waré za'ra irob'rãsutuzéb u hã. Tahawa, wa za wanhimiza'rese 're wahâimana u'âsi za'ra.

¹² Tahawa, Cristuhu ãma asiptete sina 're aihâimana za'ra wa'aba mono na, 're asi'madâ'â ze za'ra wa'aba mono wamhã, te za asimiza'rese sina pé 're aihâimana za'ra wa'aba mo, aiwasété u apâ 're airere'e aba mono tõ da.

¹³ Tô sena, asiptete sina ãma 're anomro u'âsi aba mono zô, 'Re ihâimana u'âsi mono hã te te 're aipibu za'ra wa'aba mono wamhã, aimawi na te te 're aipibu za'ra wa'aba mono õ di za, ipire uptabi na hã. Tô õhõ na si te te 're ida'apibui mono zém na si, te za tô te te 're aipibu za'ra wa'wa. 'Re ihâimana u'âsi mono hã uburé wama umnhasi za'ra di, marĩ na uburé te te wama 're i'aropisutu mono zém na hã. E tawamhã, asiptetezém nhipai u, te za ipire uptabi na te te aipibu na 're sahu za'ra wa'wa, aiwasété u apâ tiwi 're airere'e aba mono da. Mare di. Tô sena, asiptete sina ãma 're anomro u'âsi aba mono zô, te te 're aipibu za'ra wa'aba mono wamhã, te za niha te te aima 're pisutu za'ra wa'wa, rowẽ ré ihawi 're aiwairébé aba mono zéb da hã, õne haré asiptete sina ãma 're anomro u'âsi aba mono da.

¹⁴ Tahawa, ĩsisãnawã norĩ, ĩma asawi pese za'ra wa'aba norĩ hã, waihu'u pese newa romhâiba 'manharĩ ãma 're idawata za'ra mono zém na, da'ãma 're sasõmri za'ra wa'aba mono õ di za. Taha nhiti te za 're aihâimana u'âsi za'ra wa'aba mo.

¹⁵ A norĩ wa'wa hã te oto asimiza'rese 're aihâimana za'ra wa'aba mo, tô. Tahawa, ãhã na te aima ãma irowasu'u za'ra wa'aba zém na, te za ãma 're irosa'rata pese za'ra wa'aba mo, i'uwaibaba te ãma aima 're i'a'uwaimrami aba mono zô.

¹⁶ Zezusi hã wazada idâ'âzém na 're iwasipo're pu'u za'ra mono zéb da, wasiré 're wasi'rã'õtõ mono wa, 'Re ihâimana u'âsi mono ãma 're wawata za'ra mono pari, wa za hâsizém na uwa 'rãi wa'u isé hã wa te 're âhuri. Ãne hã wasiré, wa te 're âhuri mono wamhã, Cristuhu wi iwapru hã tiwi pu'u wa, wazada idâ'âzéb zarina, te rowẽzé hã wahâiba mono bâ wama 're hâimana za'ra. Duré i'u'ẽne hã wasiré, wa te 're huri mono da, wa te wasima 're wẽ'ẽ za'ra mono wamhã, Cristu hã da te dasiwi hâibapru wa, wazada idâ'âzéb zarina, te duré wahâiba mono bâ rowẽzé hã wama 're hâimana za'ra.

¹⁷ Zezusi hã wazada idâ'âzém na 're wasipo're pu'u za'ra mono da, wasiré 're wasi'rã'õtõ mono wamhã, wa'ahâ nherẽ, wa za i'u'ẽne hã wa te wasima 're wẽ'ẽ za'ra, misi nherẽ, wa te 're ihuri mono da hã. E marĩ te wama wasu'u za'ra, misi i'u'ẽne hã. Wa norĩ hã wasiré isazei'wa norĩ hã wa'ahâ nherẽ, simisutu Cristuhu siré 're iwahâimana za'ra mono zé, te wama wasu'u za'ra. Misi dahâiba ne oto 're iwahâimana za'ra mono zé, te duré wama wasu'u za'ra.

¹⁸ Izaraéu nhihudu norĩ hã bété. Ta norĩ hã 'Re ihâimana u'âsi mono ma, 're sõprub za'ra mono da, tinhimizama te te 're simroi mono wa, wedeza ne na tãma danhoprubzé nomrizé nhisiwi, da te 're zata za'ra mono õ ré, te za suru na te te sima 're po'o za'ra, inhi hã, ãma 're saihuri mono da. Ãne wamhã, 'Re ihâimana u'âsi mono siré te za 're hâimana za'ra. Tane duré, a norĩ wa'wa hã waihu'u pese newa, romhâiba 'manharĩ ãma 're dawata za'ra mono da, danhimizama da te tãma 're isõmri za'ra mono nhi na, dasiré ãma 're asaihuri aba mono wamhã, te duré dasiré ãma 're aiwata za'ra wa'aba mo, romhâiba 'manharĩ ãma. E ãne hã aima wẽ za'ra wa'aba di. Mare di. Ta hã wẽ õ di, ãma 're i'aiwata za'ra wa'aba mono hã, dame.

