प्रकास 1 - पश्चिम तामाङ1 चु छ्येःकी तम्मा येसु ख्रीस्ट्चे ङोन्जेत्पल य्हीन्ब। पर्मेस्वर्चे र्हङ्की योक्पोमात ग्योःनेनो तखस्येकी तम्मा ङोन्बरी येसुत चु जम्मनो तम्मा न्हङ्जेत्पल मुबल। येसुचे चु तम्मा स्येत्परी स्वर्गदुत् गीःत र्हङ्की योक्पो युहन्नाज पीत्जेत्ज्यी। 2 ङ युहन्ना र्हङ्चे म्रङ्बे जम्मनो तम्मा स्येत्पल मुब। पर्मेस्वर्चे ङत ङोन्जेत्पे फ्रोइतेङ् येसु ख्रीस्ट्चे ङत ङोन्जेत्पे देमेन्की तम्मा चुनो य्हीन्ब। 3 चु छ्येःकी अगम्बानीइ फ्रोइमा र्होत खेत्पीन्बलमा, ओसेम् ज्यनले ङ्येन्बतेङ् हुजु अनुसार् ब्रबलमा जम्मनो मोलम् यङ्बलमा य्हीन्ब। तलेपङ्सम् चु तम्मा ग्योनेनो तस्ये मुब। मन्डली ङ्यीस्त युहन्नाइ लस्सो 4 ङ युहन्ना ग्यम्से एसीया प्रदेस्री मुबे मन्डली ङ्यीस्त लस्सो: पर्मेस्वर् मुब, मुबल ओसेम् ब्योन्खजेत्टीब, ओसेम् थेङ्की ठीइ ङोन्री मुबे आत्मा ङ्यीस् ग्यम्से एङ्यीमात अनुग्रहतेङ् सान्ती तखइ। 5 बीस्वास्योग्य साक्षी ओसेम् स्यीब ग्यम्से सोबलमान्हङ्री जम्मन्हङ्री ङोन्ग्यम् सोजेत्पल, ओसेम् जम्बुलीङ्की ग्यल्बोमाकी ग्यल्बो येसु ख्रीस्ट् ग्यम्से एङ्यीमात अनुग्रहतेङ् सान्ती। येसु ख्रीस्ट्चे ङ्य्हङ्मात म्होइजेत्प ओसेम् र्हङ्की काचे ङ्य्हङ्मात ङ्य्हङ्माकी पाप्मा ग्यम्से फेःपीन्जेत्पल मुब। 6 थेङ्चे ङ्य्हङ्मात र्हङ्की पर्मेस्वर् अपइ य्हुल्री सेवा स्य्हेङ्बरी लम्बुइ अधीकार् न्हङ्जेत्पल मुब। थेङ्तनो महीमातेङ् सक्ती खेमपङ्लेनो तस्यीनोटीखइ! आमेन्। 7 च्यागो, थेङ् मुक्पन्हङ् ब्योन्खजेत्टीब मुब, ओसेम् जम्मइ मीःचेनो थेङ्त म्रङ्स्ये मुब, थेङ्त ब्लोःबलमाचेएनो म्रङ्स्ये मुब। ओसेम् थेङ्चे लज्यीम् जम्बुलीङ्की जम्मनो जातीमाचे दुख म्हन्दीस्ये मुब। चोतेब तस्येनो मुब। आमेन्। 8 “ङनो अल्फातेङ् ओमेगा य्हीन्ब” बी गोदोब्न्हङ्की सक्तीसाली परमप्रभु पर्मेस्वर्चे सुङ्जेत्प- थेङ् मुब, मुबल ओसेम् ब्योन्खजेत्टीब। युहन्नाचे ख्रीस्ट्त दर्सन्री म्रङ्बल 9 ङ ख्रीस्ट्री एङ्यीमाकी अज्यो युहन्ना य्हीन्ब। ओसेम् येसुत बीस्वास् स्य्हेङ्बल तज्यीम् एङ्यीमातेङ् बक्च्य ङचेएनो नाज्यीम् दुख नाटीबल मुब, हुजु दुखमी पर्मेस्वर्की य्हुल्री मुबलमात खब। पर्मेस्वर्की फ्रोइतेङ् येसु ख्रीस्ट्की बारेरी स्येत्पल तज्यीम् ङत म्हीमाचे पत्मोस् पङ्बे टापुरी च्युप्ज्यीम् थेन्बल मुबल। 