यहुदा 1 - पश्चिम तामाङ1 ङ यहुदा, येसु ख्रीस्ट्की योक्पो ओसेम् याकुबकी अले ग्यम्से, पर्मेस्वर् अपचे ङ्होत्जेत्पलमा ओसेम् पर्मेस्वर् अपइ म्होइबरी टीबलमातेङ् येसु ख्रीस्ट्री जोगइतीजेत्पलमात चु चीठी ब्रीटीब मुब। 2 पर्मेस्वर्चे एङ्यीमात य्हक्को कृपा, सान्ती ओसेम् म्होइब न्हङ्खइ। भ्युकी बीस्वास्की तम् लोप्पे लोप्पोन्मा 3 म्होइबे र्होमा, ङ्य्हङ्मा जम्मचेनो यङ्बे मुक्तीइ बारेरी एङ्यीमात ब्रीबरी ङत य्हक्को सेम् तज्यी, तर देरेम् खेम पङ्लेनोइ लागीरी तीख्यप् पर्मेस्वर्चे र्हङ्की पबीत्र म्हीमात न्हङ्जेत्पे बीस्वासत जोगइतीउ बी एङ्यीमात आर् पीन्बरी ब्रीनोथोब बी म्हेन्ज्यी। 4 तलेपङ्सम् पर्मेस्वर्त म्हन्अदीबे डेत्डेत् म्हीमा एङ्यीमाकी गुङ्री खुसुक्ले वङ्ज्यीन्बल मुब। ओसेम् पर्मेस्वर्चे न्हङ्जेत्पे अनुग्रहत थेङ्यीमाचे अज्यबे लक् स्य्हेङ्बरी कोल्पुङो पङ्ब, ओसेम् येसु ख्रीस्ट्त गीःकीनो मुबे ङ्य्हङ्की मालीक्तेङ प्रभु य्हीन्ब पङ्ज्यीम्एनो म्हन्अदी। होतेबे म्हीमा दोसी ठार्तीब बी दङ्बोनो धर्म छ्येःरी ब्रीबल मुबल। 5 एङ्यीमाचे चु तम् ङोन्नो स्येःबल मुलेएनो ङ देबेएनो व्हल् लपीन्ब की प्रभुचे र्हङ्की म्हीमात मीस्र ग्यम्से तेत्बजेत्ज्यी, तर बीस्वास् अस्य्हेङ्बलमात लीक्यम् नास् स्य्हेङ्जेत्ज्यी। 6 र्हङ्की अधीकार न्हङ्री अटीनले र्हङ् टीबे ग्ला ख्लेथेन्ज्यीम् ब्रबे स्वर्गदुत्मात थेङ्चे न्यायकी ङ्हच्छ्यङ् दीन्की लागीरी म्हुन्दुङ्न्हङरी खेमेएनो अस्योर्नले खीःज्यीम् थेन्जेत्पल मुब। 7 होलेनो सदोम्तेङ् गमोरा ओसेम् हुजु सहर् ङ्य्हीकी ज्यतङ्की सहर्की म्हीमाचे जम्मनो ब्यभीचार्तेङ् अपमाचे अपमातेङ्नो ब्रबे लक्मा स्य्हेङ्ज्यी, ओसेम् थेङ्यीमा खेमेएनो अस्यीबे मेइ दन्ड यङ्बलमाकी नमुन तज्यी। 8 होलेनो चु भ्युकी तम् लोप्पे लोप्पोन्माचे म्रङ्बे म्हङ्चे लज्यीम् र्हङ्की ल्हीःत असुद्द तनलब, थेङ्यीमाचे प्रभुइ अधीकार्त अङ्येन्ब, ओसेम् स्वर्गइ स्वर्गदुत्माकी नीन्द स्य्हेङ्ब। 9 तर ङ्हच्छ्यङ् स्वर्गदुत मीखाएलचेएनो मोसाइ स्यीबे ल्हीःकी बारेरी सैतान्तेङ् तम् ज्योप्पे बेलोरी सैतान्त नीन्द लज्यीम् दोस् पीन्बे आर् अल, तर थेचे “प्रभुचे एत बराजेत्खइ” बी पङ्ज्यी। 10 तर चु म्हीमाचे र्हङ्चे गोनो अगोबे तम्माल नीन्द स्य्हेङ्ब ओसेम् थेङ्यीमाकी गोबे सक्तीमी लो अरेबे सेम्ज्येन्माल र्हङ्ब तब, ओसेम् थेङ्यीमा हुजुचेनो नास् तब 11 धीक्कार थेङ्यीमात! थेङ्यीमा कयीनकी ग्यम्री ब्रज्यी। टङइ लागीरी बालाम्चे स्य्हेङ्बे अज्यबे लक्की ग्यम्री ब्रज्यी। ओसेम् थेङ्यीमाचे कोरहचे र्हङ्ले बीरोद् लज्यी, ओसेम् थेङ्यीमा हुजु र्हङ्ले नास् तब। 