¹⁹ Ãne na te aima ãma irowaihu'u za'ra wa'aba mono zé hã, e marĩ te wama wasu'u za'ra. E romhâiba 'manharĩ hã, 'Re ihâimana u'âsi mono, waihu'u pese na 're ihâimana mono ne, 're ihâimana za'ra mono zé, te wama wasu'u za'ra. Mare di. Duré dasa hã romhâiba 'manharĩ ma, da te 're isõmri za'ra mono hã, e pire na te wama 're hâimana za'ra. Mare di. Ta hã wama za'ra hã, tarére hã.

²⁰ Ãne si, wa za duré aima ãma rowaihu'u za'ra wa'wa. Isazei'õ'wa norĩ hã wedeza ne na dasa te te 're zata za'ra mono wamhã, 'Re ihâimana u'âsi mono ma, ta norĩ hã ãma 're sõprub za'ra mono õ di. Wa'uburé norĩ ma si, te ta norĩ hã tãma ãma 're sõprub za'ra, ãma 're iwata za'ra mono da hã. Tahawa, a norĩ wa'wa hã dasa, ta norĩ ma, da te 're isõmri za'ra mono na ãma 're asaihuri aba mono wamhã, wa'uburé norĩ ãma si hã te za ãhã wamhã 're aihâimana za'ra wa'aba mo. Tahawa, ãne hã dame 're 'manharĩ za'ra wa'aba mono da, wa hã te ai'ãma 're rosa'rata za'ra wa'aba mono õ di. Mare di.

²¹ A norĩ wa'wa hã Cristuhu zazei'wa oto 're anomro aba mono wa, te tô asiré 're asi'rã'õtõ aba mo, uwa 'rãi wa'u isé hã asiré 're âhuri aba mono da, hâsizém na, Wanhib'apito wi, iwapru tiwi pu'u wa, wazada idâ'âzém na ãma 're i'asipo're pu'u u'âsi za'ra wa'aba mono zéb da hã. Tahawa, wa'uburé norĩ ãma 're dawata za'ra mono da, marĩ hã dasiré da te 're âhuri mono wamhã, ãma dame 're aihâimana waihu'u za'ra wa'aba mono õ di za, ta norĩ nhimihâsizém na isiré 're âhuri aba mono tõ da. Duré Wanhib'apito hâiba, da te dasiwi hâibapru wa, wazada idâ'âzém na ãma 're asipo're pu'u za'ra wa'aba mono da, te duré i'u'ẽne hã asiré 're ihuri aba mo. E tawamhã i'uwaibaba, te za tô dame 're i'manharĩ za'ra wa'aba mo, isazei'õ'wa norĩ siré 're asaihuri aba mono wamhã, wa'uburé norĩ ãma 're dawata za'ra mono da, dasa hã da te dasima 're 'manharĩ za'ra mono wamhã. E tô i'uwaibaba ãne hã aima za'ra wa'aba hã.

²² Ãne hã 're 'manharĩ za'ra wa'aba mono wamhã, Wanhib'apito hã te za asada 're hâimana za'ra wa'wa, i'upana wa'uburé norĩ ãma si 're aiwata za'ra wa'aba mono wa. Ãne zarina, wazada 're hâimana za'ra mono wamhã, e Wanhib'apito nhiptetezém nhipai u, wanhiptetezé hã wama 're hâimana za'ra mono bâ, wa za isimihâzé wi 're wawairébé. Mare di. Tiwi 're wawairébé waihu'u mono õ di za.

²³ Ni'wam norĩ hã asiré isazei'wa 're ihâimana za'ra mono norĩ hã, te ãne na te te sima 're nharĩ za'ra: “Marĩ hã wa te 're 'manharĩ za'ra mono tõ da, 'Re ihâimana u'âsi mono te te wawi 're awẽ'õ mono õ nherẽ, wa norĩ zama, wa te wasiwi 're wẽ'õ za'ra mono õ di za, wa te 're 'manharĩ za'ra mono tõ da. Wa za tô wa te 're 'manharĩ za'ra, wa te wasima 're iwẽ za'ra mono zéb uwaibaba si.” Ãne ma tô ni'wam norĩ hã te te sima 're waihu'u za'ra. Tane hã wẽ di tô. Tane nherẽ, marĩ hã 'Re ihâimana u'âsi mono te te wawi 're awẽ'õ mono õ nherẽ, ãté wa te 're 'manharĩ za'ra mono wa, wa za wasiré isazei'wa norĩ wi, wa te ãma 're 'wa'rutu za'ra. Tahawa, marĩ hã dazu wa te 're 'manharĩ za'ra mono õ di za, wasiré isazei'wa norĩ wi, wa te ãma 're 'wa'rutu tõ za'ra mono da. Duré wasiré isazei'wa norĩ hã, Cristuhu ãma si siptete sina 're nomro mono da, wa te 're ipawaptob za'ra mono da si, wa za tô uburé marĩ hã iwẽ si wa te 're 'manharĩ za'ra.