10 प्रभुइ दीन्री ङ पबीत्र आत्माचे प्लीङ्बल मुबल, ओसेम् तुरहील र्हङ्बे ङ्हच्छ्यङ् केत् गीः ङइ ग्यप्चे थेःज्यी। 11 हुजु केत्चे चोले पङ्ज्यी, “एचे तात म्रङ्ब हुजु छ्येः गीःरी ब्रीज्यीम् एफीसस्, स्मुर्ना, पर्गामम, थीआटीरा, सार्डीस्, फीलाडेल्फीया ओसेम् लाउडीकीया पङ्बे सहर्माकी मन्डलीमा ङ्यीस्तनो पीतो।” 12 ङतेङ् तम् पङ्बल खल बी ङचे ग्यप् दोःज्यीम् च्याज्यी, ओसेम् ङचे म्हर्की साम्दान् ङ्यीस्त म्रङ्ज्यी। 13 ओसेम् साम्दानमाकी गुङ्री कङ् सम्मा दोःबे न्हम्ज येन्बलतेङ् कुत्तोरी म्हर्की पेटी खीःबे “म्हीइ ज” र्हङ्बे म्ही गीःत ङचे म्रङ्ज्यी। 14 थेङ्की क्रइ क्रबा पेइ वुइ ग्लीङ् र्हङ्बे तर् मुबल, ओसेम् थेङ्की मीः मेइ ल्हम् र्हङ्ले लुम्बल मुबल। 15 थेङ्की स्य्हब्मा मेरी ख्रङ्ज्यीम् सर्नलबे कास र्हङ्ले सर्बल मुबल, ओसेम् थेङ्की केत्मी ङ्हच्छ्यङ् स्योङ् ङ्य्हब र्हङ्ब मुबल। 16 थेङ्की केत् फ्याचे सार् ङ्यीस्त चुङ्जेत्टीपल मुबल, ओसेम् थेङ्की स्य्हल् ग्यम्से पट्टी ङ्य्हीनो छ्यर्पे स मुबे तर्वार् डोङ्बल मुबल। थेङ्की लीःमी दीन् गुङ्की दीनी र्हङ्ले वक्वक्ले सर्बल मुबल। 17 ङचे थेङ्त होले म्रङ्मम् ङ स्यीब र्हङ्बनो तज्यीम् थेङ्की स्य्हब्की दुङ्री गुर्य्हर्ज्यी। तर थेङ्चे र्हङ्की केत् फ्या ङइ जोरी थेन्जेत्ज्यीम् ङत चोले सुङ्ज्यी, “थलोङो, तीप्पतेङ् ज्युः ङनो य्हीन्ब। 18 ओसेम् सोम्बोमी ङनो य्हीन्ब। ङ स्यीबल मुबल, तर च्यागो, देरेम् ङ खेमपङ्लेनोइ लागीरी सोबल मुब। ओसेम् स्यीबतेङ् स्यीबे म्हीमाकी आत्मामा टीबे ग्लाकी साचोमा ङतेङ् मुब। 19 होत्तज्यीम् एचे ता म्रङ्बल मुब, देरे ता तटीबल मुब ओसेम् लीक्यम् ता तस्ये मुब हुजु तम्मा ब्रीउ। 20 एचे ङइ केत्की यारी म्रङ्बे सार् ङ्यीस्की रहस्यतेङ् एचे म्रङ्बे म्हर्की साम्दान् ङ्यीस्की र्हस्यमी चु य्हीन्ब: सार् ङ्यीस् मन्डली ङ्यीस्की स्य्हप्तो स्य्हेङ्बे स्वर्गदुत्मा य्हीन्ब, ओसेम् साम्दान् ङ्यीस्मी मन्डलीमा ङ्यीस् य्हीन्ब।” |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.