प्रेरीत् 22 - पश्चिम तामाङ1 “अज्यो-अलेमातेङ् अपमा, देरेम् थेङ्माकी ङोन्री ङचे र्हङ्की लागीरी पङ्थोबे तम् ङ्येन्जेतो।” 2 पावलचे हीब्रु ग्योत्री तम् पङ्बल थ्येःब बीसेम् म्हीमा जम्मनो कुटीले टीज्यी। 3 पावलचे पङ्ज्यी, ङ कीलीकीया प्रदेस्की टार्सस सहर्री न्हबे यहुदी य्हीन्ब। तर ङ यरुसलेम सहर्री लोप्पोन् गमलीयलचे लोप्ज्यीम् छर्ज्यी। दङ्बो ङ्य्हङ्की म्हेमेमा य्हङ्से म्हन्दीज्यीम् खबे ङ्य्हङ्की पेठीम्मातेङ् नीयम्मा ङचे ज्यनले लोप्पल मुब। तीङ्यी एङ्यीमाचे पर्मेस्वर्त तङज्यीम् गदे म्हन्दीज्यी ङचेएनो होदेनो तङज्यीम् म्हन्दीबल मुब। 4 ङचे चु मुक्ती यङ्बे ग्यम्री ब्रबे म्हीमात स्यीब सम्मनो दुख पीन्बल मुबल। ङचे अपकोलमातेङ् अमकोलमात चुङ्ज्यीम् जेल्री च्युप्न लबल मुबल। 5 गोदोब्न्हङ्की ङ्हच्छ्यङ् लम्बुतेङ् जम्म सभाचेएनो चु लक् ङचे स्य्हेङ्बल य्हीन्ब बी पङ्ब खम्ब। ङत एङ्यीमाचेनो दमस्कस्री मुबे यहुदी अज्यो-अलेमाकी मीन्री पत्र न्हङ्ज्यी। ओसेम् अधीकार् यङ्ज्यीम् हुजु ग्लाकी बीस्वासीमात चुङ्ज्यीम् खीःज्यीम् यरुसलेमरी बज्यीम् सजाय पीन्बरी ङ दमस्कस्री ङ्यीबल मुबल। पावलचे र्हङ् परीवर्तन तबे बारेरी स्येत्पल ( प्रेरीत् ९:१-१९ ; २६:१२-१८ ) 6 “ङ दमस्कसक्योर् दोःय्हम्बे बेलोरी दीन् गुङ् तबल मुबल। हुजु बेलोरीनो मु ग्यम्से य्हक्को सर्बे य्हल् ङइ कोरोरो सर्ज्यी। 7 ओसेम् ङ सरी गुर्ज्यी, हुजु बेलोरी ङचे चोले पङ्बे केत् थ्येःज्यी, ‘ओ साउल, साउल, ङत एचे तले दुख पीन्टीब?’ 8 ओसेम् ङचे ङ्योत्ज्यी, ‘प्रभु, थेङ् खल य्हीन्ब?’ ओसेम् थेङ्चे, ‘ङ एचे य्हक्को दुख पीन्टीबे नासरतकी येसु य्हीन्ब’ बी सुङ्ज्यी। 9 ओसेम् ङतेङ् बक्च्य मुबे म्हीमाचे य्हल्तम् म्रङ्ज्यी, तर थेङ्यीमाचे ङतेङ् तम् सुङ्टीबे केत्मी अथ्ये। 10 ओसेम् ङचे, ‘प्रभु, देरेम् ङ ता लब?’ बी पङ्ज्यी। ओसेम् प्रभुचे ङत सुङ्ज्यी, ‘रेःज्यीम् दमस्कस सहर्री ङ्यीउ, एचे स्य्हेङ्थोबे लक्माकी बारेरी हुजुरी एत स्येत्स्ये मुब।’ 11 हुजु य्हल्चे तज्यीम् ङइ मीःचे तएनो म्रङ्ब अखम्। होत्तज्यीम् ङतेङ् मुबे र्होमाचे ङत सेज्यीम् दमस्कस्री बोर्ज्यी। 12 “हुजु सहर्री हननीया मीन् मुबे म्ही गीः टीब मुबल। थे मोसाचे ब्रीबे पर्मेस्वर्की नीयम् अनुसार ब्रबे धर्मी म्ही मुबल। ओसेम् दमस्कस्री टीबे यहुदीमा जम्मचेनो थेत स्हेस स्य्हेङ्ब मुबल। 13 ओसेम् हुजु म्ही ङइज खज्यीम् ङइ रेइरी रप्ज्यीम् पङ्ज्यी, ‘अले साउल, एइ मीः देबेएनो म्रङ्ब खमो।’ ओसेम् थेचे होले पङ्ब साच्चेनो ङइ मीः म्रङ्ज्यी। 14 हुजु लीप्चे थेचे ङत पङ्ज्यी, ‘एचे ङ्य्हङ्की म्हेमेकी पर्मेस्वर्की थुः स्येःब खम्खइ, ओसेम् हुजु धर्मी म्हीत म्रङबरीतेङ् थेङ्की स्य्हल् ग्यम्से सुङ्बे फ्रोइत ङ्येन्बरी थेङ्चे एत दम्जेत्पल मुब। 15 तलेपङ्सम् एचे थेङ्की बारेरी म्रङ्बतेङ् थ्येःबे तम्मा जम्म म्हीमाकी ङोन्री स्येत्थोस्ये मुब। 