२ थेस्लोनीकी 1 - पश्चिम तामाङ1 ङ पावल ओसेम् सीलासतेङ् तीमोथी ग्यम्से पर्मेस्वर् अप ओसेम् प्रभु येसु ख्रीस्ट्री थेस्लोनीकीइ मन्डलीमात, 2 पर्मेस्वर् अप ओसेम् प्रभु येसु ख्रीस्ट् ग्यम्से एङ्यीमा अनुग्रहतेङ् सान्ती। व्होर्छ्येतेङ् प्रार्थना 3 र्होमा, एङ्यीमाकी बीस्वास् य्हक्को तबोर्टीबल मुब। ओसेम् एङ्यीमाचे गीःचे गीःत झेन् य्हक्को म्होइस्यीनो टीबोर्बल मुब। होत्तज्यीम् एङ्यीमाकी लागीरी ङ्यीमाचे पर्मेस्वर्त खेम पङ्लेनो व्होर्छ्ये पीन्थोब। 4 ओसेम् एङ्यीमात म्हीमाचे पीन्बे दुखमा ओसेम् दुखमा नाज्यीमएनो एङ्यीमा र्हङ्की बीस्वास्री कोङ्नले टीबे तम्की बारेरी पर्मेस्वर्की मन्डलीमाकी गुङ्री ङ्यीमाचे न गङ् लज्यीम् स्येत्प। 5 पर्मेस्वर्चे जम्मनो म्हीमात ठीक् न्याय स्य्हेङ्जेत्प बी चु जम्मनो तम्माचे ङोन्ब। एङ्यीमाचे चु जम्मनो तम्मा नाटीबल तज्यीम् एङ्यीमा पर्मेस्वर्की य्हुल्री टीबरी जेःब बी थेङ्चे सुङ्स्ये मुब, तलेपङ्सम् हुजु य्हुल्की लागीरी एङ्यीमाचे य्हक्को दुख नाटीब। 6 पर्मेस्वर्चे ठीक् न्याय स्य्हेङ्जेत्प, होत्तज्यीम् थेङ्चे एङ्यीमात दुख पीन्बलमात दुख न्हङ्जेत्स्ये मुब। 7 प्रभु येसु सक्तीसाली स्वर्गदुत्मातेङ् बक्च्य मे ल्हम्तेङ् स्वर्ग ग्यम्से ब्योन्युजेत्पे बेलोरी थेङ्चे एङ्यी दुख यङ्बलमातेङ् ङ्यीमात हुजु दुख ग्यम्से फेःपीन्जेत्स्ये मुब। 8 ओसेम् पर्मेस्वर्त अस्येबलमातेङ् ङ्य्हङ्की प्रभु येसुइ ज्यबे सम्तर्त अङ्येन्बलमात थेङ्चे सजाय न्हङ्जेत्स्ये मुब। 9 थेङ्यीमाचे प्रभुइ सक्तीसाली य्हल्तेङ् सङ्गती ग्यम्से फेःज्यीम् जुक्नो नास् तबे सजाय नास्ये मुब। 10 चु तम्मा प्रभु येसु ब्योन्युजेत्पे दीन्री तब। हुजु दीन्री प्रभु येसुचे र्हङ्की पबीत्र म्हीमा ग्यम्से स्य्हेस ओसेम् बीस्वासीमा ग्यम्से तोप्प यङ्जेत्स्ये मुब। एङ्यीमाएनो थेङ्यीमातेङ् तस्ये मुब, तलेपङ्सम् एङ्यीमाचे ङ्यीमाचे स्येत्पे सम्तर्त पतइतीज्यी। 11 होत्तज्यीम् पर्मेस्वर्चे ङ्होत्जेत्पे जीवन्की लागीरी एङ्यीमात थेङ्चेनो जेःबल स्य्हेङ्जेत्खइ, ओसेम् थेङ्की सक्तीचे एङ्यीमात ज्यबे लक् स्य्हेङ्बतेङ् बीस्वासकी लक् टोप्ले स्य्हेङ्बरी र्हो स्य्हेङ्जेत्खइ पङ्ज्यीम् एङ्यीमाकी लागीरी प्रार्थना स्य्हेङ्स्यीनो टीब। 12 चोले एङ्यीमा ग्यम्से ङ्य्हङ्की प्रभु येसुइ छेन्की स्य्हेस तस्ये मुब, ओसेम् थेङ् ग्यम्सेएनो एङ्यीमाचे स्य्हेस यङ्स्ये मुब, तलेपङ्सम् एङ्यीमाचे पर्मेस्वर् अपतेङ् प्रभु येसु ख्रीस्ट् ग्यम्से अनुग्रह यङ्बल मुब। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.