12 चु म्हीमा एङ्यीमाचे मन्डलीरी चबे डोन्की कलङ्क य्हीन्ब। तलेपङ्सम् थेङ्यीमा ल्हो-ल्होत तइ वास्त अस्य्हेङ्नले र्हङ्की फो म्रेन्न लब। थेङ्यीमा लाबचे नाज्यीम् बोर्बे नम् अरेबे मुक्प र्हङ्ब मुब। थेङ्यीमा रोःरो रो:बे बेलोरीएनो रो:रो अरोबे टा य्हङ्सेनो ओर्लाबे खर्य्हर्ज्यीम स्यीबे दोङ्बो र्हङ्ब मुब। 13 थेङ्यीमा सुमुन्द्ररी रेःबे अज्यबे लोङ्बे छाल् र्हङ्ब मुब, ओसेम् र्हङ्की नेइबे तम् समुन्द्रइ कोप्स्यो र्हङ्ले ङोन्ब। थेङ्यीमा कोर्ज्यीम् ब्रबे मुइ सार् र्हङ्ब मुब, थेङ्यीमाकी लागीरी खेम बीबीनोइ लागीरी लोङ्बे म्हुन्दुङ् ग्ला थेन्बल मुब। 14 आदम य्हङ्से पुस्त ङ्यीस्की म्ही हनोकचे चु म्हीमाकी बारेरी चोतेबे अगम्बानी पङ्बल मुबल, “च्याको, ज्याज्यीम् ज्याब अखम्बे र्हङ्की पबीत्र दुत्मातेङ् बक्च्य प्रभु ब्योन्युजेत्स्ये मुब। 15 थेङ्चे जम्मनो म्हीमाकी न्याय स्य्हेङ्जेत्स्ये मुब। ओसेम् पर्मेस्वर्त अतङ्बे दुस्ट लक्मा स्य्हेङ्बलमातेङ् थेङ्की बीरुद्दरी तम् पङ्बलमा जम्मतनो सजाय न्हङ्जेत्स्ये मुब।” 16 चु म्हीमा खेमेएनो सन्तोक् अत, खेम पङ्लेनो ल्हो-ल्होइ दोस् ङोन्ब ओसेम् र्हङ्की अज्यबे सेम् अनुसार् ब्रब, र्हङ्चे र्हङ्त घमन्ड लबलमा ओसेम् र्हङकी लक् स्य्हेङ्बे लागीरी ल्हो-ल्होत छ्युगु फोर्ब। बीस्वास्री कोङ्ज्यीम् टीबे बारेरी 17 तर म्होइबे र्होमा, ङ्य्हङ्की प्रभु येसु ख्रीस्ट्की प्रेरीतमाचे ङोन्नो पङ्बे तम्मात एङ्यीमाचे व्हल् लउ। 18 थेङ्यीमाचे पङ्बल मुबल, “ज्युकी बेलोरी पर्मेस्वर्त अम्हन्तीज्यीम् र्हङ्की अज्यबे सेम्चे म्हेन्ब र्हङ्ले ब्रज्यीम् खीसी लबे म्हीमा तस्ये मुब।” 19 एङ्यीमात थीनलबे म्हीमा चुमानो य्हीन्ब। थेङ्यीमाचे र्हङ्की सेम्चे ता स्य्हेङ्गे म्हेन्ज्यी हुजु स्य्हेङ्ब, ओसेम् थेङ्यीमातेङ् पर्मेस्वर्की आत्मा अत। 20 तर म्होइबे र्होमा, एङ्यीमा र्हङ्की य्हक्को पबीत्र बीस्वास्री बङ्ज्येन् तज्यीम् कोङ्स्यीनो बोरो, ओसेम् पबीत्र आत्माइ सक्तीरी प्रार्थना स्य्हेङो। 21 ओसेम् खेमेएनो अबेबे जीवन्की लागीरी ङ्य्हङ्की प्रभु येसु ख्रीस्ट्की क्रीपा ब्रेन्ज्यीम् टीबतेङ् एङ्यीमाचे र्हङ्चे र्हङ्त पर्मेस्वर्की म्होइबरी थेनो। 22 सङ्क स्य्हेङ्बलमात क्रीपा ङोनो। 23 ल्हो-ल्होमात नर्कइ मेन्हङ् दोःब ग्यम्से थर्न लउ। ल्हो-ल्होमात होसीयार्ले क्रीपा ङोनो, तर पापचे न्होङ्बे थेङ्यीमाकी ब्यबहार्मात हेल लउ। 24 देरेम् पर्मेस्वर्चे एङ्यीमात पाप्री दोःब ग्यम्से जोगइतीब खम्जेत्प, ओसेम् थेङ्चे एङ्यीमात तइ दागएनो अरेनले य्हक्को तङ्नलजेत्ज्यीम् र्हङ्की महीमारी नोम्जेत्प। 25 ङ्य्हङ्की प्रभु येसु ख्रीस्ट् ग्यम्से ङ्य्हङ्मात मुक्ती न्हङ्बे गीःकीनो पर्मेस्वर्त जम्मनो महीमा, स्हेस, सक्तीतेङ् अधीकार् ठुङ्ब य्हङ्से देरे ओसेम् ज्यु: सम्म खेम पङ्लेनो तखइ। आमेन्। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.