²⁴ 'Râwip si 're asipawaptob za'ra wa'aba mono da, asina 're rosa'rata za'ra wa'aba mono õ di za. Asiré isazei'wa norĩ hã 're pawaptob za'ra wa'aba mono da si, te za ta norĩ ãma 're irosa'rata u'âsi za'ra wa'aba mo.

²⁵ Romnhi hã da te dasima 're iwede za'ra mono zéb ãma, da te 're i'uipra za'ra mono hã, te za asina aihâtâ'â ãna 're ihuri aba mo, nima hawib zô 're asimnhasi za'ra wa'aba mono ãna. Romhâiba 'manharĩ ma, da te 're isõmri za'ra mono na, 're rosa'rata za'ra wa'aba mono ãna aipẽ'ẽ 're, ãma 're asiwẽ'õ za'ra wa'aba mono õ di za.

²⁶ 'Re ihâimana u'âsi mono zadawa 'mahârâ'wa hã ma tô ãne na ãma rob'ui'éré, duréihã: “Uburé ti'a hã Wanhib'apito te hã. Duré uburé marĩ hã ti'ai ãma 're ihâimana za'ra mono hã, Wanhib'apito te hã. Tahawa, uburé dasazé hã wẽ di, ãma 're iwasaihuri mono zéb da hã.”

²⁷ Isazei'õ'wa isiré ai'masai wa'aba da, asô 'maihârâ aba wamhã, te za tô isiré ai'masai wa'wa, asima 'maiwẽ wa'aba wamhã. Tawamhã uburé dasazé hã da te aima i'a za'ra wa'wa hã te za tô ihuri 'wa, nima hawi, da te 'mai'ãwisi zô, da'mazadanharĩ aba ãna, 'râwi aipẽ'ẽ 're, asiwi i'maiwẽ'õ aba zarina.

^28-29 Tane nherẽ, ãté ni'wa hã te za ãne na aima 'maiwaihu'u 'wa: “Ã hã dasazé hã romhâiba 'manharĩ ma, da te 're isõmri za'ra mono.” Ãne hã ni'wa te te aima wasu'u za'ra wa'aba wamhã, taha na ai'masai wa'aba õ di za. E 'râwi aipẽ'ẽ na asiwi 'maiwẽ'õ aba tõ da, wa ãne aima waihu'u za'ra wa'wa. Mare di. Taré dasa hã te te aima i'maiwasu'u wa'aba wi, rosa'rada hã si'wa'rutu tõ da, wa ãne na aima roti za'ra wa'wa, taha na asaihuri aba tõ da. E tawamhã, romnhi hã romhâiba 'manharĩ ma, da te 're isõmri za'ra mono na, wa za 're ĩsa, romhâiba 'manharĩ ãma dame 're ĩwata mono õ nherẽ. Ãne, wa 'râwi wa hã te ĩsima ãma 're rosa'rata u'âsi.

³⁰ 'Re ihâimana u'âsi mono hã sõpru wa, ãma 're wawata za'ra mono sina, wasa hã wa te 're huri mono wamhã, e i'uwaibaba te za ni'wa hã te te dama 're wawasu'u wasété za'ra, tô õ hã wa te 're ihuri mono na hã. Mare di. Taré te za ni'wa hã te te dama 're wawasu'u wasété za'ra, tô sena newa.

³¹ Ãne, wa za duré aima ãma 'rãsutu za'ra wa'wa, ã ĩnhimirowasu'u na hã. Uburé marĩ hã te za 're i'manharĩ wẽ u'âsi za'ra wa'aba mo, 're asaihuri aba mono wamhã, duré 're âhuri aba mono wamhã, duré marĩ aimawi hã 're 'manharĩ za'ra wa'aba mono wamhã, taha zarina si, 'Re ihâimana u'âsi mono ãma 're dawata za'ra mono da.

³² Marĩ hã 're 'manharĩ za'ra wa'aba mono õ di za oto, da te ãma 're ai'madâ'â za'ra wa'aba mono wa, dawasété u 're darere'e mono tõ da. Ãne hã dazada 're 'manharĩ za'ra wa'aba mono õ di za, zudeu norĩ da, duré zudeu'õ norĩ da, duré 'Re ihâimana u'âsi mono nhib'a'uwẽ 're ihâimana za'ra mono norĩ da.

³³ Wa hã bété. E niha dama 're ĩhâimana mono zé hã. Ãne si, wa tô te ĩsima 're da'awẽ, uburé marĩ hã te 're i'ab'manharĩ wẽ mono zém na, te ãma 're da'apawapto mono da. Ĩsima si, ãne na 're ĩhâimana mono õ di. Uburé, wa dama 're ĩhâimana, 'Re ihâimana u'âsi mono te te 're ida'anho'reptui mono zé hã da te dasina 're uwaimrami za'ra mono da, ĩnhimipawaptobzéb zarina.