16 होत्तज्यीम् देरेम् तले ब्रेन्ब? रेःज्यीम् बप्तीस्मा कीनो ओसेम् प्रभुइ छेन्री र्हङ्की पापमा ख्रुउ।’ 17 “हुजु लीप्चे ङ यरुसलेमरी दोःज्यीम् खज्यी, ओसेम् पर्मेस्वर्की दीम्री प्रार्थना स्य्हेङ्टीबे बेलोरी ङचे दर्सन म्रङ्ज्यी। 18 ओसेम् थेङ्चे ङत चोले सुङ्टीबल म्रङ्ज्यी, ‘ग्योन्-ग्योन्नो यरुसलेमसे डोङो, तलेपङ्सम् चु ग्लाकी म्हीमाचे एचे ङइ बारेरी स्येत्पे तम् ङ्येन्स्ये अरे।’ 19 ओसेम् ङचे पङ्ज्यी, ‘प्रभु, ङचे जम्म यहुदीमा र्हुब् तबे दीम्मारी ङ्यीज्यीम् थेङ्त बीस्वास् स्य्हेङ्बलमात जेल्री युबतेङ् तोब-ग्यङ्ब स्य्हेङ्बल थेङ्यीमात था मुब। 20 ओसेम् थेङ्की साक्षी स्तीफनस्त का य्हर्नलज्यीम् सेत्पे बेलोरी ङएनो डीःबल मुबल। हुजुरी ङ थेत सेत्पलमाकी ग्यामा रुङ्ज्यीम् टीटीब मुबल।’ 21 तर प्रभुचे ङत सुङ्ज्यी, ‘ए ङ्यीउ, ङ एत थारीङ्-थारीङ् सम्मनो यहुदी अय्हीन्बे म्हीमाज पीत्स्ये मुब।’” 22 थेङ्यीमाचे पावलकी तम् चोदे सम्मकीनो ङ्येन्ज्यी, हुजु लीप्चे थेङ्यीमा चोले पङ्ज्यीम् बङ्ले क्रीङ्ब तीप्ज्यी, “चोतेबे म्हीत जम्बुलीङ् ग्यम्सेनो ख्लाथोःब, तलेपङ्सम् थे सोबरी जेःबल अरे।” 23 चोले थेङ्यीमाचे र्हङ्-र्हङ्की ग्या प्लोक्ज्यीम् ख्लाज्यी, ओसेम् बुप्फ्र नम्तीङ् ख्लाज्यीम् क्रीङ्ज्यी। 24 चु म्रङ्ब बीसेम् रोमी सेनपतीचे “पावलत न्हङ्री बोर्ज्यीम् कोर्रचे ग्यङो, तलेपङ्सम् थेत कोर्रचे ग्यङ्बतेङ् यहुदीमा तले बोमो लबल बी थेचे स्येत्मुव” पङ्ज्यीम् कुल्ज्यी। 25 तर स्यीपाइमाचे पावलत कोर्रचे ग्यङ्बरी खीःबे बेलोरी पावलचे रेइरी रप्टीबे कप्तान्त पङ्ज्यी, “रोमी म्हीत तइ दोस् अय्हङ्ननो कोर्रचे ग्यङ्म्यङ्ब? रोमी नीयम्चे चोलेनो स्य्हेङो पङ्बल मुब?” 26 कप्तान्चे चु थ्येःब बीसेम् सेनपती मुबे ग्लारी खज्यीम् चोले पङ्ज्यी, “थेङ्चे चु ता स्य्हेङ्ब म्हइजेत्पल? तलेपङ्सम् चु म्हीम् रोमी म्हीक टीम्।” 27 होत्तज्यीम् सेनपतीचे न्हङ्री वङ्ज्यीम् पावलत ङ्योत्ज्यी, “ङत पङो, ए देमेन्नो रोमी म्ही य्हीन्ब?” पावलचे, “य्हीन्ब” बी पङ्ज्यी। 28 सेनपतीचे पङ्ज्यी, “ङम् य्हक्को टङ फाज्यीम् रोमी म्ही तबल य्हीन्ब।” पावलचे पङ्ज्यी, “तर ङम् न्हब य्हङ्सेनो रोमी म्ही य्हीन्ब।” 29 चु थ्येःब साच्चेनो पावलत ङ्योत्प थी:ब स्य्हेङ्बे म्हीमा ग्यप्चे सार्तीज्यी। ओसेम् पावल रोमी म्ही य्हीन्ब टीम् बी स्येःज्यीम् सेनपतीएनो लोङ्ज्यी। तलेपङ्सम् थेचे पावलत खीःबल मुबल। यहुदी ङ्हच्छ्यङ् सभाकी ङोन्री पावल 30 तर यहुदीमाचे पावलत तले दोस् ल्हइतीबल टीम् बी स्येःबे सेम् सेनपतील मुबल। होत्तज्यीम् न्हम्स्य्होर्हङ् जम्म ङ्हच्छ्यङ् लम्बुमातेङ् ङ्हच्छ्यङ् सभाकी जम्म सदस्यमात ङ्हच्छ्यङ् सभारी र्हुब् तउ बी कुल्ज्यी। ओसेम् पावलत बज्यीम् थेङ्यीमाकी ङोन्री रप्पुङ्ज्यी। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.